O Partido Popular de Galicia sacará músculo esta fin de semana, “en positivo e con propostas”, na 28ª Interparlamentaria do PP, en contraste coa oposición galega, que “segue instalada no ‘non’ e no bloqueo sistemático”.
“Imos demostrar unha vez máis que o PPdeG é o partido galego maioritario no Parlamento de Galicia, no Congreso dos Deputados, no Senado e no Parlamento Europeo”, sinalou a secretaria xeral do PPdeG, Paula Prado, durante a presentación do acto que se celebra desde a mañá do sábado na Coruña.
A número dous dos populares galegos puxo en valor o liderado do presidente do PPdeG, Alfonso Rueda, amosando que “somos o partido co que Galicia Goberna”, e tamén o papel do líder nacional Alberto Núñez Feijóo.
En contraste, referiuse aos plans do PSdeG para esta fin de semana, na que os socialistas se reunirán para solucionar cuestións internas despois de que saíra á luz o caso Tomé. “O socialismo reúne o seu máximo órgano non para falar do futuro de Galicia, senón para solucionar os problemas de acoso machista e de acoso laboral, algún deles nesta cidade. E todo iso, mentres aplaude os agasallos de Sánchez a Cataluña”, dixo.
Pola súa banda, o BNG dedicará o sábado a alentar unha manifestación “en contra dun futuro democrático en Venezuela”. “O independentismo galego non cambia: unha vez máis, vólvese situar no lado incorrecto da historia”, engadiu a secretaria xeral do PPdeG.
A continuación, referiuse ás posicións de Ana Pontón e do BNG no último mes, denotando “o afastados que están dos galegos”. Así, cuestionou se a próxima semana o BNG vai aceptar na Deputación de Lugo o voto dun suposto acosador sexual, en referencia a José Tomé, e da persoa que o sabía todo e o ocultou, a deputada provincial Pilar García Porto. “Simplemente para manterse na vicepresidencia e deixando a un lado o feminismo e as mulleres”, subliñou.
Prado considera que “os lucenses e todos os galegos merecen saber que van facer, máis alá do paripé destas semanas mentres negociaban millóns de euros en privado con Tomé”. “Se non o aclaran antes, a próxima semana saberemos se o BNG de Ana Pontón está do lado do feminismo e das mulleres ou prefire aferrarse unha vez máis aos cargos. Se aceptan, ten que saber todo o mundo que formarán goberno cun presunto acosador sexual”, lamentou.
En canto á postura sobre Venezuela, engadiu que o BNG “é máis fan de Maduro que o propio goberno de Maduro” e lembrou que o independentismo galego foi “incapaz” de recoñecer en 2024 a vitoria da oposición en Venezuela.
“Ao BNG só lle interesa a democracia cando beneficia aos seus amigos tiranos. É unha auténtica vergoña, unha vez máis se pon ao carón dun ditador”, rematou Prado, lembrando que o nacionalismo galego “esquece o sufrimento de miles de galegos que viven en Venezuela e dos miles de venezolanos que viñeron a Galicia”.
GALICIA, UN “ESPELLO” NO QUE SE MIRA O PARTIDO POPULAR
Durante o acto tamén participou o vicesecretario de Política Autonómica, Local e Análise Electoral, Elías Bendodo, que puxo en valor a Galicia como “o espello no que se mira o PP de moitos territorios de España”, destacando a estabilidade, o compromiso, os orzamentos e o liderado de políticos que “solucionan os problemas da xente”.
Ademais, o presidente provincial do PP da Coruña, Diego Calvo, apuntou ao 2026 como o ano “no que hai que poñer fin a esa etapa negra do sanchismo no Goberno”. Calvo criticou o modelo do presidente do Executivo central, Pedro Sánchez, un modelo “sen sentido común e inxusto”, especialmente “grave” no reparto da financiación ás comunidades autónomas que pretende o Executivo Central.
Así, Calvo amosou a súa preocupación tralo pacto de Pedro Sánchez co líder de ERC, Oriol Junqueras, que se traducirá nunha nova financiación autonómica con cerca de 5.000 millóns máis para Cataluña. “Que se negocie por separado con uns e o que queda se reparta entre o resto, non é o modelo xusto”, enfatizou Calvo.
“Hai outra forma de gobernar e de crer na política e no PP temos a experiencia para recompoñer este pais”, puntualizou o presidente dos populares coruñeses.
Miguel Lorenzo, líder local do PP na Coruña, agradeceu a Alberto Núñez Feijóo e ao Comité Executivo do Partido Popular a elección da cidade herculina para celebrar esta Interparlamentaria “e converter á nosa cidade en referente nacional para deseñar a estratexia no novo ano”, sinalou.
“Van ser unhas xornadas de traballo nas que falarase de todo o que importa aos españois e nas que se proporán solucións para cando Alberto Núñez Feijóo sexa o presidente do Goberno, algo moi necesario para España e para que cumpra cos investimentos do Estado pendentes na Coruña, tantas veces anunciados por Pedro Sánchez e Inés Rey e nunca executados”, rematou Lorenzo.
