Categoría: Parlamento de Galicia

O Parlamento de Galicia condenou hoxe, a través dunha proposición non de lei, os actos de vandalismo cometidos contra as sedes do Partido Popular de Galicia, así como calquera outro acto de natureza similar dirixido contra sedes de formacións políticas democraticamente constituídas. Neste sentido, rexeitou a utilización de mobiliario e espazos públicos ou privados para a colocación de pintadas, que non compren coa normativa vixente e con consignas que teñen o único fin de xerar crispación, polarización e alimentar a conflitividade social, por seren contrarias á legalidade e ao respecto debido á convivencia cidadá.

A través desta iniciativa tamén se demanda que as forzar políticas se absteñan deste tipo de prácticas e as condenen publicamente cando se produzan, como expresión dun compromiso compartido co pluralismo político, o respecto institucional e o uso responsable dos espazos comúns. Por último, o Parlamento de Galicia reafirma o seu compromiso coa defensa dunha participación política respectuosa co marco democrático e legal, baseada no diálogo, no respecto ás institucións e na convivencia cidadá.

LÍMITES QUE NON SE PODEN CRUZAR

A deputada popular Nicole Grueira lembrou que “nos últimos días producíronse ataques ás sedes do Partido Popular de Galicia, con pintadas, empapelados e sinalamentos”. “Non falamos dun feito illado nin dunha anécdota puntual, senón dunha reiteración, como o vimos no día de onte nas sedes de Lalín e de Sada, e cando os feitos se repiten xa non estamos ante un incidente: estamos ante unha dinámica que cómpre frear”, apuntou.

“Hai límites, e desde logo hai liñas vermellas, que non se poden cruzar”, incidiu a deputada popular, quen dixo que “a democracia sostense, sobre todo, con regras compartidas, sobre o respecto das institucións, sobre o respecto ás formacións políticas democraticamente constituídas e sobre o respecto á legalidade e aos espazos, sexan públicos ou privados”.

Nicole Grueira manifestou que “Galicia sempre foi exemplo de tranquilidade, pluralismo e convivencia”, pero lamentou que “cando se empapela unha sede, cando se utiliza unha fachada como taboleiro de confrontación ou cando se sinalan a persoas polo seu compromiso político estase atacando o dereito de milleiros de cidadáns a organizarse libremente”.

CONDENA FIRME, SEN PEROS, DÚBIDAS E SILENCIOS

“A liberdade de expresión é un dereito fundamental que todos defendemos, pero non ampara a ocupación indebida de espazos, nin a vandalización, nin a intimidación simbólica”, sinalou a deputada popular, quen afirmou que “a liberdade de expresión exercítase co uso da palabra, co argumento, coa mobilización cívica dentro da lei, non coa imposición nin coa vandalización”.

Para rematar, Nicole Grueira anotou que “nesta ocasión os ataques foron contra as sedes do Partido Popular, pero se mañá fose a sede doutra formación a vandalizada, a nosa posición sería exactamente a mesma: condena firme, sen peros, sen dúbidas e sen silencios”.

O portavoz do Grupo Popular no Parlamento, Alberto Pazos, destacou, hoxe, no día que se celebra o segundo aniversario da vitoria electoral de Alfonso Rueda, as políticas da Xunta que permiten que a Comunidade avance ámbitos como a vivenda, a educación, a sanidade, os servizos sociais ou o emprego. “Eu confío en que o Estilo Rueda siga vixente polo ben que lle fai a Galicia”, salientou.

Así, fixo fincapé no traballo dun presidente e de todo un equipo que “centra o foco nas prioridades das galegas e dos galegos” e incidiu na solvencia e no bo control das contas públicas, no impulso á vivenda pública ata chegas ás 10.000 antes de 2030, na aposta pola innovación e o emprendemento, así como tamén, nos investimentos para o avance das infraestruturas e mellora da mobilidade.

AS INICIATIVAS DO PRÓXIMO PLENO
De cara a próxima sesión plenaria, o Grupo Popular presentará unha proposición non de lei sobre os fondos estatais da Nova Economía da Lingua para reclamarlle ao Goberno central a transferencia da totalidade dos solicitados. Neste punto, recordou que o Executivo de Pedro Sánchez tan só fixo unha achega de 3,5 millóns de euros ao Proxecto Nós, posto en marcha pola Xunta, en colaboración coa Universidade de Santiago. Unha achega que, tal e como salientou Pazos, é “insuficiente” para unha iniciativa que aspira a situar ao galego na economía dixital.

