Categoría: Parlamento de Galicia

Os deputados do Grupo Popular Miguel Fidalgo, Manuel Santos, Loli Hermelo e Raúl Santamaría trasladaron ao patrón maior da Confraría de Pescadores de Bueu e presidente provincial da Federación de Confrarías, José Manuel Rosas, o seu apoio á demanda para que o Goberno de España asuma as súas competencias e flexibilice o novo regulamento de control pesqueiro, que obriga aos barcos, entre outras medidas, a preavisar da súa chegada a porto ou levar un rexistro electrónico de capturas ao longo da xornada.

Neste sentido, anunciaron que o PPdeG levará, tanto ao Parlamento de Galicia como aos concellos do litoral galego, iniciativas reclamando estas reformas da normativa europea, que afecta negativamente á viabilidade económica da pesca galega, á seguridade no mar e ao mantemento do tecido social e produtivo das zonas costeiras.

Acompañados da portavoz do PPdeG en Bueu, Elena Estévez, os deputados populares consideraron necesario un período de adaptación ao novo regulamento de control pesqueiro. Porén, lamentaron que “o Goberno de España non dispón dun plan operativo público suficientemente definido que garanta a correcta aplicación da nova normativa e que evite consecuencias negativas para o sector pesqueiro galego, particularmente para a pesca costeira artesanal”.

RISCO OPERATIVO E DESVIACIÓN DA ATENCIÓN

A obriga de avisar electronicamente da entrada a porto dos barcos con varias horas de antelación ou a declaración exhaustiva de capturas en tempo real “son medidas máis propias da pesca industrial que da artesanal, e supoñen un risco operativo e unha desviación da atención principal á propia actividade de pesca”, manifestaron.

Os deputados populares amosaron o seu apoio ás reivindicacións dos pescadores galegos e consideran que “o Goberno de Pedro Sánchez tense extralimitado na aplicación do regulamento europeo, que non está adaptado á realidade social, económica e técnica da pesca de baixura galega, polo que é imprescindible que se proceda a flexibilizar ao máximo estas medidas que non tiveron en conta para nada a realidade do sector do mar”.

Por este motivo, o PPdeG levará ao Parlamento galego e aos concellos costeiros de toda Galicia iniciativas co fin de que o Goberno central reaccione e tome a iniciativa, “facilitando unha adaptación ao novo regulamento de control pesqueiro porque se fai imprescindible que estas novas normas se apliquen con proporcionalidade e sentido común, e que se deixe traballar a sector pesqueiro galego, que ten demostrado o seu compromiso coa sostibilidade do mar e dos recursos mariños”.

O portavoz do Medio Rural do Grupo Popular, Miguel Ángel Viso, esixiu hoxe no Parlamento de Galicia que o Goberno central “protexa ao sector primario, defenda as cláusulas de salvagarda no acordo de libre comercio entre a Unión Europea e Mercosur ante posibles ameazas, e garanta e intensifique os controis de fronteira co fin de que os produtos agroalimentarios de terceiros países que pretendan comercializarse no mercado comunitario cumpran os mesmos estándares de calidade, sanidade e benestar animal que os esixidos en Europa”.

Miguel Ángel Viso considerou “absolutamente comprensible a preocupación dos gandeiros e agricultores galegos ante o acordo entre a Unión Europea e Mercosur”, unha situación ante a que “a Xunta non se agocha, e por iso a conselleira do Medio Rural convocou o Consello Agrario para analizar coas organizacións profesionais o impacto da PAC e do novo escenario europeo, ao tempo que porá en marcha medidas concretas en ámbitos como a saúde animal e vexetal, para detectar enfermidades, pragas e problemas nos alimentos”.

“E todo isto cun obxectivo claro e inequívoco: defender o sector agrogandeiro galego, apostar polos produtos de calidade e estar sempre ao carón das necesidades reais do campo galego”, incidiu o portavoz popular.

