Santiago, 12 de setembro de 2017.- O portavoz do Grupo Popular, Pedro Puy, demandou hoxe ao BNG que “deixe os papeis pintados” da súa proposta de cupo para Galicia porque sería “fondamente prexudicial para a Facenda galega e, en conxunto, para todos os galegos”. Puy referiuse ao último Informe anual de recadación tributaria, correspondente ao exercicio de 2014, do que se pode deducir que Galicia perdería cerca de 2.200 millóns de euros coa proposta dos nacionalistas.

Pedro Puy criticou que o BNG “defenda un sistema de financiamento que é prexudicial para Galicia e no peor momento: xusto cando se está a negociando a reforma do financiamento autonómico”. Así mesmo, lamentou que “defendan o illacionismo financeiro e económico para Galicia”.

CUSTES IMPRESIONANTES

Na súa intervención, o portavoz popular manifestou que os custos do cupo proposto polo BNG para Galicia “serían impresionantes”, porque suporía “perdas evidentes para a economía galega de introducirse o sistema foral de financiamento”.

“O gasto en pensións no último ano medra en Galicia tres veces máis que as cotizacións, nun momento no que se está a falar de cubrir o déficit da Seguridade Social cos tributos xerais”, afirmou Puy, quen lembrou ademais que nos últimos datos coñecidos das balanzas fiscais Galicia figura como beneficiada nun 6,85 por cento do PIB, fronte as perdas do 9,.82 por cento de Madrid ou do 5,02 de Cataluña. “En España hai solidariedade entre as comunidades autónomas, xa que as autonomías de rendas altas contribúen a financiar o gasto das de rendas baixas gracias ao sistema fiscal progresivo que temos”, dixo.

PROPOSTA NACIONALISTA RUINOSA

Ademais, e tomando os datos do Informe anual de recadación tributaria correspondente a 2014, o último liquidado polo sistema de financiamento autonómico, Pedro Puy situou en cerca de 2.200 millóns de euros a diferencia a favor de Galicia entre a recadación tributaria e os recursos finalmente liquidados. En concreto, a recadación da Axencia Tributaria en Galicia ascendeu nese ano a 5.777 millóns de euros, fronte aos 6.752 millóns de euros liquidados á Comunidade galega, aos que hai que sumar outros 1.110 millóns de euros da participación das corporacións locais nos tributos do Estado.

“O cupo é un mecanismo pouco xeneralizable, que remataría coa solidariedade entre autonomías existente en España e, polo tanto, prexudicaría a Galicia”, afirmou Puy. Deste xeito, considerou “absolutamente inconcebible que un grupo parlamentario que di defender a Galicia traia ao Parlamento unha proposta de financiamento que sería unha ruína para a Comunidade galega”.