Categoría: Parlamento de Galicia

Os deputados do Grupo Popular Julio García Comesaña, Manuel Santos e Felisa Rodríguez solicitaron hoxe que o Goberno de España habilite de maneira urxente unha solución habitacional para as persoas migrantes que, tras ver denegadas as súas solicitudes de protección internacional, se ven obrigadas a abandonar o centro Cemar de Mondariz-Balneario sen ningunha alternativa.

Acompañados pola alcaldesa de Ponteareas, Nava Castro; o alcalde de Mondariz, Pablo Barcia Bello; e a portavoz municipal do PP en Mondariz-Balneario, Marisa Dominguez Alvarez, os deputados populares denunciaron “a absoluta falta de planificación e de responsabilidade do Goberno de Pedro Sánchez, que trasladou a 200 migrantes a Mondariz-Balneario sen coordinación coa Xunta nin cos concellos e que agora se desentende completamente da súa situación, deixando a estas persoas literalmente na rúa, sen recursos, sen fogar e en situación administrativa irregular”.

DENEGACIÓN DE ASILO

A situación destas persoas, procedentes maioritariamente de países como Senegal, Mali ou Mauritania, agravouse recentemente ao coñecerse que a moitas delas se lles notificou a denegación das súas solicitudes de asilo, quedando obrigadas a abandonar as instalacións do centro de acollida no que permanecían. A consecuencia directa é que estas persoas fican na actualidade sen fogar, sen acceso a recursos públicos, en situación administrativa irregular e sen posibilidade de inserción social ou laboral.

“A solidariedade non pode depender só da boa vontade dos concellos ou dos veciños, polo que o Goberno de España non pode lavarse as mans e abandonar ás persoas ás que el mesmo decidiu trasladar de xeito unilateral”, sinalou García Comesaña. Pola súa parte, Felisa Rodríguez destacou que o novo regulamento da Lei de Estranxeiría que entra en vigor este mes “imposibilita incluso a vía do arraigo como alternativa, condenando aos migrantes a anos de irregularidade e exclusión”.

Os deputados populares anunciaron a presentación no Parlamento galego dunha iniciativa a través da que se solicita ao Goberno central que informe á Xunta e aos concellos aos que se destinaron estes migrantes do número destas persoas que están a ter unha negativa da súa solicitude de asilo, ao tempo que se lle pide que active medidas que lles permitan acceder a recursos básicos de subsistencia mentres non se exploran alternativas legais de permanencia no país.

“Reiteramos o compromiso do Partido Popular cunha política migratoria humanitaria, coordinada e respectuosa cos dereitos das persoas”, sinalaron os deputados populares, quen lembraron que “Galicia non ten competencias en materia migratoria, polo que é o Estado quen debe asumir a súa responsabilidade”.

O portavoz do Grupo Popular, Alberto Pazos, demandou hoxe ao BNG que “saia da súa burbulla nacionalista e negacionista e recoñeza a gravidade da situación que vivimos e o bo traballo feito polo Goberno galego, en coordinación coa Delegación do Goberno, durante o apagón eléctrico que sufriu toda a Península Ibérica o pasado luns e martes”.

Alberto Pazos comezou a súa intervención trasladando o agradecemento especial polo traballo feito neses días ás Forzas do Orde Público e aos profesionais na sanidade e os servizos sociais. “E tamén quixera destacar o civismo e saber estar nestas longas horas por todos os galegos, demostrando unha vez máis que somos unha sociedade avanzada que sabe adaptarse e convivir con situacións difíciles e imprevistas como a vivida este luns e martes”, engadiu.

Fronte á coordinación que houbo entre a Xunta e o Goberno central para a adopción das medidas oportunas que garantiran seguridade e transmitiran tranquilidade á cidadanía nestes momentos de apagón eléctrico, Alberto Pazos criticou a “negatividade e demagoxia amosada polo BNG, que non se lle ocorreu outra cousa respecto da complexa situación vivida que criticar a activación por parte da Xunta do nivel 3 do Plan Estatal de Xestión de Emerxencias de Protección Civil en Galicia”.

