Categoría: Parlamento de Galicia

O Pleno do Parlamento de Galicia aprobou hoxe a proposición non de lei do Grupo Popular a través da que se esixe a dimisión ou cese da ministra de Igualdade, Ana Redondo, pola neglixencia na xestión das pulseiras Cometa para a protección de vítimas de violencia de xénero, os recortes orzamentarios aplicados e a ocultación destes fallos durante meses. Así mesmo, pídese que se informe ao Goberno galego de cantos casos de desprotección de vítimas de violencia de xénero tiveron lugar durante o fallo neste sistema de protección, cantas mulleres portaban dispositivos telemáticos de control durante os últimos doce meses, as incidencias ocorridas nos devanditos dispositivos e as medidas adoptadas para emendar estas deficiencias e garantir a seguridade das vítimas.

A proposición non de lei tamén solicita ao Consello Xeral do Poder Xudicial un informe que acredite que este fallo xa foi solucionado e que o sistema actual non supón un risco para seguridade das mulleres, ao tempo que reclama ao Goberno de Pedro Sánchez dotación económica, técnica e humana suficiente para garantir a plena implantación, mantemento e correcto funcionamento do sistema de pulseiras Cometa no conxunto de España.

FALLOS COÑECIDOS, IGNORADOS, OCULTADOS E MINIMIZADOS

A viceportavoz do Grupo Popular, Paula Prado, subliñou que “estas pulseiras non son só un dispositivo electrónico, senón tamén unha ferramenta que, para moitas mulleres, separa a vida da morte”, polo que criticou que estes fallos “foron coñecidos, ignorados, ocultados e minimizados polo mesmo organismo encargado de velar porque nunca se tivera producido: o Ministerio de Igualdade”, indicou.

“Aquí o único que mentiu foi o Goberno de Pedro Sánchez, que o sabía pero preferiu mirar cara outro lado e non facer nada, amparado polo BNG que pide o cese da conselleira de Política Social en Galicia e non da ministra de Igualdade por este escándalo, demostrando que para eles existen persoas con dereitos de primeira e de segunda”, manifestou.

Paula Prado lamentou que “o Goberno que presumía de ser o máis feminista, converteuse en realidade no Goberno máis lesivo para os dereitos das mulleres da historia de España”. Neste sentido, lembrou que “deixou esmorecer o Pacto de Estado contra a Violencia de Xénero, aprobado e orzamentado polo Goberno de Mariano Rajoy en 2017, quedando sen implantar medidas como a supresión no Código Penal dos atenuantes de confesión e de reparación do dano en casos de violencia de xénero; a introdución na Lei de Axuizamento Criminal de criterios de risco que impidan que poidan diminuír as ordes de protección; ou a eliminación das esixencias de fianza para que as asociacións poidan personarse nos procedementos de violencia de xénero”.

“Non satisfeitos con iso, en 2022 cometeron a maior infamia de todas: a aprobación da nefasta Lei do só si é si; ao que se sumou o ano seguinte a Lei trans, que vai tan en contra das mulleres que ata cuestiona o propio concepto de ‘muller’”, dixo a viceportavoz popular. Ademais, criticou a “particular cruzada do sanchismo contra as mulleres que queren ser nais e contra as familias, fomentando a discriminación laboral das mulleres embarazadas, ao eliminar a bonificación pola súa substitución e negarse a aplicar deducións fiscais para a contratación; ou poñendo trabas á conciliación, primeiro coa Lei de paridade, que permitiu ás empresas despedir aos empregados que soliciten permisos de conciliación familiar, ou co recorte de financiamento do Plan Corresponsables”. “E todo isto ao tempo que recortaban tamén en seguridade, con máis de 1.000 efectivos menos de policías nacionais e gardas civís e cunha ratio de un axente por cada 206 vítimas de violencia de xénero en Galicia”, rematou.

O Pleno do Parlamento galego aprobou hoxe a proposición non de lei do Grupo Popular, co voto en contra de BNG e PSdeG, a través da que se apoia cantas iniciativas impulse a Xunta de Galicia, incluída a vía xudicial, en defensa do seu autogoberno, que pode verse violentado na súa capacidade de impulso lexislativo polos recursos de inconstitucionalidade que, con carácter político partidista, promove o Goberno de Pedro Sánchez, contra determinados preceptos da Lei 5/2024, do 27 de decembro, de medidas fiscais e administrativas que regulan o plan de axilización da dependencia e da discapacidade e a repotenciación dos parques eólicos.

O portavoz popular, Alberto Pazos, lembrou que “un Goberno de Pedro Sánchez profundamente antigalego leva anos atacando de maneira constante e planificada o autogoberno de Galicia, obrigándonos a pelexar nos tribunais o que a outros se lles concede graciosamente”. “España asiste á consolidación dun Estado de dúas velocidades, no que as esixencias dos socios do sanchismo circulan por vías de alta capacidade mentres as dos territorios menos compracentes discorren por tortuosas corredoiras pragadas de socavóns”, indicou.

