Alfonso Rueda: “Se os galegos me dan cinco minutos no colexio electoral, eu dareilles catro anos de traballo con convencemento e eficacia”

Hoxe, nun mitin no Multiusos do Sar en Santiago ao que asistiron 1.500 persoas e no que tamén participaron os cabezas de lista do PPdeG nas catro provincias galegas

  • “O domingo vai haber 11 papeletas diferentes, pero a decisión redúcese a dúas: a nosa ou as outras 10”, remarca pedindo aos galegos que opten pola papeleta da Galicia unida, centrada e fiable que representa o PPdeG
  • “Quero unha Galicia que siga tendo claro o que ten que facer e progrese sen escusas, sen demoras e desde o primeiro momento”, subliña

O presidente e candidato do PPdeG, Alfonso Rueda, asegurou hoxe que se os galegos lle dedican cinco minutos o próximo domingo indo ao colexio electoral, el daralles a cambio catro anos de traballo con convencemento, con eficacia e cunha única motivación: servir a Galicia.

Ante unha audiencia de 1.500 persoas, o líder dos populares galegos agradeceu aos seus o traballo realizado nestes días nunha campaña dunha gran mobilización que agora, explicou, hai que trasladar ás urnas para acadar unha vitoria “histórica” para “darlle certezas a Galicia e non fallar a todo un país que nos está observando”.

“Pelexemos ata o último minuto con ganas e ambición por mellorar a Galicia que queremos, con confianza pero sen confiarse. O importante é que o 18 de febreiro ninguén se quede na casa e que ningún voto se quede sen escano”, afirmou.

Apelou así á confianza de “todos os galegos que queiran un goberno unido e non unha Xunta dividida polo separatismo” e sen importar o que se votara antes porque “estas eleccións son diferentes e decisivas” na medida en que “o que está en xogo é o que temos en común e o futuro que temos por diante”.

Dirixiuse directamente aos votantes socialistas “que non queren o separatismo que o PSOE está disposto a traer a Galicia” e a todos aqueles que en anteriores eleccións optaran por outra opción política, incidindo en que “os votos que non sexan para o PPdeG acabarán en coalicións onde o nacionalismo será quen mande”.

Por isto pediu aos seus “un último esforzo para parar a soberbia, a imposición e o separatismo” e que traballen “a favor e nunca en contra de ninguén” para explicar aos galegos o que realmente está en xogo o próximo domingo.

“O domingo vai haber 11 papeletas diferentes, pero a decisión redúcese a dúas: a nosa ou as outras 10. Se non é a do PPdeG, son todas as demais”, remarcou pedindo aos galegos que opten pola papeleta da Galicia unida, centrada e fiable. A única papeleta que posibilitará, tal e como engadiu, que “avancemos xuntos no camiño que nos queda por facer”.

COMPROMISOS PARA OS PRIMEIROS 100 DÍAS DE GOBERNO

Rueda explicou acto seguido que avanzar significa “avanzar en educación, en conciliación, en defender ás familias, en apoiar ás mulleres, en axudar aos maiores, en baixar impostos”. Apostou así por unha Galicia segura, tranquila e estable na que se promocione o deporte entre mozos e maiores, na que a sanidade pública siga mellorando e na que se respecte o enorme patrimonio natural que temos.

“Quero unha Galicia que siga tendo claro o que ten que facer sen que ninguén nos diga que temos que cambiar, que progrese sen escusas, sen demoras e desde o primeiro momento”, propuxo comprometéndose a traballar desde o primeiro día e sen perder nin un minuto. Neste sentido afirmou: “Eu non preciso adaptación, nin período de gracia, nin pedirlle perdón ou permiso a outros. Só necesito a confianza dos 38 deputados que representarán á maioría dos galegos”.

O presidente e candidato do PPdeG puxo a disposición de todos o seu plan para que “Galicia funcione desde o primeiro día” e relatou algunhas das medidas que porá en marcha nos seus primeiros 100 días de goberno: a implantación da matrícula universitaria gratuíta, a rebaixa do imposto de sucesións aos herdeiros colaterais, un programa para fomentar a primeira experiencia de mozas e mozos na empresa, o custo cero do solo empresarial nos polígonos autonómicos, o inicio das autovías Tui-A Guarda e Nadela-Sarria, a realización de cribados de cancro de pulmón e de próstata, a licitación de 400 vivendas públicas e a cobertura dos gastos de adopción de animais.

“Queremos marcar a diferenza entre ter o apoio para empezar a traballar desde o primeiro día e o barullo que promove o multipartito”, concluíu Rueda apelando á confianza dos galegos para lograr que Galicia non pare e se supere a si mesma.

Alfonso Rueda reivindica ao PPdeG como o partido do rural e comprométese a seguir defendéndoo con orgullo

explotación gandeira en Friol

Hoxe, nunha visita a unha explotación gandeira en Friol acompañado polo candidato pola provincia de Ourense José González, o candidato pola provincia de Lugo Enrique Barreiro e o alcalde José Ángel Santos

  • Anuncia que impulsará a conectividade nas zonas rurais proporcionando servizos alternativos de conexión a Internet cando non sexa posible contar cunha conexión estable e de calidade
  • “É a nosa responsabilidade que o rural galego siga sendo atractivo e rendible. Porque fixar negocios no rural é tamén fixar poboación e permitir, polo tanto, que se poida vivir do rural e no rural”, subliña

O presidente e candidato do PPdeG, Alfonso Rueda, anunciou hoxe que impulsará a conectividade nas zonas rurais proporcionando servizos alternativos de conexión a Internet cando non sexa posible contar cunha conexión estable e de calidade.

