Santiago, 21 de maio de 2019.- O Grupo Popular demandará ao Goberno do Estado no Pleno do Parlamento galego da vindeira semana que impida o impacto negativo que terá para o sector pesqueiro galego, e o porto de Vigo especialmente, a instrución ditada para a importación de pesca conxelada ou procesada, que provocou a paralización de contedores e o seu desvío a Portugal.
Na mesma sesión plenaria, o Grupo Popular tamén defenderá que se manteña a condición de familia numerosa de tipo especial mentres un dos fillos cumpra as condicións de idade, convivencia e dependencia dos pais que esixe a lei, na liña das últimas sentenzas xudiciais e de acordo á recomendación do Defensor do Pobo.
Ao remate da Xunta de Portavoces, o viceportavoz do Grupo Popular, Miguel Tellado, informou que a orde do día da sesión plenaria da vindeira semana incorpora o debate de totalidade do proxecto de Lei de administración dixital de Galicia, unha norma que permitirá consolidar unha administración galega totalmente dixital e universalizar o uso e acceso da cidadanía aos servizos públicos dixitais.
Máis en concreto, Tellado indicou que esta nova lei “ten dous obxectivos principais: blindar os mecanismos de dixitalización implantados nos últimos anos na Administración galega e aproveitar esta dixitalización levada a cabo para cambiar a maneira de prestar servizos, pasando a un modelo de administración máis proactivo, que utilice os datos que manexa da cidadanía para facilitarlle, previo consentimento do usuario, os servizos”.
COMPARECENCIA SOBRE O PLADIGA
O Pleno tamén inclúe a comparecencia do conselleiro do Medio Rural para informar sobre o Plan de prevención e defensa contra os incendios forestais (Pladiga). O viceportavoz popular lembrou que este plan foi aprobado polo Consello da Xunta o pasado 2 de maio e, como novidades, prevé o uso de drons para vixilancia, detección, investigación e apoio na extinción e a ampliación da rede de vixilancia fixa.
“Serán máis de 7.000 as persoas implicadas no operativo, contabilizando as da propia Xunta, da Administración do Estado e dos concellos, apoiadas por unha trintena de medios aéreos e por 360 motobombas, entre outros medios”, lembrou Tellado, quen engadiu que se reforzará a colaboración cos concellos na prevención e defensa das aldeas, apóstase por potenciar o emprego de queimas controladas para a xestión da biomasa e foméntase a cooperación cidadá contra a actividade incendiaria a través dun número de teléfono anónimo de denuncia.
RESTAR COMPETITIVIDADE
Dentro do apartado de proposicións non de lei, o Grupo Popular demandará ao Goberno do Estado a adopción de medidas efectivas para evitar restar competitividade ao sector pesqueiro galego e impedir o impacto negativo que terá a aplicación da nova instrución para a importación de pesca conxelada ou procesada, sobre todo no porto de Vigo.
Miguel Tellado explicou que esta nova instrución impón máis trabas administrativas ás importacións de produto desde terceiros países, xa que recolle que o 100 por cento das súas partidas terán que pasar por un proceso de verificación, no que se esixirá aos operadores que aporten unha copia dos certificados de captura para avalar que o peixe foi conxelado, procesado ou transportado a bordo de buques autorizados pola Unión Europea.
“Estas novas trabas administrativas están a prexudicar directamente ao sector en Galicia, xa que provocou a paralización de contedores e o seu desvío a Portugal, reactivando a fuga de mercancías do porto de Vigo cara ao de Leixoes”, indicou.
FAMILIAS NUMEROSAS
A segunda proposición non de lei que defenderá o Grupo Popular ten como obxectivo que se manteña en Galicia a condición de familia numerosa de tipo especial mentres un dos fillos cumpra as condicións de idade, convivencia e dependencia dos pais que esixe a lei, ao tempo que se solicita ao Goberno do Estado para que recupere a homoxeneidade a nivel nacional en beneficio das familias numerosas de tipo especial e se adecúe ao que veñen expresando os tribunais.
Por último, o Grupo Popular preguntará ao Goberno galego sobre os avances na construción e posta en marcha do Edificio Fontán na Cidade da Cultura de Galicia; o balance do procedemento administrativo que levou á declaración da Ribeira Sacra como ben de interese cultural; ou o funcionamento da Tarxeta Benvida desde a súa posta en marcha.
