Categoría: Parlamento de Galicia

O Pleno do Parlamento de Galicia amosou hoxe a súa satisfacción pola concesión do Premio Nobel da Paz 2025 a María Corina Machado, expresando a confianza de que este galardón contribúa a abrir para Venezuela un horizonte de democracia, reconciliación e paz duradeira. A través dunha proposición non de lei do Grupo Popular, á que o BNG votou en contra e o PSdeG se abstivo, tamén se condena enerxicamente o réxime de Nicolás Maduro, esixindo a liberación inmediata e incondicional de todos os prisioneiros políticos e das persoas detidas arbitrariamente en Venezuela, e ínstase a que poña fin á súa política de represión e ataques contra a sociedade civil e a oposición.

A iniciativa inclúe, ademais, a solicitude para que o Goberno de España recoñeza a Edmundo González Urrutia como lexítimo gañador das eleccións presidenciais do pasado 28 de xullo de 2024 en Venezuela; apoie as medidas de presión e as sancións impostas pola Unión Europea contra o réxime venezolano; e axude de forma decidida, responsable e prioritaria aos cidadáns españois, en particular aos galegos residentes en Venezuela, a través dunha dotación inmediata e suficiente de crédito para o programa Prestación por razón de necesidade para emigrantes españois no exterior.

O portavoz popular, Alberto Pazos, subliñou que esta iniciativa “reafirma o compromiso deste Parlamento cos principios democráticos e a solidariedade do pobo galego co pobo irmán de Venezuela, que continúa a padecer o terror e a opresión baixo o brutal réxime ditatorial presidido por Nicolás Maduro”. “Un réxime corrupto e torturador responsable do asasinato de opositores, responsable da detención en condicións inhumanas de centenares de presos políticos, responsable do maior éxodo da historia da humanidade e responsable de sumir a inmensa maioría do país nun inferno de fame, miseria e penuria sen precedentes”, apuntou.

REALIDADE MIGRATORIA DRAMÁTICA

Neste sentido, referiuse ao informe de ACNUR sobre a situación humanitaria neste país, “que describe unha realidade migratoria dramática: preto de 7,9 millóns de persoas, dun censo de 28,1 millóns, saíron de Venezuela buscando protección e unha vida mellor; máis de 1,3 millóns de solicitantes de asilo de Venezuela no mundo; e a propia poboación galega no país reduciuse de 46.000 a 30.000 galegos en apenas cinco anos”.

Alberto Pazos lembrou que “a oposición foi quen de gañar as eleccións e forzar a Maduro a autoproclamarse Presidente por decreto, ilexitimamente, sen ofrecer resultados desglosados e sen amosar actas do reconto electoral”. “Unhas actas que si foron recabadas por un grupo de demócratas valentes, que con risco da súa vida as recompilaron e fixeron públicas para amosar que o presidente elixido nas urnas polos venezolanos chámase Edmundo González Urrutia”, destacou.

Ademais, anotou que “o triunfo da oposición venezolana non tería sido posible sen o liderado dunha muller valente, galardoada co Nobel da Paz polo seu incansable labor en pro dos dereitos democráticos do pobo venezolano e pola súa loita para lograr unha transición xusta e pacífica da ditadura á democracia”. “Esa muller chámase María Corina Machado e foi gravemente insultada polo BNG neste Parlamento polos que prefiren estar do lado dun ditador que do lado da democracia, unha mancha que o Parlamento de todos os galegos non pode aceptar”, rematou.

O Pleno do Parlamento de Galicia aprobou hoxe a proposición non de lei do Grupo Popular, co voto en contra do PSdeG, a través da que se demanda ao Goberno de España a posta en marcha das medidas urxentes necesarias para que non se volva repetir o caos que se desata cada vez que se suspende o servizo ferroviario pola causa que sexa, tanto no referente aos medios a dispoñer, información ás persoas usuarias e comunicación e coordinación coas administracións afectadas. Así mesmo, pídese que desbloquee con carácter urxente os proxectos prioritarios en materia de transporte ferroviario que se atopan retrasados e dos que non se teñen novas.

O portavoz popular de Mobilidade, Gonzalo Trenor, demandou “un servizo ferroviario de calidade e homologable co resto de rexións europeas” e lamentou que, “ante esta reclamación lexítima, o Goberno de Pedro Sánchez nos responde con investimentos pendentes; trens convencionais suprimidos durante a pandemia; falta de oferta de prazas e de frecuencias en alta velocidade e media distancia; incumprimento dos horarios, tempos de viaxe e supresión de servizos sen previo aviso; avarías constantes; e problemas coa web e coa compra de billetes anticipada”.