ACTUACIÓNS CONXUNTAS E COORDINADAS

“Parece mentira que lle teñamos que explicar que estamos a falar dun apagamento en toda a Península Ibérica, que requiría actuacións conxuntas e coordinadas a nivel de toda España e Portugal,  e que por iso era necesario que o mando sobre as actuacións a realizar na Comunidade galega recaera, nun momento determinado e ata que se recuperou o subministro eléctrico en toda Galicia, no Goberno central”, explicou..

Alberto Pazos criticou que “o BNG vive illado no seu mundo nacionalista e negacionista, incapaz de recoñecer a gravidade da situación que atravesamos o luns e o martes, na que Galicia tiña pouco que dicir, porque era unha afectada máis dentro apagón xeral vivido en toda a Península Ibérica e no que a solución, como se puido comprobar, tiña que vir desde o Goberno central e da Rede Eléctrica Española”.

Así mesmo, o portavoz popular denunciou “a incompetencia amosada polo Goberno de Pedro Sánchez na xestión deste apagón: primeiro, para trasladar información e tranquilizar á cidadanía sobre a situación que se estaba a vivir; e segundo, para dar unha explicación convincente e con aval técnico sobre as causas que motivaron este apagón, de xeito que se poidan adoptar as medidas necesarias co obxectivo de que esta situación no se volva a repetir xamais”.

DESENVOLVEMENTO DE COMPETENCIAS AUTONÓMICAS

Alberto Pazos tamén fixo unha valoración do Debate de Política Xeral celebrado a pasada semana, no que finalmente se aprobaron 53 resolucións, das que sete foron apoiadas por todos os grupos parlamentarios.

Porén, o portavoz popular referiuse a aquelas resolucións aprobadas pero que tiveron o voto en contra tanto de BNG como de PSdeG. En concreto, amosou a súa sorpresa pola falta de apoio de nacionalistas e socialistas a propostas como que se reforce a Unidade de Policía Adscrita á Comunidade galega, e se cubran a totalidade das vacantes do Corpo Nacional de Policía e Garda Civil; que o Goberno central faga un reparto con criterios obxectivos e equitativos dos menores migrantes non acompañados, ademais de dotar este plan do financiamento adecuado; que o Estado transfira ás comunidades autónomas a xestión directa dos fondos europeos, en particular os do ámbito industrial; que o Goberno central implante medidas para o incremento de profesionais sanitarios, como a homologación de títulos, elevar a idade máxima para exercer a profesión médica ou a implantación da especialidade de urxencias; ou que o Goberno galego siga avanzando en alivios fiscais para os cidadáns, incluíndo nos vindeiros orzamentos de 2026 novas rebaixas fiscais.

“Podemos chegar a entender que os deputados socialistas se opuxeran a algunha destas cuestións, así como outras relacionadas co cofinanciamento das escolas infantís, o abono do 50 por cento da Lei de dependencia ou a reforma do modelo de financiamento, porque a súa prioridade é defender ao Goberno de Pedro Sánchez e seguir ao ditado o que lles marcan desde Moncloa, deixando sempre a un lado os intereses de Galicia e dos galegos, como xa nos teñen acostumados”, indicou Alberto Pazos, pero asegurou que “non chegamos a comprender como os deputados do BNG, que tanto defenden o autogoberno de Galicia, se opoñan a cuestións que afectan tan directamente ao desenvolvemento das nosas competencias autonómicas, como pode ser a defensa da Unidade da Policía Adscrita; a transferencia de fondos europeos para a nosa industria ou as medidas para a incorporación de novos profesionais á nosa sanidade pública”.

Para rematar, dixo que “pechamos un Debate de Política Xeral no que os galegos puideron confirmar que gozan dun Goberno galego con ideas e proxectos para que Galicia siga sendo un referente, a nivel nacional e europeo, de estabilidade e de confianza para os inversores que desexen apostar pola nosa terra; e, enfronte, existe unha oposición que só mira polos seus intereses particulares, onde os nacionalistas rexeitan incluso aquelas cuestións que poden fortalecer o noso autogoberno, confirmando que son os do non a todo o que teña que ver co futuro da nosa industria, da nosa sanidade ou da nosa educación, e os socialistas galegos non teñen máis proxecto que defender a Pedro Sánchez, dicindo nós tampouco a todo o que supoña atender as necesidades e demandas que Galicia lle fai ao Goberno de España”.

