Categoría: Parlamento de Galicia

O portavoz do Grupo Popular, Alberto Pazos, criticou hoxe que o BNG boicoteara no Pleno do Parlamento galego celebrado esta semana, por segundo ano consecutivo, unha declaración institucional con motivo do Día Internacional en recordo das vítimas do holocausto, á que nesta ocasión tamén se sumou o silencio dos nacionalistas sobre outra proposta de declaración institucional para condenar a represión e violacións dos dereitos humanos que está a exercer o réxime dos aiatolás na República de Irán.

Alberto Pazos lamentou “o desinterese, por non chamalo pasotismo, amosado polos responsables do BNG respecto destas dúas cuestións de marcado carácter humano e de máximo respecto polas vítimas e os afectados”. “O único que pode xustificar este desinterese é que estean máis preocupados polo proceso que levan a cabo para estreitar as súas relacións co Partido Comunista do Vietnam, unha formación que goberna este estado desde hai máis de 40 anos, ao ser o único partido que existe neste país”, manifestou.

SEGUNDO ANO CONSECUTIVO

“Este será o segundo ano consecutivo no que o Parlamento galego non se procede á lectura da declaración institucional solicitada a todos os grupos pola Asociación Galega de Amizade con Israel, pola sinxela razón de que o BNG optou polo silencio total e falta de resposta á solicitude realizada desde o Grupo Popular, que atendía, como dixen antes, a solicitude da Asociación Galega de Amizade con Israel”, indicou.

Neste sentido, Pazos avanzou que, “fronte a este intento dos nacionalistas galegos de silenciar esta nobre causa en recordo das vítimas do holocausto, desde o Grupo Popular seguiremos abertos e reiterando cada ano a aprobación dunha declaración institucional do Parlamento de Galicia en recordo do xenocidio levado a cabo polo réxime nazi que aniquilou a 6 millóns de xudeus, así como a membros de minorías étnicas e sexuais, disidentes ou discapacitados”.

Ademais deste boicot do BNG a esta declaración institucional en recordo das vítimas do holocausto, no Pleno celebrado esta semana sumouse outro novo desprezo ás vítimas da represión e violación dos dereitos humanos que están a exercer o réxime dos aiatolás na República de Irán. “Neste caso, os nacionalistas tampouco quixeron saber nada da proposta de declaración institucional que lles trasladamos desde o Grupo Popular, amosando unha falta total de respecto e un mínimo de decoro institucional ao non dar unha resposta, nin afirmativa nin negativa, ás múltiples chamadas feitas desde o noso Grupo Parlamentario”, lamentou Alberto Pazos.

En concreto, esta declaración institucional pedía a fin das gravísimas violacións dos dereitos humanos en Irán; o respecto por parte das autoridades iranianas das liberdades fundamentais de expresión, reunión pacífica e asociación; e a inmediata liberación dos detidos por exercer estes dereitos.

FINANCIACIÓN PARA CATALUÑA

Por outra banda, e tamén sobre o contido da sesión plenaria celebrada esta semana, o portavoz popular referiuse á comparecencia do conselleiro de Facenda para facer unha valoración da reunión do Consello de Política Fiscal e Financeira, así como da postura de Galicia respecto da proposta de condonación da débeda ás comunidades autónomas e do novo modelo de financiamento pactado cos independentistas cataláns.

“Unha comparecencia na que quedou claro que ambas propostas nacen co único obxectivo de beneficiar a Cataluña e manter tanto a Pedro Sánchez na Moncloa como ao seu discípulo Salvador Illa na Presidencia da Generalitat, pero que para Galicia terían unhas consecuencias desastrosas, que se traducen, directamente, como ben cuantificou o conselleiro na súa intervención, nunha merma de case 1.000 millóns de euros anuais para as arcas galegas”, explicou.

Neste sentido, reiterou que “Galicia non vai aceptar nin imposicións nin chantaxes de ningún tipo por parte dun Goberno de España que sobrevive gracias a aceptar submisamente todas as chantaxes dos independentistas cataláns, e seguiremos defendendo o que de verdade é necesario: un novo modelo de financiamento autonómico que realmente recoñeza as peculiaridades de cada comunidade autónoma, que no caso de Galicia son a dispersión e o envellecemento da poboación”.