Sendo consciente de que o traballo nas explotacións agrarias e gandeiras require cada vez máis dunha boas conexións, o líder dos populares galegos aposta así por seguir impulsando medidas para garantir no rural todos os servizos básicos que se poden desfrutar no resto de Galicia.

Puxo así en valor iniciativas pioneiras na nosa Comunidade como as Casas Niño ou a recentemente anunciada axuda para sufragar desde o Goberno galego o 100% dos gastos de adaptación das televisións das vivendas en zonas de sombra polo apagón da TDT SD fixado para hoxe. Deste xeito, a Administración autonómica asumirá o custo do novo receptor necesario e garantirá que “todo o mundo teña garantido o dereito fundamental de acceso á información”.

“É a nosa responsabilidade que o rural galego siga sendo algo atractivo e rendible economicamente. Porque fixar negocios no rural é tamén fixar poboación e permitir, polo tanto, que se poida vivir do rural e no rural”, subliñou Rueda ao tempo que vinculaba o futuro de Galicia ao futuro do seu rural e avogaba por seguir mellorando as infraestruturas e continuar axudando tanto a particulares como aos pequenos concellos.

Durante a súa visita á Gandería SAT Os Carrís, ubicada na parroquia de Nodar (Friol), acompañado por máis de medio cento de gandeiros do municipio, o presidente e candidato do PPdeG quixo poñer de manifesto a mellora experimentada por este tipo de explotacións en Galicia.

Falou así das permutas de terra para facilitar a dispoñibilidade e rendibilidade dos terreos ou a introdución de nova maquinaria “para modernizar as explotacións, facilitar o traballo, obter maior rendibilidade e facer máis atractivo este traballo”.

A proba deste éxito está, para Alfonso Rueda, na remuda xeracional que se está dando nas explotacións agrarias galegas coa incorporación de xente nova que “ve que vale a pena e aprecia moito marxe de mellora en cuestións como a innovación ou a tecnoloxía”.

Destacou así mesmo que Galicia é líder do sector leiteiro español (producimos ao redor do 42% do leite a nivel nacional) e que somos a autonomía que más creceu en produción de leite nos últimos cinco anos.

O presidente e candidato do PPdeG concluíu manifestando o total apoio do seu partido ás reivindicacións que está facendo o sector primario en Galicia e en toda España “para trasladar a Europa a mensaxe de que a competitividade das explotacións pasa tamén por unha normativa que teña en conta que, sen discutir obxectivos medioambientais, hai que vivir sobre o territorio e todo se pode compatibilizar”.

explotación gandeira en Friol
explotación gandeira en Friol
explotación gandeira en Friol
explotación gandeira en Friol

Alfonso Rueda anuncia que nos 100 primeiros días porá en marcha a gratuidade da matrícula universitaria e a ampliación da rebaixa do imposto de sucesións

Nun mitin celebrado onte en Ferrol, coa participación do cabeza de lista pola provincia da Coruña, Diego Calvo, da candidata Martina Aneiros e do alcalde José Manuel Rey Varela

  • Pide o apoio maioritario dos galegos e asegura que o seu equipo comezará a traballar desde o mesmo 19 de febreiro
  • Engade para esa primeira etapa de goberno a gratuidade dos primeiros gastos para adoptar un animal de compañía, o custo cero do solo empresarial público durante 8 anos e o inicio da construción de 375 vivendas de promoción pública
  • “Só o Partido Popular de Galicia se presenta ante os galegos coa experiencia, a solvencia e a capacidade de traballo necesarias para que a nosa terra non perda nin un minuto”, salienta

O presidente e candidato do Partido Popular de Galicia, Alfonso Rueda, pediu en Ferrol o voto maioritario dos galegos para que “desde o mesmo día 19 de febreiro o Goberno comece a traballar” e comprometeuse a poñer en marcha nos 100 primeiros días medidas como a gratuidade da matrícula universitaria; a rebaixa do impostos de sucesións para irmáns, tíos e outros parentes; a gratuidade dos primeiros gastos para adoptar un animal de compañía; custo cero durante oito anos do solo público empresarial; e iniciar a construción de 375 vivendas de promoción pública.

Alfonso Rueda afirmou que quere poñerse a gobernar “desde o primeiro día”, polo que avanzou que “desde o mesmo 19 de febreiro nos poñeremos a traballar para aprobar un bo número de medidas nos 100 primeiros días de goberno”. Neste sentido, indicou que “para que te tomen en serio hai que facer propostas serias”, polo que asegurou que “non perderemos o tempo para ver a que temos que renunciar, como traen os gobernos de coalición de esquerdas”.

Así, concretou o compromiso de aplicar neste tempo diversas medidas recollidas no programa electoral do PPdeG: a matrícula universitaria gratuíta de cada materia en todos os cursos; iniciar a rebaixa do imposto ás herdanzas para irmáns, tíos e outros parentes, ao tempo que se mantén a práctica eliminación para fillos e pais; a gratuidade do chip e primeiras vacinas dos animais de compañía que se adopten; solo público empresarial da Xunta a custo cero durante os primeiros 8 anos de actividade; e iniciar a construción das 375 primeiras vivendas de promoción pública, das máis de 4.200 previstas para toda a lexislatura.