FELICITACIÓNS POLO CONGRESO DO PP EUROPEO

Por último, Alberto Pazos felicitou ao Partido Popular Europeo polo éxito do seu congreso celebrado esta semana en Valencia, no que saíu reelixido como Presidente o alemán Manfred Weber, e como secretaria xeral a española Dolors Montserrat, “a quen felicitamos expresamente pola súa estreita relación e as atencións que sempre tivo, e estamos seguros que seguirá mantendo, co Partido Popular de Galicia”. Así mesmo, saudou a designación do vicesecretario de Institucional do Partido Popular de España, Esteban González Pons, como novo responsable da portavocía do PP no Parlamento Europeo.

Os deputados do Grupo Popular Miguel Figalgo, Loli Hermelo, Manuel Santos e Magdalena Pérez criticaron hoxe que o patrón maior de Rianxo “utilice o seu posto na confraría para facer oposición política á Xunta de Galicia e converter esta entidade nunha sucursal do PSOE”.

Nunha visita ao porto de Rianxo, acompañados do portavoz do PP neste concello, José Luís Castiñeiras, os deputados populares demandaron ao patrón maior de Rianxo “que aclare cando fala se o fai como representante da Confraría ou como concelleiro do Partido Socialista”.

“A Confraría non debe converterse nunha plataforma electoral do PSOE”, indicaron os deputados, e lamentaron que o patrón maior “estea utilizando permanentemente as necesidades das persoas que traballan no mar como trincheira política contra a Xunta”. Así mesmo, consideraron “lamentable que empregue o seu cargo no sector para medrar no PSOE e facer oposición política ao Partido Popular e á Xunta de Galicia, á vez que trata de manipular ao resto de confrarías da ría no seu propio beneficio político”.

CRÍTICA Á XUNTA, SILENCIO CONTRA O GOBERNO CENTRAL

Miguel Fidalgo lembrou que, “desde que este señor preside a Confradía, os resultados do pósito non paran de baixar, de xeito contrario ao que está acontecendo noutras entidades pesqueiras veciñas”, polo que lle demandou que “centre os seus esforzos en atender á súa responsabilidade na Confraría en lugar de facer campaña política permanente en contra da Xunta”. “Se quere traballar para o PSOE, que deixe o cargo de patrón maior”, manifestou.

“Non pode utilizar o marisqueo como ferramenta política para facer campaña para o PSOE”, sinalaron os deputados populares, quen consideraron “curioso que critique á Xunta mentres cala diante do Goberno de Pedro Sánchez, que se nega a eliminar as cotizacións sociais ao marisqueo ou a reducir o IVE do peixe e do marisco”.

Por este motivo, pediron ao patrón maior que “se realmente quere defender ao sector, que apunte cara a quen crea os problemas: cara a Pedro Sánchez e as súas políticas, e non cara a quen traballa todos os días para protexer o noso mar”.

O Parlamento de Galicia aprobou hoxe a proposición non de lei do Grupo Popular, sen o voto favorable dos deputados do PSdeG, a través da que se solicita ao Goberno central que participe de xeito claro no financiamento do Sistema Público Universitario e, en consecuencia, na consecución do obxectivo de acadar o 1 por cento do PIB en recursos públicos as universidades no 2030. Así mesmo, pídese que calquera reforma que se realice no sistema universitario que afecte ás comunidades autónomas sexa en dialogo con elas e sempre trasladando os fondos necesarios para a aplicación das medidas propostas.

A portavoz popular de Educación, Cecilia Vázquez, lembrou que “en Galicia está operativo o Plan de financiamento universitario 2022-2026, a través do que as universidades galegas reciben o maior apoio da historia ao mobilizarse arredor de 3.200 millóns de euros neste período, ao que se suman outras achegas adicionais como as vinculadas ao plan de infraestruturas universitarias”.

RECIBIR O QUE NOS CORRESPONDE

“Somos a primeira comunidade autónoma que acada o 1 por cento do seu PIB en gasto na universidade pública, cumprindo con moita antelación un obxectivo fixado para o ano 2030 e mellorando o que marca a Lei de universidades estatal para o conxunto de axentes públicos”, destacou.

