Santiago, 25 de setembro de 2019.- O portavoz do Grupo Popular, Pedro Puy, salientou que “o Presidente da Xunta demostrou que ten un proxecto de país, con 90 medidas a curto e medio prazo anunciadas esta mañá e continuará traballando con lealdade por Galicia”.
“Seguiremos traballando para afrontar con lealdade os problemas da sociedade galega e procurando solucións realistas; comportándonos con lealdade institucional e defendendo a Constitución e o Estatuto de Autonomía; e, por suposto, con lealdade ao pobo galego e aos compromisos que asumimos nas eleccións de 2016 e aos que hoxe anunciou o Presidente para o que resta de lexislatura”, indicou.
Na súa intervención no Debate sobre o Estado da Autonomía, Pedro Puy demandou á oposición ser “leais á verdade e respectar os feitos e os datos”, porque “é difícil dialogar con alguén que ve a Galicia esnaquizada e todo en negro”. “A verdade é que a realidade é outra, aínda que estamos nunha situación de desaceleración económica, pero acompañada dunha prolongación da fase expansiva e unha previsión de recuperación das exportacións”, engadiu.
“A inestabilidade política que vivimos a nivel nacional está xerando efectos negativos en toda a economía española, con retrasos nos investimentos e cambios nas contratacións”, manifestou. Neste sentido, lembrou que “afrontamos o cuarto proceso electoral nacional en catro anos, que levan a que a poboación española estea cabreada e decepcionada e pense que a calidade da democracia en España é cada vez peor”. Fronte a esta situación, contrapuxo que “a normalidade e estabilidade política en Galicia levounos a celebrar catro debates de autonomía neste mesmo tempo”.
RESPECTO Á VERDADE
Pedro Puy incidiu no “respecto á verdade” por parte dos grupos da oposición e subliñou que a estabilidade en Galicia está a permitir resultados positivos, como acadar en 2018 o máximo histórico de converxencia con España en produto interior bruto por habitante (o 90,1 por cento), converxendo desde o ano 2000 doce puntos coa media nacional e oito con Europa; que a taxa de destrución de emprego medraba ao 44 por cento en 2009 e agora cae ao 15 por cento; que Galicia sexa a comunidade na que máis medrou a renda familiar dispoñible durante a última década e a cuarta onde menos dificultades hai para chegar a fin de mes.
Así mesmo, Puy anotou que “nunca antes se gastou tanto en políticas sociais, chegando ao punto de que a Comisión Europea cualifique a Galicia como Rexión de Referencia; o investimento en sanidade é un 10 por cento superior ao de 2009; e na equidade do sistema educativo estamos por enriba de Finlandia, Canadá ou Noruega”.
RESPECTO INSTITUCIONAL
O portavoz popular tamén demandou lealdade institucional, porque “cada poder ten que respectar, en sentido negativo, o exercicio das competencias dos demais e colaborar, en sentido positivo, na boa consecución dos seus fins por cada administración”. “Lealdade institucional é respectar o que establece o Estatuto da Autonomía, e deste xeito convidar ao Presidente da Xunta, que exerce a representación da comunidade autónoma do Estado en Galicia, ás visitas institucionais que realizan membros do Goberno do Estado”, apuntou.
Neste punto, referiuse aos 700 millóns de débeda financeira que o Goberno central ten con Galicia e criticou que o abono destes cartos “era imposible cando non había investidura e agora é posible cando hai unha convocatoria de eleccións”. “Un bo galego de corazón estaría do lado da Xunta e un bo economista tamén estaría do lado do Goberno galego”, indicou dirixíndose ao secretario xeral dos socialistas galegos.
Para rematar, Pedro Puy defendeu a lealdade co país e dixo que “a oposición debe ser exercida de forma construtiva”. Así, lamentou que a oposición “o único que fai é poñerse en contra de todo o que faga o PPdeG, sen importarlle o que sexa”. “Así non contribúen e ganar credibilidade”, asegurou.
