Categoría: Parlamento de Galicia

O PPdeG destaca o incremento de 6,6 M€ que o Goberno galego destinará ao Servizo de Axuda no Fogar dos 15 concellos da Mariña –Alfoz, Barreiros, Burela, Cervo, Foz, Lourenzá, Mondoñedo, Ourol, A Pontenova, Ribadeo, Trabada, O Valadouro, O Vicedo, Viveiro e Xove-, nos 3 vindeiros anos.

Así o trasladaron en sendas xuntanzas con veciños de Barreiros e Burela, os deputados do Grupo Popular no Parlamento, Raquel Arias, Nicole Grueira e Enrique Barreiro, tras o anuncio por parte da administración autonómica de aumentar de forma progresiva o prezo por hora, pasando dos 12 euros actuais aos 18 euros, en 2028. Raquel Arias explicou que a Xunta pasará a destinar 12M€ nos concellos nestes tres anos, en vez dos 5,3M€, previstos cos actuais12€/h.

Durante estes encontros, no que estiveron acompañados polos voceiros do PPdeG nos municipios, Enrique Barreiro puxo en valor o esforzo inversor da Xunta e informou de que as administracións locais, desde finais de marzo e cun prazo dun mes, poderán solicitar este incremento do financiamento do SAF; que terá, ademais, efectos retroactivos desde o 1 de xaneiro.

Froito do acordo entre Xunta e Fegamp, en 2026, o prezo da hora será de 16 euros; en 2027, de 17 euros; e, en 2028, de 18 euros. Deste xeito, este ano, en cifras aproximadas, Alfoz recibirá 432.000€; Barreiros, 342.000€; Burela, 614.000€; Cervo, 294.000€; Foz, 960.000€; Lourenzá, 267.000€; Mondoñedo, 390.000€; Ourol, 162.000€; A Pontenova, 390.000€; Ribadeo, 577.000€; Trabada, 275.000€; O Valadouro, 438.000€; O Vicedo, 233.000€; Viveiro, 1M€; e Xove, 703.000€.

O PPdeG denunciou, hoxe, o abandono do transbordador do Miño e instou ao Goberno central a cumprir cos traballos de dragado río, comprometidos con Portugal.

Nunha visita que realizaron ás instalacións –actualmente pechadas- do transbordador que une A Guarda coa localidade portuguesa de Caminha, os deputados autonómicos do Grupo Popular, Julio García Comesaña e Moisés Rodríguez, lamentaron a situación de deterioro do río Miño e o desleixo que sofre este servizo esencial para a conexión transfronteiriza.

“O río –salientou García Comesaña- está cheo de area, o que impide o paso entre ambas as dúas beiras”. E incidiu en que, a pesar de que se anunciara que no cumio hispano-luso se acordaría o dragado e a renaturalización do río, “ese compromiso nunca se materializou”, pese a tratarse dunha demanda histórica.

UN NOVO AGRAVIO DE PEDRO SÁNCHEZ CON GALICIA
Así, recordaron que o PPdeG leva anos defendendo unha estratexia integral para o tramo internacional do río Miño, que inclúe o impulso dun dragado controlado e ambientalmente sostible, a mellora da navegabilidade, a protección das pesqueiras tradicionais, o control das especies invasoras, garantías de caudais adecuados e o reforzo da cooperación transfronteiriza con Portugal.

Neste punto, Moisés Rodríguez considerou que a inacción do Executivo de Pedro Sánchez supón un “novo agravio” con Galicia, afectando á actividade económica, ao turismo e ás comunicacións entre ambos os dous países. E recordou que o PPdeG leva varias iniciativas presentadas, no Parlamento de Galicia, no Congreso e no Senado, alertando da gravidade do estado do río.

Acompañados dos rexedores da Guarda e Salvaterra de Miño, Roberto Álvarez e Marta Valcárcel, da senadora Nidia Arévalo e do voceiro do PPdeG en Tui, Nicolás Montes; os parlamentarios populares pediron que o Goberno “pase dos anuncios aos feitos” e que cumpra de maneira inmediata o compromiso adquirido, impulsando o dragado sostible do río Miño, xunto cun paquete de medidas que permitan recuperar a súa navegabilidade, garantir a súa seguridade e protexer o seu equilibrio ambiental.