Diante desta situación, Cecilia Vázquez demandou que o Ministerio de Ciencia e Universidades “poña dunha vez as cartas enriba da mesa e peche xa un plan para acadar ese 1 por cento do PIB en toda España”, pero advertiu que “non imos permitir que ese plan prexudique a Galicia e sexa penalizada con menos financiamento estatal por ter cumprido xa co obxectivo do 1 por cento”. “Se hai un plan de financiamento estatal para as universidades para acadar ese 1 por cento do PIB, Galicia debe recibir o que lle corresponde consonte ao esforzo realizado e que nos permite estar hoxe onde estamos”, indicou.

Para rematar, a portavoz popular afirmou que “o Goberno central non está actuando conforme ao obxectivo fixado e deberá incrementar o financiamento ás universidades, máxime tendo en contra que o Goberno central elaborou e aprobou a norma que establece esta meta de xeito universal sen contar coa colaboración das comunidades autónomas e sen o correspondente traslado de fondos para o desenvolvemento das medidas que recolle”.

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se solicita ao Goberno central que impulse unha nova Lei do Patrimonio Cultural para modernizar e refundir a lexislación vixente en materia de patrimonio, en colaboración coa Comunidade galega, os concellos e as demais institucións públicas e privadas do sector.

O deputado popular José Luís Ferro lembrou que “o Goberno de Pedro Sánchez  presentou en 2021 un anteproxecto da nova Lei de patrimonio cultural, da que o Goberno galego se posicionou en contra por varios motivos: invadía as competencias das comunidades autónomas, trataba de recuperar para o Estado funcións que non é capaz de facer no día a dia, e impoñía ríxidos trámites burocráticos que dificultan a xestión do patrimonio e empeoran a atención á cidadanía”.

Porén, criticou que “este Goberno de España non foi capaz de sacar adiante esta norma, que incluía medidas que restaba eficacia e eficiencia á xestión dos poderes públicos en materia de patrimonio cultural, e que claramente invadía competencias autonómicas retrotraéndose a un proceso centralizador xa superado pola madurez das competencias das autonomías”.

RESPOSTAS E SEGURIDADE

“Galicia e as entidades que teñen incidencia sobre o patrimonio precisan respostas e seguridade, porque non podemos estar pendentes dos cambios de opinión de última hora dun Goberno de España que amosa, día si e día tamén, pouca capacidade de acción para as cousas importantes e moita celeridade cando se trata de manterse no poder a costa do que sexa”, afirmou.

Ferro demandou que o Goberno de Pedro Sánchez “reinicie as tarefas que deixou a medias e que se leve a cabo un debate con todos os actores públicos e privados que protexen e promoven o coñecemento do patrimonio cultural”, porque indicou que “a redacción do anteproxecto resulta hoxe moi xenérica e débese adaptar ao moito que se evolucionou e se innovou, incluíndo asuntos que hai 40 anos non existían”.

“A creación dunha nova Lei estatal de patrimonio cultural outorgaría a Galicia seguridade no exercicio das súas competencias”, indicou o deputado popular, quen anotou que “necesitamos unha lei sinxela e unificadora, que non adultere a cultura, pois a protección e promoción da nosa cultura debe ser o prioritario”.

O deputado do Grupo Popular Roberto Rodríguez afirmou hoxe no Parlamento de Galicia que a Xunta completará nas vindeiras semanas o informe de avaliación do estado dos murais de Urbano Lugrís na rúa Olmos e que determinará o custo que suporía a súa retirada e traslado a outro espazo na cidade de A Coruña que reúna as condicións adecuadas para a súa conservación. Porén, criticou “o desleixo do Goberno socialista de A Coruña, apoiado polo BNG, que non foi quen de facer unha aposta, nin económica nin política, por un proxecto cultural para a cidade ou pola protección da obra de Urbano Lugrís”.

Roberto Rodríguez lembrou que a Xunta, exercendo o seu dereito de tanteo, adquiriu por 36.000 euros os murais de Urbano Lugrís existentes en dúas casas unidas na rúa Olmos de A Coruña, unha vez que incoou o procedemento para declarar ben de interese cultural, na categoría de monumento, estas obras. “Fronte á actitude da alcaldesa, que deixou claro que o Concello non compraría os murais, o Goberno galego actuou con rapidez para salvagardar unhas obras tan importantes e sumalas ao patrimonio público de Galicia”, apuntou.