INFRAESTRUTURAS PENDENTES

“Son moitas as infraestruturas que o Goberno central debe acometer en materia ferroviaria en Galicia e que vai demorando, como o Plan Director do Corredor Atlántico; as melloras necesarias nas conexións A Coruña-Ferrol, A Coruña-Lugo, Ferrol-Ribadeo ou Vigo-Ourense; ou a execución de obras importantes para optimizar o AVE Galicia-Madrid en tempos de percorrido, como o impulso da variante exterior de Ourense ou a dotación da dobre vía nos treitos nos que aínda non a hai”, concretou.

Gonzalo Trenor lembrou que “a vaga de lumes deste pasado mes de agosto tivo unha afección moi importante sobre a conexión ferroviaria de Galicia, e a resposta do Goberno central pasará á historia por abandonar a milleiros de persoas á súa sorte”. “Foron máis de 50.000 os viaxeiros afectados e máis de 100 os trens suprimidos”, sinalou o portavoz popular, quen criticou que “a responsa de Renfe e Adif a todas estas persoas e ao caos ferroviario ocasionado foi unha comunicación e información deficientes, a ausencia de alternativas de transporte ou o abandono de competencias e ameaza de demanda aos gobernos autonómicos”.

Diante desta situación, manifestou que “desde a Xunta e tamén desde este Parlamento denunciamos desde hai tempo a necesidade de que Renfe mellore a súa provisión de información ante retrasos, avarías e incidencias que lamentablemente son constantes”, pero lamentou que “o Goberno central non asume as súas competencias e pretende que sexan outros os que asuman as perdas económicas resultado das súas decisións e carencias”.

O deputado do Grupo Popular Roberto Rodríguez asegurou hoxe no Pleno do Parlamento galego que “nin a zona tensionada nin a criminalización das vivendas de uso turístico van a solucionar o problema do mercado de alugueiro de vivenda, nin o fixo en Cataluña nin o vai facer en ningún outro sitio porque é como quen trata a febre sen tratar a infección que a provoca: reduce a oferta e incrementa o prezo”.

Roberto Rodríguez lembrou que a Xunta puxo en marcha o pasado mes de xullo o programa Fogar Vivo, co obxectivo de axudar aos propietarios de vivendas baleiras a poñelas no mercado de alugueiro. A través deste programa, e co límite de 16.000 euros por vivenda, este programa dispón de axudas para facer fronte ao custo da contratación dos seguros de falta de pagamento de rendas e seguros multirisco do fogar; axudas para a adecuación e reparación das vivendas; e unha axuda específica para o caso de que a vivenda se alugue a menores de 36 anos ou con fillos menores de idade ou con persoas dependentes ao seu cargo.

INICIATIVA INNOVADORA E NON INTERVENCIONISTA

“Falamos dun programa de mobilización de vivendas baleiras, unha iniciativa incentivadora, non intervencionista, coa idea de axudar aos propietarios coa súa reforma para poñelas no mercado de alugueiro”, manifestou o deputado popular, quen subliñou que esta iniciativa “está ser emulada noutras comunidades e polo Goberno do Estado no deseño do novo Plan Estatal de Vivenda”.

Ademais, subliñou que “o Presidente Rueda comprometeuse en 2024 a duplicar o parque público de vivenda en Galicia con 8.000 novas vivendas e achegámonos ao ecuador da lexislatura cos deberes feitos e cun proxecto de orzamentos para 2026 que garante o impulso necesario para cumprir co compromiso adquirido polos galegos”.

Pola contra, Roberto Rodríguez criticou que “todas as accións adoptadas polo Goberno central nos últimos sete anos, lonxe de mellorar as condicións do acceso á vivenda, o que fixeron foi empeoralas”. Así, criticou que “afirman que lexislan contra os grandes tenedores, pero a realidade é que esta lexislación cae maioritariamente sobre os ombreiros dos propietarios de máis de 65 anos, de clase media e cunha única vivenda en alugueiro”.

“Deste xeito, estes propietarios afrontan dúas preocupacións á hora de poñer en alugueiro os seus inmobles: os impagos e os danos na súa vivenda”, explicou o deputado popular, quen lamentou que a responsa do Goberno de Pedro Sánchez fora “alimentar eses temores cunha lexislación estatal que claramente os desprotexe en lugar de darlles seguridade xurídica, o que se traduciu en que, en apenas dous anos, a Lei de vivenda estatal ten expulsado 120.000 vivendas do mercado de alugueiro”.

