Santiago, 3 de outubro de 2022.- O portavoz do Grupo Popular, Pedro Puy, situou o proxecto de lei de medidas extraordinarias dirixidas a impulsar a provisión de postos de difícil cobertura na sanidade galega como “un exemplo máis do interese máximo que está a poñer a Xunta por resolver a ausencia de médicos e a difícil cobertura dalgunhas prazas nos hospitais comarcais ou en áreas como a saúde mental”.
Así mesmo, destacou o debate da proposición non de lei do Grupo Popular a través da que se demandan ao Goberno central unha serie de cuestións de especial interese para Galicia en materia europea para que as inclúa na súa axenda lexislativa e as incorpore no seu programa de prioridades para a presidencia española do Consello da Unión Europea.
Pedro Puy salientou o “marcado carácter sanitario” que terá o Pleno que se celebrará no Parlamento galego esta semana, tanto pola aprobación do proxecto de Lei de medidas extraordinarias dirixidas a impulsar a provisión de postos de difícil cobertura na sanidade galega, principalmente en atención primaria, hospitais comarcais e saúde mental. Neste sentido, salientou que 91 médicos se incorporarán nas vindeiras datas a raíz do proceso aberto pola Xunta a través de concurso de méritos, unha fórmula que agora se estenderá a través deste proxecto de lei para paliar o déficit de prazas en determinados postos.
“Cremos que esta é unha boa vía para a incorporación de sanitarios ao sistema que contrasta con outras que se pediron hai tempo e que o Congreso convalidou pero que seguen sen desenvolverse”, dixo o portavoz popular. En concreto, referiuse ao incremento de prazas MIR ou a creación da especialidade de urxencias sanitarias.
INCENTIVOS COA NOVA LEI
Esta nova lei tamén recolle incentivos para o persoal que cubra estas prazas de difícil cobertura, como un acceso máis rápido ao máximo grao da carreira profesional sanitaria ou unha valoración extraordinaria do tempo de servizos prestados nestes postos á hora de computar méritos en procesos selectivos ou concursos de traslados, así como a priorización da súa participación en actividades formativas e proxectos de investigación.
Co obxecto de que o sistema garanta o obxectivo de cobertura asistencial destas prazas de difícil cobertura, a norma establece a obrigatoriedade da incorporación efectiva e permanente ao servizo activo do persoal que obteña praza a través destes concursos de méritos, así como a necesidade de permanecer un mínimo de dous anos en situación de servizo activo no posto adxudicado antes de optar a un concurso de traslados ou a outro sistema de promoción interna.
Ademais do debate para a aprobación deste proxecto de Lei, o Pleno inclúe a comparecencia do conselleiro de Sanidade para informar dos avances acadados grazas ás medidas postas en marcha para o reforzo da atención primaria, onde a Xunta está a actuar dentro das súas competencias para afrontar a falta de médicos existente.
MEDIDAS EUROPEAS E PERTE PARA A INDUSTRIA
Por outra parte, e dentro do apartado de proposicións non de lei, o Grupo Popular defenderá unha dirixida a facer ver cales son as prioridades de Galicia para incluír na axenda europea e na Presidencia española do Consello da Unión Europea. Pedro Puy explicou que o Congreso “vén de abrir unha ponencia para analizar as prioridades de España ante o reto de presidir o Consello da Unión Europea” e salientou que “Galicia será o primeiro parlamento autonómico que se pronuncia sobre este tema”.
En concreto, a iniciativa do Grupo Popular abrangue 10 ámbitos: os fondos europeos, para asegurar unha xestión e execución eficaces dos fondos Next Generation, de xeito que cheguen ao tecido produtivo galego, especialmente ás pequenas e medianas empresas; a pesca, para reorientar as normas europeas e asegurar a sustentabilidade social, económica e medioambiental da cadea mar-industria; o medio rural, adaptando as normas europeas sobre agricultura, gandería e montes á realidade galega; a cultura, promovendo o fenómeno xacobeo na Unión Europea como parte da nova Axenda Europea para a Cultura e a Estratexia da UE para as relacións culturais internacionais; a enerxía, apostando por un modelo de transición enerxética ordenada, garantista, sustentable e respectuoso co medio ambiente, que permita achegar ás familias, pemes e industria un prezo competitivo; os transportes, para aproveitar ao máximo os fondos europeos dispoñibles para impulsar as sinerxias entre Galicia e Portugal, co fin de poder reforzar a competitividade; a demografía e o despoboamento, integrándoos nos distintos programas de financiamento da Unión Europea; a política exterior, reforzando a protección consular dos europeos en terceiros países; as relacións con América; e, por último, a defensa, velando porque a renovada importancia da política europea de defensa beneficie a Galicia.
Por último, Puy referiuse á proposición non de lei do Grupo Popular que pide ao Goberno central a posta en marcha dun PERTE singular que permita dar viabilidade aos proxectos industriais priorizados na Comunidade galega. “Hai un problema coa execución dos fondos europeos e hai que facer uns Pertes viables que permitan consolidar e ampliar as cadeas de valor”, manifestou e alertou que “podemos perder unha ocasión única para mellorar o noso tecido produtivo”.
