Cualifica de inspiradora a intervención da Súa Maxestade El-Rei e di que o Executivo central faría ben en estar máis preto da Coroa e menos dos seus socios de goberno

O secretario xeral do PPdeG, Miguel Tellado, cualificou de inspiradora a intervención pronunciada onte pola Súa Maxestade El-Rei e apuntou que o país precisa máis discursos como o de Felipe VI e menos como os que pronuncia Pedro Sánchez.

Para o número dous dos populares galegos, as verbas do monarca combinaron o optimismo e a confianza ante as potencialidades dunha gran Nación como España co rexeitamento daqueles partidos que fan da confrontación un xeito de vida e mesmo de supervivencia política.

Tellado tamén destacou a sensibilidade do discurso coa España que combate a sexta ola da pandemia, que loita por superar os efectos económicos e sociais das cinco anteriores e que aínda hoxe chora por aqueles que a coronavirus levou antes de tempo.

O dirixente popular lembrou que durante corenta anos de democracia os gobernos sempre estiveron ao carón da Monarquía, pero indicou que esta forma de entender as institucións mudou coa chegada de Pedro Sánchez. “Por desgraza, hoxe están máis cómodos cos que queren combatela que cos que a defenden”, resumiu, polo que considerou que o Executivo central faría ben en estar máis preto da Coroa e menos dos seus socios de goberno.

Tellado considerou que “faría ben o Goberno en tomar nota do modelo de convivencia reivindicado por don Felipe” xa que, segundo expuxo, a intervención do monarca tivo unha calidade no fondo e na forma que non está a altura da inmensa maioría dos integrantes do Consello de Ministros.

“Na súa defensa dunha sociedade que avanza unida e sen rancor estará sempre o Partido Popular de Galicia”, asegurou o secretario xeral do PPdeG, e engadiu que a crispación e tensión política destes tempos non son boas compañeiras que sentar nas mesas da toma de decisións.

Tellado desexou que o Goberno central asuma como propias as preocupacións da Súa Maxestade El-Rei en materia de benestar social así como que comparta a súa inquedanza por temas como a suba da luz que ameaza o futuro de milleiros de fogares. “Que a Coroa estea máis sensibilizada con esta cuestión que un suposto Goberno de progreso debería facer reflexionar aos ministros de PSOE e de Podemos”.

Por último, valorou a total proximidade do monarca aos verdadeiros problemas que desvelan aos españois e lamentou que, pola contra, o Goberno central practica un distanciamento social das preocupacións da xente. “Zarzuela entende mellor a sociedade e está máis preto da rúa que o Palacio da Moncloa”, finalizou.