O PPdeG denuncia que o Goberno de Sánchez “segue negándose” a facilitar a resposta que dirixiu o Estado español á Comisión Europea, tras un ditame no que cuestiona o cumprimento da normativa comunitaria de contratación pública en relación coas prórrogas da concesión da AP-9.

“Non podemos admitir a alusión á confidencialidade en relación con un asunto que afecta a unha autoestrada fundamental para a mobilidade, a cohesión territorial e o desenvolvemento económico de Galicia” critica o deputado galego Celso Delgado, que tacha de “decepcionante” a última resposta do Goberno de Pedro Sánchez, apoiado polos seus socios independentistas, ante os requirimentos de información dos populares, amparándose nesa confidencialidade que, en realidade, é “unha absoluta falta de transparencia”.

Os deputados galegos do PPdeG no Congreso esixen, deste xeito, “coñecer por que o Goberno, tralos ditames europeos, desaproveitou a viabilidade do rescate e ata afirmou que discutirá coa Comisión Europea, mesmo indo aos tribunais de xustiza”.

UNANIMIDADE Á PETICIÓN DO PPDG NO PARLAMENTO

Os populares defenden a decisión adoptada polo Consello da Xunta de Galicia de autorizar a interposición dun recurso contencioso-administrativo, co obxectivo de obter a información remitida polo Goberno de España á Comisión Europea en relación co ditame sobre as prórrogas da concesión da AP-9.

Delgado lembra que o pasado 2 de febreiro, o propio PSOE votou no Parlamento galego a favor de demandar toda a documentación relativa ao devandito expediente da Comisión Europea. Unha petición impulsada polo PPdeG que, cos votos a favor socialistas e dos seus socios do BNG, saíu aprobada por unanimidade.

AGRAVIO COMPARATIVO CON GALICIA

“Unha vez máis queda acreditado que existe un “tratamento diferenciado” con outras comunidades”, lamenta o deputado galego, lembrando a finalización da AP-7 en Alacante ou a transferencia da A-68 a Navarra. “Non podemos seguir con este agravio a Galicia e dende o PPdeG imos seguir reclamando o que é de xustiza: unha AP-9 libre de peaxes e transferida a Galicia”, subliña.

A transferencia da AP-9 a Galicia é unha demanda histórica dos milleiros de galegos que utilizan a Autoestrada do Atlántico a diario e que sofren a negativa do Goberno central á xestión autonómica, un modelo que reduciría o elevado custo das peaxes, entre outros beneficios para a nosa Comunidade.

Ademais, o PPdeG advirte que as condicións do rescate, a medida que pasa o tempo, serán cada vez máis gravosas polas inxeccións de diñeiro público que está recibindo la concesionaria, sumado a suba das tarifas.

O Parlamento aprobou, hoxe, por unanimidade de todos os grupos presentes, instar de novo ao Goberno central a que habilite un rexistro centralizado que permita obter un certificado de titularidade das contas, saldos e posición bancarias dunha persoa falecida. “Queremos un certificado único que evite que os herdeiros teñan que ir banco por bando buscando información”, dixo Felisa Rodríguez, durante a súa intervención na Comisión 1ª.

“A día de hoxe, non existe un rexistro público que permita coñecer de maneira sinxela as posición bancarias dunha persoa falecida”, sinalou a deputada popular, quen indicou que esta situación provoca que os herdeiros non dispoñan de toda a información necesaria para decidir con seguridade se deben aceptar ou renunciar á herdanza e, no caso de aceptala, tampouco para cumprir coas obrigas tributarias correspondentes.

Tal e como remarcou, a proposición non de lei presentada polo Grupo Popular fora aprobada por unanimidade no Parlamento de Galicia, en 2022, pero volveu, hoxe, de novo a ser debatida en comisión, xa que “acabou caendo en saco roto” do Executivo central. “Insistiremos ata que se converta nunha realidade”, apuntou, para incidir, a continuación, na necesidade avanzar cara un sistema “máis transparente, máis sinxelo e con máis seguridade xurídica”; co fin de que os herdeiros poidan cumprir coas obrigas legais e tributarias con certeza e claridade.

“FACER A VIDA MÁIS SINXELA ÁS FAMILIAS”

Esta iniciativa faise fai eco da demanda de moitas familias e das suxestións de colectivos profesionais –avogados, economistas, xestores administrativos e notariais- que traballan diariamente con este tipo de casos. Entre as vantaxes está a de axilizar os procesos burocráticos, evitar sancións involuntarias e ofrecer garantías e transparencia.

