O Debate sobre o Estado da Autonomía finaliza coa aprobación de 48 propostas de resolución, das que 9 foron por unanimidade
O viceportavoz do Grupo Popular, Miguel Tellado, salientou hoxe no Parlamento que o Debate do Estado da Autonomía puxo de manifesto que “temos un goberno serio, responsable e centrado nos problemas dos galegos, cun modelo claro de menos impostos, menos débeda e máis investimento, fronte a unha oposición que repetiu os mesmos mantras de sempre porque o que menos lle preocupa agora mesmo é Galicia, xa que están demasiado preocupados polo seu futuro e as liortas internas”. O Debate de política xeral de Galicia rematou coa aprobación de 48 resolucións, das que nove foron por unanimidade e sorprendentemente BNG e PSdeG coincidiron no seu voto en contra a cinco importantes propostas: a nova rebaixa de impostos anunciada polo Presidente da Xunta, a mellora da xestión da auga, a defensa da lingua galega, a mellora da atención primaria sanitaria e a nova política forestal.
Miguel Tellado comezou a súa intervención cun recordo ao conselleiro de Facenda, Valeriano Martínez, e “agradecendo todas as mostras de respecto que recibimos durante estes días polo falecemento do noso compañeiro”.
NORMALIDADE DEMOCRÁTICA
“O mellor indicador da saúde dunha democracia, o mellor termómetro de como están as cousas, é a normalidade institucional”, sinalou o viceportavoz popular, quen apuntou que “celebrar con normalidade un Debate do Estado da Autonomía ou presentar os orzamentos nos tempos establecidos pola lei poden ser nimiedades para o BNG ou o PSdeG, pero para os galegos son indicadores de que as cousas en Galicia marchan ben”.
Tellado sinalou que o Presidente da Xunta “viu falar neste debate dunha Galicia que avanza e que, a pesar das dificultades, logrou con moito esforzo e responsabilidade saír adiante”. “Queda moito por facer e son moitos os retos que enfrontamos como Goberno e como sociedade, e por iso o Presidente presentou unha batería de propostas e enunciou unha serie de dificultades ás que nos enfrontamos desde hoxe para seguir construíndo unha Galicia mellor”, apuntou.
Na súa intervención, e logo de facer un repaso polas 40 propostas de resolución presentadas polo Grupo Popular, Miguel Tellado subliñou que o Presidente Feijóo anunciou no seu discurso “algunhas das grandes medidas da presente lexislatura, como a gratuidade das garderías, o novo modelo de residencias, máis investimentos en sanidade e apoio á industria galega, sobre todo para as comarcas de Ferrol, Pontevedra ou Lugo”.
PROPOSTAS DA OPOSICIÓN
Respecto das propostas de resolución presentadas polos grupos da oposición, o viceportavoz popular criticou que o BNG “comeza cunha batería de propostas que van en contra da lei, do Estatuto de autonomía e, en xeral, da orde establecida”. En concreto, indicou que “falan de Galicia como nación, propoñendo a creación de embaixadas no estranxeiro; queren eliminar a Garda Civil das estradas de Galicia; piden a convocatoria de referendos populares; ou propoñen o rescate e unha nacionalización masiva da industria e dos sectores estratéxicos galegos”.
“Pero o máis grave é que, unha vez máis, néganse a condenar a violencia, negándose a aceptar as regras do xogo democrático e poñéndose de parte dos violentos”, votando en contra da proposta de resolución número 39 do Grupo Popular, lamentou.
Sobre as propostas socialistas, Tellado afirmou que “poñen de manifesto que non escoitaron ao Presidente da Xunta no seu discurso e denotan que están completamente sometidos a Madrid”. Así, criticou que “pidan abaratar o prezo das garderías, cando o Presidente xa anunciou que serán gratuítas; piden un plan para axudar a saír da crise da Covid á hostalería, cando o Goberno galego xa leva aprobado e executado tres plans de rescate; entre outras cuestións relacionadas co medio rural, a educación ou os fondos europeos onde demandan accións que xa se fixeron hai tempo”.
