Iniciativa sobre as demandas que debe realizar o Goberno galego ao Goberno central en relación coa tramitación da Proposición de lei de medidas urxentes para a consolidación dos funcionarios interinos da Administración local con habilitación nacional

O día 8 de abril deste ano publicouse no Boletín Oficial das Cortes Xerais ( Senado ) a proposición de Lei de medidas urxentes para a consolidación dos funcionarios interinos da administración local con habilitación de carácter nacional, subscrita polo Grupo Parlamentario de Izquerda Confederal ( Adelante Andalucía, Més Mallorca, Más Madrid, Compromís, Gerona Bai, Catalunya en Comú Podem e a Agrupación Socialista Gomera).

Esta proposta vulnera de maneira frontal os artigos 14, 23.2 e 103.3 da Constitución Española, e toda a normativa e principios medulares do ingreso na función pública. O mérito, a capacidade e a publicidade, garanten o dereito fundamental a igualdade no acceso ao exercicio de funcións públicas, estes principios afectan aos pilares vertebradores dunha Administración Pública orientada a protección dos intereses xenerais.

Os funcionarios de administración local con habilitación de carácter nacional teñen reservadas unha serie de funcións imprescindibles en tódolos concellos, a fe pública, o asesoramento legal, o control e fiscalización interna da xestión económico-financeira e orzamentaria e contabilidade, polo tanto, a este corpo de funcionarios lles corresponden as atribucións máis importantes que se realizan nunha entidade local.

O acceso a este Corpo de Funcionarios esixe superar duros procesos selectivos que garanten a independencia e profesionalidade que esixe o recto desempeño das tarefas reservadas a estes empregados públicos.
Esta proposta permite o acceso con carácter definitivo ao corpo de funcionarios de administración local con habilitación nacional, e en xeral, ao exercicio de funcións públicas, a través de procesos de consolidación ( cunha antigüidade de tan só 3 anos) e cun simple concurso o que supón un grave atentado non só contra o prestixio destes funcionarios senón aos principios e garantías do noso Estado de Dereito.

Polo exposto, o Grupo Parlamentario Popular de Galicia presenta a seguinte proposición non de lei en comisión:

“O Parlamento de Galicia insta á Xunta de Galicia a demandar da Administración xeral do Estado e ao Goberno de España a rexeitar a tramitación da proposición de Lei de medidas urxentes para a consolidación dos funcionarios interinos da administración local con habilitación nacional e a convocar e cubrir anualmente un maior número de prazas de funcionarios de cada unha das subescalas pertencentes ao corpo de funcionarios de administración local con habilitación nacional.”

Rexistro: https://www.parlamentodegalicia.es/Expedientes/11/PNC-001517