“As familias teñen que facer fronte a unha importante carga de trámites administrativos e burocráticos”, recalcou Felisa Rodríguez. Resulta complicado saber con exactitude en que entidades financeiras tiña contas ou outros activos, como accións, bonos, fondos de investimento, posibles débedas bancaria ou mesmo moedas virtuais e contas bancarias en liña.

“Non busca crear burocracia, senón simplificar trámites, dar seguridade xurídica e facer a vida máis sinxela ás familias nun momento delicado”, subliñou. E apuntou que o Goberno central obtén entre 20 e 35 M€ de ingresos por contas ou depósitos bancarios abandonados: “Se despois de 20 anos non se detecta movemento algún, os saldos pasan a ser propiedade do Estado, en lugar de ir aos herdeiros lexítimos”.

PLANS DE ACTUACIÓN MUNICIPAIS

Por outra banda, o Parlamento aprobou, tamén, sen votos en contra a iniciativa do Grupo Popular na que se insiste na necesidade de que os concellos galegos conten cos Plans de Actuación Municipal fronte ao risco de incendios forestais, por tratarse, dun instrumento esencial de prevención, preparación e resposta no ámbito local.

Neste senso, o parlamentario popular, Ángel Rodríguez, recordou que estes plans deben ser revisados e adaptados ás características e aos medios dispoñibles en cada municipio e que son os concellos os encargados de redactalos e actualizalos, para logo ser aprobados e integrarse dentro do marco xeral da Xunta para a defensa contra incendios forestais. É prioritario, remarcou, que estean perfectamente activos para dar unha resposta rápida e axeitada a calquera situación de risco que se produza.

Ángel Rodríguez recordou que, desde finais do ano pasado, o Goberno galego remitiu aos concellos un total de 178 notificacións para recordarlles o cumprimento desta obriga. E que a Xunta, en aras de apoiar de maneira constante aos concellos e ás entidades locais no exercicio destas funcións, inviste máis de 300.000 euros.

O PPdeG urxe ao Goberno central a que “de maneira urxente e antes de que remate o ano” poña en marcha o réxime especial de franquicia do IVE para as pequenas empresas e persoas autónomas, previsto na Directiva europea 2020/285 e que debía estar vixente desde o 1 de xaneiro de 2025.

O portavoz do Grupo Popular, Alberto Pazos, lamentou, hoxe, a negativa do Goberno de Pedro Sánchez a aplicar esta medida, orientada a reducir os custes administrativos e a aliviar a carga burocrática e financeira. Tal e como explicou, esta demora supón máis burocracia, máis custes e menos competitividade para os pequenos negocios, ademais dunha importante desvantaxe competitiva fronte a outros Estados membros que xa aplican a franquía.

A través dunha proposición non de lei, os populares avogan pola súa aplicación urxente, xa que deste xeito, en Galicia, se aliviaría de forma considerable a carga fiscal de máis de 100.000 autónomos que teñen un volume de negocio anual por debaixo dos 85.000 euros. O IVE franquiciado permite simplificar a facturación e evitar as liquidacións periódicas do IVE, co consecuente aforro de tempo e custes. España é un dos poucos países que non o está a aplicar. Segundo se coñeceu a semana pasada, Bruxelas levou a España ao TJUE por non traspoñer esta Directiva.

 

UN NOVO ATAQUE DE SÁNCHEZ Á COSTA GALEGA

A través dunha proposición non de lei e dunha pregunta urxente, o Grupo Popular abordará o novo ataque do Goberno de Pedro Sánchez á costa galega, coa reforma do Regulamento Xeral de Costas. Neste punto, Pazos pediu que “cese neste intento continuado e incomprensible de boicotear o litoral galego”.

O voceiro popular dixo que a reforma introduce cambios relevantes no réxime das concesións do dominio público marítimo-terrestre, limitando a súa duración, e poñendo en risco a continuidade de instalacións vinculadas ao complexo mar-industria e outras, tamén, de carácter social. Os populares exixen a convocatoria da Conferencia Sectorial para que a Administración estatal dea debida conta do que quere facer e que suspenda o prazo de alegacións á reforma do regulamento.

