Alfonso Rueda: “Cada galego, viva onde viva e vote o que vote, ten en min alguén en quen confiar”

Hoxe, no mitin de peche de campaña na Coruña ao que asistiron 3.500 persoas e no que tamén participaron o presidente nacional do PP, Alberto Núñez Feijóo, o cabeza de lista pola provincia, Diego Calvo, e o presidente local do partido, Miguel Lorenzo

  • Se obtén a confianza dos galegos para seguir dirixindo o destino de Galicia, comprométese a “gobernar para todos sen sectarismos, sen adoutrinamentos, sen fronteiras e sen divisións entre bos e malos”
  • “Votemos polo que somos, polo que é Galicia: unha terra aberta e que quere un futuro compartido. Non é o momento de separarse. É o momento de superarse e facelo xuntos e convencidos”, engade
  • “Este domingo hai que atender á familia, aos amigos, facer deporte, descansar, pero sobre todo votar. Non hai escusa de ningún tipo”, afirma

O presidente e candidato do PPdeG, Alfonso Rueda, fixo hoxe un chamamento a “seguir construíndo a Galicia que soñaron os nosos pais e avós para poder legarlle o mellor aos nosos fillos”, onde a ninguén se lle pregunte de onde vén ou o que pensa e que só mire cara o futuro: “Cada galego, viva onde viva e vote o que vote, ten en min alguén en quen confiar”

O líder dos populares galegos iniciou a súa intervención agradecendo a todos os que fixeron posible unha campaña electoral “inesquecible” enchendo masivamente todos os lugares onde se celebraron mitins ao longo destes 15 días, incluídos os galegos que desde o exterior “viven Galicia en primeira persoa, con preocupación, con actitude construtiva e con sentimento”.

“Esta gran mobilización era necesaria e demostra aos que pensaban que isto non podía ser como sempre que non só foi como sempre, senón que foi a mellor campaña do Partido Popular de Galicia”, afirmou antes de pedir aos seus un último empuxón para seguir traballando “con convicción e disposición a falar con quen queira escoitar” ata o 18 de febreiro.

Subliñou acto seguido que non importa o tempo que faga o domingo, xa que o que realmente importa é votar e encher as urnas: “Este domingo hai que atender á familia, aos amigos, facer deporte, descansar, pero sobre todo votar. Non hai escusa de ningún tipo. E, se votamos, o domingo pola noite celebraremos e o luns porémonos a traballar”.

Alfonso Rueda aproveitou este último día de campaña para volver pedir o voto “para a Galicia que funciona” dirixíndose tanto a todos aqueles que sabe con seguridade que o van votar como a aqueles que, máis que nunca, “están agardando que alguén lles pida a súa confianza con argumentos e convicción”.

A todos eles dálles a súa palabra de que non vai renunciar a nada do que prometeu en campaña, nin fará cousas que dixo que non faría. Remarcando que todo aquel que vota ao PPdeG ten que ter claro que vota a un partido que “cumpre os seus compromisos porque cre no valor da palabra dada”.

Pediu así a confianza de todos eses votantes do PSOE que xa non recoñecen nin entenden a un partido “rendido ás ordes dos de arriba e totalmente entregado ao independentismo”. A todos eses “verdadeiros socialistas” aseguroulles que poden confiar nel do mesmo xeito que aqueles que noutras ocasións votaron a outras formacións: “Esta vez necesitámosvos máis que nunca”.

“Despois de que todos fagamos unha reflexión e de que cada un vote o que estime conveniente, eu me comprometo a que, se obteño a confianza dos galegos para seguir dirixindo o destino de Galicia, a gobernar para todos sen sectarismos, sen adoutrinamentos, sen fronteiras e sen divisións entre bos e malos”, afirmou.

“EN GALICIA CABEMOS TODOS”

Alfonso Rueda reivindicou “liberdade para sentir, vivir e falar nunha Galicia na que cabemos todos” fronte aqueles que pensan que “só serve o seu xeito de pensar, que só hai unha maneira de sentir e de ver a vida” e “non entenden o orgullo e o recoñecemento que supón ter dúas linguas nas que poder falar”.

“Este domingo votemos polo que somos, polo que é Galicia: unha terra aberta e que quere un futuro compartido. Non é o momento de separarse. É o momento de superarse e facelo xuntos e convencidos”, engadiu convencido de que “nunha Galicia que se supere hai moitas máis vantaxes que nunha Galicia que se separe”.

Defendeu así a Galicia do sentidiño, que convive tranquila e sen crisparse, que é líder en formación da xente nova, en innovación, en apoio ás familias, en servizos públicos e na que cada mozo ten garantido un futuro a través do ensino en todas as etapas educativas.

E, do mesmo xeito, avogou por unha Galicia que siga ofrecendo alternativas ao abandono escolar, na que se paguen cada vez menos impostos, que estea mellor comunicada, que respecte aos maiores, que respecte o seu patrimonio natural e cultural e que aproveite as oportunidades de crear emprego e riqueza.

“Quero unha Galicia na que cada galego poida elixir como vivir e como quere que sexa a súa propia historia. Unha Galicia sen imposicións, que viva en liberdade, en plenitude e sen complexos. Unha Galicia orgullosa de si mesma e que non teña necesidade de mirar cara outros lados nin de importar modelos fracasados”, concluíu Rueda pedindo a todos os galegos que “voten con orgullo do que somos”.