SEN ESCOITAR ÁS COMUNIDADES AUTÓNOMAS

Na súa intervención, Viso explicou que o acordo Unión Europea-Mercosur “é un tratado de política comercial internacional, polo que son os estados membros os que teñen a obriga de defender os intereses dos seus territorios durante a negociación, de escoitar ás comunidades autónomas e de trasladar esas posicións á Comisión Europea”. Porén, lamentou que “en España isto non se fixo, e o Goberno de Pedro Sánchez negociou e posicionouse sen escoitar de maneira real ás comunidades autónomas, sen integrar as preocupacións específicas de territorios como Galicia, onde o sector primario é estrutural”.

O portavoz popular insistiu en que “calquera produto que entre desde países terceiros debe cumprir exactamente as mesmas esixencias que se lles impoñen aos produtores galegos”, porque demandou que “Galicia non pode ser tratada como un dano colateral aceptable dun acordo global, nin ser o territorio ao que se lle pide comprensión, paciencia e silencio mentres outros deciden”. “O sector primario galego non é un problema que xestionar, é un activo que protexer”, indicou.

Para rematar, Miguel Ángel Viso criticou a actitude do BNG porque esta situación “non se evita facendo discursos grandilocuentes aquí mentres se sostén en Madrid ao mesmo goberno que negocia estes acordos sen contar coas comunidades autónomas”. “Ultimamente semella que algúns están máis preocupados por exhibir bandeiras alleas que por defender con firmeza os intereses de Galicia onde realmente se deciden as cousas”, dixo.

O Parlamento de Galicia aprobou hoxe a proposición non de lei do Grupo Popular, co voto en contra do PSdeG e a abstención do BNG, a través da que se demanda ao Goberno de España que aplique, en colaboración coas comunidades autónomas, un maior nivel de cogobernanza na execución dos recursos previstos no Mecanismo para a Recuperación e a Resiliencia (MRR), nomeadamente, aqueles dirixidos a unha xestión forestal sostible, incluída a loita contra os lumes, chegando incluso a transferir a Galicia os recursos correspondentes, de tal xeito que se favoreza un impacto máis positivo sobre o territorio e sexa posible acadar un maior nivel de execución.

A deputada popular Nicole Grueira lamentou que o Goberno central “optara por un modelo excesivamente centralizado para a xestión dos fondos do Plan Nacional de Recuperación e Resiliencia, uniformizando criterios e procedementos sen ter en conta a diversidade territorial”. “E isto fíxose sen unha cogobernanza real e efectiva coas comunidades autónomas, que son as que ostentan as competencias, dispoñen do coñecemento directo do territorio e teñen capacidade contrastada de execución en moitos dos ámbitos clave deste plan”, indicou.

PROBLEMAS DE DECISIÓNS MAL TOMADAS

Deste xeito, manifestou que, “cando as decisións se toman mal, aparecen os problemas, como convocatorias excesivamente ríxidas que non se adaptan ás necesidades do medio rural, distintos criterios segundo o ministerio que publique a orde de axudas, unha falta absoluta de claridade sobre o réxime de reintegro dos fondos ou a falta dun marco plurianual claro, que non permite ás comunidades autónomas coñecer con antelación os fondos dos que van dispoñer e impide unha planificación estratéxica seria”.

Nicole Grueira reclamou “máis respecto e participación das comunidades autónomas na planificación, deseño e xestión dos fondos europeos, de xeito que respondan realmente ás necesidades reais dos territorios”. Así mesmo, pediu que o Goberno de Pedro Sánchez “mellore os mecanismos de coordinación e garantía xurídica destes fondos europeos ou, no seu defecto, transfira os recursos á Xunta, que xa demostrou capacidade, coñecemento do territorio e solvencia técnica para xestionalos con maior eficacia e impacto positivo”.

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se demanda ao Ministerio de Agricultura, Pesca e Alimentación que axilice a autorización de produtos fitosanitarios de eficacia contrastada, especialmente os que xa están autorizados noutros países da Unión Europea. Así mesmo, pídese que se fomente a investigación na industria fitosanitaria para desenvolver novos principios activos e ínstase a que continúe a produción de produtos autorizados de eficacia contrastada.