VENDETA

“Galicia está sendo sacrificada nos altares do progresismo por un Goberno incapaz de aceptar democraticamente que os galegos non comulgan con rodas de muíño, pero non podemos asumir que a resposta ao castigo sufrido nas urnas galegas sexa unha lamentable vendeta”, lamentou.

Alberto Pazos explicou que “o último episodio deste novo intento de doma e castración de Galicia e o recurso de inconstitucionalidade aprobado polo Goberno central contra dúas medidas enfocadas a beneficiar de maneira clara e directa aos homes e mulleres de Galicia: que se simplifique e acelere a tramitación do recoñecemento da discapacidade e da dependencia; e que se obrigue ás empresas eólicas a compensar a concellos e veciños afectados por procesos de repotenciación de parques, ao tempo que se reduce o seu impacto visual e ambiental”.

En concreto, apuntou que “o Goberno de Pedro Sánchez considera inconstitucional a homologación automática do recoñecemento da discapacidade a persoas con dependencia, unha medida da que xa se beneficiaron máis de 10.200 galegos no que vai de ano, e o máis sorprendente é que ao mesmo tempo copia esta medida, incorporándoa á Lei de Dependencia pero limitando o seu alcance: mentres en Galicia se concede aos dependentes de grao 3 ata o 100 por cento de discapacidade, o Goberno de España tan só chega ao 65 por cento”.

582 AEROXERADORES MENOS

“O Goberno de España tamén está en contra dos beneficios de carácter ambiental, da creación de emprego a nivel local, da participación de investidores locais, do impulso á investigación ou da redución de custos enerxéticos para consumidores locais que a lei galega asocia á repotenciación dos parques eólicos”, sinalou o portavoz popular, quen concretou que o obxectivo é reducir de 733 a 151 aeroxeradores, aumentar un 34,5 por cento a produción de enerxía e redución o ámbito territorial afectado, segundo se recolle no informe elaborado pola Universidade de Vigo.

Para rematar, Alberto Pazos lamentou que BNG e PSdeG se posicionaran “en contra dos que implementan un plan de choque da dependencia, e a favor de quen o paraliza; e en contra dos que impulsan medidas que incomodan ás grandes empresas enerxéticas, pero a favor dos que paralizan esas medidas”. “Nós imos seguir impulsando as medidas necesarias para defender a Galicia deste novo atropelo dun Goberno que xa non pode ofrecer á Comunidade galega máis que desigualdade, discriminación e unha profunda carraxe”, dixo.

O portavoz do Medio Rural do Grupo Popular, Miguel Ángel Viso, afirmou hoxe no Pleno do Parlamento galego que “mentres algúns seguen instalados no ruído e na crítica fácil utilizando a vaga de incendios forestais deste verán, o Goberno galego sigue facendo o que hai que facer: axudar, reconstruír e mirar cara adiante”. “Os incendios non se apagan con discursos nin con pancartas, apáganse co esforzo de bombeiros, técnicos, gardas forestais e voluntarios que deixaron todo no terreo, así como co compromiso dun Goberno que non mira para outro lado, que responde, que acompaña e que cumpre”, indicou.

“Hai quen ve un lume no monte e pensa en como apagalo, pero tamén hai quen ve ese lume e pensa en como avivalo e aproveitarse del”, manifestou Miguel Ángel Viso, quen sinalou que “a diferenza é clara: uns usan a traxedia para sacar proveito e outros traballamos con humildade para devolverlle a esperanza á xente”.

TRABALLO, PLANIFICACIÓN E RESPONSABILIDADE

Na súa intervención, lembrou que “Galicia conta cun dispositivo de máis de 7.000 efectivos, que conseguiron que o 98 por cento dos incendios se controlaran nas primeiras 24 horas” e subliñou que “a Xunta xa puxo en marcha ata oito liñas de axuda para explotacións agrícolas, gandeiras e forestais, para maquinaria, vivendas, empresas, alimentación de gando, colmeas e restauración ambiental”.

Viso destacou que “o esforzo orzamentario global da Xunta en materia de prevención e defensa contra os incendios supera os 180 millóns de euros anuais, chegando aos 200 millóns se incluímos as actuacións forestais complementarias”. “O lume non se combate con titulares, senón con traballo, planificación e responsabilidade, e iso é o que fai a Xunta: traballar mentres outros debaten, actuar mentres outros sinalan e reconstruír mentres outros acusan”.