Alfonso Rueda remata a súa campaña en Ourense e pide á provincia os resultados espectaculares que sempre lle deu ao PP

Hoxe, nun mitin-festa fin de campaña en Ourense acompañado pola cabeza de lista pola provincia, Elena Rivo, a tamén candidata Victoria Núñez e o líder provincial do PP, Luis Menor

  • Quixo trasladar tamén o seu orgullo polo feito de que o PP de Ourense estea tan forte e unido
  • Luis Menor reivindica o seu pacto con Alfonso Rueda para a cidade de Ourense: “Un compromiso coa cidade que recolle 12 propostas concretas, serias, rigorosas e realizables, con proxectos cuantificados nos ámbitos sanitario, de vivenda, servizos sociais, transporte público, mobilidade sostible, deporte, turismo ou a mellora dos servizos administrativos”
  • Elena Rivo: “Somos a Galicia da confianza fronte aos bandazos dos demais, ofrecemos unidade fronte as liortas doutros e traballamos por solucionar os problemas, non por aumentalos”

O presidente e candidato do PPdeG, Alfonso Rueda, rematou esta noite a súa campaña na cidade de Ourense trasladando o seu orgullo polo feito de que o PP de Ourense estea tan forte e unido e apelando aos bos resultados que o partido sempre acada na provincia.

Nun mitin-festa celebrado na cancha central do Pavillón dos Remedios, o líder dos populares galegos propuxo unha Galicia que funcione desde o primeiro momento e ao xeito de Galicia: con unidade, con sentidiño e coa esixencia de mellorar cada día. Por iso pediu o voto “por todo o que podemos acadar se en Galicia permanecemos xuntos”.

Ante aos asistentes ao mitin-festa de fin de campaña celebrado en Ourense, reivindicou que, fronte á Galicia do separatismo –na que só cabe un xeito de pensar, un xeito de sentir e un xeito de falar–, na Galicia que el propón todos os galegos teñen cabida.

Chamou a esquivar os obstáculos que impiden o avance e a evitar un porvir cunha sociedade partida votando pola Galicia que funciona e que ten que seguir sendo como é, por moito que algúns queiran impoñer aos galegos como teñen que ser.

Rueda quere, coa confianza dos galegos, comezar a construír a Galicia da nova década desde o próximo luns. Unha Galicia na que cada galego poida elixir o seu xeito de vivila e sexa dono do seu propio futuro sen imposicións nin complexos, senón desde a liberdade e en plenitude.

Reafirmando o orgullo de ser galego, pediu o voto ofrecéndose a liderar a Galicia que se sinte orgullosa do que é, que vai unida cara adiante, que constrúe España, na que se pode confiar, que non imita problemas alleos. Unha Galicia, en definitiva, que funciona libre de imposicións e submisións a intereses ideolóxicos e persoais.

LUIS MENOR: “OURENSE NON VAI FALLAR”

O presidente provincial dos populares, Luis Menor, proclamou que “Ourense non vai a fallar” este domingo. Afirmación que avalou logo da multitudinaria resposta á convocatoria do mitin nos Remedios: “Todo un desafío volver a encher esta cancha central e darlle outra noite gloriosa ao PP”.

Menor, que fixo unha mención especial “a todos os ourensáns que desde moitos recunchos do mundo quixeron colaborar nesta campaña”, agradeceu o intenso traballo da candidatura, presidentes das xuntas locais e dos distritos da cidade, de afiliados, de simpatizantes e de voluntarios, nunha campaña que contou con máis de 100 actos na cidade e máis de 80 na provincia.

“Unha media de 12 actos electorais diarios é algo que non está ao alcance dos outros partidos, igual que encher esta cancha central non é froito da casualidade: é froito da potencia e da capacidade de mobilización e traballo do Partido Popular en Ourense”, afirmou.

No que atinxe á única opción válida para este domingo, o líder dos populares ourensáns sinalou que “todos queremos o modelo de estabilidade que desfrutamos”. Lembrou tamén Luis Menor que o seu pacto con Alfonso Rueda para a cidade de Ourense: “Un compromiso coa cidade que recolle 12 propostas concretas, serias, rigorosas e realizables, con proxectos cuantificados nos ámbitos sanitario, de vivenda, servizos sociais, transporte público, mobilidade sostible, deporte, turismo ou a mellora dos servizos administrativos da Xunta de Galicia”.

ELENA RIVO: “PAGA A PENA ESTE ESFORZO FINAL”

Pola súa banda, a cabeza de lista do PP por Ourense, Elena Rivo, proclamou que “esta magnífica candidatura de Ourense e os nosos militantes estamos de festa despois dunha campaña na que deixamos claro que Galicia funciona e Galicia namora”.

“O perigo é real. Podemos acabar con todo o bo que conseguimos nestes últimos anos cos gobernos do PP na Xunta de Galicia e contaxiarnos dos males do independentismo e do radicalismo que sofre España”, advertiu Rivo.

“Paga a pena este esforzo final porque somos a Galicia da confianza fronte aos bandazos dos demais, ofrecemos unidade fronte as liortas doutros, traballamos por solucionar os problemas, non por aumentalos; damos estabilidade fronte ao caos,  temos experiencia e estamos avalados polos resultados de tantos anos de xestión”, concluíu.

Alfonso Rueda: “A xente está convencida de que o domingo hai que elixir entre a Galicia que funciona ou un multipartito de esquerdas”

Hoxe, en declaracións aos medios en Pontevedra logo dun encontro con interventores e membros do equipo de campaña do partido

  • Traslada o seu agradecemento a todos os interventores e apoderados que “o domingo estarán representando ao PPdeG e a disposición de todos os votantes”, despois dunha campaña de contacto directo coa xente a pé de rúa, actos sectoriais e almorzos informativos
  • “Pido unha confianza máxima, con máis razón e con máis forza que nunca, no Partido Popular”, subliña
  • Apela á confianza dos que “non queren que Galicia caia en mans dun goberno que ten como obxectivos a independencia, a imposición lingüística ou a desaparición das Forzas e Corpos de Seguridade do Estado

O presidente e candidato do PPdeG, Alfonso Rueda, quixo iniciar o seu último día de campaña en Pontevedra para coller forzas coa súa xente e, nun encontro con interventores e apoderados, asegurou estar “satisfeito, tranquilo e convencido” de que os galegos sexan conscientes que este domingo, 18 de febreiro, “hai que elixir entre a Galicia que funciona ou un multipartito de esquerdas”.

