4, febreiro, 2020. O secretario xeral do PPdeG, Miguel Tellado, manifestou que Galicia seguirá intentando protexerse da inestabilidade institucional e económica na que o PSOE, Podemos e independentistas teñen sumida a España. Así se expresaba tras publicarse esta mañá os datos do paro do mes de xaneiro.
Nese senso, puxo en valor que a Comunidade estea a consolidar o emprego creado, pois comeza 2020 con 7.045 parados menos que hai un ano, o que supón unha baixada do 4,03% e un nivel de desemprego moi inferior ao de hai once anos. De feito, somos a segunda Autonomía na que máis baixa o paro, superando ao conxunto do Estado en 3,06 puntos.
De igual xeito, o número dous do PPdeG destacou que, por sétimo ano consecutivo, redúcese o paro nun mes de xaneiro -nestes sete anos dous de cada cinco parados abandonaron as listas-. “O desemprego descendeu en Galicia en 43.729 persoas desde que Alberto Núñez Feijóo preside a Xunta, o que demostra que as políticas activas de emprego levadas a cabo polo Goberno galego son efectivas”, subliñou engadindo que este descenso acelerouse nesta lexislatura (26.581 desempregados menos).
Pola contra, apuntou que os socialistas demostraron que durante o último ano e medio só se preocuparon dun posto de traballo: “o de Pedro Sánchez”, mentres el para o único que se interesou polo emprego en Galicia foi para destruílo, como demostra a súa vontade por pechar industrias e non dar solución á situación das electrointensivas.
Malia ao efecto Sánchez, a nosa Comunidade crea emprego e, por undécimo mes consecutivo, segue superando o millón de afiliados á Seguridade Social cun aumento do 1,42% e cunha media de 39 novos afiliados ao día. Son xa case seis anos de subas consecutivas e, desde o inicio da lexislatura, Galicia creou 33.619 postos de traballo.
Na evolución mensual, o paro sobe un 1,48%, algo que, como lembrou Tellado, é unha tendencia habitual nesta época de ano -o desemprego aumenta en xaneiro ao longo de toda a serie histórica-. Sen embargo, explicou que o crecemento do mes pasado é moi inferior á suba media en xaneiro das dúas últimas décadas -o menor incremento desde xaneiro de 1999- e o desemprego sobe a menor ritmo que no conxunto do Estado, o que evidencia que Galicia amortigua mellor os impactos negativos grazas á súa estabilidade económica e social.
Ademais, a contratación aumentou un 10,36%, case 9 puntos máis que no conxunto do Estado, e asináronse 8.058 contratos máis que no mes de decembro.
OS AUTÓNOMOS, UNHA PEZA FUNDAMENTAL
Como salientou o secretario xeral, Galicia ten como obxectivo crear máis emprego e de maior calidade e, para isto, os autónomos son unha peza fundamental.
Por este motivo, resaltou que o Goberno galego continuará en 2020 apoiando a estes traballadores a través da Estratexia Autónomo, con axudas de preto de 24,5 millóns de euros. Esta medida busca axudar a máis de 7.000 persoas na súa conciliación, no fortalecemento do seu negocio, na contratación e na competitividade do comercio, sumando novas iniciativas como o Bono Nova Oportunidade e o Bono Renova.
