Categoría: Parlamento de Galicia

O Pleno do Parlamento de Galicia aprobou hoxe a proposición non de lei do Grupo Popular, co voto en contra do BNG e a abstención do PSdeG, a través da que se insta á Xunta a recoñecer a importancia das materias primas fundamentais e das materias primas estratéxicas para reforzar a autonomía estratéxica e reducir a dependencia do exterior, continuando coa axenda iniciada este 2025 e convocando novos concursos de dereitos mineiros caducados, co obxectivo de impulsar a investigación de materiais minerais fundamentais para sectores estratéxicos da economía de cara ao seu futuro aproveitamento. Así mesmo, pídese ao Goberno de España que promova as iniciativas lexislativas necesarias para o establecer o recoñecemento explícito das materias primas minerais como recursos de primeira necesidade e carácter estratéxico dentro da Reserva Estratéxica baseada nas Capacidades Nacionais de Produción Industrial (RECAP).

O portavoz popular de Industria, Rubén Lorenzo, lembrou que “Galicia representa o 9,5 por cento da produción mineira de España, sendo líderes en pedra natural; a cuarta comunidade en valor de produción, con 337 millóns de euros; e a segunda en emprego mineiro, con máis de 3.700 traballadores directos”. “Todo isto gracias a unha aposta clara da Xunta por unha minería sustentable e respectuosa co medio ambiente, coas persoas e co patrimonio”, subliñou.

Neste sentido, referiuse ao estudo elaborado pola Universidade de Santiago no que se confirma que Galicia alberga 18 dos 34 elementos críticos identificados pola Unión Europea, cun valor económico estimado entre 25.000 e 45.000 millóns de euros. “Galicia está literalmente sentada enriba dun tesouro estratéxico para Europa, pero hai quen pretende que o deixemos enterrado, mentres seguimos importando de China o 98 por cento dos minerais que necesitamos”, indicou o portavoz popular, quen asegurou que “iso non é ecoloxismo, é un autoboikot que hipotecaría o noso futuro”.

Rubén Lorenzo afirmou que Galicia xa ten proxectos mineiros en marcha, como a mina de Penouta, en Viana do Bolo; o complexo de litio Alberta, entre Pontevedra e Ourense; e a mina de Doade, considerada estratéxica pola Unión Europea. “Galicia ten recursos, ten un marco normativo estrito e ten tecnoloxía limpa para facelo ben”, sinalou o portavoz popular, quen, dirixíndose aos deputados do BNG e do PSdeG, demandoulles que “se queren seguir sendo os partidos do non, alomenos teñan a valentía de dicir que o seu non é un si á dependencia de China, á vulnerabilidade de Europa e á hipocrisía de vivir rodeados de tecnoloxía mentres rexeitan que Galicia poida producir de forma sostible os recursos que esa tecnoloxía necesita”.

Por último, lamentou que tanto BNG como PSdeG rexeitaran “apostar por un futuro con emprego, innovación e soberanía”, porque “negarse é renunciar, aceptar a dependencia e hipotecar o noso mañá”. “O PPdeG ofrece responsabilidade e progreso; os demais, inmobilismo”, concluíu.

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que tome con urxencia as medidas necesarias para garantir a continuidade do Programa de Auxiliares de Conversa, asegurando ao mesmo tempo que a súa aplicación non supoña un prexuízo económico para as comunidades autónomas.

A portavoz popular de Educación, Cecilia Vázquez, asegurou que o Programa de Auxiliares de Conversa “funciona, da resultados e está plenamente integrado no día a día dos centros educativos galegos”. En concreto, en Galicia vense desenvolvendo desde o ano 2009 e no presente curso participan arredor de 690 auxiliares de conversa, procedentes de 19 países e que prestan apoio en 791 centros educativos.

Ademais, Cecilia Vázquez dixo que “o esforzo económico principal para a realización deste programa asúmeo a Xunta, xa que, dun custo total aproximado de 5,2 millóns de euros, a Administración galega financia 4,8 millóns de euros, é dicir, arredor do 95 por cento do total”.