Insistiu en que durante a campaña e nas próximas horas o seu obxectivo foi e será “pedir a confianza maioritaria dos galegos fronte ao radicalismo do nacionalismo independentista e a resignación dun PSOE disposto a ceder en todo”. De feito, pediu o voto de todos aqueles que “non queren que Galicia caia en mans dun goberno que ten como obxectivos a independencia, a imposición lingüística ou a desaparición das Forzas e Corpos de Seguridade do Estado”.

“Todo iso pode instalarse aquí e por iso pido unha confianza máxima, con máis razón e con máis forza que nunca, no Partido Popular e na Galicia que funciona”, explicou amosando a súa satisfacción co traballo feito durante estes 15 días nos que “fixemos a campaña que nos gusta facer”.

Destacou así o contacto directo coa xente a pé de rúa e a través de actos sectoriais de todo tipo (culturais, deportivos, sociais…) e almorzos informativos nas sete cidades con gran afluencia. “A xente quixo escoitar as nosas propostas e decidir en consecuencia porque para iso son as campañas, sen necesidade de entrar nas descualificacións nin no insulto persoal”, subliñou.

Alfonso Rueda aproveitou o seu encontro con interventores e membros do equipo de campaña do PP de Pontevedra para darlle as grazas e facer extensivo o seu agradecemento “a todos os interventores e apoderados que o domingo estarán representando ao PPdeG, a disposición de todos os votantes, e formando parte dun dispositivo que permitirá que a xornada electoral transcorra con total normalidade”.

O presidente e candidato percorrerá durante esta xornada as catro provincias galegas, xa que logo deste encontro en Pontevedra realizará un paseo por Lugo, participará logo no mitin de peche de campaña –xunto ao presidente nacional do PP, Alberto Núñez Feijóo– e rematará no mitin-festa de fin de campaña organizado polo PP de Ourense.

Alfonso Rueda fai un chamamento ao voto útil para evitar que o independentismo entre nas institucións de Galicia

O presidente e candidato do PPdeG, Alfonso Rueda, asegurou hoxe estar máis preparado que nunca para seguir sendo presidente e pediu a confianza dos galegos ofrecéndolles a cambio a súa ilusión polo futuro e a experiencia destes anos para seguir camiñando xuntos cara unha Galicia que se supere a si mesma.

Nunha comida-mitin celebrada en Redondela na que estivo acompañado polo candidato pola provincia de Pontevedra Alberto Pazos e ante os 300 asistentes, subliñou que son moitos os galegos e as galegas que habitualmente non votan ao Partido Popular pero, sen embargo, non están de acordo con que o castelán se erradique das aulas, coas alianzas de determinados partidos con Bildu, nin coa posibilidade de que Galicia poida estar gobernada polo independentismo.

A todos eles dirixiuse para asegurarlles que o único voto útil para frear todo iso é o voto ás candidaturas do PPdeG nas catro provincias. Remarcando que coller calquera outra papeleta suporá facilitar que o independentismo entre nas nosas institucións.

A cambio, Rueda ofrece un proxecto ilusionante e confiable que aposta pola Galicia que funciona e un programa con medidas realizables que constitúe o seu pacto cos galegos que lle outorguen a súa confianza o próximo 18 de febreiro. Unhas medidas entre as que se atopa a de apoiar ás mulleres que queren ser nais con máis de 40 anos aumentando ata os 45 anos a idade de acceso á fecundación in vitro, eliminando o límite dun único fillo neste servizo e facilitando a conxelación de óvulos sen necesidade de ter unha patoloxía específica.

Ademais disto, apostou por seguir reforzando a sanidade pública, atraer novos investimentos que creen riqueza e emprego, construír máis vivenda pública, seguir vertebrando o territorio e facer de Galicia unha potencia en enerxías verdes.

Alfonso Rueda subliña a súa ilusión por seguir acompañando aos galegos no camiño cara a Galicia da próxima década

Hoxe, nun mitin en Mos no que tamén participaron a candidata pola provincia de Pontevedra Felisa Rodríguez e a alcaldesa Nidia Arévalo

  • Anima así aos seus a afrontar estes últimos días de campaña pedindo ata o último voto con confianza pero sen confiarse, con optimismo, con orgullo polo feito e coa esperanza polo que queda por facer para que Galicia siga funcionando
  • Destaca investimentos en Mos como o complexo sociosanitario do Rebullón, o centro público de coidados intermedios ou as vivendas públicas que se van construír en San Eleuterio
  • Nidia Arévalo: “Mediante o voto útil, o voto para Mos, debemos devolverlle a Alfonso Rueda todo o apoio que sempre lle outorgou ao noso concello porque, con el, Galicia funciona”

O presidente e candidato do PPdeG, Alfonso Rueda, subliñou hoxe a súa ilusión por seguir acompañando aos galegos no camiño cara a Galicia da próxima década reivindicando que ama e respecta a nosa Comunidade tal e como é, sen necesidade de cambiala por nada.

O líder dos populares aposta por unha vitoria que permita a Galicia ter un goberno que merece: con ilusión, con experiencia e ao servizo de todos os galegos sen excepción. De aí que afirmase que o 18 de febreiro todos os galegos deben ter claro que o que se escolle é o camiño para os próximos entre, chamándoos a escoller a papeleta do PPdeG e con ela a da unidade, as solucións e a experiencia fronte á ruptura, as liortas, o partidismo e os nacionalismos.