O deputado popular Juan Casares manifestou que “a produtividade agrícola decae por diversas razóns, entre as que destaca o cambio climático e a actual política ambiental, que propicia a prohibición de produtos fitosanitarios necesarios para garantir uns rendementos mínimos nos cultivos”.

REVISIÓN CONSTANTE

“Para evitar danos ambientais e na saúde pública é necesaria unha revisión constante da efectividade, dos protocolos de uso e dos efectos sobre as persoas e o medio ambiente destes produtos químicos”, sinalou Juan Casares, quen apuntou que “como resultado destas revisións deben ser prohibidos aqueles que resulten perniciosos”. Porén, sinalou que esta prohibición “debe acompañarse da autorización de novos produtos que non teñan efectos negativos co gallo de non deixar desprotexidos aos nosos produtores”.

Neste sentido, segundo os datos do Rexistro Oficial de Produtos Fitosanitarios do Ministerio de Agricultura, nos últimos cinco anos canceláronse 540 produtos, mentres que só se rexistraron 120 novos. A este balance sumáronse tres cuestións: hai produtos eficaces que non se comercializan pola súa escasa marxe comercial; algúns produtos novos autorizados non contan coa efectividade dos anteriores; e existe o compromiso do Pacto Verde Europeo que prevé a redución do uso de fitosanitarios.

“Como resultado desta constelación causal, moitas pragas e enfermidades son máis difíciles de controlar, unha cuestión que compromete non só a viabilidade económica de moitas explotacións, senón tamén a súa capacidade de competir cos produtos procedentes de terceiros países”, sinalou o deputado popular.

MARXE DE MANOBRA

Por este motivo, asegurou que “o Goberno de España ten marxe de manobra para mellorar a situación axilizando as autorizacións, posto que hai produtos autorizados na Unión Europea que en España non se poden usar”, e puxo como exemplo principios activos que están autorizados no norte de Portugal que os produtores galegos non poden utilizar.

Juan Casares pediu, ademais, que “se dote de máis recursos ao Instituto Nacional de Investigación e Tecnoloxía Agraria e Alimentaria, co fin de axilizar as liñas de traballo en produtos fitosanitarios, impulsar a investigación na loita biolóxica de pragas e abrir o campo á obtención de novas variedades de cultivo máis resistentes ás pragas e enfermidades”.

“De xeito paralelo, o Goberno de España debe apoiar o mantemento da produción dos fitosanitarios pouco rendibles para a industria química, pola súa escasa marxe comercial, ao tempo que se implementan medidas complentarias como a mellora dos controis nas fronteiras, co gallo de evitar a entrada de pragas procedentes doutros países; apoiar a agricultura de precisión, posto que fai máis eficiente o uso de fitosanitarios; e aumentar o nivel de aseguramento dos cultivos a través da Entidade Estatal de Seguros Agrarios, en colaboración coas comunidades autónomas”, rematou.

O Parlamento de Galicia aprobou hoxe, sen o apoio de BNG nin de PSdeG, a proposición non de lei do Grupo Popular a través da que solicita ao Goberno central que regule a prestación universal de servicios financeiros básicos ou esenciais, como oficinas ou caixeiros automáticos, de xeito que se garanta a súa prestación para todos os usuarios, cunha calidade determinada e a un prezo asumible.

A viceportavoz popular Cristina Sanz lembrou que desde a crise financeira de 2008 “España viviu un proceso acelerado de concentración bancaria que reduciu drasticamente a rede de oficinas, especialmente na zona do rural, un proceso que viu acompañado dunha dixitalización forzosa que non tivo en conta a realidade social de milleiros de persoas maiores, nin a fenda dixital que existe en amplas zonas do territorio”.

