11, xuño, 2020. O secretario xeral do PPdeG, Miguel Tellado, apuntou que, ante a grave crise que temos no horizonte, “necesitamos que o Gobernos axude a crear riqueza, e non pense en destruíla; gobernos que fomenten a actividade económica e non o desmantelamento dos nosos sectores estratéxicos; e gobernos que pensen en crear emprego e non en pechar empresas”.
Igualmente, insistiu en pedir ao Executivo central que deixe de atacar á industria galega, que poña as ferramentas necesarias enriba da mesa para que as nosas empresas poidan manter a súa actividade e ser competitivas, e que evite peches e despedimentos innecesarios para a nosa economía.
Moi preocupado polo futuro das electrointensivas, lembrou que o resultado da mesa de Alcoa San Cibrao celebrada o martes foi decepcionante e que só constatou que o Goberno segue a poñer escusas para non asumir a súa responsabilidade: fixar un prezo eléctrico competitivo e estable para colocar a España en igualdade de condicións co resto de Europa, para permitir a continuidade da produción de aluminio primario e para garantir o mantemento dos empregos de Alcoa en San Cibrao e en toda a Mariña e de toda a industria electrointensiva galega.
O número dous do PPdeG tamén recordou que o Executivo central non presentou o borrador do Estatuto para os consumidores electrointensivos que leva prometendo desde hai máis de ano e medio, nin concretou se aceptará as alegacións realizadas desde Galicia, Asturias e Cantabria a un documento que non dá resposta ás necesidades reais para que a industria electrointensiva teña futuro en España.
Ademais, salientou que antes incluso destas alegacións, durante os meses de Goberno en funcións, a Xunta chegou a mandar un borrador de estatuto que o Executivo só debía aprobar para solucionar este problema: “Unha vez máis Galicia aportou solucións onde o Goberno tiña creado un problema e amosou a súa vontade de traballar con el, pero este respondeunos con indiferencia e con desidia”.
“Esta inacción e falta de compromiso do Goberno de Sánchez pon en perigo 5.000 empregos directos en Galicia de xeito inminente, pois nin sequera ofrece saídas a curto prazo para unha industria electrointensiva que o propio Executivo declarou esencial durante o estado de alarma”, subliñou o secretario xeral.
Así mesmo, lamentou que non exista vontade política para desbloquear a situación, xa que o Executivo central non aclarou se convocará a poxa de interrompebilidade para o que resta de ano, despois de que a do primeiro semestre fose a máis raquítica da historia; nin tampouco se establecerá o orzamento máximo que permite a Unión Europea para as compensacións por emisións de CO2 (ao redor de 275 millóns de euros), despois de que só habilitase unha partida –claramente insuficiente– de 6 millóns de euros.
DESAFIUZAR ÁS EMPRESAS DO MAR
Por outra banda, Tellado tamén se referiu á vontade do Ministerio de insistir na reforma do regulamento da Lei de Costas, desta vez aproveitando a pandemia para colala de esguello na Lei de Cambio Climático.
Segundo indicou, isto amosa que tanto a Xunta como o PPdeG estaban no certo: “Tanto en abril do ano pasado cando denunciamos o intento de variar as condicións e desafiuzar ás empresas do mar ubicadas na costa, como en xaneiro e febreiro deste ano cando desde o Goberno se dixo que esta reforma estaba paralizada e que non se reactivaría sen falar co sector”.
Sobre isto, resaltou que se trata dunha decisión dun impacto enorme para a Comunidade, pois afecta a máis dun cento de empresas e a cerca de 5.000 edificacións de 80 concellos costeiros, entre os que se atopan desde centros de saúde ata colexios e depuradoras de augas residuais.