Animou así aos seus a afrontar estes últimos días de campaña pedindo ata o último voto con confianza pero sen confiarse, con optimismo, con orgullo polo feito e coa esperanza polo que queda por facer para que Galicia siga funcionando.

E nesa Galicia que funciona xoga e seguirá xogando un papel moi importante o concello de Mos, xa que contará co complexo sociosanitario do Rebullón e cun dos primeiros centros públicos de coidados intermedios. Comprometeuse ademais a atraer novos investimentos que creen riqueza e emprego, como a Factoría do Deporte Galego, e a apostar pola vivenda pública con 20 novas que se van construír en San Eleuterio.

Do mesmo xeito, Rueda quere seguir vertebrando o territorio e neste sentido amosouse contrario a que a AP-9 siga sendo a autoestrada de titularidade estatal máis cara de España, xunto coa AP-53.

Concluíu facendo un chamamento a que este domingo os galegos aposten pola Galicia orgullosa de si mesma e do que é dentro de España, a Galicia unida con sitio para todos, a Galicia próspera e con oportunidades. A Galicia, en definitiva, que funciona e que debe seguir funcionando.

ARÉVALO: “MOS TEN QUE DEVOLVER A RUEDA O APOIO QUE SEMPRE NOS DEU”

Pola súa banda, a alcaldesa de Mos, Nidia Arévalo, agradeceu a “gran afluencia de persoas e o gran traballo que sempre desenvolve para que así sexa o equipo do comité local dos populares de Mos”. Destacou, así mesmo, a importancia de “que Alfonso Rueda siga a ser o presidente da Xunta, para continuar cun presidente libre que prima e promove o modelo Galicia fronte ás minorías e chantaxes do modelo Sánchez. Un ‘modelo Galicia’ que que nos fai punteiros en sanidade, educación, transformación e sentidiño”.

A rexedora puxo en valor “a transformación e o cambio” que experimentou Mos nos últimos tempos “grazas aos elevados investimentos” impulsados polo PP desde a Xunta. “No 2005 atopei en Feijóo o mellor aliado para defender Mos e aí xa estaba Alfonso Rueda. En 2009 desaloxamos o bipartidismo de Galicia e de Mos, e o noso concello comezou o despegue para converterse no territorio de oportunidades que hoxe é, cun PXOM aprobado en 2017, co macrocentro sociosanitario do Rebullón que será pioneiro en España en desenvolvemento e tantos outros proxectos de presente e de futuro”.

“Por iso mediante o voto útil, o voto para Mos, debemos devolverlle a Alfonso Rueda todo o apoio que lle outorgou ao noso concello. Porque en fronte só hai mentira e oportunismo. Porque Galicia perde cos nacionalistas e os socialistas, sen embargo sabemos que con Rueda Galicia funciona”, concluíu Arévalo, poñendo en valor tamén á candidata mosense Feli Rodríguez, da parroquia de Tameiga, que é tamén concelleira do equipo de goberno local e que “xa demostrou nesta lexislatura a súa defensa de Mos por riba de todo como deputada autonómica”.

 

Alfonso Rueda: “Se os galegos me dan cinco minutos no colexio electoral, eu dareilles catro anos de traballo con convencemento e eficacia”

Hoxe, nun mitin no Multiusos do Sar en Santiago ao que asistiron 1.500 persoas e no que tamén participaron os cabezas de lista do PPdeG nas catro provincias galegas

  • “O domingo vai haber 11 papeletas diferentes, pero a decisión redúcese a dúas: a nosa ou as outras 10”, remarca pedindo aos galegos que opten pola papeleta da Galicia unida, centrada e fiable que representa o PPdeG
  • “Quero unha Galicia que siga tendo claro o que ten que facer e progrese sen escusas, sen demoras e desde o primeiro momento”, subliña

O presidente e candidato do PPdeG, Alfonso Rueda, asegurou hoxe que se os galegos lle dedican cinco minutos o próximo domingo indo ao colexio electoral, el daralles a cambio catro anos de traballo con convencemento, con eficacia e cunha única motivación: servir a Galicia.

Ante unha audiencia de 1.500 persoas, o líder dos populares galegos agradeceu aos seus o traballo realizado nestes días nunha campaña dunha gran mobilización que agora, explicou, hai que trasladar ás urnas para acadar unha vitoria “histórica” para “darlle certezas a Galicia e non fallar a todo un país que nos está observando”.

“Pelexemos ata o último minuto con ganas e ambición por mellorar a Galicia que queremos, con confianza pero sen confiarse. O importante é que o 18 de febreiro ninguén se quede na casa e que ningún voto se quede sen escano”, afirmou.

Apelou así á confianza de “todos os galegos que queiran un goberno unido e non unha Xunta dividida polo separatismo” e sen importar o que se votara antes porque “estas eleccións son diferentes e decisivas” na medida en que “o que está en xogo é o que temos en común e o futuro que temos por diante”.

Dirixiuse directamente aos votantes socialistas “que non queren o separatismo que o PSOE está disposto a traer a Galicia” e a todos aqueles que en anteriores eleccións optaran por outra opción política, incidindo en que “os votos que non sexan para o PPdeG acabarán en coalicións onde o nacionalismo será quen mande”.

Por isto pediu aos seus “un último esforzo para parar a soberbia, a imposición e o separatismo” e que traballen “a favor e nunca en contra de ninguén” para explicar aos galegos o que realmente está en xogo o próximo domingo.