Por outra banda, os populares galegos denuncian o ataque do Goberno central aos dereitos de máis de 12.000 dependentes. Así, a través dunha proposición non de lei, propón que a Xunta presente alegacións e recursos ante o Tribunal Constitucional para defender as competencias que ten Galicia na xestión da dependencia. E reclamarán, unha vez máis, o abono da débeda pendente e o cofinanciamento do 50% que lle corresponde, tal e como está establecido na normativa estatal.

No apartado de preguntas ao Goberno galego, o Grupo Popular interesarase polas accións que está a adoptar a Xunta para que o Executivo de España dea información precisa sobre a modificación, sen previo aviso nin ás Comunidades nin ao sector afectado, do Regulamento Xeral de Costas. Así mesmo, preguntarán polos investimentos realizados pola Administración autonómica na muralla de Lugo, así como polas principais liñas de axuda para apoiar ás persoas traballadoras autónomas.

Alberto Pazos informou da comparecencia, a petición propia, do conselleiro de Presidencia, Xustiza e Deportes para dar conta da situación do servizo ferroviario de Galicia; ao tempo que dixo que se debaterá por procedemento de lectura única o proxecto de Lei que inclúe o pagamento en efectivo para as deducións fiscais en libros e material escolar.

Para rematar e tras un novo ataque vandálico a unha sede do PPdeG, o voceiro trasladou todo o apoio aos compañeiros de Lalín e amosou a súa preocupación polo “silencio” dos grupos da esquerda.

O Portavoz do Grupo Popular no Parlamento, Alberto Pazos, instou, hoxe, ao Goberno central a posta en marcha dun plan integral de conservación para as autovías e estradas de titularidade estatal. Neste senso, apuntou á urxencia de obras de reparación, conservación e mantemento para garantir a seguridade.

Así, indicou que non é unha cuestión nin de semanas nin de meses, senón de anos de denuncias polo mal estado das vías que, agora, se ven desbordadas pola actual situación climatolóxica. Así, referiuse ás estradas N-120, N-550, N-540 ou a A-52. O portavoz popular pediulle ao Goberno que “escoite” á cidadanía e “actúe” de inmediato.

Neste punto, referiuse a un recente estudo da Asociación Española de la Carretera no que se pon o foco na ausencia de conservación da rede viaria estatal e na falta de investimento do ministerio de Óscar Puente. Segundo este informe, o 52% da rede de estradas está en estado grave ou moi grave e precísanse máis de 1.100 millóns de euros para o seu arranxo.

Pazos contrapuxo a un Goberno central que “nin está nin se lles espera” cunha Xunta que “cumpre” e asume a súa responsabilidade. Para este 2026, o Executivo galego destinará 71,6 millóns de euros á conservación e mantemento dos 5.500 quilómetros das estradas.

Do mesmo xeito, o portavoz do Grupo Popular fixo fincapé no caos do sistema ferroviario, con suspensión do servizo e falta de mantemento da infraestrutura. Lamentou que a fórmula habitual dos grupos da oposición sexa que cos cartos dos galegos se asuman as obrigas do Goberno estatal: “Non é raro escoitarlles pedir que a Xunta faga o que non fai o Goberno e que pague o que non paga o Goberno”.

UNHA OPOSICIÓN QUE SE OPÓN A GALICIA
Para Pazos, no último pleno, os grupos da oposición volveron quedar retratados como antigalegos, ao seren incapaces non defender os intereses da Comunidade.

“Para unha vez que Pontón non quere ser a do non é incapaz de dicir si” e se abstivo á retirada dos recursos de inconstitucionalidade contra o plan de axilización da dependencia e da discapacidade, e da repotenciación dos parques eólicos. Tal e como explicou, con estes recursos, por unha banda, párase o plan de choque que impulsou a Xunta para reducir as listas de agarda na dependencia; e, por outra banda, bloquéase o proceso de modernización e remuda de parques eólicos, que permitiría o abaratamento do prezo da enerxía para as empresas e fogares galegos.

Pazos criticou a “postura servil” do PSdeG, que apoia recortar os dereitos dos galegos, boicotear a mellora dos servizos sociais e a bloquear o avance económico de Galicia.

O Parlamento de Galicia aprobou hoxe por unanimidade a proposición non de lei do Grupo Popular a través da que se reclama ao Goberno central que asigne unha dotación orzamentaria específica para facer efectivos de maneira inmediata os dereitos recoñecidos pola Lei ELA, e que a súa aplicación teña carácter retroactivo desde a súa entrada en vigor.

