26 de agosto de 2023. A secretaria xeral do PPdeG, Paula Prado, asegura que o ano 2023 será recordado como o ano no que Alberto Núñez Feijóo “devolveu ao PP o orgullo das vitorias” e por iso reivindica a celebración do acto de inicio do novo curso político no lugar que durante anos simbolizou os éxitos da formación: o pontevedrés Castelo de Soutomaior.

Ata alí se desprazou esta mañá acompañada do presidente do PP de Pontevedra, Luis López, e a secretaria xeral provincial, Luisa Piñeiro, para supervisar os traballos de montaxe do acto que se celebrará mañá. Un acto no que os populares celebrarán “a vitoria nas municipais e autonómicas, a recuperación de comunidades emblemáticas como a Comunidade Valenciana, Baleares, Canarias ou A Rioxa; e a revalidación das maiorías absolutas de Andalucía e Madrid”.

Uns resultados que Paula Prado vincula ao liderado de Alberto Núñez Feijóo e aos que engade a recuperación da Deputación de Pontevedra. “Recuperar a Deputación permitiunos tamén recuperar este espazo que desde mañá volverá ser un espazo de todos e para todos e poñer fin aos oito longos e escuros anos de sectarismo e tics autoritarios de Carmela Silva”, engadiu.

Neste sentido a número dous dos populares galegos pediu á presidenta do PSdeG que “deixe ao PP celebrar as súas vitorias e se dedique a poñer orde na súa casa” en lugar de facer declaracións que “só amosan o seu mal perder”. E ironizou acto seguido con que os socialistas galegos “non poden celebrar nin as súas primarias”.

“QUEREMOS TRASLADAR O MODELO GALEGO A ESPAÑA”

Paula Prado reivindicou a vitoria de Alberto Núñez Feijóo o pasado 23 de xullo, na que destacaron especialmente os resultados obtidos en Galicia. Uns resultados cos que “os galegos dixemos a España cal é a forma na que nos gusta ser gobernados: con sentidiño, con capacidade de xestión e poñendo os intereses dos cidadáns por riba de calquera outro”.

Ese modelo político que practica Alfonso Rueda á fronte da Xunta é o que os populares aspiran a trasladar a España para “poder contar cun Goberno que se fixe en Galicia e nos problemas dos galegos e abandone o desprezo e o maltrato que durante anos recibimos por parte de Pedro Sánchez.

“Feijóo ten un proxecto serio e de país para España que tamén necesitamos en Galicia, polo que mañá reunirémonos máis de 1.000 persoas para demostrarlle que estamos con el e que queremos que nos leve pola senda dun futuro prometedor e lonxe da escuridade que ofrecen o PSOE e a amalgama de partidos de esquerda cos que aspira a gobernar Pedro Sánchez”, concluíu.

LUIS LÓPEZ: “O DE MAÑÁ SERÁ UN ACTO DE RESTITUCIÓN E LIBERDADE”

Pola súa banda, o presidente provincial do PP de Pontevedra, Luis López puxo de manifesto a “ledicia” de volver a este lugar onde a formación realizaba sempre o acto de inicio de curso político “ata que no ano 2015, co cambio de goberno na Deputación, o bipartito PSOE-BNG prohibiunos a súa celebración”.

“O acto de mañá será una acto de restitución e un símbolo de liberdade. Xa que o Castelo de Soutomaior, máis que nunca, volve estar a disposición de todos os cidadáns e de todos os colectivos”, explicou.

A xornada de mañá, segundo apuntou, será un “acto de celebración de todo o esforzo colectivo e os moi bos resultados acadados polo PP na provincia de Pontevedra nas eleccións municipais e xerais”.

Un acto no que os populares mostrarán unha vez máis o seu apoio a Alberto Nuñez Feijóo, que “durante trece anos deu o mellor de si mesmo por Galicia e que agora merece ser investido presidente de España para dar ao noso país o ansiado cambio que necesita”.