Salienta a sensibilidade do presidente con todos os profesionais que coidaron e facilitaron a vida dos galegos nos últimos meses
O número dous dos populares galegos, Miguel Tellado, valorou o discurso de Fin de Ano do presidente da Xunta, Alberto Núñez Feijóo, asegurando que a súa mensaxe anticipa unha Galicia preparada para afrontar os retos do ano 2022, entre os que destacan o control e evolución da Covid e a recuperación económica.
? @Mtelladof valora que o discurso de @FeijooGalicia anticipa unha Galicia preparada para afrontar os retos de 2022 e pide á oposición que faga o que non fixo en 2021: arrimar o ombro.https://t.co/z65AQFkwXe pic.twitter.com/x9N4duQ0Dq
— PP de Galicia (@ppdegalicia) December 31, 2021
Nese senso, o secretario xeral lembrou a exemplar xestión da Xunta durante a pandemia, que segue liderando a loita contra o virus coa súa capacidade de anticipación na toma de decisións. “O Goberno galego soubo combinar a máxima prudencia sanitaria co apoio incondicional a todos aqueles sectores e familias máis afectados polos efectos do coronavirus”, manifestou.
Igualmente, apuntou que as medidas tomadas ao longo destes meses permitíronnos contar con ferramentas axeitadas para encarar mellor o ano que entra. Ademais, precisou que, malia que o “caótico desgoberno liderado por Pedro Sánchez mirou cara outra lado durante os momentos máis difíciles e delegou as súas responsabilidades nas Comunidades”, Galicia sempre mantivo a súa lealdade ao Estado.
Así mesmo, resaltou a sensibilidade do presidente á hora de destacar o labor de todos aqueles profesionais, de diferentes sectores, que facilitaron a vida aos galegos en tempos aínda complicados.
Máis polo miúdo, Tellado fixo fincapé no esforzo dos sanitarios, cuxa tarefa non recibe sempre o recoñecemento que merece. “É unha mágoa que os intereses partidistas do resto de formacións lles impidan poñer en valor o traballo dos profesionais do noso Servizo Galego de Saúde, aos que menosprezan de forma constante coas súas inxustificadas críticas á nosa Sanidade pública”, dixo mentres pedía á oposición que faga en 2022 o que non quixo facer en 2021: arrimar o ombro.
Sobre isto, recordou que a Comunidade conta con máis orzamento, máis profesionais, menos espera media, máis centros de saúde, máis e mellores hospitais e máis innovación en materia sanitaria, algo que permitiu que Galicia puidese afrontar mellor as consecuencias da Covid-19. De feito, o secretario xeral sinalou que somos unha das Autonomías que controla o virus con maior eficacia, coas taxas de vacinación más altas de España e de Europa e coa taxa de mortalidade máis baixa de toda a Península a pesar de ter a maior porcentaxe de poboación vulnerable.
Por outra parte, o dirixente popular tamén salientou a vontade expresada por Feijóo de reivindicar o que nos corresponde, engadindo que dende o PPdeG continuarase defendendo os intereses da nosa terra, para o que é fundamental un reparto xusto dos Fondos Europeos -clave para a nosa economía-, que se aporten dunha vez solucións á crise industrial provocada pola improvisación do Executivo central á hora de levar a cabo unha mal entendida transición ecolóxica e un financiamento autonómico que teña en conta as necesidades das persoas e non dos territorios.
