Santiago, 4 de xuño de 2018. O portavoz do Grupo Popular, Pedro Puy, amosou “o noso agradecemento e respaldo persoal a Mariano Rajoy, un Presidente do Goberno de España digno ata o final que deixou a Presidencia nunha moción de censura coa elegancia que caracterizou a súa presenza na política”. A nivel de Galicia, Puy asegurou que “abordamos os próximos días con absoluta tranquilidade, porque a estabilidade institucional está perfectamente garantida coa maioría ampla que respalda as políticas do Goberno galego e, a nivel político, porque pertencemos a un partido democrático que nos vindeiros días vai tomar as decisións que considere oportunas nesta nova situación”.
Pedro Puy lembrou que o Grupo Popular defenderá no Pleno desta semana dúas proposicións non de lei. Unha primeira, a través da que se solicita que a Xunta, paralelamente ao investimento público que vén realizando en tecnoloxía sanitaria, fomente e acolla de xeito complementario todas aquelas accións de mecenado que redunden nunha mellora do servizo ao paciente.
INTERMODAL DE SANTIAGO
En segundo lugar, demándase ao Concello de Santiago inicie, o antes posible, a redacción do proxecto de accesos que garanta a funcionalidade da nova estación de autobuses de Santiago a partir da rúa Clara Campoamor. Puy apuntou que esta iniciativa coincide co anuncio realizado polo Concello de que atrasa un mes máis o concurso para os accesos á estación intermodal, logo de que se detectaran fallos na tramitación administrativa municipal.
Así mesmo, o portavoz popular indicou que o Grupo Popular preguntará ao Goberno galego polas axudas destinadas aos afectados pola explosión dun almacén ilegal e clandestino de material pirotécnico en Tui. Neste sentido, indicou que, “nunha situación extraordinaria como esta, todas as administracións deben involucrarse” e salientou que “a Xunta estivo áxil na posta de recursos a disposición dos afectados”. Porén, considerou “chamativo que no ámbito da Administracion provincial o único que se propón é una reasignación dos cretos atribuídos a ese concello, cando ten necesidade dunha aportación maior para resolver o problema xerado pola explosión dun almacén pirotécnico ilegal”.
LEGADO DE MARIANO RAJOY
Puy tamén informou que na reunión dos deputados do Grupo Popular celebrada esta mañá “analizamos a situación política actual, que ten mudado como consecuencia da tramitación con éxito dunha moción de censura no Congreso”. Neste sentido, amosou “o noso agradecemento e respaldo persoal a quen foi desprazado por esta moción de censura, o Presidente Mariano Rajoy Brey, que actuou correctamente respectando un trámite constitucional e non abrindo novos procesos de incerteza como os que podería xerar a apertura dun novo proceso de investidura”.
O portavoz popular salientou “o legado” que deixa Mariano Rajoy logo do seu paso pola Presidencia do Goberno de España: “colleu o país cun déficit de preto do 11 por cento e agora estamos no 3 por cento; destruíanse milleiros de postos de traballo e nos últimos anos téñense creado máis de 1 millón de empregos; e o PIB leva crecendo catro anos por enriba do 3 por cento”.
Neste sentido, Pedro Puy referiuse aos datos de paro rexistrado coñecidos esta mañá e subliñou a caída do paro de máis dun 6 por cento en España no último ano e o incremento de máis de 570.000 novos afiliados á Seguridade Social. No caso de Galicia, destacou que a baixada do paro no último ano achégase ao 11,5 por cento, “situando a cifra de parados en niveis moi inferiores ao que tiñamos cando entramos a Gobernar en 2009”. “A situación laboral non só mellora en termos de creación de emprego, senón tamén en incremento do emprego indefinido e a tempo completo”, indicou.
INCERTEZAS CO NOVO GOBERNO
Pedro Puy alertou que “novo goberno central abre moitas incertezas en Galicia”. Así, referiuse ás declaracións realizadas por dirixentes socialistas galegos nas que indican que a AP-9 e a súa transferencia non entran no trazo gordo do novo goberno e demandan a reforma do financiamento autonómico, cando o propio Pedro Sánchez xa anunciou no debate da moción que non se daban as condicións para esta modificación”.
“Desde a Xunta e o PPdeG imos seguir como ata o de agora porque nos debemos aos galegos, polo que continuaremos defendendo os intereses de Galicia con independencia de quen ocupe a Presidencia do Goberno de España”, asegurou.
