Santiago, 23 de xaneiro de 2017.- O portavoz do Grupo Popular, Pedro Puy, avogou porque a Comisión de investigación sobre as caixas de aforro galegas, que esta mañá se constituíu no Parlamento galego, elabore un ditame “que permita á sociedade galega ver como foi o proceso de transformación das caixas en bancos, cales foron os chanzos que motivaron esa evolución e extraer as responsabilidades políticas para saber como se adoptaron as decisións e quen foi o competente”.
Puy subliñou que no PPdeG foi o primeiro grupo parlamentario en solicitar a creación desta Comisión de Investigación, porque “somos os primeiros con interese en que se faga un informe que documente esa evolución e as circunstancias que acompañaron a todo ese proceso”.
CUMPRIR CO MANDATO
O portavoz popular concretou que a intención do Grupo Popular é cumprir co mandato para o que se creou esta Comisión de Investigación: analizar e avaliar a evolución económico-financeira das antigas caixas de aforros e as causas e responsabilidades da súa transformación en bancos, incluíndo as indemnizacións millonarias dos seus ex directivos, co obxecto de rematar os traballos realizados na IX Lexislatura.
Porén, indicou que “estamos abertos a que calquera cuestión relevante sobre a materia que estea fundamentada se poida incorporar ao ditame”. En concreto, lembrou que o Grupo Popular pediu, no seu momento, a incorporación da sentenza da Audiencia Nacional sobre as indemnizacións cobradas polos ex directivos de Novacaixagalicia, á que agora haberá que engadir a sentenza do Tribunal Supremo sobre a mesma materia. “Hai moitos outros documentos que son públicos e se poden incorporar para chegar ás mellores conclusións e enriquecer o informe”, sinalou Puy
REPASAR TODA A DOCUMENTACIÓN
Neste sentido, apuntou que os grupos da oposición “deberían repasar non so a documentación feita pública no seu día, senón especialmente tamén o informe publicado hai poucos días polo Tribunal de Cuentas, no que se refire explicitamente ao proceso de venda de Novacaixagalicia, para saber cales son as afirmacións que o órgano de control externo do sector público en España di con relación ao proceso de venda” das caixas galegas. “A partir de aí, calquera insinuación ou cousa que se diga ten moi pouco recorrido”, dixo.
“Non imos converter a comisión de investigación nun momento de atención mediática, con prexuizos ou insinuacións que non se sosteñen nin nos feitos nin da documentación obrante”, manifestou Pedro Puy. Así, subliñou que unha comisión de investigación “non é un sitio para traer prexuízos ou facer política partidaria, senón un sitio onde cando se fai unha afirmación ten que estar apoiado nunha documentación”. “Esa é a diferenza fundamental entre os que veñen a comisión a facer ruído mediático, aproveitando circunstancias concretas, e os que pretendemos que no documento, co respaldo de documentación oficial, poidamos chegar a conclusións razoables sobre o que pasou”, dixo.
INFORMACIÓN MOI DESTACABLE
O portavoz popular lembrou que na pasada lexislatura o Plan de Traballo da Comisión de Investigación fora aprobado por unanimidade de todos os grupos parlamentarios, coa comparecencia de 45 persoas, entre eles o ex gobernador do Banco de España, o Presidente da Xunta, os conselleiros con competencias na materia ou responsable da Comisión Nacional do Mercado de Valores. A estas comparecencias sumáronse “máis de 34 caixas de documentación, con 30.000 folios que a Xunta puxo a disposición desta Cámara”.
“Do que se trata é de rematar os traballos realizados durante a pasada lexislatura, na que se acumulou unha información moi destacable, aínda que non toda a que nos gustaría ter xuntado como consecuencia de que determinados organismos do Estado consideran, con respaldo xurídico, que a Comunidade Autónoma no pode investigar cuestións que son de competencia estatal”, sinalou.