O PPdeG quixo hoxe reafirmar o seu apoio á xestión do presidente Alfonso Rueda na medida en que supón a constatación de que “Galicia goberna” e permite que a nosa comunidade teña unha posición de liderado “tanto cando hai unha situación extraordinaria, como cando hai que xestionar e propoñer novas medidas ou cando se trata de escribir o futuro da nosa terra”.
Así o manifestou a secretaria xeral do partido, Paula Prado, nunha rolda de prensa ofrecida esta mañá e na que se referiu á ola de incendios sufrida este verán como “unha situación extraordinaria”. Unha situación á que o Goberno galego deu “unha resposta que tamén foi extraordinaria poñendo en marcha o maior dispositivo da historia de Galicia, con axudas completas e rápidas e cun equipo e un presidente, Alfonso Rueda, que estiveron onde debían estar”.
“Todo o mundo que traballa ten acertos e erros, e a Xunta tamén os ten porque traballou”, engadiu ao tempo que avanzaba que na comparecencia parlamentaria do presidente Rueda a próxima semana “verase quen trae propostas útiles e un discurso construtivo, e quen vén unicamente con dogmas de fe e consignas aderezadas co seu tradicional discurso apocalíptico e catastrofista”.
Prado criticou con dureza que “como ocorreu sempre” a oposición “xa tiña escritas as súas conclusións, os seus ataques e os seus insultos á intelixencia dos galegos antes de que empezara a vaga de lumes”. Só así se entende, na súa opinión, que “primeiro pediron unha comparecencia e, como a van ter, agora xa pasaron ao capítulo de petición de dimisión”.
“No seu dicionario hai tres palabras que se repiten constantemente cando falan da Xunta ou do PP: ‘non’, ‘manifestación’ e ‘dimisión’”, concluíu lamentando que “con iso pretenden arranxar todo sen necesidade de analizar cada situación” e afirmando que “en política é fácil distinguir a quen quere buscar solucións de quen só pretende enredar”.
Referíndose ao caso concreto do BNG, censurou que o independentismo galego, en plena vaga de incendios, “só pensara en organizar manifestacións e en saír á rúa coas súas bandeiras”. Unha crítica que fixo extensiva tamén a Abel Caballero e a Yolanda Díaz, aos que cualificou de “invitados estrela” desas manifestacións e aos que afeou que “pensaran antes na política que nos galegos”.
Nesta liña apuntou que “unha barbaridade como a de convocar manifestacións en plena vaga de incendios si que merecía algunha dimisión” e lamentou que Ana Pontón e Besteiro non demostren a mesma actitude “cando se trata da corrupción do PSOE, da quita da débeda ou de esixir medios ao Goberno central”.
BULOS SOBRE A QUITA DA DÉBEDA
Precisamente sobre a cuestión da quita da débeda, a secretaria xeral do PPdeG cuestionou o concepto de “normalidade” que teñen tanto o PSOE como o BNG ao aplaudir que “un presidente dunha comunidade autónoma se reúna cun prófugo da xustiza” –en referencia ao encontro entre Salvador Illa e Carles Puigdemont– e ao pretender “enganar aos galegos” a través de “bulos”.
“A condonación da débeda non vai supoñer contar con cartos que se poidan usar para gasto social nin para as axudas dos incendios”, explicou indicando que esta condonación é “unha fraude e un negocio ruinoso para Galicia que só serve para beneficiar a Pedro Sánchez e aos seus socios independentistas”.
O que se busca con esta medida, engadiu, é “que todas as comunidades autónomas paguemos os compromisos que Pedro Sánchez adquiriu de xeito unilateral co independentismo catalán”. Algo que suporía un “negocio ruinoso para Galicia” na medida en que a nosa comunidade “tería que asumir uns 600 millóns de euros de débeda procedente doutras comunidades cos seus correspondentes intereses”.
“A cada galego se lle reduciría a débeda autonómica en 1.477 euros, pero pasa a asumir da débeda estatal 1.702 euros. É dicir, cada galego tería que pagar 225 euros máis”, sintetizou concluíndo que no PPdeG non están dispostos a que “se castigue a Galicia desa maneira” e que por iso o Goberno galego xa anunciou que non se vai acoller a este mecanismo.
