O PPdeG enxalzou o labor da Unidade de desenvolvemento infantil e apoio familiar (UDIAF) do Deza.

Os deputados do Grupo Parlamentario Popular Raúl Santamaría, Manuel Santos e Carmen Pomar visitaron, en Lalín, as instalacións desta unidade, que conta cun equipo interdisciplinar de cinco profesionais especializados en desenvolvemento infantil e atención temperá, ademais dunha administrativa. O servizo, público e gratuíto, acolle ás familias dos concellos de Lalín, Silleda, Vila de Cruces, Agolada, Rodeiro e Dozón.

Durante a xuntanza mantida coa coordinadora xeral da unidade, Maia García, ademais de coñecer o funcionamento e as necesidades actuais da UDIAF, recibiron a memoria anual de actividades, onde se recolle o traballo desenvolvido pola entidade na comarca ao longo de todo o ano. Así, no 2025, esta unidade atendeu a 156 familias, cuxo grado de satisfacción global é dun 4,91 puntos dun total de 5. Asemade, realizouse un total de 4.052 prestacións individuais, entre elas: 126 consultas de acollida, 254 sesións de valoración e ata 3.255 sesións de apoio directo a menores e familias.

Tras poñer en valor o labor realizado nos seis concellos da comarca, amosaron o seu compromiso de trasladar as necesidades do centro e as demandas dos profesionais ao Parlamento de Galicia, co fin de garantir que o servizo se preste coa mellor calidade e nas mellores condicións posibles, tanto para as nenas e nenos como para as súas familias.

AMPLIACIÓN DA REDE DE ATENCIÓN TEMPERÁ
Durante o encontro, no que estiveron acompañados polo concelleiro de Política Social do concello de Lalín, Avelino Souto, os parlamentarios populares fixeron mención ao ditame de novas propostas a prol da integridade das persoas con discapacidade, aprobado recentemente e que contou cun amplo consenso entre entidades, asociacións, organizacións, familias e, tamén, os grupos con representación no Parlamento de Galicia.

Tal e como remarcaron, a atención temperá ocupa unha das liñas de actuación prioritarias, xa que se avoga pola ampliación da rede de atención ata cubrir todo o territorio e, tamén, pola creación de servizos específicos máis aló dos 6 anos.

A UDIAF de Lalín, que desde que abriu as súas portas en 2009 atendeu a máis de 850 familias, forma parte dun proxecto impulsado pola Asociación Galega de Atención Temperá e está financiado integramente pola Xunta de Galicia. O concello, pola súa banda, cede as instalacións, situadas no Parque Empresarial Lalín 2000. Presta, así, asesoramento, orientación e apoio ao desenvolvemento de nenos e nenas de entre 0 e 6 anos, seguindo o modelo da Rede Galega de Atención Temperá. A intervención baséase nun enfoque integral que inclúe tanto ao menor como ao seu entorno familiar e social.