Demanda tamén á Administración de Sánchez que abra vías de diálogo para parar a folga de transportistas que pode levar ao colapso da nosa economía
O número dous dos populares galegos, Miguel Tellado, pediu ao Goberno de Pedro Sánchez un plan de continxencia para que os produtores non perdan as súas mercadorías pola folga de transportistas: “É o momento de tomar medidas urxentes e extraordinarias”.
Tras condenar rotundamente calquera tipo de violencia que se teña producido estes días e de rexeitar enerxicamente calquera forma de coacción ou presión contra outros traballadores, trasladou tamén a súa comprensión á dramática situación que están vivindo os transportistas: co prezo dos combustibles nun crecemento exponencial durante meses, cun Goberno socialista que se debate entre a parálise e o abandono e cos impostos máis altos da nosa historia. Por todo isto, demandou ao Executivo central que abra vías de diálogo para parar unha folga que pode levar ao colapso da nosa economía.
MEDIDAS PARA O SECTOR AGROALIMENTARIO
Así mesmo, Tellado manifestou o apoio do PPdeG á manifestación que agricultores a gandeiros convocaron para o día 20, unha queixa masiva que se produce como reacción ao abandono total por parte da Administración de Sánchez: “Apoiamos a convocatoria do próximo domingo e reclamamos ao Goberno medidas inmediatas para paliar a crise do sector agroalimentario”.
Como salientou, o sector sofre unha absoluta falta de diálogo en toda a lexislatura, un ataque permanente á súa reputación nacional e internacionalmente -incluso de boca de ministros-, políticas ideolóxicas que danan a produción e a competitividade, e subidas masivas de impostos que reduciron drasticamente a rendibilidade das explotacións. Ademais, a todo isto, únese agora a complexa situación internacional derivada da guerra de Ucrania.
En contraposición á falta de actuación do Executivo central, destacou que desde a Xunta puxéronse onte en marcha varios paquetes de medidas, como a axilización do bono térmico social, axudas directas para profesionais, novas liñas extraordinarias de financiación e anticipos de axudas, avais para as subvencións da PAC ou o pago de todas as taxas portuarias durante os próximos meses.
Ademais, reiterou a demanda ao Goberno para que aplique de forma inmediata unha baixada extraordinaria e excepcional dos impostos ata superar esta crise. “Os traballadores e as súas familias non pode agardar máis. Ou actuamos xa desde todas as administracións ou a situación pode ter consecuencias moi graves para os sectores produtivos do noso país”, aseverou.
UN PP MÁIS FORTE, UNIDO E PREPARADO
Por último, o secretario xeral falou da campaña do candidato á presidencia do partido, Alberto Núñez Feijóo, que está recorrendo toda España trasladando o seu proxecto dun “PP máis forte, máis unido e máis preparado para chegar ao Goberno”.
Logo de salientar a extraordinaria acollida que Feijóo ten en todos os lugares que visita, apuntou que máis de 15.000 afiliados e simpatizantes xa participaron esta semana en actos e encontros co candidato: “Estamos percibindo a ilusión de milleiros de militantes que lle trasladan a súa forza. Nin sequera o CIS de Tezanos pode ocultar a recuperación do partido”.
Aínda que a confianza manifestouse claramente nos máis de 55.000 avais que recibiu Feijóo para oficializar a súa candidatura, Tellado remarcou a importancia de dar voz á militancia e da participación das bases como piar fundamental. “Este luns todos os afiliados están chamados ás urnas para reafirmar o que xa dixeron cos seus avais. Toda a militancia poderá votar este luns nas súas sedes locais para elixir ao presidente nacional do PP”, dixo lembrando que, xa no Congreso de Sevilla, será a quenda dos compromisarios.
Segundo indicou, o camiño iniciado por Feijóo non acaba coa celebración do conclave, senón na Moncloa “ofrecendo aos españois unha alternativa seria, responsable e solvente, e un Goberno á altura das circunstancias e que sexa útil ás familias e aos traballadores”.