 ATRASO DO PLAN ESTATAL DE VIVENDA

No apartado de preguntas ao goberno, o Grupo Popular presentará, ademais da relativa ao Regulamento Xeral de Costas, outras dúas: unha relativa ao atraso da aprobación do Plan Estatal de Vivenda 2026-2030 e outra sobre as axudas destinadas a proxectos para a restauración da biodiversidade e ecosistemas mariños, e para a rexeneración da produtividade dos bancos marisqueiros.

 Para rematar, Pazos avanzou que, na próxima sesión plenaria, se debaterá o Proxecto de Lei de modificación da Lei de Saúde de Galicia, pola que se establecen medidas de prevención e protección integral contra a violencia no sistema sanitario galego. E que o conselleiro de Educación, Ciencia, Universidades e Formación Profesional comparecerá, a petición propia, para informar sobre a modernización do modelo de FP de Galicia.

O PPdeG puxo en valor, hoxe, o desenvolvemento económico e industrial da comarca do Deza, especialmente, de Lalín. “É referente para todos os concellos en todos os ámbitos do rural galego”, dixo Alberto Pazos.

Neste punto, o Portavoz do Grupo Popular no Parlamento incidiu no pulo do Goberno galego ao proxecto de ampliación da cuarta fase do Parque Empresarial de Lalín 2000. Na actualidade, este polígono, que conta con preto de 540.000 metros cadrados, xa non ten solo dispoñible para o asentamento de máis empresas, así é que, tal e como informou, con esta ampliación se incrementará a súa superficie en preto dun 60%.

Tal e como indicou Pazos, trátase dun proxecto estratéxico para o Deza, que contribuirá ao seu desenvolvemento económico, facilitando o asentamento de novas iniciativas empresariais e permitindo, no caso de que o precisaren, a ampliación das xa existentes. Deste xeito, este polígono afianzarase aínda máis como un polo de dinamización económica e industrial, no que, a día de hoxe, conta con preto de 100 empresas e máis de 1.200 traballadores.

Os parlamentarios populares elixiron Lalín para celebrar a reunión semanal de grupo, continuando, así, coa rolda de visitas que realizan polo territorio.

LALÍN, LECCIÓN DE XESTIÓN E BO FACER
Acompañado do alcalde, José Crespo, o portavoz popular salientou a “lección de xestión e bo facer” deste concello, grazas a que hai planificación e moito traballo: “José Crespo é un referente para este partido, e para calquera outro, que queira apostar polo futuro do rural en Galicia”. “Conseguiuse –engadiu- que non apareza nas noticias pola perda de peso, senón por todo o contrario, porque aquí hai proxecto”.

O PPdeG destaca o incremento de 4,6 M€ que o Goberno galego destinará ao Servizo de Axuda no Fogar dos 9 concellos do Salnés –Cambados, O Grove, A Illa de Arousa, Meaño, Meis, Ribadumia, Sanxenxo, Vilagarcía de Arousa e Vilanova de Arousa-, nos 3 vindeiros anos.

Así llo trasladou o portavoz do Grupo Popular no Parlamento, Alberto Pazos, aos alcaldes e portavoces da comarca, tras o anuncio por parte da administración autonómica de aumentar de forma progresiva o prezo por hora, pasando dos 12 euros actuais aos 18 euros, en 2028. Pazos explicou que a Xunta pasará a destinar 15,7M€ nos concellos nestes tres anos, en vez dos 11,6M€, previstos cos actuais12€/h.

Durante unha xuntanza, na que estivo acompañado do deputado Raúl Santamaría, Alberto Pazos puxo en valor o esforzo inversor da Xunta e informou de que as administracións locais, desde finais de marzo e cun prazo dun mes, poderán solicitar este incremento do financiamento do SAF; que terá, ademais, efectos retroactivos desde o 1 de xaneiro.

UN 41% DE INCREMENTO MEDIOS NOS CONCELLOS DO SALNÉS
Froito do acordo entre Xunta e Fegamp, en 2026, o prezo da hora será de 16 euros; en 2027, de 17 euros; e, en 2028, de 18 euros. Isto suporá que, para o período 2026-2028, a suba media do orzamento destinado ao SAF de todos os concellos do Salnés é do 41%.

