Marta Nóvoa lamenta que o Executivo de Sánchez aprobara o Decreto de aforro enerxético sen escoitar ás Comunidades Autónomas, aos sectores afectados e as recomendación da Comisión Europea
A viceportavoz do Grupo Parlamentario Popular e coordinadora de Industria e Empresa do PPdeG, Marta Nóvoa, afirmou que o Goberno central ten a oportunidade de rectificar o seu “errático” modelo enerxético se escoita ás Comunidades Autónomas, aos sectores afectados e, sobre todo, se segue as propias recomendación da Comisión Europea: “Solicitamos unha vez máis que se convoque a Conferencia de Presidentes, tal e como foi solicitada polo presidente da Xunta”.
Desta forma se referiu en rolda de prensa ao Decreto de aforro enerxético aprobado polo Executivo central, que optou por poñer en marcha, de forma unilateral, medidas impositivas ao comercio, ao turismo e ás PEMES e autónomos en xeral, cando noutros Estados da Unión Europa se teñen formulado como voluntarias. Neste sentido, criticou que non se quixeran estudar as propostas feitas polas Comunidades Autónomas nin sacar adiante un plan que realmente atendese as necesidades do tecido empresarial e produtivo ante unha situación na que a luz segue a marcar medias de 250 euros o MWh e que está provocando unha inflación do 10,8 %, a niveis de hai 38 anos.
Mentres o PSdeG novamente se coloca no lado do “seguidismo” a Pedro Sanchez, Nóvoa puxo en valor que a Xunta leva anos tomando medidas relacionadas coa eficiencia enerxética para as familias e as empresas, de forma voluntaria e a través de liñas de axudas que incentivan o aforro e a eficiencia. Do mesmo xeito, avanzou que os populares presentarán no Parlamento unha batería de iniciativas para o seu debate no arranque do período de sesións con propostas e medidas de apoio elaboradas desde o consenso.
“Pedimos ao Goberno central que estableza canto antes as liñas de axudas para as medidas que os establecementos teñen que poñer en marcha como a instalación de mecanismos para o peche de portas, a colocación de cartelería ou medidores de temperatura”, dixo avogando polo diálogo coas Comunidades Autónomas para coordinar e sumar esforzos.
LEI DE ÁREAS EMPRESARIAIS DE GALICIA
Durante a súa comparecencia, Marta Nóvoa sinalou tamén que o pasado mes de xullo pechouse no Parlamento o relatorio do Proxecto de Lei de áreas empresariais de Galicia que, xunto coa Lei de simplificación administrativa e de apoio á reactivación económica de Galicia, “constitúen o mellor marco lexislativo para dar resposta ás necesidades do tecido empresarial e garantir a competitividade das áreas industriais”.
Como precisou, a finalidade desta Lei consiste en simplificar os procedementos de ordenación e execución de solo empresarial para adaptar a oferta de solo ás necesidades reais das empresas, en prazos máis breves e que permitan a rápida implantación de iniciativas. Ademais, inclúe unha demanda da comunidade empresarial como a creación de entidades para a conservación, xestión e modernización de áreas empresariais urbanas. Así mesmo, con esta Lei tamén se regula a figura de Concellos Emprendedores.
A viceportavoz subliñou que este Proxecto de Lei foi mellorado no proceso de ponencia, con 16 emendas aceptadas ou transaccionadas do PSdeG e do BNG. Máis polo miúdo, explicou que o Grupo Parlamentario Popular engadiu tres emendas, salientando a referida aos proxectos de enerxía eólica, que poderán ser considerados como iniciativas prioritarias, sempre e cando os seus promotores subscriban contratos de compravenda de enerxía a longo prazo e a prezo competitivo cunha empresa situada en Galicia, garantindo polo menos o 50% da súa produción de enerxía. Segundo resaltou, trátase dunha iniciativa demandada pola industria electrointensiva (empresas como Alcoa ou Ferroglobe, que consumen unha alta cantidade de enerxía e teñen paralizado ou reducido a súa produción pola situación enerxética).
“Creo que as Administracións Públicas estamos para facilitar a implantación de empresas no noso territorio, xerando o ecosistema axeitado, garantido sempre a convivencia e a viabilidade técnica de calquera asentamento empresarial con outros sectores produtivos. Esta é a máxima do presidente Alfonso Rueda e de todo o seu equipo ao fronte da Xunta de Galicia”, manifestou.
FONDOS NEXT GENERATION
Por outra banda, referiuse aos fondos Next Generation, lamentando que continúen sen materializarse os apoios do Goberno central aos proxectos tractores galegos como como o de hidróxeno verde, impulsado por Reganosa e Naturgy; o da Fábrica de Fibras téxtiles de Altri, ou o da fábrica de pneumáticos de Sentury.
Nese senso, criticou tamén que o Goberno do Estado deixara a Stellantis e á industria auxiliar da automoción fóra das axudas e denunciou que, ata agora, dos 11 Pertes aprobados por 33.090 millóns de euros só se leve convocado a quinta parte. Ademais, cuestionou que non se planifique un Perte para o sector da industria cultural e que o Perte agroalimentario non inclúa a estrutura de transformación dos produtos do mar.
Sobre esta cuestión, afeou tamén a falta de cogobernanza no deseño e planificación destas axudas coas Comunidade, que son as que teñen as competencias industriais e as que mellor coñecen os sectores produtivos. Por todo isto, solicitou ao Goberno central que rectifique, xa que ningún dos proxectos que foron anunciados “a modo de autobombo” polo Estado se traduciu en investimentos para Galicia.
