O Partido Popular de Galicia vén de presentar no Congreso dos Deputados unha batería de medidas co obxectivo de situar as necesidades de Navantia na axenda industrial do Goberno e impulsar a competitividade do estaleiro da empresa en Ferrol como “centro do futuro do sector naval español”.
Logo de manter unha reunión co comité intercentros de Navantia na que estiveron presentes os deputados galegos Francisco Conde, Irene Garrido e Tristana Moraleja; os populares solicitan, entre outras cuestións, a comparecencia da presidenta da SEPI, grupo ao que pertence a empresa.
Unha petición que vén motivada pola inacción da dirección da empresa e coa que buscan que se informe sobre a situación laboral que padecen os traballadores, a actualización do convenio colectivo, a estratexia de investimentos da compañía a curto, medio e largo prazo, a carga de traballo prevista e a exposición das contas da empresa do ano 2023.
Os populares aseguran que a competitividade do estaleiro de Navantia en Ferrol necesita de decisións de enorme relevancia no eido laboral e que pasan polo acordo para pechar un novo convenio –o actual finalizou a súa vixencia en decembro de 2021– e por dar respostas concretas aos traballadores en cuestións como a masa salarial ou o contrato relevo.
“Navantia está nunha situación excepcional ante a ausencia dun plan estratéxico vixente e dun plan orzamentario, o cal está condicionando o futuro do estaleiro e da súa carga de traballo. Unha situación excepcional que require medidas excepcionais e inmediatas”, argumentan.
Xunto á solicitude de comparecencia da presidenta da SEPI, os deputados do Partido Popular rexistraron tamén unha proposición non de lei para impulsar a competitividade do estaleiro de Navantia en Ferrol na que instan ao Goberno a:
– Construír un dique seco na planta ferrolá para garantir a súa competitividade internacional, permitindo un layout eficiente que mellore a capacidade da compañía para competir en licitacións internacionais e ofrecer prezos máis competitivos a medio e largo prazo.
– Iniciar a modernización integral das instalacións para completar a transformación do estaleiro 4.0, incluíndo a implementación de tecnoloxías avanzadas e prácticas de sustentabilidade acordes cos obxectivos do Plan Estratéxico de Navantia e as tendencias globais do sector.
– Crear un dique de reparacións a través da colaboración público-privada, ampliando as capacidades de servizo e mantemento de Navantia, mellorando a súa oferta e competitividade en servizos pos venta e xerando novos empregos.
– Promover todas aquelas iniciativas que permitan impulsar a formación do persoal de Navantia Ferrol a efectos de adaptarse ás novas necesidades de cualificación.
UN NOVO INCUMPRIMENTO DE PEDRO SÁNCHEZ CON FERROL
O comité de empresa e os deputados do Partido Popular constataron na súa xuntanza o nivel de incumprimento dos investimentos vinculados ao plan estratéxico 2018-2022, así como do plan orzamentario que permitía atender as necesidades laborais do persoal actual e as contratacións comprometidas.
Tamén se fixeron eco do incumprimento do anuncio feito por Pedro Sánchez durante a campaña electoral das eleccións galegas e no que comprometía a construción en Ferrol dun buque de aprovisionamento de combate (BAC) para a Armada Española. Un proxecto que, segundo asegurou, se executaría “coa máxima celeridade” e cun investimento de 439 millóns de euros e suporía a creación de 1.800 empregos.
De aí que os populares presentaran unha serie de preguntas para que o Goberno responda por escrito sobre a fase na que se encontra a tramitación do expediente para a construción deste buque, as previsións de firma da súa orde de execución, a partida dos Presupostos Xerais do Estado á que se cargará esta actuación e cando se iniciarán os traballos.