A portavoz popular de Política Social, Raquel Arias, afirmou que “unha lei sen orzamento non é unha lei; é, pola contra, unha ficción política, propaganda e unha burla”. Así, agarda que o Executivo central cumpra dunha vez cunha norma que aprobou hai xa 16 meses: “Ningunha comunidade ten capacidade para afrontar en solitario a atención que estes enfermos e as súas familias precisan”, porque, segundo dixo, “as axudas son esenciais para vivir con dignidade”.

Así, Raquel Arias criticou a falta de sensibilidade do Goberno central por tardar tres anos en tramitar a norma, que, cando entrou en vigor, fíxoo sen financiamento preciso e sen mecanismos de aplicación: “Unha burla para os doentes”. E é que, tal e como argumentou, a lei que, segundo o Goberno de Sánchez, está pensada para chegar a todos os afectados, “as achegas son tan restritivas que só chegan ao 5 por cento dos doentes”.

O GOBERNO GALEGO, AO CARÓN DOS ENFERMOS DE ELA

Tal e como recordou a deputada popular, Galicia foi pioneira en axudas e dereitos para os enfermos de ELA. Así recordou que foi a primeira comunidade en crear o proceso asistencial integrado de esclerose lateral amiotrófica, mediante o cal se priorizou a atención establecendo vías rápidas tanto a nivel sanitario, para axilizar a diagnose, como a nivel social, para a tramitación da dependencia e a discapacidade. “En Galicia, aos doentes con ELA recoñéceselle o grao máximo de dependencia de forma automática”, engadiu Arias.

Así mesmo, fixo fincapé na axuda directa anual de 12.000 euros a todos os doentes galegos diagnosticados con ELA, mediante a cal lles permite mercar produtos de primeira necesidade. Unhas axudas que, desde este mesmo ano, están exentas fiscalmente.

Durante a súa intervención, Raquel Arias tivo palabras de “agarimo, recoñecemento e admiración” para Susi Seoane, quen foi presidenta da Asociación Galega de Enfermos de ELA (AGAELA), pola súa loita na investigación da enfermidade e incremento dos dereitos dos doentes e os seus familiares: “Susi deixounos hai apenas dúas semanas sen ver cumprido o seu soño”, dixo a parlamentaria popular, quen avogou por un compromiso firme e unánime cos enfermos e as súas familias.

O Parlamento de Galicia aprobou hoxe, co voto en contra do PSdeG e a abstención do BNG, a proposición non de lei do Grupo Popular a través da que se solicita ao Goberno de España que respecte o autogoberno de Galicia e retire, con carácter inmediato, o recurso de inconstitucionalidade contra o plan de axilización da dependencia e da discapacidade, así como contra a repotenciación dos parques eólico e a obriga de ofertar e vender en Galicia parte da electricidade xerada en beneficio directo da cidadanía e da industria galegas.

O portavoz popular, Alberto Pazos, manifestou que “ao longo do noso autogoberno se teñen producido desencontros entre o Goberno galego e o Goberno central, diferenzas que foron resoltas normalmente a través das canles institucionais pero que nesta ocasión é a primeira vez que o Goberno de Pedro Sánchez decidiu utilizar unha vara de medir diferente e específica para castigar a Galicia”. “Non falamos dunha discrepancia de criterio entre a Xunta e o Estado, senón dun novo episodio do proceso de doma e castración de Galicia deseñado por un goberno incapaz de asumir democraticamente o seu fracaso electoral nesta terra”, dixo.

PARALIZACIÓN DE FACTO

En concreto, o recurso interposto polo Goberno de España paralizou de facto o plan de choque impulsado pola xunta para reducir as listas de espera na dependencia e o proceso de modernización e remuda de parques eólicos que permite o abaratamento do prezo da enerxía para empresas e fogares galegos.

“O plan de axilización e simplificación da dependencia e da discapacidade da Xunta estaba a ser unha ferramenta de enorme utilidade para reducir os tempos de espera para o recoñecemento da dependencia”, asegurou Alberto Pazos, quen concretou que só durante o pasado ano 2025 se resolveron 86.319 expedientes, 28.737 persoas se incorporaron ao sistema de dependencia, se fixeron 57.582 recoñecementos de discapacidade e 12.626 persoas con dependencia viron recoñecida de maneira automática a súa discapacidade, reducindo os tempos de espera en dous meses.

