Santiago, 17 de outubro de 2017.- A deputada do Grupo Popular Teresa Egerique asegurou hoxe no Pleno do Parlamento que o proxecto de Lei de Portos de Galicia, que continúa a súa tramitación parlamentaria logo de rexeitarse as emendas á totalidade dos grupos da oposición, “mantén intactas as potestades públicas de posibilitar, autorizar e controlar todas as actividades marítimas e terrestres relacionadas co tráfico portuario e as de fomento das actividades comerciais, industriais e de servizos”.
“Non hai ningunha privatización ou postergamento do servizo público”, subliñou a deputada popular, quen engadiu que “se acentúa a función reguladora da autoridade pública de xestión situando aos portos como servizo público e como ferramenta da actividade económica”.
Egerique explicou que “o maior prazo das concesións, de 30 a 50 anos, é unha medida destinada a fomentar a actividade económica dos portos, permitindo a determinación de prazos en relación a cada concesión concreta de xeito que se facilite a amortización dos investimentos comprometidos nestas concesións”.
Así mesmo, afirmou que o proxecto de Lei “contén as suficientes medidas e posibilidades de coordinación coa xestión dos portos de interese xeral localizados en Galicia, pero no asume a vulneración do sistema constitucional vixente de distribución de competencias entre a Administración Xeral do Estado e a Comunidade galega”.
CONSENSO, PRINCIPAL AVAL
A deputada popular destacou, ademais, “a vontade de coordinación e colaboración coas administracións locais”, xa que lembrou que “foi redactada da man da Federación Galega de Municipios e Provincias”. “O consenso é o principal aval do texto que se presenta, tanto a nivel social como institucional”, dixo.
Teresa Egerique indicou que este proxecto de lei “vai permitir adaptar a Lei estatal de portos ás particularidades dos portos galegos, reforzando o autogoberno; aumentando a competitividade; dando maior seguridade xurídica; aproveitando a franxa portuaria; adaptándose ao marco europeo; con maior sustentabilidade ambiental; consensuada coa comunidade portuaria; e mellorando e dando maior axilidade no día a día dos portos”.
“En definitiva, unha nova lei que busca axilizar o funcionamento da administración portuaria; facilitar os trámites aos empresarios nas concesións, para darlle maiores garantías e outorgar un papel decisivo á participación empresarial na actividade portuaria; mellorar as condicións das dársenas e das instalacións portuarias; fomentar maior competitividade na prestación dos servizos portuarios; establecer a compatibilidade de usos e mellorar a relación porto-cidade ou porto- vila; asegurar o normal funcionamento dos traballos dos usuarios dos portos, a través do reforzo da figura de gardapeiraos e da axilización de trámites como a retirada de buques abandonados”.