“O domingo vai haber 11 papeletas diferentes, pero a decisión redúcese a dúas: a nosa ou as outras 10. Se non é a do PPdeG, son todas as demais”, remarcou pedindo aos galegos que opten pola papeleta da Galicia unida, centrada e fiable. A única papeleta que posibilitará, tal e como engadiu, que “avancemos xuntos no camiño que nos queda por facer”.

COMPROMISOS PARA OS PRIMEIROS 100 DÍAS DE GOBERNO

Rueda explicou acto seguido que avanzar significa “avanzar en educación, en conciliación, en defender ás familias, en apoiar ás mulleres, en axudar aos maiores, en baixar impostos”. Apostou así por unha Galicia segura, tranquila e estable na que se promocione o deporte entre mozos e maiores, na que a sanidade pública siga mellorando e na que se respecte o enorme patrimonio natural que temos.

“Quero unha Galicia que siga tendo claro o que ten que facer sen que ninguén nos diga que temos que cambiar, que progrese sen escusas, sen demoras e desde o primeiro momento”, propuxo comprometéndose a traballar desde o primeiro día e sen perder nin un minuto. Neste sentido afirmou: “Eu non preciso adaptación, nin período de gracia, nin pedirlle perdón ou permiso a outros. Só necesito a confianza dos 38 deputados que representarán á maioría dos galegos”.

O presidente e candidato do PPdeG puxo a disposición de todos o seu plan para que “Galicia funcione desde o primeiro día” e relatou algunhas das medidas que porá en marcha nos seus primeiros 100 días de goberno: a implantación da matrícula universitaria gratuíta, a rebaixa do imposto de sucesións aos herdeiros colaterais, un programa para fomentar a primeira experiencia de mozas e mozos na empresa, o custo cero do solo empresarial nos polígonos autonómicos, o inicio das autovías Tui-A Guarda e Nadela-Sarria, a realización de cribados de cancro de pulmón e de próstata, a licitación de 400 vivendas públicas e a cobertura dos gastos de adopción de animais.

“Queremos marcar a diferenza entre ter o apoio para empezar a traballar desde o primeiro día e o barullo que promove o multipartito”, concluíu Rueda apelando á confianza dos galegos para lograr que Galicia non pare e se supere a si mesma.

Alfonso Rueda anuncia que nos 100 primeiros días porá en marcha a gratuidade da matrícula universitaria e a ampliación da rebaixa do imposto de sucesións

Nun mitin celebrado onte en Ferrol, coa participación do cabeza de lista pola provincia da Coruña, Diego Calvo, da candidata Martina Aneiros e do alcalde José Manuel Rey Varela

  • Pide o apoio maioritario dos galegos e asegura que o seu equipo comezará a traballar desde o mesmo 19 de febreiro
  • Engade para esa primeira etapa de goberno a gratuidade dos primeiros gastos para adoptar un animal de compañía, o custo cero do solo empresarial público durante 8 anos e o inicio da construción de 375 vivendas de promoción pública
  • “Só o Partido Popular de Galicia se presenta ante os galegos coa experiencia, a solvencia e a capacidade de traballo necesarias para que a nosa terra non perda nin un minuto”, salienta

O presidente e candidato do Partido Popular de Galicia, Alfonso Rueda, pediu en Ferrol o voto maioritario dos galegos para que “desde o mesmo día 19 de febreiro o Goberno comece a traballar” e comprometeuse a poñer en marcha nos 100 primeiros días medidas como a gratuidade da matrícula universitaria; a rebaixa do impostos de sucesións para irmáns, tíos e outros parentes; a gratuidade dos primeiros gastos para adoptar un animal de compañía; custo cero durante oito anos do solo público empresarial; e iniciar a construción de 375 vivendas de promoción pública.

Alfonso Rueda afirmou que quere poñerse a gobernar “desde o primeiro día”, polo que avanzou que “desde o mesmo 19 de febreiro nos poñeremos a traballar para aprobar un bo número de medidas nos 100 primeiros días de goberno”. Neste sentido, indicou que “para que te tomen en serio hai que facer propostas serias”, polo que asegurou que “non perderemos o tempo para ver a que temos que renunciar, como traen os gobernos de coalición de esquerdas”.

Así, concretou o compromiso de aplicar neste tempo diversas medidas recollidas no programa electoral do PPdeG: a matrícula universitaria gratuíta de cada materia en todos os cursos; iniciar a rebaixa do imposto ás herdanzas para irmáns, tíos e outros parentes, ao tempo que se mantén a práctica eliminación para fillos e pais; a gratuidade do chip e primeiras vacinas dos animais de compañía que se adopten; solo público empresarial da Xunta a custo cero durante os primeiros 8 anos de actividade; e iniciar a construción das 375 primeiras vivendas de promoción pública, das máis de 4.200 previstas para toda a lexislatura.

O presidente do PPdeG lembrou que “temos un programa electoral para desenvolver nos vindeiros catro anos con 872 medidas, todas elas taxadas e aprobadas polo conselleiro de Facenda”, polo que agora “o noso pacto é con todos os galegos, e eles serán os únicos que terán que pedirnos contas”

QUE GALICIA SE SUPERE A SI MESMA

“Quero que Galicia se supere a si mesma e cada día avance máis”, asegurou o candidato do PPdeG, quen alertou de que “a alternativa é unha sucursal do Goberno central”. Deste xeito, engadiu que “unha Galicia que non quere parar non pode permitirse gobernos sen experiencia e que non teñan manexado un euro público na súa vida”. E subliñou que “só o Partido Popular de Galicia se presenta ante os galegos coa experiencia, a solvencia e a capacidade de traballo necesarias para que a nosa terra non perda nin un minuto”.