Pola súa banda, a modificación da normativa impulsada polo Goberno galego buscou acelerar o proceso de renovación tecnolóxica dos parques eólicos galegos de máis de 25 anos, obrigando ás eléctricas a adiantar os seus investimentos para mellorar o aproveitamento eólico en beneficio de todos. “Unha medida moi criticada polo sector enerxético, pero que segundo o informe da Universidade de Vigo permitiría reducir o número de aeroxeradores nun 80 por cento, aumentando ao mesmo tempo a produción nun 34,5 por cento”, indicou o portavoz popular.

MEDIDAS COPIADAS

Ademais, subliñou que “son tan exitosas estas medidas que o propio Goberno de Pedro Sánchez está incorporando algunhas destas iniciativas na súa propia lexislación, coa diferenza de que mentres a Xunta recoñece aos dependentes de grao 3 o 100 por cento da discapacidade, o Goberno de España fai o mesmo pero limita o recoñecemento ao 65 por cento”.

“Resulta incomprensible que o Goberno de España cuestione unha normativa que está mellorando a vida dos galegos, pero aínda resulta máis incomprensible que ese disparate sexa apoiado por grupos que teñen representación neste Parlamento”, considerou o portavoz popular, quen anotou que “non se pode berrar pedindo máis autogoberno, despois de apoiar a quen recorta o noso autogoberno; non se pode esixir a redución das listas de espera da dependencia, e apoiar a quen boicotea as medidas que permiten reducir as listas de espera da dependencia; e non se pode esixir que a sociedade galega obteña beneficio da explotación dos nosos recursos, para despois apoiar a quen impide que iso se faga realidade”, concluíu.

A portavoz de Xuventude do Grupo Popular, Nicole Grueira, destacou hoxe no Pleno do Parlamento galego que “Galicia presenta un saldo migratorio positivo de máis de 160.000 persoas desde o ano 2009, uns datos que desmenten o discurso escuro e interesado do BNG, construído a base de pancarta, ruído e catastrofismo”.

Nicole Grueira explicou, recollendo datos publicados polo CIS referidos ao ano 2024, que preto de 8.500 galegos e galegas retornaron desde o exterior, “demostrando que Galicia volve ser unha opción real de vida para quen un día marchou”. Así mesmo, aínda que 16.460 persoas marcharon ao estranxeiro, 44.190 persoas chegaron a Galicia procedentes do exterior, polo que resulta un saldo migratorio positivo co exterior de 27.730 persoas. “Ademais, se falamos de mobilidade entre comunidades autónomas, o resultado tamén é positivo: marcharon 20.244 persoas, pero chegaron 22.839”, engadiu.

“Isto é o resultado de políticas públicas serias, planificadas e sostibles no tempo, que permiten que Galicia supere xa os 2,7 millóns de habitantes”, destacou a portavoz popular, que fixo referencia a medidas impulsadas polo Goberno de España como a Estratexia Galicia Retorna, o Retorna Cualifica Emprego, a Primeira Experiencia Profesional, Cooperas, Fixar, Galicia Emprega Moz@s, as Bolsas de Excelencia no Exterior ou o Bono Emancípate.

Deste xeito, Grueira insistiu que “estas medidas son o reflexo do compromiso real do Goberno galego coa xuventude, son oportunidades para os nosos mozos e mozas, e, sobre todo, son políticas que dan resultados positivos”.

O deputado popular Raúl Santamaría criticou hoxe “a pouca iniciativa” do PSdeG ao volver a traer hoxe ao Pleno unha iniciativa sobre a dotación actual de profesorado de pedagoxía terapéutica, audición e linguaxe e coidadores nos centros educativos públicos galegos, “cando hai pouco máis de dous meses xa se explicou que Galicia conta con 5.000 profesionais dedicados á atención á diversidade e na próxima convocatoria de oposicións de Educación a atención á diversidade ocupa a segunda categoría con máis prazas ofertadas”.

Raúl Santamaría lembrou que as rateos de profesores nos centros de ensino galegos están reguladas e controladas por lei, pero, “a pesar diso, Galicia reduciu este rateo de xeito voluntario ata os 20 alumnos”. Ademais, subliñou que “temos os mellores rateos alumno/profesor de España e o número de prazas ofertado é moi superior á demanda existente”.