“O problema non está nin nos centros, nin no profesorado, nin nos auxiliares, senón que está na descoordinación interna do Goberno de España”, manifestou a portavoz popular, quen considerou “absolutamente incoherente que o Ministerio de Traballo, a través da Inspección, cuestione agora a figura do auxiliar de conversa como programa de intercambio cultural e pretenda impoñer unha relación laboral ordinaria no Réxime Xeral da Seguridade Social”.

Deste xeito, Vázquez manifestou que, “se o Goberno de España decide cambiar as regras de xogo, debe facelo con responsabilidade, con seguridade xurídica e asumindo as consecuencias”. “O que non pode facer é crear un programa, mantelo durante anos e poñelo en risco por pura descoordinación interna, trasladando o problema e a factura ás comunidades autónomas”, dixo.

En definitiva, Cecilia Vázquez asegurou que “esta iniciativa parlamentaria non pide privilexios, nin excepcións, senón unicamente que o Goberno de España coordine aos seus ministerios, aclare o marco xurídico e garanta a continuidade do Programa de Auxiliares de Conversa, sen prexuízo económico para as comunidades autónomas”.

O portavoz de Industria do Grupo Popular, Rubén Lorenzo, afirmou hoxe que os proxectos industriais estratéxicos (PIE) “son un instrumento para axilizar a tramitación administrativa, pero sempre baixo o cumprimento estrito da normativa ambiental, patrimonial, de transparencia e de participación pública”. Neste sentido, cualificou de “rotundamente falso” que todos os proxectos industriais estratéxicos estean paralizados, e puxo como exemplo a planta de Stolt Sea Farm en Rianxo ou a planta de carbón vexetal de Xeal en Dumbría.

Rubén Lorenzo apuntou que “para que un proxecto poida ser declarado industrial estratéxico debe acreditar unha repercusión económica e social cualificada: investimento, emprego, innovación e impacto territorial”. “O que se fai é garantir que Galicia poida atraer proxectos de envergadura, que xeren emprego estable, que impulsen a competitividade e que reforcen a autonomía estratéxica de Galicia”, indicou.

“Non se pode defender á xente nos discursos e votar en contra dos seus beneficios nas leis, e moito menos pedir unha e outra vez neste Parlamento que se coarten os dereitos das empresas que están interesadas en implantarse en territorio galego”, manifestou o portavoz popular.

XUÍZO POLÍTICO PARALELO

Respecto ao proxecto de Altri en Palas de Rei, Lorenzo criticou que BNG e PSdeG pidan unha resolución denegatoria para esta iniciativa industrial, o que suporía “substituír a avaliación técnica e administrativa por un xuízo político paralelo e significa que se a Xunta prevaricara con esta resolución”.

“Todos os proxectos tramítanse con criterios obxectivos, con informes técnicos e con normativa ambiental e sectorial”, asegurou Rubén Lorenzo, quen lamentou que “a súa fixación por acabar co proxecto de Altri chega ao punto de que son capaces de sacrificar o futuro da seguinte década de toda a provincia de Lugo desconectándoa da planificación enerxética”.

Así mesmo, negou que a Xunta estea obrigada a autorizar proxectos industriais no prazo dun ano porque “o que establece a lexislación é que o procedemento debe resolverse nese prazo, sexa para autorizar, denegar ou arquivar”. “Se hai demora imputable á Administración, recoñécese unha responsabilidade patrimonial limitada, cun máximo de 500.000 euros, exactamente o mesmo que se está facendo na Unión Europa”, dixo.

O portavoz de Industria do Grupo Popular, Rubén Lorenzo, afirmou hoxe que os proxectos industriais estratéxicos (PIE) “son un instrumento para axilizar a tramitación administrativa, pero sempre baixo o cumprimento estrito da normativa ambiental, patrimonial, de transparencia e de participación pública”. Neste sentido, cualificou de “rotundamente falso” que todos os proxectos industriais estratéxicos estean paralizados, e puxo como exemplo a planta de Stolt Sea Farm en Rianxo ou a planta de carbón vexetal de Xeal en Dumbría.