A viceportavoz do Grupo Popular, Paula Prado, criticou hoxe no Pleno do Parlamento galego “a falta de rigor, seriedade e coherencia do BNG á hora de reclamar atención ás vítimas de violencia de xénero, incapaz de denunciar os recortes do Goberno central na posta a disposición de recursos para as vítimas ou a ausencia de centros de información á muller nos concellos onde gobernan”.

Paula Prado acusou aos nacionalistas galegos de ser “moi bravos en Galicia pero moi mansos en Madrid”, porque “mentres aquí critican a xestión da Xunta dos centros de crise 24 horas de atención ás mulleres vítimas de violencia de xénero, non lles escoitei ningunha crítica cando o Goberno de Pedro Sánchez non aportou financiamento para a súa posta en marcha, se desatenderon da elaboración dos protocolos de actuación e se despreocuparon de cal debía ser a mellor localización”.

COÑECER TODOS OS DATOS

“Do mesmo xeito que mentres aquí reclaman á Xunta que poña a disposición das vítimas máis recursos, sabendo que Galicia é unha das comunidades con mellores recursos de protección, son incapaces de denunciar os recortes que aplica o Goberno central nesta materia, e mesmo apoian recortes en dereitos, como a aprobación de leis que benefician aos agresores sexuais; recortes na protección xudicial, como negarse a dotar a todas as cidades galegas de xulgado específico de violencia de xénero; ou recortes na seguridade, como o que supón a falta de efectivos policiais”, manifestou.

A viceportavoz popular demandou ao BNG que “se queren máis recursos falen cos alcaldes e alcaldesas de Brión, A Teixeira, Cuntis, Mazaricos, Camariñas e moitos máis concellos gobernados por BNG e PSdeG que nin sequera contan cun Centro de Información á Muller, obrigando ás súas veciñas a ter que desprazarse a outros municipios para poder recibir os seus servizos”.

Prado afirmou que “coincidimos co BNG na necesidade de coñecer todos os datos dos programas e actuacións realizadas en cada un dos centros de crise 24 horas”, e lembrou que no último Pleno a conselleira anunciou que xa se está traballando na elaboración dun informe que recollerá o número total de mulleres atendidas nestes centros, o total de intervencións psicolóxicas e xurídicas que se fixeron e o total de atencións telefónicas que se prestaron ao longo deste tempo en cada un deles.

A portavoz de Política Social do Grupo Popular, Raquel Arias, esixiu hoxe ao BNG que “respecten a todas as persoas que traballan nos servizos sociais en Galicia e que fan un traballo impecable, incluídos os inspectores, e deixen de alarmar aos usuarios destes servizos e ás súas familias, lanzando falsas acusacións todos os días sobre calquera tema”.

Raquel Arias asegurou que os nacionalistas galegos “non están neste momento para traballar a prol dos galegos e as súas necesidades, porque a súa razón de ser agora mesmo é xerar conflitos, alboroto e crispación, seguindo ao pe da letra as directrices que lle marcha a UPG”.

“O que tiñan que facer era esixirlle a Pedro Sánchez que pague os 2.500 millóns de euros que debe a Galicia pola prestación da dependencia, así como que abone o 50 por cento do custo deste servizo, tal e como se recolle na Lei de dependencia”, demandou a portavoz popular, quen criticou que esta porcentaxe “o Goberno de Pedro Sánchez si que a ten confirmada ao País Vasco, mentres a Galicia nos rebaixa do 40 ao 35 por cento a aportación entre os anos 2023 e 2024”.

PLAN DE CHOQUE

A portavoz popular subliñou que, segundo os datos do propio Ministerio, “Galicia lidera tanto en ratios de atención de persoas dependentes valoradas, co 98 por cento de atención; como en redución de listas de agarda, reducíndoas en 37 días mentres no conxunto do Estado aumentan en 14 días; e co máximo histórico de 88.000 dependentes atendidos”.

“Uns datos que se conseguiron en boa medida gracias ao plan de choque implantado pola Xunta para a redución da lista de espera en dependencia, que o Goberno de Pedro Sánchez quere recurrir e o BNG aplaude que se recorra”, dixo.

Moisés Rodríguez Pérez é o novo deputado do Grupo Popular pola provincia de Pontevedra, substituíndo á recién nomeada directora da Axencia Galega de Infraestruturas, María Deza.