Alfonso Rueda tamén tivo palabras concretas sobre Ferrol e sinalou que “no diálogo, a colaboración e o cofinanciamento entre administracións está o segredo, e por iso aquí chegamos a acordos que noutros sitios son imposibles”. Así, en concreto, impulsaranse a fase final das obras de ampliación e reforma do complexo hospitalario de Ferrol, cun investimento total superior aos 131 millóns de euros; levarase adiante o proxecto Abrir Ferrol ao Mar; e sairá adiante o programa de mellora de infraestruturas deportivas, cun investimento de 18 millóns de euros.

“Ferrol, cunha Xunta do PPdeG, seguirá medrando, porque precisa un trato xusto e afastado das promesas dun Goberno central que son unicamente propaganda”, destacou.

GOBERNOS ESTABLES QUE FUNCIONAN

Previamente, o alcalde de Ferrol, José Manuel Rey, manifestou que “estamos vendo como con gobernos estables, Ferrol funciona e Galicia funciona”. “Durante os últimos seis meses vimos como Ferrol avanzou con proxectos dos que se levaba moitos anos falando pero non había nada”, lembrou.

“Nós presentamos feitos e xestión; os outros só palabras e promesas”, subliñou, para apuntar que “eu hoxe non veño aquí a pedirvos o voto, senón a confianza, confianza aos que nos votastes sempre, a todos os que sen votar ao PP confiastes en min e aos que están pensando en quedarse na casa: que saiban que en Alfonso Rueda teñen unha opción”.

Alfonso Rueda anuncia a ampliación do acceso á fecundación in vitro na sanidade pública ás mulleres de ata 45 anos e a eliminación do límite dun único fillo para o acceso a esta fórmula

Nun almorzo informativo celebrado esta maña na Coruña ao que asistiron 600 persoas e no que foi presentado polo presidente do PP local, Miguel Lorenzo

  • Ademais, todas as mulleres que desexen poderán conxelar os seus óvulos no sistema público, xa que tamén se eliminará o requisito de ter unha patoloxía para solicitar este servizo
  • Como novidade, anunciou tamén a posta en marcha do Intercity express, un transporte por estrada en autobús para conectar as sete cidades galegas, sen paradas intermedias e a prezos asumibles
  • O presidente salientou que os 450 millóns de euros que se investirán no CHUAC suporán o maior gasto realizado en infraestruturas sanitarias que xamais se fixo en Galicia

O presidente e candidato do PPdeG, Alfonso Rueda, anunciou hoxe na Coruña que na vindeira lexislatura se dará “un paso máis no impulso de medidas contra o inverno demográfico” co aumento dos 40 aos 45 anos a idade para o acceso á fecundación in vitro na sanidade pública galega e a eliminación dun único fillo para o acceso a esta fórmula, así como a introdución da posibilidade de que todas as mulleres que desexen poidan conxelar os seus óvulos no sistema público coa eliminación do requisito de ter unha patoloxía para solicitar este servizo

Nun almorzo informativo celebrado esta mañá con representantes da sociedade coruñesa, Alfonso Rueda destacou os grandes esforzos feitos nestes anos na mellora da sanidade pública galega e recoñeceu a necesidade de “seguir mellorando e impulsando iniciativas beneficiosas para todos os galegos”. En concreto, destacou que a Xunta investirá no CHUAC cerca de 450 millóns de euros: “Supón o maior investimento en materia de infraestruturas sanitarias que xamais se fixo en Galicia”. Neste momento xa se levou adiante a fase 0 –por importe de 13 millóns de euros– para a creación dunha nova planta de hospitalización, un novo espazo do hospital de día, o aumento do número de camas para críticos e a ampliación tamén dos servizos de urxencias. Ademais, investíronse case 30 millóns de euros na dotación de novos equipamentos e nova tecnoloxía, como resonancia magnética, equipos TAC, salas de hemodinámica, radioloxía bascular ou neurorradioloxía.

“Agora levaremos adiante a Fase 1, que suporá 40 millóns de euros para a construción da torre polivalente e os novos accesos, en colaboración co Concello da Coruña. Queda pendente de licitar ao longo deste ano a fase 2, que suporá un investimento de 228 millóns de euros; e restaría a fase 3, cun custo estimado de 157 millóns de euros”, explicou.

MÁIS ACTUACIÓNS EN MATERIA DE SANIDADE

O líder dos populares galegos lembrou a recente adxudicación de 16 prazas de médicos de urxencias e destacou a entrada en funcionamento do novo Hospital de día de saúde mental infanto-xuvenil no Materno. Tamén se referiu, no ámbito da Atención Primaria, á posta en marcha do centro de saúde de Novo Mesoiro e amosou o compromiso de avanzar na construción do centro de saúde de Santa Lucía, para o que avogou pola colaboración municipal para comezar as obras no antigo mercado.

O candidato do PPdeG agradeceu a colaboración da Fundación Amancio Ortega na dotación de aparatos de alta tecnoloxía na sanidade galega e na construción de residencias de maiores nas sete cidades galegas. No caso concreto da Coruña, destacou que a residencia estará operativa este ano para albergar a 150 persoas.

“Sempre hai que dar pasos cara adiante e en Galicia hai unha aposta decidida por apoiar ás familias e loitar contra todo o que supoñen os prexuízos do inverno demográfico”, manifestou Rueda lembrando iniciativas postas en marcha neste sentido como a gratuidade das escolas infantís, as creación de casas-niño en máis de 100 concellos galegos, as axudas para actividades extraescolares ou de reforzo escolar, así como a gratuidade da universidade para os estudantes que aproben.

