Salienta que a Comunidade avanza na dinamización do mercado de traballo con emprego seguro, de calidade, estable e adaptado ao tecido produtivo
O secretario xeral do PPdeG, Miguel Tellado, asegurou que a nosa Comunidade non se conforma con rexistrar menos paro que o conxunto do Estado nin con seguir resistindo os efectos da Covid-19, senón que Galicia aspira a liderar unha recuperación sólida da nosa economía. Para acadar este obxectivo, puxo en valor o papel da Xunta, que avanza con paso firme na dinamización do mercado de traballo con emprego seguro, de calidade, estable e adaptado ás necesidades do tecido produtivo.
Así se expresaba tras coñecerse os datos de desemprego do pasado mes, nos que na Autonomía caeu o paro en 25.687 persoas (14,52%) fronte a agosto de 2020 -tendo en conta o descenso rexistrado no Estado (12,33%), a vantaxe de Galicia é de 2,19 puntos-. Deste modo, estamos ante a maior baixada anual en termos absolutos e relativos de toda a serie histórica de datos (1996), coa Comunidade a niveis de paro inferiores ao reflectido en agosto de 2008, hai 13 anos, no inicio da anterior crise económica. Ademais, aumentan as afiliacións e medra a contratación.
En termos mensuais, o número dous dos populares tamén salientou que o desemprego diminúe en agosto, algo que non ocorría desde 2017, resaltando que, mentres Galicia crea emprego e suben as afiliacións, o conxunto do Estado perde cotizantes.
ENCAMIÑAR A RECUPERACIÓN
“A resistencia da nosa economía ante a crise do coronavirus debe darnos unha maior capacidade para encamiñar a recuperación”, apuntou Tellado mentres explicaba que isto non só significa volver aos niveis previos á pandemia ou recuperar os postos de traballo perdidos: “Trátase de continuar crecendo, de crear máis emprego de calidade e mellores oportunidades, así como de captar investimentos e proxectos transformadores da nosa economía”.
De feito, “grazas á vacinación e á resposta eficaz á pandemia que a Xunta deseñou no plano económico, imos avanzando cara a unha recuperación progresiva da actividade, que se reflicte no dinamismo do noso mercado de traballo”, incidiu o secretario xeral, que lembrou o gran esforzo investidor da nosa Comunidade en materia de axudas para o emprego.
Nese senso, cómpre indicar que permanecen activas achegas por máis de 12 millóns para impulsar o traballo autónomo e apoiar a súa consolidación, coa idea de chegar a 3.000 autónomos e 90 empresas; e séguese apoiando ás entidades da Economía Social, con máis de 5 millóns de euros destinados á mellora da súa competitividade e á remuda xeracional. Así mesmo, o Goberno galego vén de destinar 20 millóns de euros á inserción laboral de 3.500 traballadores con discapacidade en centros especiais de emprego e colabora cunhas 200 entidades sen ánimo de lucro para a contratación de 500 persoas desempregadas.
“Sen embargo, non nos esquecemos dunha das chaves no camiño da recuperación”, dixo referíndose ao reforzo da formación, recordando que se ampliou ata os 34,2 millóns de euros o orzamento dos obradoiros duais para cubrir o 100% das solicitudes e que se lanzou o primeiro Plan de formación específico para o sector servizos vencellado ao Xacobeo, que preparará a 4.000 persoas traballadoras para mellorar as súas capacidades e adaptalas á nova era dixital.
