Santiago, 15 de decembro de 2017.- O secretario xeral do PPdeG, Miguel Tellado, pediu explicacións esta mañá ao alcalde de Vigo, Abel Caballero, sobre o paradoiro dos 180 millóns de euros que non se gastaron no abastecemento de auga neste municipio.
O secretario xeral lembrou que a xestión de augas é unha competencia municipal, e malia que desde 2011 Caballero sabía que a potabilizadora de Vigo necesitaba unha reparación, o alcalde non tivo reparos en xogar coa saúde dos seus veciños, nin de mentir descaradamente sobre a potabilidade da auga que consumen. Así, desde que é rexedor, a concesionaria debería ter invertido 180 millóns de euros en infraestruturas e melloras da rede de abastecemento, segundo os informe que fixo públicos onte a nosa voceira no concello, Elena Muñoz.
“Desde o Partido Popular gustaríanos saber onde están os cartos de Aqualia, a antiga Aquagest, e cremos que os vigueses merecen as explicacións necesarias”, subliñou Tellado. Nese senso, indicou que teñen que saber quen autorizou que eses 180 millóns de euros non se gastasen na mellora da rede da auga de Vigo, “dado que este evidente desvío de fondos provocou que das billas da primeira cidade de Galicia siga saíndo auga turbia”; a que se destinan os impostos que pagan, “xa que son unha das cidades con maior presión fiscal de Galicia, e se hai alguén facendo un uso irregular dos mesmos”; e o motivo de tanto escurantismo con este tema, “porque o Partido Popular preguntou e non recibiu resposta, pediu unha auditoría sobre esta cuestión e desde o Concello néganse a encargala”.
“De momento, sabemos que a única solución que se lle ocorre ao alcalde ante esta situación é subirlle máis dun 2% o recibo da auga aos vigueses, que seguirán pagando máis por unha auga de mala calidade”, manifestou Tellado, que recoñecía que as últimas semanas resumiron perfectamente o perfil político de Abel Caballero: “Un soberbio que non é quen de admitir os seus erros e a súa incapacidade na xestión, un polemista que prefire confrontar e ameazar a cooperar con que lle tende a man, e un trilero que só sabe escapar dos problemas, pero que prefire poñer tobogáns, Dinosetos e barcos nas rotondas a darlle auga potables aos vigueses”.
TRABALLAR DE XEITO COORDINADO
Igualmente, o secretario xeral asegurou que a pesar das chuvias dos últimos días, cómpre seguir vixiantes pola alerta por seca, admitindo que é bo momento para poñerse a traballar de xeito coordinado entre administracións para evitar que estas situacións se repitan. Por este motivo, recoñeceu que lle entristece volver a ver as loitas entre concellos ou que as estratexias de confrontación coa Xunta se manteñan.
Tellado referiuse a actitude dos alcaldes de Vigo e Ponte Caldelas, que continúan cruzando declaracións durísimas entre eles. “Máis alá desta loita interna entre socialistas, que non deixa de ser unha de tantas, o que transcende é que unha vez máis Abel Caballero está intentando ocultar con confrontación a súa incapacidade total como xestor público”, insistiu.
“Esta estratexia non nos sorprende, pois é a única que ten, e a que está a soster a súa carreira política durante os últimos anos. Pero, nin toda a auga que caeu esta semana é capaz de tapar a súa neglixencia neste caso”, dixo o número dous do PPdeG, que engadiu que non se pode admitir que desde o Concello se poña en cuestión a profesionalidade dos técnicos da administración pública, “que non teñen máis interese có de velar pola saúde dos cidadáns”.
DOUS MODELOS POLÍTICOS DISTINTOS
Por outra banda, Tellado tamén celebrou que os Orzamentos entren a vindeira semana na fase definitiva da súa tramitación parlamentaria, sinalando que este proceso transcorreu con total normalidade. “Cremos que houbo espazo para o intercambio de ideas, para o diálogo e incluso para o acordo. E, se non houbo máis, foi porque na meirande parte de cuestións foi a oposición a que se negou a intentar propoñer construtivamente ou sumar coa maioría da Cámara”, apuntou.
“Nós entendemos que a oposición atopouse uns Orzamentos moi acertados nas súas liñas fundamentais, que priorizaban cuestións como a consolidación da recuperación económica e a creación de emprego; a mellora da sanidade, a educación e os servizos sociais; ou a dinamización do noso medio rural”, dixo o secretario xeral mentres lamentaba que os demais partidos foron incapaces de artellar un discurso alternativo, ou propostas que tivesen sentido para mellorar as liñas estratéxicas do Goberno galego.
Por iso, recalcou que neste debate de Orzamentos volveu quedar moi claro que en Galicia hai dous modelos políticos que son ben distintos. Por un lado, mentres a Xunta apostou por baixar impostos, reducir o endebedamento, atraer empresas e crear emprego e por unha administración áxil, eficiente e ordenada, ligada ás demandas dos cidadáns; a oposición quixo subir os tributos, ter máis débeda, destruír postos de traballo e optar por unha administración chea de trabas e incapaz de resolver as necesidades dos galegos.
