“Fomos a Comunidade Autónoma na que máis baixou o paro no mes de xuño”, salientou o secretario xeral do PPdeG.

O secretario xeral do PPdeG, Miguel Tellado, afirmou hoxe que os datos do paro do mes de xuño amosan que a estabilidade que se vive en Galicia volve a dar bos resultados en materia de emprego. “Somos a Comunidade Autónoma na que máis baixou o paro durante o pasado mes e seguiremos traballando para continuar creando postos de traballo, a través da nova Axenda de Emprego que prevé mobilizar máis de 225 millóns de euros para dar resposta aos retos laborais logo da pandemia da Covid-19”, sinalou.

Segundo os datos publicados hoxe polo Ministerio de Traballo, o paro baixou en Galicia no mes de xuño en 6.428 persoas, fronte a un incremento a nivel nacional de 5.107 desempregados. A situación económica vivida como consecuencia da pandemia da Covid-19 provocou un incremento do paro anual, que en Galicia se sitúa nun 18,94 por cento, case dez puntos menos que a media nacional (28,09 por cento). “A pesar deste incremento anual, o desemprego en Galicia mantense en cifras inferiores ás do ano 2009 cando Feijóo chegou á Xunta, xa que por aquel entón tiñamos máis de 210.000 parados e hoxe non chegamos a 185.000”, salientou Miguel Tellado.

INCREMENTO DAS AFILIACIÓNS

No que respecta ás afiliacións á Seguridade Social, Galicia volve rexistrar por segundo mes consecutivo un incremento do número de cotizantes (10.268) a pesar da pandemia sanitaria, situándose como a terceira Comunidade na que máis medran as afiliacións en termos absolutos.

“De cara ao futuro, Galicia precisa dun goberno que siga impulsando medidas acertadas para o crecemento económico e a creación de emprego, do mesmo xeito que viu facendo na última década”, manifestou o secretario xeral do PPdeG. Neste sentido, asegurou que “as 30 medidas que integran a Axenda de Emprego aprobada recentemente pola Xunta de Galicia para dar unha rápida resposta aos efectos da crise sanitaria beneficiarán a máis de 65.000 galegos e galegas”.

En concreto, os principais obxectivos desta Axenda de Emprego son acompañar na transición cara o novo contexto laboral; recuperar a confianza e a seguridade laboral; apoiar a formación para o emprego; impulsar o emprego autónomo; e modernizar as oficinas de emprego.

Tellado asegurou que “temos un Goberno e un presidente con experiencia na xestión de momentos complicados e con proxecto de futuro para seguir levando a Galicia pola senda do crecemento e a creación de emprego”. “Debemos aproveitalo e animo aos galegos a respaldar a proposta de Feijóo nas urnas o vindeiro 12 de xullo, para poder seguir traballando por Galicia desde o día seguinte e manter á nosa Comunidade como un referente na loita contra o desemprego e na recuperación económica”, indicou.