HIPOCRISÍA DO BNG

“O Goberno municipal de A Coruña, que o BNG apoia incondicionalmente, non fixo absolutamente nada nin para protexer os murais de Urbano Lugrís nin para que estas obras quedaran na cidade”, incidiu o deputado popular. Neste sentido, criticou que, logo de que a alcaldesa anunciara en abril de 2023 que se ía solicitar a tramitación da declaración destes murais como BIC, “tardaron once meses e só remitiron a solicitude ao día seguinte que a Xunta anunciou o seu interese por estas obras”.

Ademais, Roberto Rodríguez asegurou que “os murais quedarán en A Coruña pola aposta seria e decidida da Xunta, porque se fora polo interese e a dilixencia dos responsables municipais xa estarían hoxe nunha galería privada de Vigo, a pesar de que no seu programa electoral se comprometeron literalmente a recuperar os murais da rúa Olmos e crear en Fornos o Espazo Urbano Lugrís”. Agora, afirmou que o informe de avaliación sobre os murais “será unha boa base para sentar a conversar e tender pontes entre administracións para buscar a mellor solución”.

Para rematar, o deputado popular criticou a “hipocrisía do BNG ao traer hoxe ao Parlamento galego a súa preocupación polos murais de Lugrís en A Coruña, pedindo a outros o que non son quen de esixirlle que cumpra a alcaldesa, pese a facela e mantela no seu posto”.

O Parlamento de Galicia aprobou hoxe, sen o apoio dos deputados de BNG e PSdeG, a proposición non de lei do Grupo Popular a través da que se solicita ao Goberno de España que realice, de maneira urxente e inmediata, as actuacións necesarias para asegurar a subministración eléctrica a todos os proxectos industriais estratéxicos previstos na Comunidade galega, e garantir a evacuación de enerxía derivada do aumento da xeración renovable no sistema eléctrico. Así mesmo, pídese que colabore estreitamente coas comunidades autónomas e dea resposta ás súas necesidades no deseño da nova planificación eléctrica con horizonte 2030, co obxectivo de garantir o desenvolvemento enerxético e industrial de Galicia.

O portavoz popular de Industria, Rubén Lorenzo, manifestou que “a planificación eléctrica deberíase de configurar como un instrumento normativo que establece os desenvolvementos necesarios da rede de transporte de electricidade para que a subministración en España siga sendo segura, de alta calidade e cada vez máis renovable”. Deste xeito, afirmou que “débese facer unha planificación dimensionada e preparar a rede de transporte para que, ademais de atender a demanda actual, sexa capaz de dar resposta a novos consumos e facilite a transición ecolóxica”.

APAGÓN ELÉCTRICO E INFORMATIVO

Lorenzo cualificou de “surrealista e incomprensible que no 2025 esteamos falando de que se dea unha situación de cero enerxético en España” como a que aconteceu onte, na que “moito máis grave que o apagón eléctrico sufrido durante moitas horas, foi o apagón informativo ao que nos someteu o Goberno central”. Neste sentido, puxo en valor “o civismo dos españois, porque gracias a el non estamos falando de situacións preocupantes no país”.

“Pedro Sánchez non pode falar de rede eléctrica como se fose unha empresa privada máis, porque todos sabemos que Redeia é un organismo público”, manifestou o portavoz popular, quen cuestionou “onde está a presidenta de Rede Eléctrica Española, unha señora que era ministra co señor Zapatero e que está desaparecida para a cidadanía e para as empresas”.

O Grupo Popular demandará no Pleno ordinario que se celebra a vindeira semana o apoio do Parlamento galego á rebaixa do nivel de protección do lobo e que o Goberno central apoie ás comunidades autónomas no desenvolvemento das accións oportunas e necesarias para a xestión desta especie e a defensa dos intereses dos gandeiros. Asemade, pedirá que a tramitación do proxecto da mina de Doade en Ourense, seleccionada como un dos sete proxectos en España para o procesado e reciclado de materias primas estratéxicas na Unión Europea, se leve a cabo consonte á normativa actual e sen ningún menoscabo ambiental, de tal xeito que so poida ser aprobado se cumpre toda a lexislación vixente, especialmente a medioambiental.

