Santiago, 8 de marzo de 2022.- O deputado do Grupo Popular José Manuel Balseiro acusou hoxe ao BNG no Pleno de Parlamento galego de intentar “branquear a súa mala conciencia coa declaración do 10 de marzo como Día da clase obreira galega logo de boicotear unha declaración institucional proposta por Comisións Obreiras en apoio e recoñecemento dos feitos que aconteceran nesa data tráxica de 1972 en Ferrol”.

José Manuel Balseiro recoñeceu que esa data “é unha referencia explícita que se pode enmarcar na loita democrática da sociedade civil contra a ditadura”. “Podemos e debemos facer un esforzo por aprender da historia, porque un pobo que esquece a súa historia está condenado a repetila, e ninguén quere repetir nada de todo aquilo, máis ben ao contrario, a democracia foi conquistada por todos”.

ACORDO PARLAMENTARIO PLENAMENTE VIXENTE

Na súa intervención, Balseiro afirmou que o acordo adoptado polo Parlamento galego en apoio e conmemoración do acontecido o 10 de marzo de 1972 está “plenamente vixente, polo que non quixéramos que a iniciativa do BNG contribuíra a desvirtualo”.

“Non imos branquear a mala conciencia do BNG ao vetar a declaración institucional proposta por Comisións Obreiras a todos os grupos parlamentarios para conmemorar este ano o 50 aniversario daquel 10 de marzo”, sinalou o deputado popular, quen explicou que CC.OO “non buscaba máis que o xusto protagonismo que lle da a historia, cando non está terxiversada, xa que a declaración só era unha homenaxe á loita daquel día e unha maneira de lembrar os tráxicos sucesos”.

Ademais, José Manuel Balseiro criticou que o BNG “está obsesionado con levantar muros e diferenzas entre os galegos, reclamando a oficialización do Día da clase obreira galega, en contraposición co primeiro de maio, celebrado en 80 países como data de consenso para ese día mundial”.

“Os dereitos e intereses dos traballadores galegos non se defenden con slogans, senón con feitos, nin converténdose en meras marionetas do sindicato nacionalista irmán, senón con políticas activas de emprgo como as que está a levar adiante a Xunta para incrementar as oportunidades laborais dos galegos e as galegas”, dixo o deputado popular.