Rubén Lorenzo apuntou que “para que un proxecto poida ser declarado industrial estratéxico debe acreditar unha repercusión económica e social cualificada: investimento, emprego, innovación e impacto territorial”. “O que se fai é garantir que Galicia poida atraer proxectos de envergadura, que xeren emprego estable, que impulsen a competitividade e que reforcen a autonomía estratéxica de Galicia”, indicou.

“Non se pode defender á xente nos discursos e votar en contra dos seus beneficios nas leis, e moito menos pedir unha e outra vez neste Parlamento que se coarten os dereitos das empresas que están interesadas en implantarse en territorio galego”, manifestou o portavoz popular.

XUÍZO POLÍTICO PARALELO

Respecto ao proxecto de Altri en Palas de Rei, Lorenzo criticou que BNG e PSdeG pidan unha resolución denegatoria para esta iniciativa industrial, o que suporía “substituír a avaliación técnica e administrativa por un xuízo político paralelo e significa que se a Xunta prevaricara con esta resolución”.

“Todos os proxectos tramítanse con criterios obxectivos, con informes técnicos e con normativa ambiental e sectorial”, asegurou Rubén Lorenzo, quen lamentou que “a súa fixación por acabar co proxecto de Altri chega ao punto de que son capaces de sacrificar o futuro da seguinte década de toda a provincia de Lugo desconectándoa da planificación enerxética”.

Así mesmo, negou que a Xunta estea obrigada a autorizar proxectos industriais no prazo dun ano porque “o que establece a lexislación é que o procedemento debe resolverse nese prazo, sexa para autorizar, denegar ou arquivar”. “Se hai demora imputable á Administración, recoñécese unha responsabilidade patrimonial limitada, cun máximo de 500.000 euros, exactamente o mesmo que se está facendo na Unión Europa”, dixo.

A viceportavoz do Grupo Popular, Paula Prado, salientou hoxe que a Xunta incrementou o Fondo de Cooperación Local un 47 por cento desde o ano 2021, unha partida que se achegará este ano aos 700 millóns de euros. Así mesmo, lembrou o compromiso do Goberno galego de iniciar a tramitación parlamentaria da nova Lei de administración local ao longo do vindeiro ano 2026.

Paula Prado indicou que os concellos galegos “contarán nesta lexislatura cunha nova normativa local pioneira, adaptada ao século XXI e pensada para clarificar as súas competencias, actualizar o sistema de financiamento e atender a problemática da dispersión, o despoboamento e o envellecemento na prestación dos servizos”.

Porén, lamentou que “de pouco servirá esa actualización da normativa autonómica se non se acompaña tamén dunha reforma da normativa estatal” e criticou que o actual presidente da Fegamp “non lle interesa reclamar ao Goberno de España que traia ao século XXI a caduca Lei de bases de réxime local de 1985”.

CONTRIBUCIÓN PARA O SAF

A viceportavoz popular recoñeceu que “os concellos teñen un problema co servizo de axuda no fogar, pero non hai maior demagoxia que os que agora veñen pedir á Xunta que financie o 100 por cento deste servizo sexan os mesmos que no seu día llo endosaron aos concellos na Lei de servizos sociais de Galicia de 2008”.

“E miren que mala é a Xunta que, aínda sen ser a súa competencia, contribúe de xeito máis que significativo ao financiamento do servizo de axuda no fogar: a día de hoxe, achega 12 euros por hora e está disposta a chegar aos 16 euros”, indicou Paula Prado, quen lamentou que “por meros intereses partidistas estean bloqueando a negociación, porque prefiren seguir avivando o conflito e facer ruído a costa das persoas dependentes”.

Ademais, lamentou que “temos que escoitar á oposición que o que eles defenden é un modelo público fronte aos recortes do PP, o mesmo BNG que ten privatizado o servizo de axuda no fogar no 66 por cento dos concellos onde goberna ou o PSdeG que case o 70 por cento dos seus concellos teñen tamén a xestión do SAF completamente privatizada”.