A COMUNIDADE MÁIS INCLUSIVA

“Non é casualidade que Galicia sexa a comunidade máis inclusiva de España, co 93,3 por cento do alumnado con necesidades educativas especiais matriculado en centros ordinarios, oito puntos máis que a media española”, sinalou. Así mesmo, destacou que Galicia ten unha das mellores rateos de alumnos por profesor nos centros de educación especial: 3,3 fronte ao 5,2 estatal.

O deputado popular destacou que “temos cerca de 700 profesionais de pedagoxía terapéutica e audición e linguaxe, por enriba do que marca o catálogo”, aínda que explicou que “a atención á diversidade non é cousa dos PT ou AL, senón que é cousa de todo o profesorado: hoxe Galicia ten máis docentes ca nunca, a pesar de ter 20.000 alumnos menos”.

 

 

 

O portavoz do Medio Rural do Grupo Popular, Miguel Ángel Viso, asegurou hoxe no Pleno do Parlamento galego que a proposta socialista de promover a agricultura e gandería rexenerativa “carece de base legal imprescindible para unha política pública seria”. “Presentan como novidade un modelo que carece de marco legal, de certificación pública obrigatoria e de regras comúns, permitindo que calquera use o termo sen asumir as mesmas esixencias”, indicou.

Miguel Ángel Viso explicou que a denominada agricultura rexenerativa “responde a un enfoque centrado na restauración da saúde do solo, no incremento da biodiversidade e na captura de carbono, principios que tamén están no corazón da agricultura ecolóxica, pola que a Xunta leva anos facendo unha aposta decidida”.

PRÁCTICAS QUE XA SE APLICAN

Neste sentido, asegurou que “Galicia aposta pola produción ecolóxica impulsando axudas á conversión e ao mantemento das explotacións ecolóxicas, apoiando a incorporación de novos produtores, financiando a certificación, e promovendo a calidade diferenciada e a transferencia de coñecemento”, e o resultado é que, segundo CRAEGA, a superficie e os operadores ecolóxicos en Galicia seguen medrando ano tras ano.

“Falan de novo modelo produtivo como se os actuais estivesen alleos á sustentabilidade, cando moitos agricultores e gandeiros xa aplican prácticas de conservación do solo, rotación, cubertas vexetais e redución de insumos non por unha etiqueta, senón porque nesa boa xestión lles vai o futuro económico de Galicia”, asegurou o portavoz popular.

Porén, o portavoz popular insistiu aos socialistas que “cando se crean conceptos sen base normativa créanse expectativas que logo non se poden cumprir: axudas sen marco, formación sen sistema, campañas sen produto realmente diferenciado e, sobre todo, riscos de competencia desleal para quen si cumpre cun réxime tan esixente como o ecolóxico”. “Pola contra, a agricultura ecolóxica é un sistema completo: con control, con certificación, con esixencias técnicas e con apoio público”, asegurou.

A portavoz de Política Social do Grupo Popular, Raquel Arias, demandou hoxe ao Goberno central que “cumpra as propias leis socialistas e pague o 50 por cento que lle corresponde pola Lei da dependencia, de xeito que os concellos poidan complementar o custo do servizo de axuda no fogar logo de que o Goberno galego incremente un 50 por cento a súa aportación ata 2028”.

Raquel Arias criticou a postura contraria do BNG ao acordo asinado pola Xunta e a Fegamp para o financiamento do servizo de axuda no fogar, “un acordo ao que dixeron non unicamente por cuestións ideolóxicas”. “O mesmo BNG que xunto co PSdeG decidiron en 2008, cando gobernaban Galicia, que o servizo de axuda no fogar fora unha competencia municipal”, lembrou.

RECURSO CONTRA O PLAN DA DEPENDENCIA

“Coincidimos en que é unha carga moi pesada para os concellos a prestación deste servizo e por iso a Xunta incrementará o financiamento nun 50 por cento ata 2028, pero cremos que esa axuda ten que ser aínda maior porque o Goberno central ten que cumprir as propias leis socialistas e pagar o 50 por cento da Lei da dependencia, do mesmo xeito que xa o fai no País Vasco”, manifestou.

Así mesmo, a portavoz popular criticou que “cando Galicia pon en marcha un plan de choque para reducir as listas de agarda das valoracións da dependencia e a discapacidade, a través do que os discapacitados galegos pagaron o pasado ano 114 millóns de euros menos ao Estado, o Goberno de Pedro Sánchez paraliza este plan cun recurso de inconstitucionalidade e ao BNG e ao PSdeG parécelles perfecto esta decisión”.