6 de febreiro de 2023. O candidato do PP á alcaldía de Pontevedra, Rafa Domínguez, presentou hoxe ante o empresariado pontevedrés e acompañado polo presidente do Partido Popular de Galicia, Alfonso Rueda, as propostas e ferramentas que porá en marcha nos seus primeiros 100 días como alcalde “para reverter a perda de importancia e influencia de Pontevedra”.
Rafa Domínguez fixo un diagnóstico económico valéndose de diferentes datos da cidade. Comezando polo feito de que, en canto ao desemprego, Pontevedra lidera o paro en tres de cada catro trimestres: “O triste é que encabezamos o desemprego feminino e o xuvenil. Somos os campións do paro”. Ademais, a cidade é a vila galega con menor número de creación de empresas: “Pontevedra estase a converter nunha cidade dormitorio. Somos a cidade de onde máis xente marcha para traballar e estudiar”.
Logo da análise, Domínguez avanzou as propostas que porá en marcha nos seus 100 primeiros días como alcalde. O primeiro, un novo PXOM, xa que o actual data de 1989: “Vemos como moitos proxecto acumulan retrasos e dificultan enormemente que novas inversións cheguen a cidade. Ademais, iniciaremos os trámites necesarios para modificar o Peprica”.
Nesta liña, nos primeiros 100 días, Domínguez iniciará tamén todas as medidas organizativas, xurídicas e administrativas para que as licenzas municipais déanse en tempo e forma. “Conseguir unha licenza en tempo e forma é absolutamente imposible. Organizaremos os servicios técnicos e crearemos unha oficina especifica, dotada de recursos suficientes, para a súa concesión”, avanzou o popular.
En relación a isto, engadiu que incorporará o uso das ECCOM, entidades certificadores de conformidade municipal, “o que permitirá que as obras se inicien o día seguinte da súa presentación”.
Outro proposta, xa tratada polos populares, é a solicitude de gratuidade do tramo de autopista AP-9 entre Pontevedra e Barro. “Entendemos que esta medida melloraría enormemente a competitividade e produtividade das nosas empresas”, destacou. En paralelo, Domínguez creará aparcamentos disuasorios ben comunicados e mellorará as liñas públicas de transporte.
Sobre impostos, o presidente local reducirá o IBI urbano do 0,64 ao 0,6: “Abriremos diversos tipos de subvencións por un importe 1,6 millóns de euros, nun plan global anual que permitirá non só emprender, senón tamén mellorar a eficiencia enerxética, innovar e adecuar as instalacións”.
Noutro orde, Domínguez avanzou diferentes ferramentas económicas que poñerá en marcha ca súa chegada á alcaldía: programas de turismo, de atracción de empresas, creación dun hub tecnolóxico, atracción de nómades dixitais, a ampliación e mellora do solo industrial, abrir Pontevedra á ría, creación de instalacións deportivas, reforzo dos servicios sociais e creación dun novo espazo socio-sanitario, entre outros.
“Dóeme ver como a diario Pontevedra perde centros de toma de decisións. Estou seguro, aínda que non será fácil, de que podemos levar a cabo as reformas necesarias para xerar un cambio de tendencia en Pontevedra”, resumiu o popular.
ALFONSO RUEDA: “SE A ECONOMÍA NON VAI BEN, NON HAI FUTURO”
O presidente do Partido Popular de Galicia, Alfonso Rueda, foi o encargado de inaugurar este almorzo económico e fíxoo poñendo en valor que o tecido empresarial é “necesario e imprescindible” na medida en que “crea riqueza, dá traballo e se esforza día a día por mellorar”.
“O que deben facer as administracións é axudar e apoiar ao tecido empresarial e nunca estorbar. Porque a economía é fundamental e non a moven as administracións, senón a xente”, afirmou.
Alfonso Rueda reivindicou ao PP de Pontevedra como “un partido que aspira a gobernar para colocar esta cidade fóra de ideoloxías e condicionantes que non sexan intentar mellorar” e ao seu candidato, Rafa Domínguez, como “un médico que se complicou a vida meténdose en política e que só quere facer as cousas ben”.
Recordando as últimas eleccións municipais, o líder dos populares galegos puxo en valor “o moi bo resultado en Pontevedra nun momento no que o PP tiña as cousas moi difíciles” e mostrouse convencido de que o resultado será aínda mellor o 28 de maio: “Nestes catro anos Rafa Domínguez non fixo máis que mellorar, escoitar, aprender, facer unha oposición útil e agora chegou o seu momento”.
“A Pontevedra fáltanlle moitas cousas e está perdendo moitos trens nun momento no que hai tantas oportunidades para aproveitar. Porque é un erro vivir sempre do mesmo, repetir sempre o mesmo e non mirar cara a adiante mentres outros aproveitan as oportunidades que aquí se deixan escapar por incapacidade ou por inercia. Pero aínda está da nosa man reverter esta situación”, remarcou.
Referíndose de xeito especifico ao futuro de Ence, Alfonso Rueda asegurou que non se trata só do futuro dunha empresa: “Son centos de familias e a potencia industrial de Pontevedra. A cidade non se pode permitir dar ese paso atrás e converterse nunha illa que non quere empresas”.
“Faremos todo o posible para que, pase o que pase, Pontevedra siga tendo futuro e por suposto futuro económico”, concluíu o presidente do PPdeG antes de referirse novamente a Rafa Domínguez: “Despois de tantos anos, chega o momento de escoitar a quen ten ideas novas”.
