Santiago, 20 de outubro de 2020.- O portavoz do Grupo Popular, Pedro Puy, afirmou hoxe no Pleno que a reactivación da Comisión de Investigación sobre as antigas caixas é unha “oportunidade para establecer feitos que están documentados e que a partir de aí cada un asuma as súas responsabilidades”.

A sesión plenaria aprobou esta mañá por unanimidade a creación dunha Comisión de investigación para analizar a evolución económico-financeira das antigas caixas de aforros e as causas e responsabilidades da súa transformación en bancos, incluíndo as indemnizacións millonarias dos seus ex directivos, co obxecto de rematar os traballos realizados na IX e X Lexislatura que están pendentes de conclusión.

FUSIÓN AVALIADA POR OITO INFORMES

Pedro Puy considerou “bo que o Parlamento galego fixe os feitos, os fixe no tempo, os fixe con datos e coa enorme documentación depositada nesta Cámara elaboremos un ditame” da Comisión de investigación das caixas. “Nós, desde logo, traballaremos para presentalo coa conciencia absolutamente limpa”, sinalou.

Na súa intervención, o portavoz popular lembrou que o proceso de fusión “estaba avaliado por oito informes, que consideraban que era a mellor opción e a máis viable”. Neste sentido, apuntou que “o informe de KPMG leva dez anos a disposición desta Comisión no Parlamento galego”, xunto ás 34 caixas con 180 documentos e máis de 30.000 follas que enviou a Xunta de Galicia”.

“Ademais, compareceron medio cento de persoas, o que supón que contemos cunha gran información” para elaborar o ditame desta comisión de investigación, porque “o país precisa protexerse contra declaracións descontextualizadas que queren destruír a nosa historia”, manifestou Pedro Puy.