Indica que o Bloque débelle obediencia a ese PSOE que lle firma as nóminas, ao que ten que servir en silencio pola conta “corrente” que lle trae

O secretario xeral dos populares galegos, Miguel Tellado, afirmou que o Bloque perde a súa combatividade no túnel de Guadarrama, sendo rupturista en Twitter, pero adorable na tribuna do Congreso: “Do que din ao que fan vai o mesmo traxecto que hai entre as fotos dalgúns produtos que se venden Internet e o que finalmente recibimos nas nosas casas. O BNG ten obediencia a ese PSOE que lle firma as nóminas e ao que ten que servir en silencio pola conta corrente que lle trae”.

Deste modo, cuestionou o feito de que Podemos sexa moito máis esixente con Pedro Sánchez do que o son os nacionalistas galegos e o PSdeG, aos que lles serven os Presupostos Xerais do Estado que presente Moncloa “sexan cales sexan e aos que lles falta tempo para aplaudir todas e cada unha das medidas do Goberno socialista, por moi lesivas que sexan para Galicia”.

Sobre isto, manifestou que, trala petición do Bloque para que se destinen máis de 1.000 millóns de euros á Comunidade nos Orzamentos de 2022, haberá que agardar a comprobar o que sucede se o PSOE non cumpre. Ante isto, preguntou se os nacionalistas estarán dispostos a romper os seus acordos cos socialistas ou se, coma sempre, “baixarán a cabeza e tragarán con todo”.

AS DISCREPANCIAS DO GOBERNO CENTRAL

Na súa comparecencia en rolda de prensa, o número dous do PPdeG afeou que, malia as reiteradas promesas de Sánchez, os Presupostos de 2022 xa non serán aprobados en tempo e forma, nin se cumprirán os prazos que marca a Constitución. “Por desgraza estamos empezando a ver normal o que debería ser excepcional porque as Contas deberían estar xa aprobadas en Consello de Ministros e entregadas no Congreso”, dixo contrapoñendo esta situación coa de Galicia, que si contará cos seus Orzamentos nos prazos establecidos.

Tellado criticou que, na recta final dunha das peores crises da historia do país, Podemos e o PSOE manteñan as súas permanentes discrepancias sen lograr acordar unha Lei de Presupostos que impulse a recuperación económica. “Parece que só se poñen de acordo nunha cousa: manterse no poder a calquera prezo”, engadiu.

Neste sentido, explicou que presentar a Lei de Presupostos en tempo e forma, non só é unha garantía para que os Orzamentos poidan entrar en vigor o 1 de xaneiro de 2022, senón que tamén asegura que sexan debatidos con normalidade democrática nas Cortes e permite aos diferentes partidos estudalos e enriquecelos coas súas aportacións. “Pero o cumprimento da Constitución e as garantías democráticas non foron nunca as prioridades do Goberno de Sánchez”, insistiu.

UNHAS CONTAS XUSTAS PARA GALICIA

Así mesmo, o secretario xeral lembrou que nas anteriores Contas Xerais fomos unha das Comunidades máis maltratadas, mencionando a redución do 11% do Orzamento, sendo os peores Presupostos en 15 anos; a baixada ata o 6.6% do investimento territorializado, o reparto desigual entre Autonomías, premiando os apoios parlamentarios do Goberno; ou o abandono das principais infraestruturas.

Por todo isto, admitiu que a esperanza de que o Executivo central presente uns Orzamentos xustos con Galicia é mínima. “Saberémolo nas próximas semanas pero xa lles anuncio que o PSdeG, ese bipartito en si mesmo que é o partido dos socialistas galegos, estará encantado”, recalcou mentres indicaba que, pola súa parte, o BNG fará moitos aspaventos en rolda de prensa pero despois acabará axudando a Sánchez a seguir o seu Manual de Resistencia.

A IMPORTANCIA DO PPdeG

Por outra banda, Miguel Tellado tamén se referiu á Convención Nacional do Partido Popular, amosándose orgulloso de que comezara en Santiago: “Para nós amosa a importancia que ten o PPdeG para o partido nacional, e iso é un motivo de honra. O PP sabe valorar o papel que xogamos na estabilidade institucional de Galicia pero tamén como actores da política no conxunto do Estado”.

Sobre a clausura deste evento, que terá lugar esta fin de semana en Valencia, apuntou que os populares galegos estarán representados por unha ampla delegación encabezada por Alberto Núñez Feijóo.