O presidente do PPdeG lembrou que “temos un programa electoral para desenvolver nos vindeiros catro anos con 872 medidas, todas elas taxadas e aprobadas polo conselleiro de Facenda”, polo que agora “o noso pacto é con todos os galegos, e eles serán os únicos que terán que pedirnos contas”

QUE GALICIA SE SUPERE A SI MESMA

“Quero que Galicia se supere a si mesma e cada día avance máis”, asegurou o candidato do PPdeG, quen alertou de que “a alternativa é unha sucursal do Goberno central”. Deste xeito, engadiu que “unha Galicia que non quere parar non pode permitirse gobernos sen experiencia e que non teñan manexado un euro público na súa vida”. E subliñou que “só o Partido Popular de Galicia se presenta ante os galegos coa experiencia, a solvencia e a capacidade de traballo necesarias para que a nosa terra non perda nin un minuto”.

Alfonso Rueda tamén tivo palabras concretas sobre Ferrol e sinalou que “no diálogo, a colaboración e o cofinanciamento entre administracións está o segredo, e por iso aquí chegamos a acordos que noutros sitios son imposibles”. Así, en concreto, impulsaranse a fase final das obras de ampliación e reforma do complexo hospitalario de Ferrol, cun investimento total superior aos 131 millóns de euros; levarase adiante o proxecto Abrir Ferrol ao Mar; e sairá adiante o programa de mellora de infraestruturas deportivas, cun investimento de 18 millóns de euros.

“Ferrol, cunha Xunta do PPdeG, seguirá medrando, porque precisa un trato xusto e afastado das promesas dun Goberno central que son unicamente propaganda”, destacou.

GOBERNOS ESTABLES QUE FUNCIONAN

Previamente, o alcalde de Ferrol, José Manuel Rey, manifestou que “estamos vendo como con gobernos estables, Ferrol funciona e Galicia funciona”. “Durante os últimos seis meses vimos como Ferrol avanzou con proxectos dos que se levaba moitos anos falando pero non había nada”, lembrou.

“Nós presentamos feitos e xestión; os outros só palabras e promesas”, subliñou, para apuntar que “eu hoxe non veño aquí a pedirvos o voto, senón a confianza, confianza aos que nos votastes sempre, a todos os que sen votar ao PP confiastes en min e aos que están pensando en quedarse na casa: que saiban que en Alfonso Rueda teñen unha opción”.

Alfonso Rueda anuncia a ampliación do acceso á fecundación in vitro na sanidade pública ás mulleres de ata 45 anos e a eliminación do límite dun único fillo para o acceso a esta fórmula

Nun almorzo informativo celebrado esta maña na Coruña ao que asistiron 600 persoas e no que foi presentado polo presidente do PP local, Miguel Lorenzo

  • Ademais, todas as mulleres que desexen poderán conxelar os seus óvulos no sistema público, xa que tamén se eliminará o requisito de ter unha patoloxía para solicitar este servizo
  • Como novidade, anunciou tamén a posta en marcha do Intercity express, un transporte por estrada en autobús para conectar as sete cidades galegas, sen paradas intermedias e a prezos asumibles
  • O presidente salientou que os 450 millóns de euros que se investirán no CHUAC suporán o maior gasto realizado en infraestruturas sanitarias que xamais se fixo en Galicia

O presidente e candidato do PPdeG, Alfonso Rueda, anunciou hoxe na Coruña que na vindeira lexislatura se dará “un paso máis no impulso de medidas contra o inverno demográfico” co aumento dos 40 aos 45 anos a idade para o acceso á fecundación in vitro na sanidade pública galega e a eliminación dun único fillo para o acceso a esta fórmula, así como a introdución da posibilidade de que todas as mulleres que desexen poidan conxelar os seus óvulos no sistema público coa eliminación do requisito de ter unha patoloxía para solicitar este servizo

Nun almorzo informativo celebrado esta mañá con representantes da sociedade coruñesa, Alfonso Rueda destacou os grandes esforzos feitos nestes anos na mellora da sanidade pública galega e recoñeceu a necesidade de “seguir mellorando e impulsando iniciativas beneficiosas para todos os galegos”. En concreto, destacou que a Xunta investirá no CHUAC cerca de 450 millóns de euros: “Supón o maior investimento en materia de infraestruturas sanitarias que xamais se fixo en Galicia”. Neste momento xa se levou adiante a fase 0 –por importe de 13 millóns de euros– para a creación dunha nova planta de hospitalización, un novo espazo do hospital de día, o aumento do número de camas para críticos e a ampliación tamén dos servizos de urxencias. Ademais, investíronse case 30 millóns de euros na dotación de novos equipamentos e nova tecnoloxía, como resonancia magnética, equipos TAC, salas de hemodinámica, radioloxía bascular ou neurorradioloxía.

“Agora levaremos adiante a Fase 1, que suporá 40 millóns de euros para a construción da torre polivalente e os novos accesos, en colaboración co Concello da Coruña. Queda pendente de licitar ao longo deste ano a fase 2, que suporá un investimento de 228 millóns de euros; e restaría a fase 3, cun custo estimado de 157 millóns de euros”, explicou.

MÁIS ACTUACIÓNS EN MATERIA DE SANIDADE

O líder dos populares galegos lembrou a recente adxudicación de 16 prazas de médicos de urxencias e destacou a entrada en funcionamento do novo Hospital de día de saúde mental infanto-xuvenil no Materno. Tamén se referiu, no ámbito da Atención Primaria, á posta en marcha do centro de saúde de Novo Mesoiro e amosou o compromiso de avanzar na construción do centro de saúde de Santa Lucía, para o que avogou pola colaboración municipal para comezar as obras no antigo mercado.

O candidato do PPdeG agradeceu a colaboración da Fundación Amancio Ortega na dotación de aparatos de alta tecnoloxía na sanidade galega e na construción de residencias de maiores nas sete cidades galegas. No caso concreto da Coruña, destacou que a residencia estará operativa este ano para albergar a 150 persoas.

