Santiago, 11 de decembro de 2020.- O portavoz do Grupo Popular, Pedro Puy, amosouse hoxe “con ganas de rematar o ditame da Comisión de investigación sobre as antigas caixas de aforro galegas, unha vez que está moi clarexado o panorama xudicial”. Porén, afirmou que “a nosa prioridade fundamental neste momento é a Comisión de reactivación económica, social e cultural de Galicia creada neste Parlamento e a aprobación duns orzamentos para 2021 que van permitir combater a pandemia sanitaria a curto prazo”.

Ao remate da reunión de constitución da Comisión de investigación para analizar a evolución económico-financeira das antigas caixas de aforro nesta XI Lexislatura, na que quedou configurada a Mesa, coa presidencia e vicepresidencia a cargo dos deputados populares José Manuel Rey e Lupe Murillo, respectivamente, Pedro Puy avogou, “por cortesía parlamentaria e tendo en conta a composición da comisión e a designación realizada por cada grupo, por deixar un pouco de tempo aos deputados que se incorporan por vez primeira para que analicen, estuden e vexan a inxente documentación que hai a disposición desta comisión no Parlamento”.

Neste sentido, apuntou que o obxectivo é “concluír un traballo que, unha vez escoitadas algunhas das cuestións que ten dito a oposición e tendo en conta a composición dos grupos na propia comisión, tanto da súa abstracción territorial como de antecedentes relacionados coas caixas, faga unha síntese obxectiva, documentada e baseada en datos certos, sobre cal foi o proceso, que fases tivo, que fixo cada un en cada fase e, a partir de aí, facer públicas as conclusións desa análise”.

TEMAS CLAREXADOS

“Aínda que quedan temas pendentes subiúdice en relación coas caixas galegas, aqueles temas que considerábamos fundamentais no seu momento, como saber por que as caixas remataron como remataron, saber o que pasou co tema das preferentes e saber o que ocorreu coas indemnizacións millonarias dos directivos das antigas caixas, xa están clarexados entre outras cousas gracias as intervencións xudiciais que houbo ao respecto”, manifestou.

Pedro Puy fixo unha reflexión sobre a conveniencia de manter comisións de investigación parlamentarias ao mesmo tempo que teñen lugar xuízos, sobre todo cando son de carácter penal e afectan ao obxecto de investigación do Parlamento. “O certo é que, se analizamos por que moitas das comisións de investigación que se fixeron na Cámara ultimamente non chegaron a resultados, entre outras cousas ten que ver polo feito de que moitas destas cuestións que o Parlamento decide investigar están sometidas a procesos penais”, afirmou.

Esta situación “dificulta o propio traballo da investigación, porque aqueles que están suxeitos a un proceso penal poden inhibirse e non responder nin aportar documentación, porque teñen o dereito á súa propia defensa que prevalece sobre calquera capacidade de investigación da Cámara; e, en segundo lugar, isto pode levar a alongar os traballos indefinidamente, porque se os adiantamos e despois hai unha contradición nas conclusións dun mesmo obxecto de estudo ou investigación por parte do poder xudicial e do poder lexislativo estaríamos facendo un fraco favor á verdade, en primeiro lugar, e ás institucións, en segundo lugar”.

PRIORITARIO ABORDAR A CRISE ACTUAL

Para rematar, o portavoz popular subliñou que “no Parlamento estamos rodeados de comisións en marcha e estamos traballando arreo”, pero concretou que “para nós é prioritario abordar a crise actual”. “Se a oposición cree prioritario plasmar por escrito algo que o país coñece polas comparecencias e pola documentación que se fixo pública nesta Comisión e polas sentenzas xudiciais, se equivoca”, indicou.

“Para nós, o prioritario é o que está vivindo o país, unha pandemia e unha crise económica sen precedentes, polo que temos claro que a nosa prioridade fundamental é a Comisión de Reactivación deste Parlamento e a aprobación duns orzamentos que van permitir combater a pandemia a curto prazo, o que non quere dicir que abandonemos outras responsabilidades”, concretou.