PROBLEMA ESTATAL

“Diante desta situación, a Xunta, en colaboración coa Federación Galega de Municipios e Provincias, foi unha das primeiras administracións autonómicas en poñer en marcha medidas para evitar que os concellos do rural quedasen completamente excluídos do sistema financeiro”, lembrou Cristina Sanz. En concreto, explicou que no ano 2020 asinouse un convenio entre o Goberno galego e a Fegamp para a adhesión de concellos sen oficina bancaria co fin de facilitarlles a instalación dun caixeiro e servizos financeiros básicos. Esta iniciativa permitiu dotar a 41 concellos galegos destes servizos, que beneficiaron a máis de 51.000 galegos e galegas, que puideron realizar máis de 480.000 operacións bancarias no seu propio concello.

Porén, Cristina Sanz manifestou que “a exclusión financeira non pode resolverse so desde o ámbito autonómico, porque se trata dun problema estrutural, de alcance estatal, que require unha resposta global e coordinada por parte do Goberno de España”.

“Por este motivo, solicitamos ao Goberno central que regule a prestación universal dos servizos financeiros básicos ou esenciais, de maneira que se garanta o seu acceso a toda a cidadanía con independencia do seu lugar de residencia ou da súa idade”, rematou.

O portavoz do Grupo Popular, Alberto Pazos, criticou hoxe que a nova presidenta da Deputación de Lugo estea sustentada “no voto favorable dun presunto acosador sexual e en 500.000 euros que o BNG se axenciou das arcas de todos os lucenses para repartidos entre os seus concellos e organizacións afíns á causa nacionalista”. Respecto do novo sistema de financiamento autonómico, demandou que sexa “falado e consensuado por todas as comunidades autónomas, tendo presente as particularidades e as necesidades de todas elas”.

Alberto Pazos comezou a súa comparecencia ante os medios de comunicación dando conta dos cambios realizados no Grupo Parlamentario Popular logo da marcha de Ethel Vázquez, a quen desexou “o mellor na súa nova etapa laboral, agradecendo todo o bo traballo que desenvolveu ao longo destes case dous anos que nos acompañou como deputada neste Parlamento e como secretaria da Mesa”. En concreto, Nazareth Cendán será a nova deputada pola provincia de A Coruña e para a Secretaría da Mesa do Parlamento o Grupo Popular propuxo ao actual viceportavoz e presidente da Comisión 1ª, Julio García Comesaña.

ANSIAS DE PODER SOCIALISTA

Na súa intervención, o portavoz popular referiuse á elección no día de onte da nova Presidenta da Deputación Provincial de Lugo, que “nace logo dun vergoñento pacto, ou pacto guarro, como o ten cualificado acertadamente a nosa secretaria xeral, Paula Prado, capitaneado por un presunto acosador sexual e que demostra ás claras o pouco que lle importan as mulleres tanto a BNG como a PSdeG”.

“O esperpento chega ata tal punto que unha muller foi capaz de aceptar o voto deste presunto acosador sexual para facerse coa Presidencia da Deputación”, indicou Pazos, ante o que se cuestionou “ata que punto poden chegar as ansias de poder das mulleres socialistas, cando neste caso a nova Presidenta da Deputación é capaz de aceptar un goberno totalmente enlamado polo voto dun presunto acosador sexual?”

Respecto do BNG, a terceira pata deste Goberno tripartito na Deputación de Lugo, Alberto Pazos manifestou que “volveu demostrar o seu feminismo de pancarta, deixando a un lado a súa defensa das mulleres para conseguir manterse no Goberno da Deputación de Lugo”. Ademais, criticou “a pouca vergoña coa que desde o BNG nos xustificaron o seu apoio á nova presidenta socialista da Deputación: 500.000 euros bastaron para que os nacionalistas galegos esqueceran as falcatruadas levadas a cabo polo presunto acosador sexual sendo presidente da Deputación, pecharan os ollos e deran o seu voto favorable á nova presidenta socialista”. “Ata que punto debe chegar esta vergoñenta situación protagonizada polo BNG na Deputación de Lugo que nin a súa propia lideresa, Ana Pontón, tivo a ben asistir á toma de posesión da nova Presidenta”, indicou.