“Sempre hai que dar pasos cara adiante e en Galicia hai unha aposta decidida por apoiar ás familias e loitar contra todo o que supoñen os prexuízos do inverno demográfico”, manifestou Rueda lembrando iniciativas postas en marcha neste sentido como a gratuidade das escolas infantís, as creación de casas-niño en máis de 100 concellos galegos, as axudas para actividades extraescolares ou de reforzo escolar, así como a gratuidade da universidade para os estudantes que aproben.

Neste sentido, o presidente do PPdeG anunciou “un paso máis no apoio ás familias e daquelas mulleres que queiran ter fillos”, ofrecendo un novo estímulo para loitar contra a baixa natalidade. Así, explicou que na actualidade os procesos de fecundación in vitro na sanidade pública galega está limitados ás mulleres de ata 40 anos e para un único fillo. Pero “a partir de agora imos apoiar con máis intensidade a estas mulleres e propoñemos que ese proceso se estenda ata os 45 anos e non só para o primeiro fillo, senón tamén para o segundo e sucesivos”, subliñou.

Alfonso Rueda apuntou, ademais, que “ata agora a conxelación de óvulos na sanidade galega só se podía facer se existía unha patoloxía que xustificara a solicitude da muller, pero a partir da vindeira lexislatura calquera muller que desexe conxelar no sistema público poderá facelo, eliminando o requisito de ter unha patoloxía”. Son, segundo subliñou “solucións prácticas para loitar contra o problema demográfico que temos”.

Na súa intervención, o candidato do PPdeG tamén falou de mobilidade, destacando a construción, xunto co Goberno central e o Concello, da nova estación intermodal, na que a Xunta investirá 40 millóns de euros. “Queremos que a intermodalidade chegue tamén á Coruña e chegue a tempo para atender as necesidades da Alta Velocidade ferroviaria”, sinalou ao tempo que lamentaba descoñecer “cantos trens van vir e cantas frecuencias”.

Ademais, avogou por seguir reivindicando o Corredor Atlántico de Mercadorías, sobre o que pediu “pasar das palabras aos feitos”; e dixo que “seguiremos impulsando o transporte público por estrada, coa gratuidade do servizo para menores de 21 anos e, agora, tamén para maiores de 65 anos”; e a conxelación das peaxes nas autoestradas de titularidade da Xunta “mentres as tarifas da AP-9 e a AP-53 volveron a subir e situarse entre as máis caras de España”. Como novidade, anunciou a posta en marcha do Intercity express, un transporte por estrada en autobús para conectar as sete cidades galegas, sen paradas intermedias e a prezos asumibles.

No ámbito da vivenda, recordou as 40 vivendas que recentemente se entregaron no barrio de Xuxán e avanzou que se prevé a construción de 1.600 máis nesta zona, entre as que fará directamente a Xunta e aquelas de promotores privados.

RECUPERAR A FACHADA MARÍTIMA

Rueda incidiu na “oportunidade que supón o proxecto para recuperar a fachada marítima da Coruña e abrir a cidade ao mar”, e reiterou que “a Xunta ten dispostos para este mesmo ano 20 millóns de euros para colaborar co Concello e recuperar para os coruñeses o fronte marítimo”.

Para rematar, o presidente do PPdeG falou de educación, cifrando en 22,4 millóns de euros o investimento previsto no plan a catro anos para levar a cabo obras en 45 colexios e institutos da cidade; e tamén de deporte, con 9,2 millóns de euros destinados ao apoio a clubs, becas a deportistas, ademais doutros 7,5 millóns para remodelación ou mellora de instalacións deportivas coruñesas.

De cara ao futuro, Alfonso Rueda considerou “un éxito colectivo e unha actuación intelixente conseguir a sede a Axencia Española de Supervisión da Intelixencia Artificial (AESIA) en A Coruña, a opción que tiña máis posibilidades que ningunha outra”. Ademais, sinalou que a Cidade das TIC, –que xa conta con dous edificios funcionando neste momento– seguirá contando co apoio da Xunta para a construción este ano dun Centro de Formación Avanzada en transición dixital e verde, así como a posta en marcha do centro de investigación CITIC 2.

Alfonso Rueda comprométese a unificar todas as convocatorias de axudas a autónomos nun único procedemento de solicitude

Hoxe, nunha visita á Panadaría Fachal de Boqueixón acompañado pola cabeza de lista pola provincia de Ourense, Elena Rivo, o presidente da Comisión de Emprego do PPdeG, Pablo Fernández e o alcalde Ovidio Rodeiro

  • “O obxectivo é que quen teña dereito a esas axudas se atopen cun único formulario e non teñan que perder o tempo que necesitan para xestionar os seus negocios, nin dedicar recursos adicionais a facer un trámite burocrático que é posible simplificar”, explica
  • O presidente ten claro que “se queremos unha Galicia que funcione, temos que facer que a vida dos que xeran riqueza e emprego sexa un pouco máis fácil non só axudándolles, senón tamén sendo eficaces na tramitación e concesión das axudas”

O presidente e candidato do PPdeG, Alfonso Rueda, comprometeuse hoxe a simplificar e unificar todas as convocatorias de axudas a autónomos que se promovan desde o Goberno galego nun único procedemento de solicitude e así facilitar tanto a súa tramitación como a súa obtención.

“O obxectivo é que quen teña dereito a esas axudas se atopen cun único formulario e non teñan que perder o tempo que necesitan para xestionar os seus negocios, nin dedicar recursos adicionais a facer un trámite burocrático que é posible simplificar”, explicou o líder dos populares galegos poñendo en valor que o Goberno galego dedica un promedio de 50 millóns de euros ao ano a axudar aos autónomos a través de diversas convocatorias que “é necesario e posible simplificar”.