Deste xeito, en 2026, en cifras aproximadas, Cambados recibirá uns 620.000€; O Grove, 780.000€; A Illa de Arousa, 280.000€; Meaño, 270.000€; Meis, 334.000€; Ribadumia, 750.000€; Sanxenxo, 615.000€; Vilagarcía de Arousa, 840.000€; e Vilanova de Arousa, 450.000€.

O PPdeG urxe ao Goberno central a inmediata posta en marcha do réxime especial de franquicia do IVE, previsto na Directiva europea 2020/285 e que debía estar vixente desde o 1 de xaneiro de 2025.

Os deputados autonómicos, Cristina Sanz e José Manuel Mato, acompañados da presidenta provincial do PPdeG, Elena Candia, mantiveron unha xuntanza, en Lugo, con membros dos colectivos Lugo Monumental e Mulleres Líderes de Galicia; co fin de recoller as súas demandas e inquedanzas e abordar, tamén, as consecuencias que está a ter a negativa do Executivo de Pedro Sánchez de aplicar esta medida. E segundo se coñeceu esta mesma semana, Bruxelas levou a España ao TJUE por non traspoñer esta Directiva.

Tal e como explicou Cristina Sanz, esta demora supón máis burocracia, máis custes e menos competitividade para os pequenos negocios, ademais dunha importante desvantaxe competitiva fronte a outros Estados membros que xa aplican a franquía. De aí que avoguen pola súa aplicación urxente, xa que deste xesto se aliviaría de forma considerable a carga fiscal de máis de 20.000 autónomos na provincia –arredor duns 100.000 en Galicia-, que teñen un volume de negocio anual por debaixo dos 85.000 euros.

Neste punto, os parlamentarios populares aproveitaron o encontro para trasladarlles a iniciativa que o Grupo Popular presentou no Parlamento de Galicia e na que se insta ao Goberno a que deixe de afogar aos traballadores por conta propia, xa que lles impide optar por un réxime que simplifica a facturación e evita as liquidacións periódicas do IVE, co consecuente aforro de tempo e custes. “Ata cando vai seguir con esta asfixia inxusta e inxustificable?, lamentou Cristina Sanz, quen sinalou que esta medida está orientada a reducir os custes administrativos e a aliviar a carga burocrática e financeira.

O APOIO DA XUNTA A AUTÓNOMOS E PEMES

Asemade, fixeron fincapé na sensibilidade que o Goberno galego está a ter co colectivo dos autónomos e pemes. Neste punto, José Manuel Mato puxo en valor as diferentes accións que en apoio deste colectivo desenvolve na nosa Comunidade, enmarcadas na Axenda de Impulso ao Emprego Autónomo, a cal conta cun orzamento total de 360 M€ ata 2027. E salientou a ampliación a dous anos da cobertura da cotra cero no programa de promoción do emprego autónomo para aquelas persoas que inicien unha actividade vinculada á agricultura, gandaría ou silvicultura; o reforzo do Bono Remuda, destinado a facilitar a transmisión de negocios; ou accións destinadas a favorecer o retorno ao autoemprego.

O portavoz do Grupo Parlamentario do PPdeG, Alberto Pazos, lamentou, hoxe, que a estratexia de confrontación do BNG antepoña os intereses partidistas ao respecto ás institucións.

Así, criticou que os independentistas persistan na súa proposta á adxunto ao cargo da Valedora do Pobo, sen ter garantido, previamente, o apoio da Cámara para a súa aprobación. Tal e como sinalou, “por primeira vez na historia do Parlamento de Galicia”, rexistrouse o nome dun candidato para ocupar un órgano estatutario de maneira unilateral e se rexeita por falta de previo consenso.

“Non é certo que este grupo teña rachado ningún consenso, porque non se pode rachar o que nunca existiu”, incidiu Pazos, quen recordou que o acordo era que ambos os dous partidos propuxeran perfís marcadamente institucionais e independentes. Neste punto, fixo fincapé en que o currículo da persoa proposta polos nacionalistas é incompatible coas “esixencias de imparcialidade, de transparencia e de obxectividade”, imprescindibles para preservar unha institución como a da Valedoría do Pobo. É por iso que o Grupo Popular rexeitou, na Comisión de Peticións, a proposta do BNG.