Nacido en Tui, Moisés Rodríguez foi deputado autonómico na X e XI Lexislaturas, sendo presidente e voceiro do Grupo Popular na Comisión 6ª de Industria, Enerxía, Comercio e Turismo.

Coordinador parlamentario do PPdeG desde 2022, na actualidade era asesor do Gabinete da Consellería de Vivenda e Planificación de Infraestruturas.

Moisés Rodríguez foi concelleiro de Tui, municipio do que foi alcalde entre os anos 2011 e 2015. Tamén foi deputado provincial entre 2013 e 2015.

A portavoz de Sanidade do Grupo Popular, Encarna Amigo, amosou hoxe no Pleno do Parlamento o compromiso do Goberno galego de dotar de xeriatras a todas as áreas sanitarias de Galicia, “para o que necesitamos máis profesionais destas especialidade e, por iso, a Consellería de Sanidade leva tempo traballando nesa dirección”.

Encarna Amigo avogou por “seguir avanzando con rigor, fortalecendo os equipos existentes, incorporando xeriatras de forma progresiva e avaliando a creación de novas unidades cando existan recursos humanos suficientes e o contexto asistencial o aconselle”.

Neste sentido, lembrou que “o envellecemento da poboación require adaptar os servizos, reforzar a coordinación entre niveis asistenciais e incorporar o coñecemento específico dos profesionais de xeriatría”. “O Servizo Galego de Saúde non improvisa, planifica e adapta continuamente a súa rede asistencial á realidade poboacional”, manifestou a portavoz popular, quen incidiu que a xeriatría “é unha disciplina que achega unha visión integral da persoa maior, que axuda a priorizar tratamentos, evitar ingresos innecesarios e mellorar a calidade de vida”.

SITUACIÓN EN OURENSE

Amigo insistiu que “Galicia necesita máis profesionais de xeriatría” e destacou que a Consellería xa leva tempo traballando nesa dirección. En concreto, lembrou que na última convocatoria MIR ofrecéronse o 100 por cento das prazas de formación en xeriatría e tamén o 100 por cento en enfermería xeriátrica, unha situación que derivou en que na actualidade Galicia conte con 14 residentes formándose no sistema sanitario.

Respecto da situación na provincia de Ourense, a portavoz popular explicou que “é a área sanitaria con máis centros de saúde de toda Galicia, conta con sete equipos de soporte de atención domiciliaria, con servizos de hospitalización a domicilio en Verín Valdeorras e Ourense, e cunha rede de medicina interna que integra atención a pacientes crónicos, complexos e fráxiles”.

“Ourense é un área prioritaria, con programas de seguimento domiciliario pioneiros, con atención próxima e humana, e con profesionais extraordinarios que dan resposta diaria ás necesidades da súa poboación maior”, asegurou Encarna Amigo, quen anotou que “o reto demográfico é enorme, pero tamén é unha oportunidade para facer de Galicia un referente na atención ao envellecemento”.

O portavoz do Mar do Grupo Popular, Miguel Fidalgo, avogou hoxe no Pleno do Parlamento de Galicia por “intensificar a coordinación entre Salvamento Marítimo e Gardacostas de Galicia, un servizo exemplar e singular en toda España, para mellorar aínda máis a resposta ante emerxencias e episodios de contaminación”. “Galicia non renuncia a máis autogoberno, pero quere transferencias reais, útiles e exercibles, como é o caso da reclamación da AP-9, bloqueada no Congreso con máis de 50 prórrogas do prazo de emendas, ou o traspaso de aeródromos e permisos de traballo”, concretou.

No debate da proposición de lei do BNG sobre a transferencia de competencias á Comunidade galega en materia de salvamento marítimo e loita contra a contaminación mariña, Miguel Fidalgo asegurou que este traspaso “non melloraría nada o xa existente, non é viable e non responde ao interese real de Galicia”.

LÍMITES CONSTITUCIONAIS, INTERNACIONAIS E OPERATIVOS

Neste sentido, lembrou que esta demanda xa se debateu no Parlamento galego no 2003, no 2010, no 2014 e no 2019, “sempre coa mesma formulación, os mesmos argumentos e a mesma desconexión coa realidade legal e operativa”. “Se esta transferencia non se fixo en Galicia nin en ningunha outra comunidade autónoma non é por falta de vontade política, é porque o salvamento marítimo ten límites constitucionais, internacionais e operativos moi claros”, sinalou.