SETE PUNTOS MENOS DE FINANCIAMENTO POR HABITANTE

Por outra banda, sobre a proposta de financiamento autonómico pactada polo Goberno de España cos independentistas cataláns e a inútil reunión do Consello de Política Fiscal e Financeira celebrada onte en Madrid, o portavoz popular incidiu que “Galicia non vai aceptar que o novo salvavidas que lle lanzaron os independentistas cataláns a Pedro Sánchez para manterse a frote na Moncloa se converta nunha realidade”.

“Non pode ser que este novo modelo, pensado unicamente para beneficiar a Cataluña, supoña un recorte de máis de sete puntos no financiamento por habitante de Galicia, situándose como a segunda comunidade con menor financiación por habitante; que Galicia, cando representa un 6 por cento da poboación das comunidades de réxime común, só reciba o 2,8 por cento do suposto incremento dos recursos: 587 millóns dos case 21.000 previstos; ou que se dea unha situación totalmente anómala e nunca vista con anterioridade: que Galicia reciba menos recursos do financiamento do Estado que os que aporta ao fondo común”, explicou.

Alberto Pazos demandou aos socialistas galegos “un firme rexeitamento desta proposta de financiamento, do mesmo xeito que o están a facer compañeiros de partido doutras comunidades autónomas españolas onde gobernan, como Castela A Mancha ou Asturias”, aínda que lamentou que “a súa submisión a Pedro Sánchez non lles permita enfrontarse ás directrices que lles marcan desde Moncloa, a pesar de que recoñezan que Galicia sae prexudicada e xa é necesaria unha modificación do sistema de financiamento proposto”.

Así mesmo, criticou que, “mentres os independentistas cataláns espremen todo o que poden a Pedro Sánchez a cambio do seu apoio para que se manteña no Goberno de España, o BNG segue, erre que erre, na súa eterna teima de demandar un cupo para Galicia, un modelo rexeitado por todos os expertos en financiamento autonómico, tal e como se puxo de manifesto na Comisión de Estudo que levamos a cabo neste Parlamento galego durante a pasada lexislatura”.

DIÁLOGO PARA CONSENSUAR O NOVO SISTEMA

“Galicia precisa un novo sistema de financiamento, pero non o sistema acordado entre o Goberno de España e os independentistas cataláns”, asegurou o portavoz popular, quen demandou un modelo que “supoña un incremento para Galicia moi superior ao previsto nese acordo pactado nas súas múltiples reunións entre Pedro Sánchez e Oriol Junqueras, e que permita atender todas as necesidades dos galegos, sen que existan diferencias respecto dos servizos públicos de calidade que gozan os españois que residen en comunidades máis ricas, como Cataluña ou o País Vasco”, concretou.

Deste xeito, avanzou que “desde o Grupo Popular seguiremos demandando que o Goberno central abra unha vía de diálogo con todas as comunidades autónomas para concretar este novo sistema de financiamento autonómico” e apuntou que “o mellor espazo para facelo é o propio Consello de Política Fiscal e Financeira, pero en reunións nas que se debata e se teñan en conta as posicións de todas e cada unha das comunidades autónomas”.

O Grupo Popular proporá a Julio García Comesaña como novo secretario da Mesa do Parlamento de Galicia, quen substituirá nese cargo a Ethel Vázquez. A elección terá lugar no primeiro Pleno deste novo período de sesións, que se desenvolverá entre os días 27 e 28 de xaneiro.

Licenciado en Ciencias Físicas pola Universidade de Santiago de Compostela, García Comesaña ten a especialidade sanitaria de Radiofísica Hospitalaria, así como o máster en Administración Sanitaria pola Escola Nacional de Sanidade.

