Santiago, 18 de maio de 2022.- O Grupo Popular demandará no Pleno da vindeira semana ao Goberno central que restableza o réxime de excepcións vixente ata 2015 que excluía da obriga de cotizar como autónomo a aquelas persoas que teñan ingresos como titulares de explotacións agrarias cando non superen determinados limiares de renda e rendemento económico.
Así mesmo, solicitará o apio do Parlamento ao Manifesto pola seguridade xurídica do planeamento territorial e urbanístico, acordado por 14 gobernos autonómicos e que sinala a necesidade de que o Goberno central impulse medidas lexislativas para ofrecer maior seguridade xurídica aos concellos nos que se anulan os seus instrumentos de ordenación.
Previamente á celebración da sesión plenaria ordinaria, terá lugar a celebración dun pleno específico para a designación como senadores en representación da Comunidade galega de Alberto Núñez Feijóo e de Miguel Tellado Filgueira, que virán cubrir as vacantes deixadas por Elena Muñoz e Juan Serrano.
CAVERNA NACIONALISTA
A visita que os Reis de España realizarán a Galicia o vindeiro martes pola mañá, para inaugurar a nova Cidade da Xustiza e a Feira Internacional da Industria Naval-Navalia en Vigo motivará que o Pleno ordinario dea comezo ás 16 horas, decisión que foi comunicada polo Presidente do Parlamento aos grupos parlamentarios na reunión da Xunta de Portavoces e que contou co visto bo do PPdeG e do PSdeG.
Neste sentido, a viceportavoz do Grupo Popular, Paula Prado, considerou “razoable” que a segunda autoridade da Comunidade galega acompañe aos Reis de España na inauguración da Cidade da Xustiza de Vigo e lamentou que o BNG “demostre, unha vez máis, que segue instalado no nacionalismo radical de sempre e na súa caverna nacionalista e independentista ao posicionarse en contra da máxima institución que representa ao Estado español”.
GOLPE AOS CONCELLOS RURAIS
Respecto das iniciativas que defenderá o Grupo Popular na sesión plenaria, Paula Prado explicou que “solicitaremos o Goberno de España restableza o réxime de excepcións vixentes desde o ano 2015 que excluía da obriga de cotizar como autónomo a aquelas persoas que teñan ingresos como titulares de explotacións agrarias”.
A viceportavoz popular lamentou que o actual Goberno central aproveitara a pandemia sanitaria para incorporar no Real Decreto-Lei 15/2020 de medidas urxentes complementarias para apoiar a economía e o emprego medidas que “asestan un duro golpe á economía de milleiros de familias dos concellos rurais”. En concreto, explicou que desde esa reforma calquera traballador que se atope cotizando á Seguridade Social no Réxime Xeral ou no Réxime de Autónomos, e que dispoñan dunha pequena explotación agraria, polo feito de ter esta propiedade e realizar algún labor na mesma van ter que darse de alta e abonar mensualmente a cotización.
“Diante desa situación de inestabilidade, o ministro de Agricultura recoñeceu o erro e indicou que este réxime sería modificado a través dunha instrución que, a día de hoxe e despois de dous anos, aínda non se ten producido”, polo que desde o Grupo Popular considérase necesario que o Goberno central restableza o réxime de excepcións vixentes para estes traballadores desde o ano 2015.
INSTRUMENTOS DE ORDENACIÓN
En segundo lugar, o Grupo Popular demandará o apoio do Pleno do Parlamento galego ao Manifesto pola seguridade xurídica do planeamento territorial e urbanístico, asinado o pasado mes de marzo por 13 gobernos autónomos no marco do Encontro Xacobeo 21-22 por un urbanismo responsable. Este documento, entre outras medidas, considera necesario que o Goberno central impulse as medidas lexislativas necesarias para ofrecer maior seguridade xurídica e, en particular, promover solucións á problemática á que se enfrontan os concellos no momento no que se anulan os seus instrumentos de ordenación.
Paula Prado sinalou que con este manifesto “as comunidades autónomas trasladan ao Goberno central a súa disposición para dar un paso adiante e contribuír a adoptar aquelas medidas que resulten necesarias para acadar un urbanismo responsable e perdurable no tempo, á vez que se brindan a fortalecer a cooperación e coordinación entre a Administración Xeral e as autonómicas en materia de ordenación do territorio e de urbanismo”.
Respecto das preguntas ao Goberno galego, o Grupo Popular interesarase polas actuacións levadas a cabo ata o momento polo Goberno central en relación á execución dos PERTE e os proxectos estratéxicos presentados desde Galicia; polo desenvolvemento das medidas previstas na Estratexia de Educación Dixital 2030; e polas dificultades que está a atopar Galicia na execución do Fondo Europeo Marítimo e de Pesca.