Alberto Pazos criticou que o BNG siga “coa súa teima do que Galicia teña a chave dos seus cartos, ou, con outras palabras, que se implante en Galicia un cupo ao estilo do que gozan no País Vasco ou Navarra, pero sen ter en conta que Galicia non comparte moitas das peculiaridades destas comunidades e este modelo de financiamento suporía unha perda de 2.000 millóns de euros anuais para a Comunidade galega”.

E, respecto dos socialistas galegos, incidiu que “seguen punto por punto as indicacións que lle mandan desde Moncloa, sen saírse o máis mínimo das pautas marcadas desde alí”, pero amosou a sorpresa porque “ao pouco de aplaudir o acordo asinado entre Pedro Sánchez e o inhabilitado Oriol Junqueras, xa recoñecían que os 587 millóns previstos para Galicia se quedaban cortos e animaban á Xunta a negociar para sumar ata 300 millóns de euros máis”. “Unha cifra que se queda corta, tendo en conta os informes elaborados por expertos que sitúan en máis de 1.000 millóns de euros o que realmente lle correspondería á Comunidade galega neste modelo de financiamento autonómico”, indicou.

O Parlamento de Galicia aprobou hoxe a proposición non de lei do Grupo Popular, co voto en contra de BNG e PSdeG, a través da que se insta á Xunta de Galicia a que insista ante Europa na reclamación de información sobre a xestión de España co Fondo Social polo Clima, logo de que a Comisión Europea confirmara que o Goberno de Pedro Sánchez non presentou aínda o seu Plan Social polo Clima, que mobilizaría nos próximos anos 9.000 millóns de euros en proxectos relacionados co cambio climático en todo o país.

A deputada popular Kati Varela lamentou o incumprimento do Goberno central para presentar antes do pasado 30 de xuño as medidas e actuacións que se financiarán en España ao abeiro do Fondo Social para o Clima, así como a forma de facer a repartición entre as comunidades autónomas. En total, este Fondo Social está dotado con 86.700 millóns de euros para o período 2026-2032, dos que a España lle corresponden 9.000 millóns de euros, cofinanciados nun 75 por cento con fondos europeos e nun 25 por cento con achegas estatais.

TRANSICIÓN ENERXÉTICA XUSTA

A través deste Plan Social polo Clima preténdese garantir unha transición enerxética xusta para os sectores máis vulnerables da sociedade. En concreto, a través destes plans sociais establécense axudas temporais e directas que permitan reducir a dependencia dos combustibles fósiles dos usuarios dos distintos medios de transporte, micro empresas e fogares vulnerables.

“Galicia reclamou ao Goberno de Pedro Sánchez en marzo de 2025 a participación activa das autonomías no Plan Social polo Clima, no que se plasmarían as actuacións a financiar a cargo do Fondo Social polo Clima, pero non houbo contestación algunha a este requirimento”, sinalou a deputada popular.

Diante desta falta de transparencia e comunicación por parte do Goberno central, a Xunta presentou un total de 58 proxectos de sete consellerías por un importe de 2.000 millóns de euros. “Dese total, arredor de 1.460 millóns de euros corresponden a iniciativas relacionadas coa mellora da eficiencia enerxética en vivendas, aínda que tamén se incorporaron proxectos relacionados coa mobilidade cidadá; o saneamento e depuración de augas; a xeración de biogás; ou a formación e o emprego no ámbito da eficiencia enerxética e a mobilidade sostible.

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España que dea traslado de toda a documentación relativa ao expediente aberto pola Comisión Europea en relación coa AP-9 e das comunicacións mantidas pola administración do Estado con este obxecto, ao tempo que adopte cantas iniciativas sexan precisas para facer efectivo o rescate da concesión da AP-9, por ser esta a alternativa máis vantaxosa para o interese público, e acordar a eliminación das peaxes.