O Pleno do Parlamento de Galicia aprobou hoxe a nova Lei de protección da saúde das persoas menores e de prevención das condutas aditivas, “que nace co obxectivo de protexer, anticipar e actuar fronte aos novos riscos que afectan directamente á infancia e á adolescencia”, manifestou a portavoz popular de Sanidade, Encarna Amigo. Neste sentido, asegurou que “non hai maior responsabilidade que coidar dos menores, defender o seu dereito a medrar sans, libres de presións comerciais, de contornas aditivas, de contidos tóxicos e de riscos que nin sequera existían hai só unha década”.

Encarna Amigo indicou que “estamos nun contexto social no que os perigos asociados ás adicións evolucionan máis rápido ca capacidade das familias, dos centros educativos e das propias institucións para facerlles fronte”. Por este motivo, considerou esta lei “imprescindible e necesaria, que actualiza o marco legal da Comunidade galega, integrándoo coa evidencia científica máis recente a na liña dos estándares europeos máis avanzados en saúde pública e protección do menor”.

EVITAR SUFRIMENTO, ENFERMIDADES E DESIGUALDADE

“Estamos a falar de crear oportunidades, de acompañar ás familias, de reforzar os centros educativos, de dotar de instrumentos aos concellos e de apoiar aos profesionais da saúde de dos servizos sociais”, sinalou a portavoz popular, quen afirmou que “cando actuamos desde a prevención, evitamos máis sufrimento, máis enfermidade e máis desigualdade”.

A portavoz popular concretou que “debemos protexer non só fronte ás adicións tradicionais, senón tamén fronte ás emerxentes” e avogou por reforzar a protección fronte ao tabaquismo e fronte ao consumo de alcohol, especialmente fronte ás novas modalidades como os cigarros electrónicos e vapeadores, bebidas de alta graduación ou campañas de publicidade encubertas en redes sociais.

Así mesmo, a nova lei inclúe, por primeira vez dun modo completo e sistemático, a regulación das condutas aditivas non asociadas a substancias, “porque hoxe sabemos que a adición non é só química: é psicolóxica, emocional e social”.

Encarna Amigo engadiu que a lei “vai traer máis seguridade, máis control e máis garantías, xa que reforza o control sobre a publicidade, a promoción e a venda de produtos potencialmente aditivos desde tres principios: proporcionalidade, responsabilidade e protección”. “Endurece o acceso de menores a máquinas expendedoras; regula espazos e contornas de risco; introduce un sistema de sancións proporcionado, que non busca castigar senón garantir o cumprimento; e establece o principio de tolerancia cero fronte á captación comercial de menores, ademais de incorporar un elemento fundamental: avaliación periódica e transparencia”, explicou.

Respecto dos concellos galegos, a portavoz popular asegurou que esta lei, “lonxe de implicar novas cargas, reciben instrumentos para protexer espazos públicos, regular actividades, ordenar contornas e reforzar actividades de ocio saudables”.

O Pleno do Parlamento de Galicia aprobou hoxe a Lei de medidas fiscais e administrativas, unha norma que “consolida o modelo de estabilidade, moderación fiscal, política social responsable e simplificación administrativa recoñecible de Galicia”, manifestou o viceportavoz do Grupo Popular, Julio García Comesaña.

“É unha lei útil, necesaria e plenamente constitucional”, asegurou García Comesaña, quen apuntou que é “unha ferramenta que permite adaptar o ordenamento xurídico para que os orzamentos non sexan papel mollado e para que as políticas públicas se poidan executar con seguridade xurídica”.

Entre as medidas que inclúe esta lei, Julio García Comesaña indicou que “continúa pola senda da rebaixa de impostos e do alivio da presión fiscal sobre as rendas medidas e baixas” que ven implantando o Goberno galego nos últimos anos”. En concreto, de cara ao vindeiro ano elimínase a tributación no IRPF das axudas ás persoas enfermas de ELA, suprímese a tributación das compensacións ás vítimas da talidomida e elimínase a tributación das axudas polos incendios forestais deste ano.

