O PPdeG urxe ao Goberno central a adoptar unha solución que garanta a continuidade do programa auxiliares de conversa nun marco xurídico e laboral seguro, estable e común para todas as Comunidades.

Neste senso, a portavoz de Educación do Grupo Popular, Cecilia Vázquez, referiuse ás discrepancias internas dentro do Executivo de Pedro Sánchez e que están a supoñer unha ameaza para o desenvolvemento dunha iniciativa clave para a ensinanza de linguas estranxeiras. Tal e como indicou, mentres o ministerio de Traballo considera que os auxiliares de conversa deben formalizar a súa relación mediante contratos laborais e cotizar no réxime da Seguridade Social; o de Educación, Formación Profesional e Deportes, pola contra, define a participación neste programa como unha experiencia de intercambio cultural e non como unha relación laboral ordinaria nin como un desempeño docente.

GALICIA, A COMUNIDADE CON MELLOR NIVEL DE INGLÉS

O programa de auxiliares de conversa leva funcionando con éxito na nosa Comunidade desde hai máis de 15 anos e é un eixo estratéxico do modelo de ensino plurilingüe que contribuíu a situar a Galicia como a comunidade con mellor nivel de inglés de España. Este curso, o sistema educativo galego recibiu peto de 700 auxiliares de conversa que prestan apoio a 791 centros.

Por iso, a parlamentaria popular considerou prioritario clarificar o marco xurídico e laboral do programa, xa que as recentes actuacións do ministerio de Traballo están a poñer en risco a continuidade desta iniciativa e xa provocou que algunhas Comunidades fosen obxecto de expedientes sancionadores, derivando en sancións económicas.

 Lamentou que o Goberno non asuma as súas obrigas e que, a día de hoxe, non se coñeza ningún avance ao respecto. Para Cecilia Vázquez, é urxente que o Goberno central elimine “as ambigüidades”, polo que exixe a coordinación entre ambos os dous ministerios que evite interpretacións dispares por parte da inspección de traballo.

Durante a súa intervención na Comisión 4ª de Educación, aproveitou para aclarar que a Xunta non dispón de competencias directas sobre o seu funcionamento nin sobre a normativa laboral aplicable, senón que é o ministerio de Educación, Formación Profesional e Deportes quen o coordina e quen, ademais, marca os criterios e regras. Para rematar, advertiu de que a desaparición deste “ferramenta estratéxica” se deberá á “falta de coordinación e de resposta” do Goberno central.