“Non pedimos privilexios, senón que Galicia deixe de ser tratada como unha excepción incómoda e que se respecte o que este Parlamento galego leva anos reclamando por unanimidade”, manifestou o deputado popular Rubén Lorenzo, quen apuntou que “o rescate da AP-9 non é unha batalla partidista, é unha cuestión de dignidade territorial, de eficiencia económica e de xustiza social”.

OPORTUNIDADE HISTÓRICA

Rubén Lorenzo lembrou que a Comisión Europea foi clara: as prórrogas da concesión da AP-9 presentan irregularidades. “Ese ditame abría unha oportunidade histórica para que o Goberno de España actuase con responsabilidade e puxese fin a unha situación que prexudica aos galegos desde hai décadas, pero atopámonos con que o Goberno de Pedro Sánchez non fixo nada: nin transparencia, nin explicacións, nin acceso ao expediente europeo, malia ser solicitado pola Xunta en reiteradas ocasións”, indicou.

“Mentres tanto, Galicia fixo os deberes e a Xunta actualizou o estudo económico sobre o rescate da AP-9, que cuantifica esta decisión en 2.356 millóns de euros, un custo practicamente equivalente ao que o Estado terá que asumir en bonificacións ata o final da concesión”, destacou.

Ademais, o deputado popular recordou que Galicia, Asturias e Castela e León xa constituíron unha fronte común para reclamar o rescate da AP-9 e da AP-66, “tres gobernos que coinciden na mesma conclusión de que o rescate é ineludible, pero ante a que o Ministerio de Transportes segue sen responder ás cartas, ás solicitudes de reunión e ás peticións de información”.

Rubén Lorenzo lamentou, por último, que “Galicia segue a pagar as peaxes máis caras de España, mentres o Goberno central libera outras autoestradas en territorios gobernados polo PSOE”. En concreto, dixo que “nos últimos meses o Goberno de Pedro Sánchez cedeu a titularidade da AP-68 a Navarra, sen dilación nin escusas; liberou as peaxes na AP-7 en Alacante; e mantén bloqueada no Congreso o debate sobre a transferencia da AP-9, recorrendo ao filibusterismo parlamentario máis descarado”.

O deputado do Grupo Popular Moisés Rodríguez asegurou hoxe no Parlamento galego que a Xunta está definindo os novos contratos de explotación do servizo de autobús interurbano no sur da provincia de Pontevedra para dar mellor resposta á mobilidade actual. “O Goberno galego é consciente de que existe unha necesidade de mellora en determinadas conexións neste área, principalmente pola evolución da demanda de transporte público, que rexistrou un crecemento moi importante nos últimos anos”, sinalou.

Moisés Rodríguez destacou que “o incremento dun 37 por cento do número de viaxeiros nos últimos tres anos derivou en novas necesidades que requiren introducir cambios na prestación do servizo de transporte público por estrada”. Diante desta situación, a Xunta acordou co operador resolver os cinco contratos de transporte que tiña nesta zona co obxectivo de que “a renovación conxunta destes contratos permita levar adiante unha reestruturación integral do transporte público na zona cunha oferta máis coherente, eficiente e integrada”.

“A Xunta ten moi en conta todas as demandas e propostas de mellora realizadas tanto polos usuarios como polos concellos á hora de definir os novos proxectos de explotación, co obxectivo de configurar unha oferta de servizos adaptada ás necesidades reais da poboación”, indicou. En concreto, o deputado popular avanzou que, xunto coa revisión xeral dos servizos que atenden á comarca do Baixo Miño, tamén se está a avaliar a mellora da oferta de servizos ao campus da Universidade de Vigo e aos hospitais.

Na actualidade, a comarca do Baixo Miño conta con 63 liñas de transporte de viaxeiros por estrada, que atenden 1.043 paradas funcionais e prestan máis de 35.000 servizos ao ano. Durante o pasado ano, máis de 530.000 usuarios utilizaron estas liñas de transporte, o que representa un incremento do 3 por cento respecto ao 2024.