Ao remate da Xunta de Portavoces, o portavoz popular, Alberto Pazos, lamentou “os dous apagóns que sufrimos onte todos os españois: o eléctrico e o informativo por parte do Goberno central”. Neste sentido, agradeceu o traballo desenvolvido polos profesionais de todas as administracións públicas, de xeito especial o realizado pola Xunta de Galicia, “que traballaron nunha situación complicada para mitigar os efectos que podía ter na cidadanía a falta de enerxía eléctrica”.

“Nos congratula que a gran maioría dos galegos poida gozar neste momento do normal subministro eléctrico” afirmou Pazos, quen demandou explicacións sobre o acontecido ao Goberno central “porque é un problema que afectou ao conxunto do Estado”. “Non sei que debe pasar en España para que se declare unha emerxencia nacional”, indicou.

Respecto da orde do día da sesión plenaria, o portavoz popular informou que terá lugar a comparecencia de dous conselleiros: o de Cultura, Lingua de Xuventude, para dar conta dos proxectos a curto e medio prazo que afronta este departamento; e o do Mar, para informar sobre a comercialización dos produtos pesqueiros ante as negociacións do acordo de libre comercio da Unión Europea con Tailandia.

APOIO Á REBAIXA DA PROTECCIÓN DO LOBO

Dentro do apartado de proposicións non de lei, o Grupo Popular pretende que o Parlamento de Galicia manifeste o seu apoio á rebaixa do nivel de protección do lobo, restablecendo o equilibrio entre a necesaria preservación desta especie e as actividades gandeiras desenvolvidas no rural; ao tempo que se pide ao Goberno central que apoie ás comunidades autónomas no desenvolvemento das accións oportunas e necesarias para a xestión do lobo e a defensa dos intereses dos gandeiros.

Alberto Pazos lembrou que o Congreso acordou rebaixar a protección desta especie ao norte do río Douro, “o que supón unha corrección á errada decisión do Goberno de España de incluír en 2021 o lobo no listado de especies silvestres en réxime de protección especial, adoptada de xeito unilateral, sen consultar coas comunidades autónomas afectadas, e sen ningún tipo de aval científico”.

“Esta decisión do Goberno de Pedro Sánchez privou ás comunidades autónomas de adoptar medidas de control sobre o lobo, o que dificultou a súa convivencia co sector gandeiro e derivou en perdas considerables aos propietarios polos ataques aos seus animais”, lembrou. Unha mostra desta preocupante situación foi que os avisos por danos provocados polo lobo se incrementaron cerca dun 77 por cento, ao tempo que as reses afectadas por ataques desta especie aumentaron nun 57 por cento, cunha media de dez animais atacados cada día.

IMPULSO Á ACTIVIDADE INDUSTRIAL

A segunda das proposicións non de lei que defenderá o Grupo Popular ten que ver co impulso da actividade industrial en Galicia, en concreto a raíz da selección por parte da Comisión Europea da explotación da mina de litio de Doade en Ourense como un dos sete proxectos estratéxicos en España. “Esta decisión permitirá a esta explotación mineira dispor dun mellor financiamento europeo e nacional, así como contar cunha maior axilidade á hora de obter permisos para reducir a dependencia da Unión Europea de materiais estratéxicos procedentes doutras áreas do mundo”, explicou o portavoz popular.

Deste xeito, desde o Grupo Popular pedirase que se recoñeza a importancia das materias primas fundamentais e das materias primas estratéxicas para reforzar a autonomía estratéxica e reducir a dependencia exterior. Para iso, solicitarase no Pleno que a tramitación do proxecto da mina de Doade se leve adiante co máximo respecto á normativa actual, incluídas as esixencias do Regulamento Europeo de materias críticas, e, por suposto, sen ningún menoscabo medioambiental, e que non exista un posicionamento a favor ou en contra do proxecto da mina de Doade en tanto non haxa un pronunciamento dos técnicos competentes na materia.

Por último, dentro do apartado de preguntas ao Goberno galego, o Grupo Popular interesarase pola sociedade Vivenda Pública de Galicia e de que xeito está a contribuír na promoción de vivenda pública, con destino á venda ou alugueiro, desde a súa creación en novembro de 2024. Asemade, solicítase unha valoración sobre o proceso de gobernanza realizado polo Goberno de Pedro Sánchez na planificación e execución dos recursos recollidos no Plan de Recuperación, Transformación e Resiliencia de España e pedirase información sobre os datos definitivos das listas de espera sanitarias correspondentes ao pasado ano 2024.

