O presidente do PPdeG, Alfonso Rueda, reivindica que Lugo está moi presente nos Orzamentos do ano 2024, que foron aprobados hoxe e que son unhas contas que reflexan unha forma de gobernar á galega: pensando na xente e nos seus problemas reais desde o sentidiño e co obxectivo de manter a illa de estabilidade na que se converteu Galicia.

Remarcando que Galicia é a primeira comunidade autónoma en aprobar os seus Orzamentos, o líder dos populares galegos explicou que neles se contemplan investimentos na mellora do polígono (8,1 M€), se continúa dando pulo ao barrio da Residencia, se aposta por infraestruturas como a intermodal (5,7 M€) ou a Rolda Leste (5 M€), así como o coidado de bens patrimoniais como a Muralla e a Catedral.

Algo que é posible, engadiu, porque o seu Goberno quere seguir mellorando a vida dos galegos con medidas como a baixada de impostos ou a conxelación dos prezos das autoestradas autonómicas o próximo ano, e facilitando as cousas ás familias con nenos ou dependentes.

“Porque nós, aos Reis Magos, non lles cargamos a responsabilidade de xestionar”, ironizou o presidente ao tempo que criticaba a condonación da débeda de 16.300 millóns de euros a Cataluña por parte de Pedro Sánchez, que suporá un pago de 400 euros por galego e coas que se poderían construír 27 autopistas como a A-54 entre Lugo e Santiago de Compostela.

Rueda censurou, neste sentido, que Sánchez estea poñendo cada día un novo ladrillo a ese muro que decidiu levantar entre el e a cidadanía. Tal e como demostrou cunha visita a Galicia na que só veu a que os seus lle aplaudiran todas as promesas pendentes que ten cos galegos e a presentarse como candidato dun cuadripartito que vota a favor da amnistía e do agravio a Galicia.

Fronte a todo isto, o presidente do PPdeG pediu aos seus compañeiros que sigan traballando para facer de Galicia o bastión da política útil, apelando ao feito de que Lugo fose a provincia na que o PP obtivo máis apoio de toda España nas pasadas eleccións xerais. Do mesmo xeito que Lugo foi a cidade na que o partido obtivo a maior porcentaxe de apoio nas eleccións municipais.

Pola súa banda, Elena Candia –da que Rueda destacou a súa incansable capacidade de traballo– quixo salientar “o enorme caudal de afecto, cariño e confianza” que Lugo sempre lle deu ao PPdeG e tamén ao seu presidente; ao que agradeceu a súa enorme aposta pola cidade, con exemplos como o Centro Integral de Saúde.