Neste sentido, o presidente do PPdeG anunciou “un paso máis no apoio ás familias e daquelas mulleres que queiran ter fillos”, ofrecendo un novo estímulo para loitar contra a baixa natalidade. Así, explicou que na actualidade os procesos de fecundación in vitro na sanidade pública galega está limitados ás mulleres de ata 40 anos e para un único fillo. Pero “a partir de agora imos apoiar con máis intensidade a estas mulleres e propoñemos que ese proceso se estenda ata os 45 anos e non só para o primeiro fillo, senón tamén para o segundo e sucesivos”, subliñou.

Alfonso Rueda apuntou, ademais, que “ata agora a conxelación de óvulos na sanidade galega só se podía facer se existía unha patoloxía que xustificara a solicitude da muller, pero a partir da vindeira lexislatura calquera muller que desexe conxelar no sistema público poderá facelo, eliminando o requisito de ter unha patoloxía”. Son, segundo subliñou “solucións prácticas para loitar contra o problema demográfico que temos”.

Na súa intervención, o candidato do PPdeG tamén falou de mobilidade, destacando a construción, xunto co Goberno central e o Concello, da nova estación intermodal, na que a Xunta investirá 40 millóns de euros. “Queremos que a intermodalidade chegue tamén á Coruña e chegue a tempo para atender as necesidades da Alta Velocidade ferroviaria”, sinalou ao tempo que lamentaba descoñecer “cantos trens van vir e cantas frecuencias”.

Ademais, avogou por seguir reivindicando o Corredor Atlántico de Mercadorías, sobre o que pediu “pasar das palabras aos feitos”; e dixo que “seguiremos impulsando o transporte público por estrada, coa gratuidade do servizo para menores de 21 anos e, agora, tamén para maiores de 65 anos”; e a conxelación das peaxes nas autoestradas de titularidade da Xunta “mentres as tarifas da AP-9 e a AP-53 volveron a subir e situarse entre as máis caras de España”. Como novidade, anunciou a posta en marcha do Intercity express, un transporte por estrada en autobús para conectar as sete cidades galegas, sen paradas intermedias e a prezos asumibles.

No ámbito da vivenda, recordou as 40 vivendas que recentemente se entregaron no barrio de Xuxán e avanzou que se prevé a construción de 1.600 máis nesta zona, entre as que fará directamente a Xunta e aquelas de promotores privados.

RECUPERAR A FACHADA MARÍTIMA

Rueda incidiu na “oportunidade que supón o proxecto para recuperar a fachada marítima da Coruña e abrir a cidade ao mar”, e reiterou que “a Xunta ten dispostos para este mesmo ano 20 millóns de euros para colaborar co Concello e recuperar para os coruñeses o fronte marítimo”.

Para rematar, o presidente do PPdeG falou de educación, cifrando en 22,4 millóns de euros o investimento previsto no plan a catro anos para levar a cabo obras en 45 colexios e institutos da cidade; e tamén de deporte, con 9,2 millóns de euros destinados ao apoio a clubs, becas a deportistas, ademais doutros 7,5 millóns para remodelación ou mellora de instalacións deportivas coruñesas.

De cara ao futuro, Alfonso Rueda considerou “un éxito colectivo e unha actuación intelixente conseguir a sede a Axencia Española de Supervisión da Intelixencia Artificial (AESIA) en A Coruña, a opción que tiña máis posibilidades que ningunha outra”. Ademais, sinalou que a Cidade das TIC, –que xa conta con dous edificios funcionando neste momento– seguirá contando co apoio da Xunta para a construción este ano dun Centro de Formación Avanzada en transición dixital e verde, así como a posta en marcha do centro de investigación CITIC 2.

Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

Hoxe, nun encontro coa sociedade viguesa no que foi presentado pola candidata pola provincia de Pontevedra, Patricia García

Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

  • Destaca que o novo instituto de Navia será o primeiro de Galicia centrado nas especificidades académicas, tecnolóxicas e de sustentabilidade
  • Destaca os investimentos feitos en obras fundamentais para o desenvolvemento da cidade como a estación intermodal, así como a construción de 200 vivendas en San Paio de Navia e a reforma dos centros sanitarios da área sanitaria
  • Reitera a súa disposición a contribuír á reforma das pistas de atletismo de Balaídos e a impulsar o Centro de Asociacionismo no edificio dos vellos xulgados da rúa Lalín

12 de febreiro de 2024. O presidente e candidato do PPdeG, Alfonso Rueda, anunciou hoxe a compra, en colaboración coa Deputación de Pontevedra, do Cine Fraga de Vigo para convertelo nun espazo para “o reencontro da cidade coa creación artística e cultural” e sede permanente da Galicia Film Comission.

Nun almorzo celebrado esta mañá con representantes da sociedade viguesa, Rueda incidiu en que vai “seguir rexeitando a confrontación entre Administracións e defendendo que, se hai ganas reais de facer cousas e vontade de non obstaculizar, pódese contar coa Xunta, como se fai noutros concellos e lugares de toda Galicia”.

Afirmou que “a política da ocorrencia, de botar cousas ao aire, de buscar liortas e non facer nada, non funciona”, polo que avogou pola “xestión e por render contas” ante os cidadáns do traballo feito. Neste sentido, dixo que nestas eleccións autonómicas hai dúas opcións: “Ou unha maioría suficiente do PPdeG para pactar cos galegos e cumprir os nosos compromisos, ou un multipartito encabezado por un partido nacionalista-independentista”.

POLÍTICA PARA CREAR RIQUEZA

Na súa intervención, manifestou que “a política ten que axudar a crear riqueza para que a sociedade funcione, e para crear riqueza están os empresarios”. Así, apuntou que “a Administración ten que estar para estimular a economía, acompañala e non ser un obstáculo”, e para iso “o primeiro é o rigor económico”.