“Cando propoñen crear novas estruturas, duplicar administracións e fragmentar a coordinación non están mellorando nada, máis ben poñendo en risco un sistema que funciona”, afirmou o portavoz popular, quen subliñou que “cando hai unha emerxencia no mar, o que importa non é quen ten a competencia escrita nun DOG ou nun BOE, senón quen chega antes e salva vidas”.

Miguel Fidalgo lembrou que Galicia foi pioneira no salvamento marítimo en España coa creación en 1990 do Servizo de Gardacostas de Galicia, antes de que existise desde 1992 o SASEMAR a nivel estatal. “Fomos a primeira comunidade con centro de coordinación autonómico, con embarcacións e helicópteros propios, e hoxe o Servizo de Gardacostas é referencia nacional e internacional, con capacidade de resposta inmediata e coordinación exemplar, operando as 24 horas os 365 días do ano”, dixo.

Por último, o portavoz popular incidiu que “ningunha comunidade autónoma en España ten transferida a competencia en materia de salvamento marítimo e loita contar a contaminación mariña, non por falta de ambición política, senón porque non é viable”. Así, explicou que “o que hai en Euskadi é un principio de acordo que non supón unha transferencia plena da competencia, porque esta comunidade autónoma só asumiría a xestión operativa en augas interiores”. “Non se transfire bens nin persoal, e o Estado mantén todo o esencial: lexislar, coordinar a resposta nacional, aprobar o plan de salvamento e controlar o tráfico marítimo”, indicou.

O portavoz do Grupo Popular, Alberto Pazos, salientou hoxe as novas rebaixas fiscais incorporadas aos orzamentos da Xunta para o 2026 que beneficiarán a familias monoparentais, a formación de contratos vitalicios para o coidado dos maiores, a compra de libros e material escolar, aos enfermos de ELA e ás súas familias e aos afectados pola vaga de incendios deste verán. “Estamos diante duns novos presupostos da Xunta, presentados en prazo e que dotarán á Comunidade galega dos fondos económicos necesarios para que, a partir do 1 de xaneiro, poida seguir medrando e creando emprego como viu facendo nos últimos 17 anos cos gobernos de Alberto Núñez Feijóo e Alfonso Rueda”, manifestou.

Ao remate da Xunta de Portavoces, na que se aprobou o calendario de comparecencias dos membros do Goberno galego, as deputacións provinciais e os organismos autónomos na Comisión 3ª para dar conta dos orzamentos dos seus respectivos departamentos, que darán comezo o vindeiro xoves, 23 de outubro, ás 10 horas co conselleiro de Facenda, Alberto Pazos criticou que BNG e PSdeG intentaran hoxe bloquear os orzamentos votando en contra da aprobación deste calendario. “Non lles chega con deixar a España durante tres anos sen orzamentos, senón que agora queren estender ese modelo a Galicia”, lamentou.

EXEMPLO A NIVEL ESTATAL

“Galicia volverá a ser un exemplo a nivel estatal ao tramitar os seus orzamentos en tempo e forma para que estean totalmente vixentes o 1 de xaneiro”, destacou o portavoz popular, quen contrapuxo esta situación “coa que sufrimos a nivel estatal, cun Goberno débil e sen o apoio parlamentario suficiente para sacar adiante uns orzamentos do Estado, prorrogados desde o ano 2023 e que atendían a proxectos e actuacións vixentes na pasada lexislatura, que, por suposto, quedaron totalmente desfasados para as necesidades da sociedade española actual”, sinalou.

O portavoz popular lembrou que o proxecto de orzamentos da Xunta para 2026 acada a cifra récord de 14.240 millóns de euros, dos que 3 de cada 4 euros se destinarán a gasto social, é dicir, sanidade, educación, políticas sociais e emprego; ámbitos nos que se prevé unha suba do 3,1 por cento respecto ao 2025, por enriba da suba do 2 por cento dos gastos totais recollidos nos orzamentos.

Máis en concreto, Alberto Pazo destacou a previsión de que o desemprego se reducirá ao 7,8 por cento ou que o Produto Interior Bruto se incremente un 1,9 por cento, un dato por enriba dos avances feitos tanto a nivel dos países da Zona Euro (1,4 por cento) ou da Unión Europea dos 27 (1,5 por cento). “E, todo iso, aderezado cunha nova rebaixa de impostos para colectivos sociais desfavorecidos, como: familias monoparentais; a formalización de contratos vitalicios para o coidado dos nosos maiores; a compra de libros e material escolar; os enfermos de ELA e as súas familias; ou os afectados pola vaga de incendios que sufrimos este verán; mantendo, por suposto, as rebaixas fiscais das que xa gozamos os galegos de anos anteriores”, subliñou.