O Parlamento de Galicia aprobou hoxe a proposición non de lei do Grupo Popular, co voto en contra tanto do BNG como do PSdeG, a través da que pide ao Goberno central que a reforma do Estatuto Marco do persoal estatutario dos servizos de saúde se realice co consenso e participación efectiva das Comunidades Autónomas e dos sectores profesionais implicados. Así mesmo, demándase que esta reforma contribúa a dar resposta ao déficit de profesionais sanitarios, especialmente en atención primaria e nos postos de difícil cobertura.

A portavoz popular de Sanidade, Encarna Amigo, manifestou que a oposición ao Estatuto Marco presentado polo Ministerio de Sanidade “é unha demanda maioritaria dos profesionais médicos en Galicia e en todo o conxunto de España”. “Un texto que nace coa frontal oposición dos profesionais é un texto condenado ao fracaso, do mesmo xeito que non se pode reformar esta norma sen contar coas comunidades autónomas, que son as competentes na organización e prestación da asistencia sanitaria”, indicou.

MINISTRA INCAPAZ

“Levamos meses sufrindo paros e folgas continuas, totalmente lexítimas, pero quen acaba pagando o prezo non é o Ministerio, senón os pacientes, e os galegos non merecen sufrir o froito de ter unha ministra incapaz de resolver un problema que ela mesma xerou”, sinalou a portavoz popular.

En concreto, cifrou en máis de 86.000 asistencias médicas que non se realizaron en Galicia a consecuencia dos paros e folgas convocados nestes últimos meses, unha situación da que o Servizo Galego de Saúde se resinte directamente, véndose obrigado a reprogramar toda a actividade suspendida, co conseguinte incremento de tempos nas listas de espera.

Encarna Amigo lamentou que “o conflito segue aberto porque o Ministerio non quere escoitar: chegamos a un punto no que a incapacidade dos responsables do Ministerio é tan patente que incluso intentaron derivar o problema nas comunidades autónomas”. Neste sentido, criticou que o Goberno de Pedro Sánchez “despreza aos profesionais, minusvalora o conflito, deixa medrar a confrontación e, cando a situación se volve insostible, pretende derivar o problema a unhas comunidades autónomas que ignoraron desde o principio”.

“Pedimos consenso e participación real, así como unha memoria económica e técnica, para que a reforma sirva para dar resposta ao déficit de profesionais, especialmente en atención primaria e nos postos de difícil cobertura”, rematou.

O portavoz de Industria do Grupo Popular, Rubén Lorenzo, asegurou hoxe no Pleno do Parlamento galego que a proposta do BNG de que o canón eólico se calcule pola potencia total do parque “é legalmente imposible e politicamente incoherente, e non se pode facer porque o Tribunal Supremo dixo que o canon é ambiental; o Tribunal de Xustiza da Unión Europea dixo que non pode haber vínculo coa produción; a Atriga advertiu que sería ilegal; e a Consellería de Economía explicou que vulnera a Lei orgánica de financiamento das comunidades autónomas”.

“O BNG é o único partido capaz de estar contra os parques eólicos novos, contra a eólica mariña, contra os parques que xa existen e tamén contra os parques repotenciados, e todo isto ao mesmo tempo que no seu discurso piden o desbloqueo do despegue da eólica, máis canon e máis recadación para os concellos”, manifestou Rubén Lorenzo.

Na súa intervención, o portavoz popular afirmou que a reforma da Xunta sobre o canon eólico “é un exemplo de rigor, legalidade e adaptación tecnolóxica, porque o Goberno galego fixo o que había que facer: adaptar o canon á realidade tecnolóxica, pasar de contar máquinas a medir altura tendo en conta o impacto ambiental real; garantir unha recadación estable; evitar que a repotenciación penalice aos promotores, e manter o Fondo de Compensación Ambiental como instrumento de equilibrio territorial”.

“Galicia necesita unha política enerxética seria, estable e coherente, non precisa contradicións, demagoxia, postureo nin propostas imposibles para contribuír á maquillaxe do BNG”, subliñou.

