13 de marzo de 2023. O portavoz do Grupo Popular, Pedro Puy, cualificou hoxe como “excelente nova” que as comunidades de Galicia, Euskadi, Asturias e Cantabria “traballen conxuntamente para que o Corredor Atlántico sexa unha realidade e haxa unha liña ferroviaria interoperable no ámbito europeo tanto para o tráfico de mercadorías como de viaxeiros”.

Neste sentido, afirmou que esta infraestrutura “podería estar antes do 2031, pero nos tememos que pase como con outras infraestruturas de transporte que foron pospostas por falta de execución dos investimentos que precisan”.

Pedro Puy salientou a importancia do “encontro plural, con respecto á militancia de cada un, que os presidentes de Galicia, Euskadi, Cantabria e Asturias celebrarán hoxe en Vitoria” sobre o Corredor do Atlántico, “unha das infraestruturas coas que Galicia se xoga o seu futuro económico a medio e longo prazo”.

MAIOR INVESTIMENTO NO CORREDOR DO ATLÁNTICO

Neste sentido, amosou a “preocupación pola falta de impulso e avances na construción do Corredor do Atlántico”, unha obra que non ten avanzado desde que, a comezos de 2019, o Ministerio de Transportes presentara o seu Plan de desenvolvemento, “que prevía un investimento de 16.000 millóns de euros para esta infraestrutura, pero que non variaron nestes catro anos xa que, lamentablemente, non se executou obra algunha neste tempo”.

Puy lembrou que “a última información facilitada polo Comisionado do Goberno para o Corredor Atlántico fixa para o vindeiro mes de outubro a presentación do plan director definitivo do Corredor Atlántico”, a pesar de que as comunidades afectadas veñen solicitando a elaboración deste documento desde hai anos. En principio, este plan director analizará as necesidades de reforma das distintas liñas ferroviarias para que sexan interoperables no ámbito europeo, non só para mercadorías senón tamén para viaxeiros, ao tempo que concretará os prazos e investimentos para que a rede básica estea lista antes de 2031.

“Confiamos que o Goberno de España atenda as necesidades de incrementar o investimento para o Corredor do Atlántico”, sinalou o portavoz popular. Ademais, explicou que as comunidades autónomas xa teñen identificadas as necesidades de actuación máis prioritarias deste Corredor Atlántico: precisa dun investimento estimado de 8.000 millóns de euros, que cómpre empezar a executar canto antes aproveitando a oportunidade única dos fondos europeos do Mecanismo Conectar Europa. Fronte a estas necesidades orzamentarias, desde o Goberno central reducen o investimento a 1.100 millóns de euros, unha cantidade que non permitirá cumprir os obxectivos de competitividade que debe facilitar o Corredor Atlántico e as necesidades de transporte ferroviario das empresas e dos cidadáns.

CONCILIACIÓN ENERXÍA EÓLICA E ACTIVIDADE PESQUEIRA

Cuestionado sobre os plans de ordenación do espazo marítimo (POEM) aprobados polo Goberno de España, Pedro Puy incidiu que “tanto o Goberno galego como o Grupo Popular xa nos temos pronunciado sobre a necesidade de avanzar na conciliación do aproveitamento da eólica mariña, pero preservando a actividade pesqueira”. Neste sentido, lamentou “a falta de diálogo” amosada polo Goberno de Pedro Sánchez, que “non tivo en conta a opinión nin das comunidades autónomas nin do sector pesqueiro”.

Así mesmo, Puy criticou que non haxa un calendario detallado de implantación destes parques eólicos mariños nin información de como se vai desenvolver o POEM, porque “non se entende moi ben que a vixencia do plan sexa ata 2027 cando é moi probable que os proxectos se desenvolvan a partir desa data”.

Para rematar, avogou polo desenvolvemento das enerxías limpas e renovables, “pero sen que sexa a costa da actividade pesqueira”. Deste xeito, reiterou que o Goberno galego “non vai facilitar a posta en marcha destas instalacións se afectan á actividade pesqueira que se desenvolve actualmente nas nosas costas”.