Unha axuda que, subliñou, foi moi importante en “momentos de dificultade económica” como aconteceu na pandemia da Covid ou máis recentemente coa suba de custos enerxéticos e produtivos derivada da guerra de Ucraína. E neste sentido destacou que “no momentos nos que os autónomos necesitaron máis axuda, atoparon no Goberno galego unha Administración que foi rápida na entrega deses cartos que en moitos casos foron fundamentais para que tivesen futuro”.

En declaracións aos medios logo de realizar unha visita ao obradoiro da Panadaría Fachal (Boqueixón), onde ademais tivo a oportunidade de ser partícipe do proceso de elaboración artesanal do pan, Rueda reivindicou o traballo que día a día fan os autónomos galegos e o papel fundamental que desempeñan dentro do tecido produtivo e económico de Galicia grazas á súa iniciativa, á súa capacidade para facer fronte ás dificultades e a súa función como xeradores de emprego e riqueza.

“Para ser autónomo hai que ser moi valente, ter moita ilusión e moito compromiso. Polo que, dado o dificultoso que é sacar adiante un negocio día a día, o mínimo que poden esperar das Administracións é que lles ofrezamos certezas, estabilidade e axuda cando sexa preciso”, asegurou.

De feito, Rueda ten claro que “se queremos unha Galicia que funcione, temos que facer que a vida dos que xeran riqueza e emprego sexa un pouco máis fácil non só axudándolles, senón tamén sendo eficaces na tramitación e concesión das axudas”.

Alfonso Rueda aposta polo avance de Santiago co investimento de máis de 70 M€ no CHUS e a creación dun Centro Integrado de FP no eido sanitario

Hoxe, nun almorzo informativo coa sociedade compostelá no que foi presentado polo candidato pola provincia da Coruña Borja Verea

  • Comprométese a seguir mellorando as infraestruturas e os equipamentos da cidade e, nesa liña, ofrece a súa colaboración para a posta en marcha dunha piscina olímpica en Santa Marta e a reforma integral do Salón Teatro
  • “Santiago é marca Galicia e todo o que veña a Santiago ten repercusión en toda a Comunidade”, sostén ao tempo que reivindica un “turismo amable e acolledor” co horizonte posto xa no Xacobeo 2027

O presidente e candidato do PPdeG, Alfonso Rueda, manifestou hoxe o seu compromiso co avance e o progreso de Santiago de Compostela no eido socio-sanitario destacando un investimento de máis de 70 millóns de euros no CHUS e a súa proposta de poñer en marcha un Centro Integrado de FP de ciencias da saúde en Conxo.

O líder dos populares galegos explicou esta mañá nun almorzo informativo coa sociedade compostelá a súa intención de crear un “polo de ciencias da saúde” na USC para integrar as ensinanzas de Medicina, Farmacia e Enfermería.

Do mesmo xeito, e dentro da súa aposta por seguir potenciando a Formación Profesional, anunciou a creación dun Centro Integrado de FP en Conxo con 2.000 prazas para mellorar a oferta educativa vinculada ao campo sanitario e ás necesidades profesionais neste ámbito.

Rueda remarcou o seu compromiso por seguir mellorando as infraestruturas e os equipamentos da cidade e, nesa liña, ofrece a súa colaboración para a posta en marcha dunha piscina olímpica en Santa Marta e a reforma integral do Salón Teatro. Na mesma liña que outros proxectos que xa son unha realidade como o Centro de servizos innovadores para empresas biotecnolóxicas no parque empresarial da Sionlla ou o Centro de Supercomputación de Galicia.

No eido das infraestruturas, o líder dos populares galegas incidiu na importancia de garantir a conectividade de Santiago e lamentou a falta de compromiso do Goberno central en dúas cuestións que considera fundamentais para avanzar neste eido: a chegada da Alta Velocidade á capital galega, a mellora dos servizos ferroviarios e a conxelación das peaxes da AP-9 e da autoestrada a Ourense “como xa fai o Goberno galego nos tramos e vías que son da súa competencia”.

Puxo en valor, en cambio, a nova senda peonil e ciclista que se porá en marcha entre O Milladoiro e a nova estación intermodal, que se completará ademais cunha conexión ao CHUS e ao novo complexo administrativo de San Caetano. “Trece quilómetros que suporán un investimento de 12 millóns de euros pero que valen a pena”, sinalou.

Recordou así mesmo o recente inicio das obras do centro de protonterapia en Compostela, o primeiro de España, que contribúe a consolidar a cidade como “capital sanitaria” e volveu insistir no seu compromiso de poñer en marcha o aparcamento do CHUS.

NOVO ANO SANTO EN 2027 NO HORIZONTE

Nun lugar turisticamente referente, Alfonso Rueda quere que o número de visitantes a Galicia e á súa capital non teña freo e que desde o sector e as Administracións se siga ofrecendo “un destino amable e acolledor” fronte aos discursos de “turismofobia” que promoven algúns.