Foi conselleiro de Sanidade da Xunta de Galicia desde setembro de 2020 ata abril do 2024. Con anterioridade, en marzo do ano 2017 foi nomeado xerente da Área Sanitaria de Ourense, Verín e O Barco de Valdeorras, cargo que ocupou ata setembro do 2019, cando pasou a ocupar a xerencia da Área Sanitaria de Vigo.

No ámbito da xestión sanitaria desempeñou os postos de director de centro e director operativo no Complexo Hospitalario Universitario de Vigo; de subdirector xeral de Ordenación Asistencial e Innovación Organizativa do Servizo Galego de Saúde; ou de director de Procesos Asistenciais da Estrutura Organizativa de Xestión Integrada de Vigo. Como especialista en Radiofísica Hospitalaria desenvolveu a súa actividade asistencial nos hospitais Povisa e Meixoeiro de Vigo, e Vall d’Hebron de Barcelona.

Na actualidade, é viceportavoz do Grupo Popular no Parlamento de Galicia e presidente da Comisión 1ª, Institucional de Administración Xeral, Xustiza e Interior.

O portavoz do Grupo Popular, Alberto Pazos, contrapuxo hoxe “a política laboral sanchista, que busca mellora as cifras de paro manipulando as estatísticas, coa do Partido Popular, que aposta pola creación real de emprego a través dun auténtico diálogo social”. Ademais, afirmou que “Galicia seguirá apostando por unha formación profesional de calidade que nos permita reter talento e por unha reciclaxe permanente das capacidades laborais”.

“Isto será moito máis sinxelo cun Goberno de España presidido por Alberto Núñez Feijóo, onde a clave da creación de emprego estará en conciliar os intereses de empresarios e traballadores e en asumir que a mesa de diálogo social é un espazo para o encontro e non un campo de batalla no que cavar trincheiras ideolóxicas”, asegurou.

Na súa intervención na interparlamentaria que o PP está a celebrar en A Coruña, na mesa redonda titulada Un pais no que valga a pena traballar, Alberto Pazos explicou que en España “temos experimentado dous modelos de política laboral ben diferenciados: por unha banda, o modelo sanchista, cuxo maior logro foi alterar o modo de contabilizar o número de parados, de tal xeito que o importante non sexa o dato de empregos creados, senón o dato das estatísticas oficiais; e, por outro lado, o modelo o Partido Popular, que consiste en crear as condicións que propicien a xeración de emprego”.

“Deste último modelo algo sabemos en Galicia, porque aquí os presidentes Feijóo e Rueda priorizaron a confianza nas persoas, e neste caso nos empresarios e nos traballadores”, indicou. Neste sentido, dixo que, “cando un escoita con atención, descobre que o que buscan os empresarios son traballadores que respondan ás necesidades reais das súas empresas, e o que buscan os traballadores é a cualificación que lles permita acceder a postos de traballo con mellores condicións laborais”.

Alberto Pazos destacou “o prestixio, confianza e utilidade” que ten a formación profesional en Galicia, onde dous de cada cinco estudantes que rematan os seus estudos obrigatorios se matriculan nesta opción educativa, dobrando o número de alumnos que cursaban estudos en FP cando o PP chegou ao Goberno de Galicia en 2009.

MESMA FILOSOFÍA

O portavoz popular agradeceu “a confianza que depositaron nesta formación as máis de 15.000 empresas que colaboran neste éxito colectivo, empresas que nos contaron as súas necesidades, que manteñen abertas vías de comunicación permanente coas que deseñar unha oferta formativa á carta, e que colaboran activamente na formación real dos alumnos mediante un sistema de prácticas”. Esta situación derivou en que o 85 por cento dos alumnos de FP acceden a un emprego, unha cifra que se eleva practicamente ao 100 por cento se se trata da FP dual.

