Santiago, 2 de outubro de 2017.- O portavoz do Grupo Popular, Pedro Puy, avanzou hoxe que “abordamos o Debate sobre o Estado de Autonomía desta semana co obxectivo de que os galegos tomen conciencia de que as cousas van ben e continuar nunha senda que permita o incremento das rendas dos cidadáns, principalmente a través da creación de emprego”. Respecto da situación que se vive en Cataluña, Puy avogou porque “a través do diálogo todos saibamos darlle unha resposta conxunta ao reto que se lle presenta aos demócratas, por primeira vez en 40 anos, para a defensa da Constitución e o Estatuto de Autonomía”.
Puy lembrou que esta semana se celebra o primeiro Debate sobre o Estado da Autonomía desta lexislatura, logo dun ano no que “pretendemos afortalar a recuperación da economía, feito que se está a conseguir”. Neste sentido, indicou que a estabilidade do Goberno galego e a capacidade de aprobar os orzamentos “influíu non so na economía, senón tamén na capacidade de atender os problemas que a crise deixou, mellorando as políticas sociais”.
En concreto, o portavoz popular referiuse á “recuperación ao longo deste ano do poder adquisitivo dos empregados públicos e das persoas que viven no sector privado a través de políticas fiscais e de decisións fiscais de carácter progresivo que beneficien aos que menos renda obteñen”. En definitiva, concretou que o obxectivo é “afortalar o crecemento e restablecer as condicións que moitos perderon como consecuencia da peor crise”.
DESAFÍO SOBERANISTA
Respecto dos acontecementos que se están a vivir en Cataluña, o portavoz popular manifestou que “asistimos a unha evidente actuación á marxe da Constitución e da Lei” e subliñou que é “a primeira vez en 40 anos de democracia que un poder constituído de acordo coa Constitución e o Estatuto de Autonomía está a actuar contra as normas que todos nos demos”.
Pedro Puy sinalou, ademais, que esta situación “afecta moito a Galicia, polo que implica de desestabilización do sistema constitucional” e porque “afecta á capacidade de financiamento da Comunidade galega”.
Por este motivo, alertou destes “problemas graves para que en Galicia tomemos nota e nos posicionemos ante este desafío soberanista”. “Hai que defender os intereses de Galicia”, demandou, e amosouse “sorprendido que aqueles que se presentan a si mesmos como grandes defensores dos intereses de Galicia estean a apoiar algo tan fondamente prexudicial para a nosa comunidade desde o punto de vista institucional, económico e social”.
Para rematar, demandou que “impere o sentido común e haxa unha resposta conxunta de todos os demócratas e de todos os que defendemos a Constitución e o Estatuto de Autonomía”, ao tempo que enviou “unha mensaxe de apoio e solidariedade a moitos cidadáns de Cataluña con orixes galegas, así como aos cataláns residentes na Comunidade galega, ante a situación complexa que se están a vivir”.
