Santiago, 3 de novembro de 2017.- O secretario xeral do PPdeG, Miguel Tellado, reclamoulle esta mañá a Gonzalo Caballero que interceda para que a presidenta da Deputación de Pontevedra, Carmela Silva, e o presidente da Deputación de Lugo, Darío Campos, comparezan no Parlamento, tal e como deberían facer hoxe para presentar os seus orzamentos.
O número dous dos populares galegos lembrou que primeiro Silva e despois Campos anunciaron a súa intención de non asistir á Cámara a cumprir cun acordo parlamentario de novembro de 2005. Como sinalou, dito acordo foi impulsado por unha presidenta socialista, Dolores Villarino -recentemente recuperada por Gonzalo Caballero para a Executiva do Partido-; foi argumentado no seu día polos letrados da Cámara dun xeito impecable; e ten aínda hoxe total vigor, “por iso se respectou nos últimos anos”.
Tellado asegurou que desde o PPdeG cren que esta negativa de dous presidentes de Deputación a acudir ao Parlamento só pode ter tres explicacións posibles. A primeira é que tanto Darío Campos coma Carmela Silva avergóñanse da súa xestión ao fronte das Deputacións. “E cremos que teñen motivos para facelo, porque demostraron xa en moitas ocasións que cando teñen que tratar cun Concello o primeiro que fan é mirar a súa cor política”.
Sen ir máis lonxe, onte mesmo o Partido Popular denunciaba que Silva anuncia axudas aos Concellos que supostamente se destinan para paliar os efectos dos incendios e que son ficticias, xa que son fondos que por lei xa pertencían aos concellos.
A segunda explicación que deu Tellado é que ambos presidentes non cren nin na transparencia nin na cooperación entre institucións. “O cal tampouco nos estrañaría, xa que hoxe a Deputación de Pontevedra só funciona como anexo ao Concello de Vigo; e a de Lugo como reserva natural do Besteirismo”, dixo.
Por último, fixo referencia á posibilidade de que esta sexa a nova estratexia consciente do PSdeG de Gonzalo Caballero. “Quizá o novo secretario xeral dos socialistas galegos aposte por un partido que non dá a cara, que non rende contas, e que non respecta as institucións”, recoñeceu.
“Se estamos enganados, e a Gonzalo Caballero tamén lle avergoña ver o comportamento dos seus compañeiros de partido, o que lle pedimos é que lles reproche publicamente a súa conduta e interceda para facer que tanto Carmela Silva como Darío Campos rendan contas ante o Parlamento e, por tanto, ante o conxunto dos galegos”, insistiu.
Así mesmo, Tellado tamén recordou que ambas Deputacións son gobernadas polo partido socialista grazas ao apoio do BNG, co que firmou pactos de goberno. Polo tanto, pediu a Ana Pontón que, se non está de acordo con esta conduta dos seus socios de goberno, os force a comparecer ou lles retire o apoio na Deputación de Pontevedra. “Unha vez máis, estamos ante unha gran oportunidade para que a oposición sexa coherente co que di cando está na oposición, pero logo nunca fai cando está no goberno”, subliñou.
MELLORA DAS CIFRAS DO PARO
Durante a súa intervención, Tellado fixo unha breve valoración dos datos do paro do mes de outubro publicados esta mañá, celebrando que a tendencia de creación de emprego se consolida e xa academos os catro anos consecutivos de mellora das cifras de paro.
Nese senso, salientou que hoxe temos máis de 13.000 parados menos que hai un ano e 18.000 afiliados máis á seguridade social; un emprego de maior calidade, posto que medra a contratación indefinida e a contratación a tempo completo; e, en termos intermensuais, a menor caída da historia con respecto ao mes de setembro. Segundo apuntou Tellado, este é o froito dunha política económica baseada na estabilidade, no rigor, na aprobación dos Orzamentos en tempo e forma e en traballar cada día a favor dos intereses dos cidadáns.
Por outra banda, o secretario xeral quixo agradecer ao PSdeG a súa chamada no día de onte para solidarizarse e condenar o ataque que rexistrou esta semana a sede dos populares, con pintadas ameazadoras por parte de alguén que, ademais, lanzou ovos contra o cartel que inclúe o logo do partido.