Pazos referiuse ao novo paso dado polo Goberno galego trasladando ao Servizo Público de Emprego “a mesma filosofía de escoita e de conciliación de intereses de empresarios e traballadores”. En concreto, puxo como exemplo a incorporación da ferramenta de emprego e mellora da información (EMI), que aplica intelixencia artificial para analizar e encaixar as competencias profesionais dos demandantes de emprego cos requirimentos concretos da oferta laboral, ou a incorporación das recomendacións do Consejo de Europa sobre microcredenciais.

Para rematar, puxo de manifesto que “en Galicia estamos potenciando as accións para reter todo o talento galego, aspirando a atraer novo talento estea onde estea”. Deste xeito, lembrou que “ofrecemos a esa outra Galicia, a Galicia da emigración, a posibilidade para que retorne á súa terra, e que mellor maneira de facelo que cun contrato de traballo en orixe que lle permita iniciar unha vida mellor aquí”.

Os deputados do Grupo Popular Juan Casares e Víctor Baladrón salientaron hoxe a importancia do servizo de Furgoteca prestado pola Xunta aos concellos de Ourense e Lugo que non contan con biblioteca como ferramenta de acceso aos servizos bibliotecarios e de cohesión territorial para a cidadanía que reside nestas localidades.

Acompañados do alcalde de Baltar, José Antonio Feijóo, Juan Casares e Víctor Baladrón visitaron a Furgoteca instalada neste concello ourensán na que os veciños poden acceder a servizos diversos, como préstamo de libros, revistas e outros materiais, asesoramento e recomendacións de lectura; formación, acompañamento e resolución de dúbidas no eido dixital; e organización de actividades culturais.

DOUS PERCORRIDOS NA PROVINCIA DE OURENSE

En concreto, na provincia de Ourense, están operativas dúas Furgotecas: unha para toda a área de Ourense-Sur, que cubre os concellos de Baltar, Os Blancos, Calvos de Randín, Castrelo de Val, Cualedro, A Gudiña, Laza, Oímbra, Trasmiras e Vilardevós; e outra para a zona de Ourense-Occidental, que visita as localidades de Lobeira, Muíños, Padrenda, Porqueira, Quintela de Leirado, Rairiz de Veiga, Ramirás, Sandiás, Sarreaus e Verea.

A Furgoteca achégase a cada un destes concellos dúas veces ao mes, con dúas rutas que poden ser consultadas na páxina web https://bibliotecas.xunta.gal/es/furgoteca, nos lugares de información habituais de cada concello ou a través das redes sociais.

“Este servizo representa un recurso que vai máis alá do cultural para transformarse nunha ferramenta social que favorece o desenvolvemento persoal, a aprendizaxe e a creatividade”, sinalou o deputado Víctor Baladrón.

Pola súa banda, Juan Casares destacou que “estamos ante unha ferramenta correctora dunha realidade estrutural de desequilibrio no acceso a un servizo básico no interior da provincia de Ourense, un recurso que, ao mesmo tempo que emenda ese déficit, cohesiona culturalmente o territorio ourensán”.

O deputado do Grupo Popular Jesús María Fernández Rosende salientou hoxe que o de Lorbé será un dos dez pantaláns flotantes de portos galegos nos que a Xunta procederá este ano á renovación do seu pavimento.

Acompañado de varios concelleiros de Oleiros, Fernández Rosende explicou que a dura climatoloxía que sofren estas instalacións deriva nun deterioro dos materiais cos que están construídos, principalmente madeira. “Tanto os pantaláns como os fingers soportan condicións climatolóxicas moi duras, o que leva ao seu deterioro co paso do tempo que pode supoñer un risco para transitar por eles”, apuntou.

Diante desta situación, a Xunta procederá ao longo deste ano 2026 á reposición dos pavimentos de sete pantaláns flotantes nos portos de Lorbé, Muxía, Muros, A Barquiña-Outes, Ribeira, A Pobra do Caramiñal, Carril, Vilanova de Arousa, O Grove e Baiona. Esta actuación, que suporá un investimento próximo aos 640.000 euros, permitirá a substitución do actual pavimento por un material máis duradeiro tipo Ecotek.