O Parlamento de Galicia aprobou hoxe, co voto en contra de BNG e PSdeG, a nova Lei do clima de Galicia, “que vai permitir combater con novos instrumentos o cambio climático, que nos vai permitir camiñar cara a unha economía máis eficiente e que vai permitir que todos os nosos sectores produtivos camiñen cara á descarbonización”, indicou o deputado popular Moisés Rodríguez. “Elevamos a rango de lei o obxectivo de Galicia de acadar a neutralidade climática no 2040, dez anos antes que o resto de estados e de comunidades autónomas”, concretou.

Moisés Rodríguez lembrou que “Galicia sempre foi pioneira no ámbito do cambio climático, coa aprobación dunha estratexia que fixou, por primeira vez, o compromiso dunha Galicia climaticamente neutra; os plans rexionais integrados de acción climática; e os plans de acción local polo clima”. Así, sinalou que “a prioridade é protexer á sociedade e á economía ante os riscos derivados deste fenómeno”.

NOVOS ÓRGANOS

“Esta lei permitirá promover todas aquelas accións orientadas a preparar o territorio e protexer á cidadanía dos impactos ambientais e de eventos extremos ligados ao quecemento global, coa creación, por exemplo, de refuxios climáticos que reduzan a vulnerabilidade da poboación ante vagas de calor ou o fomento de solucións baseadas na natureza”, dixo.

O deputado popular referiuse á creación de novos órganos de asesoramento, participación e instrumentos de transparencia previsto nesta nova lei, como a Oficina do Cambio Climático de Galicia, para a xestión e o fomento das políticas de mitigación, adaptación e comunicación en materia de cambio climático; ou o Foro da Acción Climática, máximo órgano colexiado de participación, asesoramento e consulta en materia de cambio climático. Ademais, a nova norma consolida instrumentos que xa están en vigor, como a Rede local polo clima, para promover a adhesión de todos os concellos galegos ao pacto das alcaldías polo clima e a enerxía.

Para rematar, Moisés Rodríguez afirmou que a lei “tamén pon deberes ás administracións” e, en concreto, sinalou que “obriga á Xunta a integrar a perspectiva climática, tanto desde o punto de vista da redución de emisións como da adaptación aos efectos do quecemento global na elaboración dos seus plans e programas sectoriais e na preparación de contratos públicos e nas convocatorias de subvencións”.

“Galicia quere dar exemplo a outras administracións e sentar as bases para regular nesta Comunidade autónoma o fenómeno coñecido como contratación pública verde”, asegurou.

A viceportavoz do Grupo Popular, Paula Prado, contrapuxo hoxe no Pleno do Parlamento de Galicia “o modelo do Goberno de Pedro Sánchez, que abandona aos concellos, non financia o que lle corresponde e impón obrigas sen recursos; e o modelo da Xunta, que está costeando innumerables servizos e competencias que son municipais ou que son competencia doutras administracións”.

Paula Prado criticou ao PSdeG que “non veñen aquí a falar seriamente de financiamento local, senón a tapar a vergoña do novo modelo de financiamento que promove o Goberno de Pedro Sánchez, un modelo que sacrifica a igualdade dos españois para manterse na Moncloa, atendendo as esixencias dos seus socios independentistas e rachando co principio de solidariedade territorial”.

“A Xunta asume competencias que claramente corresponden ás deputacións provinciais e aos concellos de máis de 20.000 habitantes, como as emerxencias, os parques de bombeiros, os GES, as agrupacións de voluntarios de protección civil ou o financiamento do servizo de axuda no fogar, ao que, logo do acordo acadado coa Fegamp, pasará de aportar 148 millóns de euros este ano a máis de 220 millóns en 2028”, indicou a viceportavoz popular.

INCREMENTO DO FONDO DE COOPERACIÓN LOCAL

Neste sentido, Paula Prado asegurou que este servizo “sería moito mellor se o Goberno de Sánchez pagase dunha vez os máis de 2.900 millóns de euros que o Estado debe a Galicia pola prestación da dependencia, ao tempo que aporte de maneira definitiva o 50 por cento que lle corresponden por esta lei para a atención aos dependentes de Galicia”.

Respecto do Fondo de Cooperación Local da Xunta, Prado subliñou que “non deixou de medrar nos últimos anos, marcando un novo récord en 2026 ao chegar aos 187 millóns de euros, logo de incrementarse un 12 por cento respecto ao pasado ano”.

