Tellado reclama unha normativa que regule uns servizos mínimos financeiros en entornos non urbanos e a implicación de todas as administracións
O secretario xeral dos populares galegos, Miguel Tellado, avanzou que o PPdeG demandará un plan estatal para combater o peche de oficinas bancarias nos concellos menos poboados de España, unha normativa que regule uns servizos mínimos financeiros para os entornos non urbanos.
Nese senso, insistiu en que se debe chegar a acordos que eviten a exclusión financeira de boa parte do territorio do noso país, unha problemática para a que hai que atopar solucións nacionais que impliquen a todas as administracións sen importar as cores políticas, pois “non estamos ante un problema único de Galicia, senón de toda a España non urbana”.
O número dous do PPdeG, que compareceu en rolda de prensa co vicepresidente primeiro da FEGAMP e alcalde de Cervo, Alfonso Villares, recoñeceu que esta realidade é preocupante en Galicia, especialmente polo seu impacto negativo no desenvolvemento do noso rural. De feito, lembrou que a Xunta foi das primeiras administracións en abordar esta problemática, pero as medidas non son suficientes por si soas.
A NECESARIA IMPLICACIÓN DO GOBERNO CENTRAL
Tellado resaltou a necesidade de contar co Goberno central para abordar unha situación que se arrastra desde 2008 e que empeorou pola forte reestruturación que está a vivir o sector financeiro na última década.
“O Estado ten que implicarse directamente”, aseverou explicando que é preciso que se ofrezan incentivos e espazos municipais para facilitar a instalación de caixeiros, que se elabore un estudo detallado sobre a situación real de exclusión financeira -especialmente en zonas rurais e remotas-, un plan de desenvolvemento e despregue de redes de caixeiros multientidade, así como programas de formación no medio rural que permitan aos seus habitantes -especialmente aos nosos maiores- familiarizarse cos servizos de banca electrónica.
Durante a súa intervención, o secretario xeral fixo fincapé en que a exclusión financeira é outra das consecuencias do problema demográfico, un dos grandes desafíos ao que nos enfrontamos como país. Por iso, destacou que o compromiso do seu partido é traballar para manter e dotar de servizos esa España baleirada, o que axudará a fixar poboación e vertebrar unha parte fundamental do noso territorio que non podemos abandonar.
Por todo isto, pediu a todos os alcaldes do PSOE que presionen ao Goberno do seu partido para que tome medidas que combatan este problema. Ademais, sinalou que desde a FEGAMP aínda se pode facer moito máis, ao igual que dende a Federación Española de Municipios e Provincias, amosándose sorprendido pola actitude do presidente da FEMP, Abel Caballero, que “non di unha palabra sobre este asunto”: “Entendemos que non é algo que afecte ao Vigo urbano pero a FEMP representa tamén a centos de concellos en toda España que sofren a falta de servizos financeiros”.