SEMANA DE GLORIA DO BNG

Respecto das valoracións do proxecto de orzamentos realizadas por BNG e PSdeG, Alberto Pazos criticou que o BNG “cualifique as contas como as de un Goberno sen proxecto de país, sobre todo se o comparamos co proxecto de país que eles defenden despois de que pasaran a súa semana de gloria protagonizando tres situacións que identifican claramente os seus obxectivos e fins: o primeiro, a foto da vergoña cos herdeiros de ETA en Bilbao; o segundo, chamando fascista á recién recoñecida co Premio Nóbel da Paz, María Corina Machado; e, o terceiro, co documento feito público polo partido marxista-leninista que tutela ao BNG no que chama a axitar e crear tensión nas rúas galegas, traendo á nosa comunidade a kale borroka do País Vasco, para desgraza dos galegos que sufrimos as algaradas e desfeitas que acompañan habitualmente estas concentracións convocadas polas organizacións satélites do BNG e da UPG”.

Así mesmo, considerou “paradóxico que os socialistas galegos teñan a desfachatez de criticar os orzamentos da Xunta, cando o Goberno de Pedro Sánchez leva desde 2023 cunhas contas prorrogadas e sen atender as demandas de novos investimentos e programas imprescindibles para a sociedade española actual”. “O seu descoñecemento ou mala fe lévaos a criticar a rebaixa dos investimentos previstos nestes orzamentos, cando é público e notorio que a finalización dos fondos europeos é a causa deste descenso dos investimentos, que, gracias ao esforzo do Goberno galego, se manterán nunhas cifras máis que aceptables e, por suposto, cun incremento do 3,3 por cento se excluímos os fondos europeos dos anteriores orzamentos”, explicou.

 

 

 

Os deputados do Grupo Popular Carmen Pomar, Rubén Lorenzo e Gonzalo Trenor visitaron hoxe as novas instalacións da Asociación Galega de Afectados pola Esclerose Lateral Amiotrófica (AGAELA) en Santiago e salientaron o compromiso da Xunta con estes enfermos, que se manifesta na axuda anual de 12.000 euros para cada enfermo e as anunciadas rebaixas fiscais que se aplicarán desde o vindeiro ano. Pola contra, criticaron que “un ano despois da aprobación da Lei ELA, os enfermos, os seus familiares e coidadores aínda seguen esperando as axudas prometidas polo Goberno de Pedro Sánchez”.

Carmen Pomar, Rubén Lorenzo e Gonzalo Trenor felicitaron aos responsables de AGAELA polo traballo que realizan de atención e compromiso cos afectados e familiares de ELA, “un esforzo para o que sempre terán ao seu carón tanto ao Goberno de Alfonso Rueda como ao Partido Popular”.

Neste sentido, lembraron que Galicia foi a primeira comunidade autónoma de España en contar cunha axuda directa para as persoas diagnosticadas con esclerose lateral amiotrófica. En concreto, a Xunta subvenciona con ata 12.000 euros ao ano a cada paciente con esta enfermidade para que poida facer fronte aos cuantiosos gastos que debe facer fronte para conseguir vivir nunhas condicións dignas, aportación que poderá destinarse a sufragar aqueles gastos que nos estean cubertos polo sistema público de saúde.

AXUDAS E DESGRAVACIÓNS FISCAIS

“Estas importantes axudas, para as que o Goberno galego destina este ano 2,4 millóns de euros, veranse complementadas en 2026 con desgravacións fiscais ás que poderán acceder os enfermos de ELA, tal e como xa anunciou esta semana o Presidente Rueda que se recollerá nos orzamentos da Xunta para o vindeiro ano”, subliñaron os deputados populares.

Porén, criticaron o “desprezo e engano que están sufrir os enfermos de ELA por parte do Goberno de Pedro Sánchez, incapaz de poñer enriba da mesa unha partida orzamentaria para dar cumprimento ao recollido na Lei aprobada hai máis de un ano por unanimidade do Congreso”.

“A parálise e extrema debilidade na que vive o actual Goberno de España é tan patente que, ademáis de ser incapaces de aprobar uns orzamentos do Estado desde hai tres anos, son incapaces de conseguir 230 millóns de euros para financiar a Lei ELA e atender as demandas dos enfermos, a pesar de que son capaces de mover milleiros e milleiros de euros para cumprir coas demandas dos seus socios parlamentarios e de contar con cuantiosos fondos europeos cos que atender estas necesidades”, sinalaron.