E xa co horizonte no Xacobeo 2027, o líder dos populares galegos insiste na necesidade dunha maior implicación do Goberno central neste acontecemento e avogou abertamente por vantaxes fiscais para favorecer os patrocinios. “Santiago é marca Galicia e todo o que veña a Santiago ten repercusión en toda a Comunidade”, concluíu neste sentido

Paula Prado acusa a Pedro Sánchez de volver “tomarlle o pelo aos galegos” coas axudas para vivenda prometidas hai 9 meses e desbotando a eliminación das peaxes na AP-9 e AP-53

El puente de Rande de la Autopista del Atlántico
  • A secretaria xeral do PPdeG sinala que “pouco beneficio trae a Galicia, máis alá de embarrar a campaña”
  • Recorda que as axudas para vivenda foron unha das promesas do PSOE nas eleccións municipais e que a día de hoxe aínda non son unha realidade
  • A número dous dos populares galegos cree que a negativa a rebaixar as peaxes das autoestradas estatais non se produciría no caso de Cataluña ou o País Vasco: “Se dependese dos votos de Galicia, estas peaxes xa non existirían”

A secretaria xeral do PPdeG, Paula Prado, critica que Pedro Sánchez “volvera esta fin de semana a Galicia para volver tomarlle o pelo unha vez máis aos galegos” anunciando unhas axudas para a compra de vivenda que xa prometera hai nove meses e desbotando a promesa do seu propio candidato de eliminar as peaxes das autoestradas AP-9 e AP-53.

A número dous dos populares galegos explica que as axudas para a compra de vivenda xa foran un dos anuncios de Pedro Sánchez na campaña das eleccións municipais e “a día de hoxe non foi capaz de poñelas en marcha”. O cal contrasta co feito de que “os galegos xa gozamos destas axudas para mercar vivenda grazas á eficacia dos gobernos do PPdeG”, que supuxeron un investimento de máis de 700 millóns de euros e beneficiaron a preto de 140.000 familias galegas.

A TRANSFERENCIA DA AP-9, FÓRA DA DOUTRINA SOCIALISTA

“Pouco beneficio trae Sánchez a Galicia, máis alá de embarrar a campaña”, lamenta a secretaria xeral do PPdeG poñendo como exemplo claro as peaxes das autoestradas AP-9 e AP-53. Neste sentido, lembrou que estas peaxes subiron un 6% o pasado 1 de xaneiro: “Comprobámolo os usuarios cada vez que pasamos pola cabina, pagando polo uso das autoestradas máis caras de España”.

Recordou ademais que os socialistas galegos teñen anunciado a eliminación das peaxes na AP-9 e na AP-53, “pero o propio Pedro Sánchez, nunha entrevista nun xornal galego, bota abaixo esta promesa e incluso fuxe de falar dela”. Unha actitude que, segundo Paula Prado, sería moi diferente se se tratara de autoestradas en Cataluña ou no País Vasco: “Se dependese dos votos de Galicia, estas peaxes xa non existirían”.

Para rematar, Paula Prado lamenta que a transferencia a Galicia da AP-9 “xa non figure na doutrina socialista” e critica ao PSOE que “voten unha cousa no Parlamento galego para despois torpedeala todo o que poden no Congreso co obxectivo de que non chegue ao seu fin”.

Alfonso Rueda reivindica que a prioridade do seu programa é axudar ás familias mentres que a do nacionalismo é a independencia de Galicia

Hoxe, nun mitin no Barco de Valdeorras ao que asistiron 600 persoas e no que tamén participaron o presidente do PP de Castela e León, Alfonso Fernández Mañueco, o líder provincial do PP de Ourense, Luis Menor, o candidato pola provincia Xosé Manuel Merelles e a alcaldesa de Carballeda de Valdeorras, Mª Carmen González

  • Defínese con orgullo como un “político xestor” fronte a aqueles que “consideran absurdo e unha perda de tempo dedicarse a administrar ben os cartos da xente para facer cousas”
  • “A miña principal motivación para querer seguir sendo presidente de Galicia non é impoñer a miña ideoloxía, nin adoutrinar, nin derrotar a ninguén. A miña primeira e única motivación é servir a Galicia e que sigamos mellorando”, asegura
  • Chama ao voto “para que a Galicia orgullosa de si mesma poida seguir estándoo, para que a Galicia aberta siga sento unha terra amable para os que veñen e para que Galicia próspera siga aproveitando todas as súas posibilidades para seguir crecendo”

O presidente e candidato do PPdeG, Alfonso Rueda, reivindicou hoxe que o seu partido é o que apoia ás familias como nos países máis avanzados de Europa fronte a un nacionalismo que só busca dividir: “A prioridade do noso programa é axudar ás familias. A do nacionalismo, a independencia”.

Asegurou neste sentido que o seu programa é “o mellor” porque “toma como base o que xa está feito e pensando no que podemos facer para seguir avanzando e progresando”. Por iso pediu o voto sacando peito de todo o conseguido “porque se conseguiu cos cartos de todos e cun Goberno que se dedicou a xestionar tomándose moi en serio cada euro dos galegos”.

De feito, reivindicouse con orgullo como un “político xestor” fronte a aqueles que “consideran absurdo e unha perda de tempo dedicarse a administrar ben os cartos da xente para facer cousas”. E acto seguido explicou a diferenza entre os políticos que cumpren co que prometen e aqueles que só fan promesas. Algo para o que tomou de exemplo o acontecido nos incendios que afectaron á comarca de Valdeorras hai dous anos.

“Pedro Sánchez veu de mala gana e a prometer axudas para os damnificados. Sen embargo, mentres que as axudas do Goberno galego estaban convocadas á seguinte semana e comezaron a pagarse tres meses despois, as que prometeu Sánchez seguen sen pagarse dous anos despois”, recordou para poñer en evidencia a diferenza entre “a política boa e a política mala”.

Rueda apuntou que os bos datos de emprego, endebedamento, exportacións, educación, axudas aos maiores e apoio ás familias avalan a xestión feita nestes anos, pero mostrouse inconformista e por iso aspira a que “Galicia siga funcionando e superándose a si mesma” a partir do 18 de febreiro.