Así mesmo, no ámbito da vivenda continúa a senda para facilitar o acceso e mobilizar o parque existente mediante tipos reducidos no imposto de transmisión patrimonial e actos xurídicos documentados ou bonificación específicas para familias monoparentais e vítimas de violencia de xénero. “Reforzamos a vivenda pública axilizando os procedementos e blindando o carácter social dos aloxamentos compartidos polo IGVS, co obxectivo claro de duplicar o parque público de vivenda nos vindeiros anos e crear solo para ata 20.000 vivendas protexidas”, apuntou.

García Comesaña destacou, por último, que esta Lei supón un novo avance na simplificación administrativa e na actividade económica, reducindo ata a metade os prazos de tramitación, facilitando a creación de solo industrial e evitando conflitos interpretativos que xeran recursos, paralizacións e custes innecesarios.

O Pleno do Parlamento de Galicia aprobou hoxe os orzamentos xerais da Comunidade galega para o 2026, que garanten “o cumprimento das nosas obrigas, a estabilidade das nosas institucións e, un ano máis, sitúan a Galicia como unha illa de estabilidade no medio dun océano de incerteza”, manifestou o portavoz do Grupo Popular, Alberto Pazos.

“Somos a única comunidade autónoma capaz de aprobar, en tempo e forma, 17 orzamentos consecutivos”, salientou Pazos, quen lembrou que o Goberno de España “leva tres anos de orzamento prorrogado, incumprindo a súa obriga constitucional de presentar un proxecto de presupostos e obviando que o Congreso acaba de tombar por segunda vez a senda de estabilidade presentada polo Goberno de Pedro Sánchez”.

Na súa intervención, o portavoz popular salientou que “tres de cada catro euros dos orzamentos da Xunta para 2026 se dedican a fortalecer a sanidade pública, a mellorar a educación pública, a consolidar e ampliar o escudo social público e a reforzar as políticas públicas de emprego”. “10.587 millóns de euros destinados a fortalecer os servizos básicos: nunca na historia de Galicia se dedicaron máis recursos públicos a fortalecer os piares do estado de benestar deste país”, concretou.

FISCALIDADE MODERADA

“Este goberno vai seguir apostando por unha fiscalidade moderada, que permita mellorar cada día os servizos públicos sen necesidade de empeorar a economía das familias galegas; por rebaixas fiscais que buscan aliviar a situación dos galegos que atravesan situacións difíciles; e porque Galicia continúe a ser esa illa de estabilidade, na que o goberno goberne ao servizo do interese xeral, na que os xuíces xulguen sen tutelas, na que a lei sexa tan previsible como un bo reloxo ou na que as empresas non dependan do capricho político”, sinalou Alberto Pazos, quen rematou avogando porque “moi pronto esa estabilidade se contaxie e poidamos dicir que España e o seu goberno se parecen a Galicia e ao Goberno de Alfonso Rueda”.

Pola súa banda, a viceportavoz popular, Paula Prado, asegurou que “son unhas contas pensadas desde Galicia, para Galicia e ao estilo Galicia, que nos caracteriza pola previsión, a planificación e o sentidiño, e que cada vez contrasta máis co bloqueo, a incerteza e a inestabilidade permanentes dun Goberno de España que nin nos seu mellores soños podería imaxinarse facendo o que hoxe estamos facendo nós aquí”.

Paula Prado fixo un repaso polas emendas presentadas polos grupos da oposición e criticou que “propoñen que haxa menos médicos nos centros de saúde, porque non piden que non se poida contratar a persoal temporal; pretenden recortar no profesorado, impedindo a contratación a tempo parcial nos centros educativos; e recortan dereitos aos funcionarios, negándolles o dereito a percibir o complemento persoal ou o dereito a percibir o complemento de produtividade”.