Os deputados do Grupo Popular Noelia Pérez e Argimiro Marnotes visitaron hoxe, en compañía da alcaldesa de San Cibrao das Viñas, Marta Nóvoa, as obras de construción do novo Centro de Excelencia en Ciberseguridade de Galicia que a Xunta está a realizar na parcela 3E da Tecnópole e demandaron que o Goberno de España localice neste espazo o futuro Centro Nacional de Ciberseguridade, tendo en conta a existencia na Comunidade galega dun sólido ecosistema empresarial e de formación e investigación nesta materia.

Noelia Pérez e Argimiro Marnotes lembraron que o futuro Centro que se está a levantar no polígono industrial de San Cibrao acollerá os sistemas de monitorización e xestión da ciberseguridade en Galicia, en coordinación co Centro Criptolóxico Nacional e co Institito Nacional de Ciberseguridade.

REFERENTE NACIONAL E INTERNACIONAL

“Queremos que Ourense se converta non só na capital galega da ciberseguridade, concentrando aquí os recursos a disposición da Xunta, dos concellos, das deputacións, das universidades, dos centros tecnolóxicos e de innovación, e do sector privado que presta estes servizos, senón que o Goberno central recoñeza o bo traballo que se leva a cabo e se decida tamén por Ourense como a sede do futuro Centro Nacional de Ciberseguridade”, sinalaron.

Os deputados populares lembraron que esta demanda é unha das resolucións aprobadas onte no Debate sobre Política Xeral celebrado esta semana no Parlamento de Galicia, unha proposta que saíu adiante co voto favorable de todos os grupos parlamentarios.

“A localización do futuro Centro Estatal de Ciberseguridade en Ourense situaría á nosa provincia como un referente neste ámbito non só a nivel nacional, senón tamén internacional, contribuíndo a un desenvolvemento máis equilibrado do país, á cohesión territorial e á redución da brecha dixital entre as rexións”, afirmaron.

As deputadas do Grupo Popular Felisa Rodríguez e María Deza, acompañadas da alcaldesa de Ponteareas, Nava Castro, salientaron hoxe a importancia das axudas da Xunta de Galicia para a modernización e rehabilitación das prazas de abastos galegas. Neste sentido, puxeron de exemplo a transformación que se levará a cabo na nave de Aceros del Tea en Ponteareas, un espazo no que se investirán cerca de 800.000 euros para convertelo na nova praza de abastos desta localidade pontevedresa.

Felisa Rodríguez e María Deza visitaron esta mañá a praza de abastos de Ponteareas para comprobar a situación na que desenvolven neste momento o seu traballo os praceiros e realizan as súas compras os consumidores. “As condicións cambiarán totalmente unha vez rematen as obras de rehabilitación e modernización da nave de Aceros del Tea, un espazo máis accesible e eficiente que albergará o novo mercado municipal e ofrecerá novas opcións gastronómicas e de restauración, ao tempo que porá en valor os produtos frescos e impulsará o comercio de proximidade”, manifestaron, para apuntar que “o obxectivo é conseguir que sexa declarado como Mercado de Excelencia”.

PEIXE E MARISCO MÁIS ASEQUIBLE

A Xunta de Galicia pon a disposición dos concellos unha liña de axudas destinadas a reforzar os mercados e prazas de abastos como motor económico local, fomentando o comercio de proximidade e dinamizando a actividade social e comercial dos municipios. Esta liña de axudas forma parte do Plan Estratéxico do Comercio de Galicia 2025-2030, en cuxa elaboración participaron máis de 300 representantes e expertos do sector do comercio galego.

As deputadas populares aproveitaron a súa visita á praza de abastos de Ponteareas para informar a praceiros e clientes da próxima implantación en Galicia do Bono Peixe, anunciado polo Presidente Rueda no Debate sobre Política Xeral celebrado esta semana no Parlamento galego.

Este bono consiste nunha axuda de 50 euros por persoa para estimular o consumo de peixe e marisco fresco por parte dos galegos. “En total, a Xunta investirá 2,5 millóns de euros para facer máis asequible e ao alcance de todos os petos estes produtos, mentres o Goberno central non adopta a redución do IVE que todo o sector lle está a pedir”, concretaron.