Neste sentido, salientou que “Galicia foi a primeira comunidade autónoma en aprobar os orzamentos para 2024 e na que menos medrou o endebedamento nos últimos anos”, polo que “temos pulmón para facer unha serie de cousas que outros non van poder levar adiante”. De feito, asegurou non estar interesado en que a Galicia lle condonen os intereses da débeda porque “son perfectamente asumibles”, pero si en “poder dicirlle ao Goberno central onde deben investirse os cartos que hai para outras comunidades”.

Tamén en clave económica, o candidato do PPdeG lembrou que o Goberno galego vén de establecer como máximo un ano para a tramitación de todos os proxectos de máis dun millón de euros de investimento “para facilitar e atraer investimentos”.

“O INVESTIMENTO EN EÓLICA É O NOSO PETRÓLEO”

Alfonso Rueda asegurou que “aquí non nos van os plantexamentos demagóxicos como os que algúns están a facer cos proxectos de renovables, porque o investimento en eólica é o noso petróleo”. Deste xeito, avogou por “ser amigables cos que queren investir en Galicia e ofrecer unha estabilidade e un rigor nas nosas contas e na tramitación administrativa para facilitar o seu asentamento”.

O presidente do PPdeG cualificou a Saída Sur ferroviaria de Vigo como “a infraestrutura máis publicitada en papeis, máis sometida a estudos e menos real”, e amosou a súa preocupación porque “a aposta de Portugal é clara e temos que corresponder”.

“Faremos todo o posible para que o Goberno portugués manteña o seu compromiso de enganchar a súa alta velocidade coa galega”, avanzou a este respecto e botando de menos “declaracións moito máis contundentes por parte da esquerda que ten influencia no Goberno central”.

Respecto da AP-9, Alfonso Rueda afirmou que “ogallá sexa gratis” pero recordou que, mentres o Goberno galego conxelou as tarifas das autoestradas da súa titularidade, as de titularidade estatal tiveron unha suba que non rexistraran en todo o século XXI. “Se non son capaces de conter a suba das tarifas, é difícil de crer que nos veñan dicir que van ser gratuítas”, indicou.

En materia de solo industrial, lembrou que o Goberno galego fixo todo o posible para a aprobación do Plan Xeral de Vigo, que agora permitirá ampliar o polígono de Valladares, en colaboración coa Zona Franca; e o parque empresarial de Balaídos. Ao tempo que considerou necesario seguir apostando pola PLISAN.

Alfonso Rueda tamén citou os 19 millóns de euros que o Goberno autonómico investiu na construción da estación intermodal de Vigo, pero lamentou que “a día de hoxe estean sen facer os seus accesos, que era o que tiña que aportar o Concello”. Ademais, avanzou que “imos seguir apostando polo transporte metropolitano, que xa utilizan 80.000 veciños de Vigo; e as bonificacións para sectores da poboación, que xa benefician a 30.000 menores da área e que agora estenderemos aos maiores de 65 anos”.

O líder dos populares galegos demandou “falar en serio de vivenda e ser realista”, ante o que avanzou que “seguiremos promocionando a súa construción”. En concreto, explicou que en Vigo xa están licitados os contratos para construír 200 vivendas en San Paio de Navia, cun investimento próximo aos 30 millóns de euros; e despois se urbanizará o polígono 1 para que, a través da promoción privada, se poidan facer 1.600 vivendas máis: “Intentaremos seguir investindo no Casco Vello desta cidade, onde nos atopamos co inconveniente de que, a pesar de aportar o 90% dos fondos, as decisións teñen que aprobarse polo Consorcio, que xa paralizou importantes investimentos nestes últimos anos”.

SANIDADE, EDUCACIÓN E SERVIZOS SOCIAIS

Un dos apartados nos que máis énfase fixo o candidato do PPdeG foi a sanidade, lembrando “todos os disparates que se dixeron do Hospital Público Álvaro Cunqueiro, que hoxe é un orgullo e un referente da sanidade en Galicia”.

Citou ademais as actuacións na mellora da Atención Primaria na área de Vigo, como o novo centro de saúde de Moaña, a ampliación do de Porriño ou as reformas dos centros de saúde de Salvaterra ou Crecente. Así como o novo centro de saúde de Mos ou a construción do Centro Integral de Saúde de Olimpia Valencia en Vigo, que contará cun investimento de 14,8 millóns de euros.

Ademais, demandou “que o Concello de Vigo poña a disposición da Xunta os terreos na ETEA para que poidamos investir 12 millóns de euros na urbanización da parcela que albergará a futura residencia de maiores que construirá a Fundación Amancio Ortega”.

No que respecta á educación, Alfonso Rueda destacou que o novo instituto de Navia, no que se investirán 14 millóns de euros e levará o nome do escritor Domingo Villar, será o primeiro de Galicia centrado nas especificidades académicas, tecnolóxicas e de sustentabilidade. Insistindo ademais no impulso da FP Dual e na proposta para que todos os universitarios que aproben teñan a matrícula gratis en todos os cursos de grao.

O presidente e candidato concluíu reiterando a súa disposición para contribuír con tres millóns de euros á reforma das pistas de atletismo de Balaídos, así como a impulsar o Centro de Asociacionismo no edificio dos vellos xulgados da rúa Lalín.

Alfonso Rueda: “As nosas prioridades son seguir ofrecendo certezas aos galegos e que os servizos públicos funcionen aínda mellor”

O presidente e candidato do PPdeG, Alfonso con veciños de Curtis

O presidente e candidato do PPdeG, Alfonso Rueda, pediu hoxe aos veciños de Curtis unha maioría absoluta o 18 de febreiro para que Galicia siga funcionando e poder parar a unha esquerda que pretende impoñer o que eles defenden en contra do sentir maioritario dos galegos e galegas.

Continue reading