Di que o PPdeG buscar sempre mellorar e que o 17º Congreso ten a vista posta nas propostas que a formación porá a disposición da Comunidade
A presidenta da Comisión Organizadora do 17º Congreso do Partido Popular de Galicia, Pepa Pardo, asegurou que hai que actualizar a organización todos os días e adecuala ao que a xente espera dos populares: “Non pretendemos que Galicia se pareza ao PPdeG, senón que o PPdeG se pareza a Galicia”.
Durante unha comparecencia en rolda de prensa celebrada despois da primeira reunión da Comisón Organizadora, Pardo remarcou que o Conclave autonómico debe ser aberto, participativo e funcional. Así mesmo, apuntou que o Congreso non terá a vista posta só nos equipos que saian del, senón nas propostas e nas ideas que van actualizar e poñer a disposición da “Galicia de hoxe”, salientando que tamén servirá como preparación da formación para servir á Comunidade do mañá.
Nese senso, destacou que o seu partido ten a humildade de buscar permanentemente como mellorar aínda gañando eleccións, xa que este é o camiño máis eficaz para non perder comicios. Sobre isto, explicou que tanto os relatores das ponencias como os militantes deberán facer aportacións co obxectivo de acertar nun ideario que debe ser reflexo do que Galicia precisa para o próximo lustro, “unha folla de ruta para seguir representando a centralidade e a moderación, a resposta máis valente, efectiva e sensata fronte ás formulas máxicas de radicais e populistas”.
Pepa Pardo incidiu en que os populares deben continuar sendo representantes do centro-dereita moderado no que tanto confían os galegos, “a única alternativa a un PSOE que hai tempo perdeu o norte e a un nacionalismo cada vez máis radical: “O dique de contención para os populismos dun lado e do outro”.
Igualmente, recordou que mentres Manuel Fraga era presidente da Xunta, Alfonso Rueda era presidente de NNXX en Pontevedra, o que quere dicir que á vez que unha xeración dirixe os destinos dun país, outra se está formando para facelo algún día. Segundo subliñou, os populares están sempre renovándose e en constante evolución.
UN FEMINISMO BASEADO NA CAPACIDADE DAS MULLERES
Por outra banda, afirmou traballar nun partido no que o xénero non é un mérito. Neste sentido, admitiu que é un orgullo que a Xunta Directiva considere que as oito integrantes da Comisión Organizadora do Congreso están preparadas para asumir esta responsabilidade, aclarando que se lles encargou este labor polo que elas fixeron na formación e “non polo que din os nosos DNIs”.
Pardo insistiu en que os populares galegos fíxanse na valía e na cualificación profesional. Ao respecto, tamén engadiu que o PPdeG defende un “feminismo real” baseado na capacidade das mulleres, no respecto polo compromiso e pola profesionalidade, e que pon en valor todo o que estas poden aportar ao partido e á sociedade.
Pola contra, manifestou non sentirse identificada por “un feminismo de pancarta baleira”, que se mostra máis preocupado por cambiar a linguaxe que por loitar pola igualdade de dereitos.
PONTEVEDRA, SÍMBOLO DO PPdeG
Por último, avanzou que está previsto que o Congreso autonómico se celebre no Pavillón Municipal de Deportes de Pontevedra, unha urbe que é un símbolo para o PPdeG, xa que nos mitins da praza de touros se xestaron catro maiorías absolutas. De igual modo, recoñeceu alegrarse de que os preto de 2.000 asistentes ao Conclave poidan gozar da amabilidade e hospitalidade dos pontevedreses e de que este evento sirva tamén para reactivar a economía da cidade.
