Santiago, 15 de xuño de 2020.- O portavoz do Grupo Popular no Parlamento galego, Pedro Puy, afirmou hoxe que “Galicia parte nunha mellor posición” para a recuperación económica das familias e as empresas, pero demandou a colaboración do Goberno central para resolver problemas existentes. En concreto, referiuse ao Plan de Reactivación posto en marcha polo Goberno galego, e demandou a implicación do Estado para o mantemento de Alcoa, a carga de traballo para o naval ou a reforma do regulamento da Lei de Costas que pon en perigo empresas e instalacións públicas e privadas.
Pedro Puy comezou a súa comparecencia perante os medios recordando aos 619 falecidos en Galicia polo coronavirus e trasladando ánimo aos 348 galegos que aínda seguen padecendo esta enfermidade, dos que só oito atópanse hospitalizados.
BOA NOVA
“Comezamos a semana coa boa nova de que Galicia entra no que se da por chamar a nova normalidade, un período que imos vivir en compañía do virus, polo que debemos tomar todas as precaucións posibles para que non volva a producirse un brote que nos leve a ir cara atrás”, manifestou. Neste sentido, engadiu que “Galicia conta cun plan de rebrote e cun sistema de prevención e rastreo suficiente para atender posibles rebrotes, pero todos debemos actuar de xeito responsable durante este período que o virus vai estar entre nós”. Por este motivo, apuntou que “todo estaría máis reforzado se contásemos cun plan de rebrote nacional, con protocolos que todas as comunidades poidan seguir”.
A partir de agora, Puy indicou que “todos temos que traballar pola recuperación económica das familias e as empresas, para o que Galicia parte nunha mellor posición”. Así, lembrou que nos últimos cinco anos a economía galega estaba a medrar unha media anual do 2,5 por cento do PIB; había 96.000 ocupados máis; e a taxa de paro era nove puntos inferior ao 2014. “Ademais, temos a vantaxe de ser a terceira comunidade menos endebedada e que estaba a cumprir as regras de estabilidade, o que nos da credibilidade e máis marxe para actuación”, engadiu.
O portavoz popular salientou que “somos máis optimistas porque os datos demostran que a boa xestión sanitaria da pandemia permitiu ir saíndo de cada fase entre as primeiras comunidades autónomas, o que repercutirá nunha caída menor do PIB”.
COMEZAR A ACTUAR
“Hai que comezar xa a actuar”, demandou, para o que puxo de exemplo que “a Xunta estao a facer co plan de reactivación económica, dotado con máis de 3.000 millóns de euros para recuperar a actividade, xerar emprego nos sectores máis golpeados e fortalecer os servizos públicos esenciais”. En concreto, dixo que este plan “vaise centrar naquilo que os expertos consideran unha prioridade para a recuperación económica: liquidez ás empresas; fomentar o emprego e a formación; garantir a solvencia empresarial; e dinamizar os sectores tractores con investimentos que xa están definidos para sanidade, o emprego, sectores sociais, dinamización económica, infraestruturas, medio rural ou educación”.
Neste sentido, manifestou que este plan de reactivación “require que deamos continuidade á colaboración co Estado, porque a recuperación pasa pola solución a algúns problemas que xa existían e que dependen de decisións por parte do Goberno central que non compartimos”.
Así, considerou “fundamental que o Goberno de Pedro Sánchez se pronuncie sobre a necesidade de permanencia de Alcoa en San Cibrao, a única fábrica que produce aluminio primario en España”. “A viabilidade desta empresa pasa por darlle certeza ao actual propietario como a calquera outro posible comprador, a través dun prezo da enerxía que lle permita competir en igualdade de condicións no mercado internacional, sen ocultar o contido do prometido estatuto das empresas electrointensivas ou pronunciándose sobre as propostas conxuntas realizadas por Galicia, Asturias e Cantabria”, explicou.
Puy tamén saudou o contrato asinado por Navantia para fabricar 62 estruturas para a eólica mariña, unha carga de traballo que “non libera ao Goberno central da súa responsabilidade de iniciar canto antes a fabricación das fragatas F-110”.
No ámbito da automoción, amosou a súa satisfacción porque o Goberno central anunciara un plan de reactivación deste sector e incidiu, á espera de coñecer o contido deste plan, na importancia de aportar certeza e confianza aos consumidores.
“No ámbito industrial tamén nos preocupa a reconsideración do previsto para a lei de costas, que afecta ao sector fundamental da transformación dos produtos do mar na franxa costeira”, sinalou Puy, para quen “estas incertezas deberían resolverse canto antes, e especialmente no momento que estamos a vivir logo da pandemia”.
MEDIDAS FISCAIS
O portavoz popular tamén considerou “importante utilizar medidas fiscais a curto prazo para revitalizar certos sectores, como a baixada do IVE no sector do turismo, ou que se volva aos criterios coñecidos e aplicados para saber cal é o custe da prestación dos servizos públicos, e que afecta á distribución dos 16.000 millóns de euros previstos polo Goberno para as comunidades autónomas”
“Acabamos de ver o reparto dos fondos de apoio ao sector vitivinícola, con criterios que non teñen en conta a produción de Galicia e a súa calidade”, afirmou, para denunciar que “dos 90 millóns que se poñen a disposición do sector a nivel de toda España, a Galicia unicamente se destinan 300.000 euros, moi lonxe do que representa o sector galego no conxunto nacional”.
Por último, lamentou que “empezan a aparecer algunhas cuestións que non se cinguen ao criterio de colaboración leal que houbo durante a pandemia” e puxo como exemplo a obstaculización que desde a Subdelegación do Goberno en Ourense estase a facer ás axudas que a Deputación Provincial dispuxo para apoiar aos autónomos, semellantes ás que realizan outras administracións gobernadas por socialistas.
