Santiago, 18 de abril de 2022.- O portavoz do Grupo Popular, Pedro Puy, avanzou hoxe que o Pleno da vindeira semana debaterá a toma en consideración do proxecto de Lei de mellora da xestión do ciclo integral da auga, “que porá a disposición dos concellos un sistema voluntario para garantir unha prestación de servizos profesional e de calidade”.

Con esta nova norma dáse resposta á demanda persistente de axuda dos concellos que teñen dificultades para o exercicio das súas responsabilidades sobre a xestión da auga, a través dun marco normativo que regula o apoio ás administracións locais nas súas competencias de abastecemento, saneamento e depuración das augas.

DECISIÓN VOLUNTARIA DOS CONCELLOS

Puy explicou que a Xunta “ofrecerá aos municipios a posibilidade de encomendarlle a Augas de Galicia, de forma sempre voluntaria, a xestión dos diferentes servizos da auga para obter garantías da súa eficiencia e eficacia, apostando por un uso racional do recurso e polo aforro da auga”.

Ademais, o Goberno galego asumirá un terzo do custo das obras que se identifiquen como necesarias para o bo funcionamento do sistema, priorizando as actuacións nas redes de saneamento e abastecemento co fin de limitar as fugas (que en ocasións chegan ao 40 por cento) e de evitar as infiltracións de augas de chuvia, de mar ou dos ríos.

“Este apoio aos concellos sumarase ao que xa viña prestando o Goberno galego nos últimos anos para que cumpran as súas competencias no ámbito do saneamento e abastecemento de auga, xa que a Xunta mobilizou desde 2009 máis de 1.000 millóns de euros para executar obras e infraestruturas hidráulicas municipais”, engadiu.

O portavoz popular manifestou que esta nova lei “reordena os tributos existentes, cunha denominación máis acorde ao seu obxecto, pero sen crear novas taxas que repercutan nos usuarios e preservando e garantindo a potestade tributaria dos municipios”. “Os concellos seguirán a ter o poder de decisión sobre o recibo final dos seus servizos municipais, cuns prezos únicos e xustos para o conxunto da Comunidade galega”, sinalou.

EFICACIA DO 95% NO ORZAMENTO DA XUNTA

Pedro Puy informou, ademais, que na sesión plenaria da vindeira semana está previsto o debate para a súa aprobación da Conta Xeral da Xunta de Galicia correspondente a 2019. Neste sentido, dixo que os informes realizados polo Consello de Contas “acreditan unha absoluta normalidade nos trámites orzamentarios por parte da Xunta, dando certezas ao tecido produtivo e favorecendo unha recuperación da crise pandémica como os problemas actuais derivados da invasión de Ucraína”.

“É unha foto positiva, cunha execución dos orzamentos cun 95 por cento de eficacia, moi por enriba do 68 por cento do Concello de Vigo ou do 40 por cento da Deputación de A Coruña”, salientou. No ámbito do endebedamento, o Consello de Contas acredita que a ratio débeda/PIB a prezos de mercado sitúase en Galicia no 17 por cento, seis puntos por baixo da media do conxunto das administracións públicas de España.

MAN LIBRE DO NOVO PRESIDENTE

Por outra banda, cuestionado sobre o relevo do Presidente do PPdeG, Pedro Puy reiterou que “o Grupo Parlamentario está a disposición do que diga o partido para acomodarnos a esta nova etapa”, polo que afirmou que o novo Presidente “terá man libre para adoptar as decisións que considere oportunas”.

“Aprecio absoluta responsabilidade e ánimo de cooperar para que esta nova etapa sexa exitosa”, manifestou Puy, quen puxo de manifesto “o ánimo de todos os responsables do PPdeG e do Grupo Popular de facer as cousas ben nestes momentos”.