“A miña principal motivación para querer seguir sendo presidente de Galicia non é impoñer a miña ideoloxía, nin adoutrinar, nin derrotar a ninguén. A miña primeira e única motivación é servir a Galicia e que sigamos mellorando”, asegurou ao tempo que trasladaba o seu desexo de ser “un presidente de todos e a favor de todos”.

A UNIÓN POR RIBA DA DIFERENZA

Aproveitando a presenza no acto do presidente do PP de Castela e León, Alfonso Fernández Mañueco, o líder dos populares galegos apelou a todo o que une a ambas comunidades e, de feito, considera que “hai máis puntos de unión que de diferenza”.

“Con nós non vai esa manía que ten o nacionalismo de levantar muros, crear diferenzas e buscar a crispación e o enfrontamento. Non vai con nós porque nos somos como á xente e non pretendemos impoñer á xente como ten que ser”, afirmou antes de recordar a “discriminación” que comparten tamén ambas comunidades por parte do Goberno central no que respecta a un viaduto da A-6 en Pedrafita que se está reconstruíndo “a paso de tartaruga”.

O presidente tamén fixo referencia ás enquisas electorais que se están publicando estes días e recoñeceu que prefire aquelas que dan malos resultados “porque nos obrigan a traballar, a estar motivados e a ser conscientes en todo momento de que nos xogamos seguir desfrutando de estabilidade ou comezar a dar pasos atrás”.

Por iso concluíu facendo un chamamento ao voto “para que a Galicia orgullosa de si mesma poida seguir estándoo, para que a Galicia aberta siga sento unha terra amable para os que veñen e para que Galicia próspera siga aproveitando todas as súas posibilidades para seguir crecendo”.

LUIS MENOR: “VALDEORRAS É MERECENTE DE MAIOR ATENCIÓN”

Pola súa banda, Luis Menor lembrou que, á súa chegada á presidencia da Deputación de Ourense, comprometeuse a canalizar a voz dunha comarca como Valdeorras, afastada xeograficamente, pero que nunca ía estar afastada da xestión da institución provincial.

“Somos plenamente conscientes de que Valdeorras é merecente de maior atención pola súa distancia, pero tamén polo peso económico das súas producións senlleiras e polo seu potencial como recurso turístico e natural e tamén polas súas deficientes comunicacións, que de seguro lastran aínda máis o seu desenvolvemento”, afirmou o líder provincial do PP.

Por iso, subliñou, este é o momento de fixar como prioridade loitar con máis intensidade se cabe por unhas comunicacións propias do século XXI e seguir reclamando con forza as infraestruturas esquecidas polo Goberno central, “porque para Sánchez, Valdeorras é un territorio sen interese salvo para sacarse fotos e prometer axudas polos incendios que nunca chegaron”

Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

Hoxe, nun encontro coa sociedade viguesa no que foi presentado pola candidata pola provincia de Pontevedra, Patricia García

Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

  • Destaca que o novo instituto de Navia será o primeiro de Galicia centrado nas especificidades académicas, tecnolóxicas e de sustentabilidade
  • Destaca os investimentos feitos en obras fundamentais para o desenvolvemento da cidade como a estación intermodal, así como a construción de 200 vivendas en San Paio de Navia e a reforma dos centros sanitarios da área sanitaria
  • Reitera a súa disposición a contribuír á reforma das pistas de atletismo de Balaídos e a impulsar o Centro de Asociacionismo no edificio dos vellos xulgados da rúa Lalín

12 de febreiro de 2024. O presidente e candidato do PPdeG, Alfonso Rueda, anunciou hoxe a compra, en colaboración coa Deputación de Pontevedra, do Cine Fraga de Vigo para convertelo nun espazo para “o reencontro da cidade coa creación artística e cultural” e sede permanente da Galicia Film Comission.

Nun almorzo celebrado esta mañá con representantes da sociedade viguesa, Rueda incidiu en que vai “seguir rexeitando a confrontación entre Administracións e defendendo que, se hai ganas reais de facer cousas e vontade de non obstaculizar, pódese contar coa Xunta, como se fai noutros concellos e lugares de toda Galicia”.

Afirmou que “a política da ocorrencia, de botar cousas ao aire, de buscar liortas e non facer nada, non funciona”, polo que avogou pola “xestión e por render contas” ante os cidadáns do traballo feito. Neste sentido, dixo que nestas eleccións autonómicas hai dúas opcións: “Ou unha maioría suficiente do PPdeG para pactar cos galegos e cumprir os nosos compromisos, ou un multipartito encabezado por un partido nacionalista-independentista”.

POLÍTICA PARA CREAR RIQUEZA

Na súa intervención, manifestou que “a política ten que axudar a crear riqueza para que a sociedade funcione, e para crear riqueza están os empresarios”. Así, apuntou que “a Administración ten que estar para estimular a economía, acompañala e non ser un obstáculo”, e para iso “o primeiro é o rigor económico”.

Neste sentido, salientou que “Galicia foi a primeira comunidade autónoma en aprobar os orzamentos para 2024 e na que menos medrou o endebedamento nos últimos anos”, polo que “temos pulmón para facer unha serie de cousas que outros non van poder levar adiante”. De feito, asegurou non estar interesado en que a Galicia lle condonen os intereses da débeda porque “son perfectamente asumibles”, pero si en “poder dicirlle ao Goberno central onde deben investirse os cartos que hai para outras comunidades”.

Tamén en clave económica, o candidato do PPdeG lembrou que o Goberno galego vén de establecer como máximo un ano para a tramitación de todos os proxectos de máis dun millón de euros de investimento “para facilitar e atraer investimentos”.