Dixo que o PPdeG, que tomou a decisión de fortalecer as institucións, designando perfís absolutamente imparciais, “non vai permitir que sexan colonizadas por activistas afíns a forzas minoritarias”. Nesta liña, o parlamentario popular avogou por volver á senda do consenso e acadar un acordo baseado na elección de persoas de marcado carácter institucional, de probada obxectividade e de absoluta imparcialidade: “Seguiremos coa man tendida para retomar o proceso da completa renovación da Valedoría”.

UNHA COMISIÓN PARA UN FINANCIAMENTO XUSTO
Por outra banda, o portavoz popular informou da constitución da Comisión non permanente especial de estudo para abordar a proposta de Galicia diante da reforma do sistema de financiamento, na que o PPdeG propuxo como presidente a Julio García Comesana e como vicepresidenta a Paula Prado.

Neste senso, incidiu en que o obxectivo é contar cun documento que responda ás necesidades reais de Galicia e que, á súa vez, sirva de apoio ao Goberno galego nas negociacións multilaterais, que tanto se teñen reclamado, para corrixir o infrafinanciamento da nosa Comunidade. E que, tal e como recordou, vén causado por “un sistema inxusto e ineficiente”.

“O consenso, que se intuía ao longo da pasada lexislatura, agora semella roto, debido ao cambio de postura, tanto do BNG como do PSdeG”, lamentou Pazos. Así, criticou que os independentistas aposten por un concerto galego, a pesar de estar desaconsellado pola maioría dos técnicos por consideralo prexudicial para Galicia; e que os socialistas, por antepoñer os intereses de Pedro Sánchez, renuncien a un financiamento xusto para Galicia.

O Parlamento de Galicia aprobou hoxe, a través dunha proposición non de lei do Grupo Popular, reclamar ao Goberno central unha planificación eléctrica xusta que garanta o desenvolvemento industrial da nosa Comunidade. A iniciativa saíu adiante sen ningún voto en contra.

O portavoz popular de Industria e Enerxía, Rubén Lorenzo, lamentou os tres anos de “atrasos e improvisacións” do Executivo de Pedro Sánchez para concluír coa planificación da rede de transporte eléctrico. Neste punto, considerou urxente unha resposta ás necesidades dos proxectos que queren implantarse na nosa Comunidade, pero que, por falta de conexión, non o poden facer.

Durante a súa intervención, o parlamentario popular recordou que, dos 8000 megavatios de nova capacidade de demanda que Galicia solicitou, o Goberno de Pedro Sánchez só concedeu o 23,7%: “Isto é, só está a atender unha de cada catro necesidades reais de Galicia; o restante 76% queda sen resposta”. Unha “discriminación inxustificable”, resaltou, máis tendo en conta que a nosa Comunidade aporta o 8,8% da xeración eléctrica do país e o 29% de toda a hidráulica total.

Fixo fincapé na falsidade do discurso sostible da Administración central: “Así non hai transición que funcione; non hai industria que se poida instalar e non hai territorio que poida competir”. E reclamou un investimento acorde á nosa xeración eléctrica, unha rede que permita evacuar renovables e desenvolver bombeos reversibles e un mecanismo áxil para conectar proxectos estratéxicos, co fin de contar con capacidade para atraer industria e crear emprego.

A PROVINCIA DE LUGO, EXCLUÍDA DO MAPA DE PLANIFICACIÓN
“O que fai con Galicia non é planificación, é abandono”, dixo Rubén Lorenzo, quen incidiu nos prexuízos que terá para a provincia de Lugo, que queda sen resposta o futuro industrial de Lugo durante a próxima década.

Tal e como figura no mapa de planificación do Executivo de Pedro Sánchez, tanto o oeste como o centro de Lugo non teñen nin unha soa subestación de transporte, o que impide a instalación de empresas: “Significa que proxectos de hidróxeno verde, centros de datos, industria agroalimentaria ou forestal queden directamente excluídos”. “Unha provincia desconectada –continuou- é unha provincia condenada”.

Tal e como explicou, a desconexión da provincia de Lugo non é un problema local, é un problema estrutural que arrastra, tamén, a outras zonas, como Curtis e Teixeiro.

Para rematar, criticou a postura do PSdeG, sempre na defensa de Pedro Sánchez, nunca na de Galicia. Así, dixo que, cada vez que o Goberno central recorta, discrimina e desconecta Lugo, “o PSdeG cala”. “Porque para o PSdeG –engadiu- antes está Pedro Sánchez que Galicia.