As deputadas do Grupo Popular Patricia García e Loli Hermelo subliñaron hoxe a aposta da Xunta de Galicia pola construción de vivenda pública, que na cidade de Vigo se manifesta na construción de 6.200 vivendas nos ámbitos de Navia, o Ofimático e Ramón Nieto.

“O Goberno galego está a cumprir en Vigo o compromiso do Presidente Alfonso Rueda de duplicar a vivenda pública existente ao longo da presente lexislatura, cunha actuación se precedentes que se traduce nas 1.600 vivendas previstas en Navia, as 3.200 no ámbito do Ofimático e as 1.400 vivendas proxectadas en Ramón Nieto”, sinalou Patricia García.

Nunha visita ás promocións de vivendas que a Xunta está a construír en Navia, acompañadas da presidenta do PP de Vigo, Luisa Sánchez, as deputadas populares destacaron a “clara implicación da Xunta coa construción de vivendas de Navia” e lembraron que os gobernos do PPdeG “promoveron as primeiras vivendas públicas neste barrio, impulsando desde o inicio o seu desenvolvemento residencial e sentando as bases do crecemento posterior da zona”.

O 60% DAS VIVENDAS XA EN CONSTRUCIÓN

Das 1.600 vivendas que na actualidade impulsa a Xunta en Navia, cun investimento total de 248 millóns de euros, 924 xa están en marcha e 134 millóns de euros xa están licitados, “o que pon de manifesto un alto grao de execución e cumprimento dos compromisos adquiridos”.

A estas actuacións en Navia súmanse as 3.200 vivendas previstas no ámbito do Ofimático e as 1.400 proxectadas en Ramón Nieto, configurando a Vigo como unha das cidades con maior impulso de vivenda pública de Galicia. “Un compromiso que contrasta coas palabras baleiras da ministra de Vivenda na súa visita á cidade, vendendo como un gran éxito o prezo de 8,8 euros por metro cadrado das vivendas, cando o prezo medio na cidade xa está moito por baixo”, indicou Patricia García.

“O compromiso da Xunta coa cidade de Vigo non se limita só ao ámbito da vivenda, e para testificalo só temos que botar unha ollada aos seus orzamentos para 2026, nos que se recollen investimentos por máis de 690 millóns de euros destinados a vivenda, educación, sanidade, infraestruturas e servizos públicos”, destacou a deputada Loli Hermelo.

En concreto, Patricia García puxo como exemplo o construción do novo instituto de ensino secundario Domingo Villar, exemplo de arquitectura moderna e da estratexia de modernización pedagóxica da Xunta, aliñada cos novos modelos educativos e coas necesidades reais do alumnado.

Os deputados do Grupo Popular Juan Manuel Casares e Víctor Baladrón, acompañados do portavoz do PP en Allariz, José Benito Grande, salientaron hoxe que a Xunta de Galicia investirá o vindeiro ano 1,3 millóns de euros na conservación do patrimonio histórico deste concello ourensá.

En concreto, e dentro do Plan Territorial de sostebilidade turística en vilas termais e cascos históricos, a Xunta destinará un millón de euros á realización de actuacións no casco histórico, espazos patrimoniais e a contorna do río Arnoia no municipio alaricán.

A este orzamento sumaranse outros 250.000 euros dentro do Plan Especial do Casco Histórico e 18.000 euros que se destinarán a traballos de conservación e posta en valor do castro de Armeá.

APOSTA POLA CONSERVACIÓN

“Este investimento directo de cerca de 1,3 millóns de euros do Goberno galego en patrimonio e bens de interese cultural converte a Allariz nun dos concellos máis apoiados pola Xunta de Galicia na realización deste tipo de actuacións”, salientou o deputado popular Víctor Baladrón.

Pola súa banda, Juan Manuel Casares afirmou que “este orzamento demostra non só o compromiso do Goberno galego con este concello ourensán, senón tamén unha aposta pola conservación destas pegadas que a nosa historia deixou no territorio e que constitúen unha parte esencial da nosa identidade cultural como galegos”.