“O INVESTIMENTO EN EÓLICA É O NOSO PETRÓLEO”

Alfonso Rueda asegurou que “aquí non nos van os plantexamentos demagóxicos como os que algúns están a facer cos proxectos de renovables, porque o investimento en eólica é o noso petróleo”. Deste xeito, avogou por “ser amigables cos que queren investir en Galicia e ofrecer unha estabilidade e un rigor nas nosas contas e na tramitación administrativa para facilitar o seu asentamento”.

O presidente do PPdeG cualificou a Saída Sur ferroviaria de Vigo como “a infraestrutura máis publicitada en papeis, máis sometida a estudos e menos real”, e amosou a súa preocupación porque “a aposta de Portugal é clara e temos que corresponder”.

“Faremos todo o posible para que o Goberno portugués manteña o seu compromiso de enganchar a súa alta velocidade coa galega”, avanzou a este respecto e botando de menos “declaracións moito máis contundentes por parte da esquerda que ten influencia no Goberno central”.

Respecto da AP-9, Alfonso Rueda afirmou que “ogallá sexa gratis” pero recordou que, mentres o Goberno galego conxelou as tarifas das autoestradas da súa titularidade, as de titularidade estatal tiveron unha suba que non rexistraran en todo o século XXI. “Se non son capaces de conter a suba das tarifas, é difícil de crer que nos veñan dicir que van ser gratuítas”, indicou.

En materia de solo industrial, lembrou que o Goberno galego fixo todo o posible para a aprobación do Plan Xeral de Vigo, que agora permitirá ampliar o polígono de Valladares, en colaboración coa Zona Franca; e o parque empresarial de Balaídos. Ao tempo que considerou necesario seguir apostando pola PLISAN.

Alfonso Rueda tamén citou os 19 millóns de euros que o Goberno autonómico investiu na construción da estación intermodal de Vigo, pero lamentou que “a día de hoxe estean sen facer os seus accesos, que era o que tiña que aportar o Concello”. Ademais, avanzou que “imos seguir apostando polo transporte metropolitano, que xa utilizan 80.000 veciños de Vigo; e as bonificacións para sectores da poboación, que xa benefician a 30.000 menores da área e que agora estenderemos aos maiores de 65 anos”.

O líder dos populares galegos demandou “falar en serio de vivenda e ser realista”, ante o que avanzou que “seguiremos promocionando a súa construción”. En concreto, explicou que en Vigo xa están licitados os contratos para construír 200 vivendas en San Paio de Navia, cun investimento próximo aos 30 millóns de euros; e despois se urbanizará o polígono 1 para que, a través da promoción privada, se poidan facer 1.600 vivendas máis: “Intentaremos seguir investindo no Casco Vello desta cidade, onde nos atopamos co inconveniente de que, a pesar de aportar o 90% dos fondos, as decisións teñen que aprobarse polo Consorcio, que xa paralizou importantes investimentos nestes últimos anos”.

SANIDADE, EDUCACIÓN E SERVIZOS SOCIAIS

Un dos apartados nos que máis énfase fixo o candidato do PPdeG foi a sanidade, lembrando “todos os disparates que se dixeron do Hospital Público Álvaro Cunqueiro, que hoxe é un orgullo e un referente da sanidade en Galicia”.

Citou ademais as actuacións na mellora da Atención Primaria na área de Vigo, como o novo centro de saúde de Moaña, a ampliación do de Porriño ou as reformas dos centros de saúde de Salvaterra ou Crecente. Así como o novo centro de saúde de Mos ou a construción do Centro Integral de Saúde de Olimpia Valencia en Vigo, que contará cun investimento de 14,8 millóns de euros.

Ademais, demandou “que o Concello de Vigo poña a disposición da Xunta os terreos na ETEA para que poidamos investir 12 millóns de euros na urbanización da parcela que albergará a futura residencia de maiores que construirá a Fundación Amancio Ortega”.

No que respecta á educación, Alfonso Rueda destacou que o novo instituto de Navia, no que se investirán 14 millóns de euros e levará o nome do escritor Domingo Villar, será o primeiro de Galicia centrado nas especificidades académicas, tecnolóxicas e de sustentabilidade. Insistindo ademais no impulso da FP Dual e na proposta para que todos os universitarios que aproben teñan a matrícula gratis en todos os cursos de grao.

O presidente e candidato concluíu reiterando a súa disposición para contribuír con tres millóns de euros á reforma das pistas de atletismo de Balaídos, así como a impulsar o Centro de Asociacionismo no edificio dos vellos xulgados da rúa Lalín.

O PPdeG esixe ao BNG o cese inmediato do seu asesor condenado por terrorismo

“O Bloque ten a soldo no Parlamento Europeo a un membro de Bildu con antecedentes en ETA e condenado por terrorismo”, di Paula Prado
O Partido Popular de Galicia esixe ao BNG que cese de inmediato a un dos seus asesores no Parlamento Europeo, Pernando Barrena, pola súa condena por pertenza á banda terrorista ETA.
“O Bloque ten a soldo no Parlamento Europeo a un membro de Bildu con antecedentes en ETA e condenado por terrorismo”, sinala Paula Prado.
Segundo recorda a secretaria xeral do PPdeG, Barrena –que exerce como asesor da eurodeputada nacionalista Ana Miranda– milita actualmente en Bildu e en 1985 foi detido por pertencer a un grupo de información de ETA. Motivo polo que posteriormente sería arrestado no ano 2008.
“Un novo caso máis de ocultación por parte do BNG e os seus escuros aliados”, sostén Paula Prado ao tempo que acusa aos nacionalistas de pretender agochar ademais un programa electoral co que queren “impoñer o monolingüismo, suprimir as provincias e mesmo botar á Guardia Civil de Galicia”.

Imaxe: Pernando Barrena – Ok Diario