Santiago, 8 de maio de 2018. O portavoz de Infraestruturas do Grupo Popular, Martín Fernández Prado, acusou hoxe no Parlamento a En Marea de “intentar crear unha realidade paralela” respecto do acordo asinado entre a Xunta e o Ministerio de Fomento sobre os terreos do porto de A Coruña. Neste sentido, reiterou a solicitude para que o Concello “se sume ao protocolo e non quede á marxe da cidade” e asegurou que “calquera alcalde estaría contento de que a Xunta poña 20 millóns de euros no seu concello para o porto, que neste caso non son 20 senón 40 millóns porque tampouco queren os 10 millóns da intermodal, nin os 5,5 para vivendas sociais no Ofimático ou outros 5 millóns para o centro de saúde de Santa Lucía”.

Martín Fernández afirmou que o acordo asinado polo Presidente da Xunta e o Ministro de Fomento “responde ao que se pediu o Pleno municipal de A Coruña nunha moción aprobada”. En concreto, explicou que este acordo “evita a poxa da Solana, Batería e Calvo Sotelo; céntrase só en garantir que o solo queda de titularidade pública; e non fala para nada de usos nin se mete en competencias do Concello”.

Neste sentido, matizou que “o que se asinou foi un protocolo ao que se lle anexará un convenio, que aínda non está pechado e para o que o Presidente da Xunta tendeulle a man tanto ao Concello como á Deputación Provincial”.

0 99% DOS CORUÑESES, CONTENTOS CO ACORDO

“O 99 por cento dos cidadáns de A Coruña están contentos con este acordo sobre os terreos do porto porque da solución un problema que o alcalde Ferreiro non soubo arranxar”, asegurou o portavoz popular, quen puxo de manifesto que “hai dous modelos de xestión: o de Feijóo, con solucións, accións, diálogo, defensa do interese xeral e cartos sobre a mesa; e o de Ferreiro, de palabrería, inmobilismo, confrontación e partidismo”.

Por último, Fernández Prado criticou que En Marea pida no Parlamento que “se anule un acordo no que o Ministerio de Fomento se compromete a pagar 140 millóns de euros para financiar a totalidade do acceso ferroviario ao porto exterior de Punta Langosteira, sen que a Autoridade Portuaria de A Coruña teña que poñer un só euro, co compromiso de que este investimento se licite no primeiro semestre de 2019”.