Para rematar, Paula Prado referiuse á situación que se viviu na Deputación de Lugo, onde “o BNG garantiu o sentido do seu voto non para esixir a dimisión do señor Tomé, acusado publicamente dunha agresión sexual, senón por 500.000 euros: un acordo económico, o chamado pacto guarro, que permitiu manter no poder a quen debía dar explicacións políticas”.

“Cando falen de ética, de feminismo ou de financiamento xusto, a pregunta é inevitable: os recurso públicos están ao servizo da cidadanía ou son moeda de cambio para manter cargos a calquera prezo”, cuestionou.

O portavoz do Medio Rural do Grupo Popular, Miguel Ángel Viso, afirmou hoxe, respecto do acordo comercial entre a Unión Europea e Mercosur, que “a nosa posición é contundente: ningún acordo pode entrar en vigor sen garantías reais para o campo, sen cláusulas automáticas, sen controis reforzados en fronteira e sen revisar as cargas que soportan os produtores europeos”. “Trátase de dicir: primeiro o rural, logo o mercado”, incidiu.

Miguel Ángel Viso reiterou que “a Xunta solicitará ao Goberno central e á Comisión Europea que non activen de xeito provisional o acordo UE-Mercosur mentres non queden blindadas as garantías para agricultores e gandeiros do regulamento de salvagardas”.

Neste sentido, salientou que o PP logrou no día de hoxe no Parlamento Europeo a aprobación dun mecanismo de salvagardas reais e efectivas para protexer aos agricultores no acordo UE-Mercosur, reducindo os limiares de activación ao 5 por cento e permitindo unha intervención rápida en só 21 días. Así mesmo, logrou que a Comisión Europea impulse un grupo de traballo específico para endurecer o seguimento e control das importacións agroalimentarias.

ESTAR CO SECTOR

“Estar co sector é mobilizar recursos, acompañar, pagar axudas, reforzar servizos, apoiar investimentos, defender mercados e sentarse coas organizacións agrarias cando hai problemas, e a Xunta leva anos demostrando con feitos ese compromiso”, asegurou o portavoz popular.

Porén, lamentou que o BNG “presume de ser o partido do rural pese a que non protexeron aos gandeiros contra o lobo, votaron contra flexibilizar a PAC e impulsan un ecoloxismo radical”. “Iso non é defender o rural: é castigar a quen produce e poñer en risco a miles de familias, facendo política de escaparate con moita palabra en Galicia e pouca presión onde realmente importa e se decide”, dixo.

Viso acusou aos nacionalistas galegos de “abrir a porta no Parlamento Europeo a unha aplicación provisional do acordo UE-Mercosur sen negociación”. Así, anotou que “algúns preferiron aliñarse cos extremos antes que garantir seguridade xurídica e protección efectiva, mentres o sector galego queda atrapado nun relato que crea ansiedade pero no crea garantías”.

O deputado do Grupo Popular Ángel Rodríguez afirmou hoxe no Pleno do Parlamento galego que a Xunta procederá nos primeiros meses deste ano á actualización do Plan de prevención e defensa contra os incendios forestais de Galicia (Pladiga). Porén, asegurou que este plan “non perde a súa operatividade en ningún momento, porque o único que se fai é actualizalo naqueles aspectos que sofren variacións de ano en ano”.

Ángel Rodríguez considerou “materialmente imposible” que, como piden os socialistas galegos, os plans anuais de incendios forestais sexan aprobados e publicados antes do 31 de outubro do ano precedente ao da súa aplicación, porque debe incluír necesariamente a estatística completa de incendios do ano en curso, que non se atopa pechada antes do 31 de outubro; e porque debe incorporar o orzamento do exercicio seguinte, cando os presupostos xerais de Galicia nunca están aprobados nesa data o que fai imposible incluír os créditos definitivos.

“Por este motivo, antes do 31 de outubro só podería elaborarse un documento incompleto e carente de seguridade xurídica, incompatible co esixido na normativa básica”, concretou o deputado popular.