O deputado do Grupo Popular Argimiro Marnotes destacou hoxe no Pleno do Parlamento galego que o Goberno galego creará un fondo adicional nos orzamentos da Xunta para 2026 dotado con 59 millóns de euros destinado a blindar o financiamento da futura Lei de Administración Local, que se prevé aprobar o vindeiro ano”.

Argimiro Marnotes lembrou que a xunta “leva tempo traballando con rigor, con participación e con diálogo para elaborar o texto da nova Lei de Administración Local de Galicia, unha reforma complexa, profunda e moi traballada que require tempo e consenso, e que xa se atopa en fase avanzada de preparación”.

“Esta nova lei non é, nin será, unha simple actualización técnica, porque o seu obxectivo é ofrecer solucións do século XXI aos problemas reais dos concellos”, dixo o deputado popular.

DESPOBOACIÓN E COOPERACIÓN

En concreto, indicou que “non é o mesmo lexislar para grandes cidades que para concellos de mil veciños, dispersos en vinte parroquias nun territorio demograficamente envellecido e cunha enorme dispersión poboacional, porque iso encarece a prestación dos servizos, dificulta a xestión e obriga a unha visión moito máis flexible e solidaria do que significa a autonomía local”.

“A futura lei incorporará esta realidade, definindo os municipios en risco de despoboamento e recollendo medidas para reforzar a súa capacidade de prestación de servizos”, avanzou o deputado popular, quen tamén indicou que a nova norma “reforzará as fórmulas de cooperación e colaboración entre concellos, porque non se trata de recentralizar nin de crear estruturas artificiais, senón de favorecer a cooperación voluntaria”.

A portavoz de Sanidade do Grupo Popular, Encarna Amigo, salientou hoxe no Pleno do Parlamento de Galicia que “o Servizo Galego de Saúde foi quen de garantir este verán, unha vez máis, a atención sanitaria en todo o territorio galego, e iso a pesar da escaseza de profesionais que nos impide poder cubrir as vacantes e pese ao incremento da demanda, tanto nos servizos de atención primaria como na atención hospitalaria”.

Encarna Amigo demandou “valentía” aos grupos da oposición para “recoñecer que os centros de saúde galegos atenderon nos meses de xuño, xullo e agosto case 30.000 consultas máis que o pasado ano no mesmo período de tempo, ao tempo que se atenderon un 26,2 por cento máis de consultas polos equipos de enfermería a domicilio”.

“Non son capaces de valorar o esforzo realizado polos profesionais sanitarios dunha atención primaria que este verán contou cun plan de 12 millóns de euros e mobilizou a máis de 260 profesionais, a pesar de que Galicia tamén sofre a escaseza de facultativos, un problema común a nivel nacional”, sinalou.

A portavoz popular subliñou que “o Goberno galego fixo todo aquilo que esta dentro do seu ámbito competencial para impulsar a incorporación de profesionais sanitarios ao noso sistema”. Neste sentido, lembrou que “fomos pioneiros coa aprobación dunha lei de medidas extraordinarias para impulsar a cobertura de prazas de difícil cobertura, aprobada co voto en contra de BNG e PSdeG, que se traduciu na contratación de decenas de profesionais que non estarían dispoñibles co sistema anterior”.

“Os galegos saben que a Xunta non vai deixar de demandar solucións ante o Goberno central e de actuar no eido das súas competencias, con medidas que garantan unha atención continuada e de calidade a toda a poboación, aínda que supoña loitar contra un sistema con déficit de profesionais porque á esquerda lles interesa tensionar os sistemas de saúde das comunidades autónomas”, rematou.

O portavoz de Lingua do Grupo Popular, José Luís Ferro, cualificou como “seria, realista e eficaz” a política lingüística do Goberno galego e do PPdeG. “Mentres o BNG pretende levantar muros, nós traballamos na unidade, unidade das dúas linguas oficiais, que son patrimonio de todos os galegos”, concretou.

José Luís Ferro lembrou que o decreto 79/2010 “naceu para garantir un equilibrio real no uso do galego e do castelán no ensino, cumprindo coa Lei de normalización lingüística e co Estatuto de Autonomía”, porque “a verdadeira normalización non pode nacer da improvisación, senón do respecto, da convivencia e do consenso”. Así, lamentou que os nacionalistas galegos rexeitaran participar nas comisións de traballo para renova o Plan xeral de normalización, “uns traballos que avanzan co compromiso do Goberno galego de ter unha proposta de documento canto antes”.

DECRETO EN PLENA VIXENCIA

“Este decreto que o BNG pide derrogar foi avalado polos tribunais, está en plena vixencia e é a mellor ferramenta para garantir o equilibrio e o respecto á legalidade”, manifestou o portavoz popular, quen apuntou que “onde os nacionalistas falan de fracaso os datos din outra cousa: a maioría dos galegos e galegas son competentes nas dúas linguas oficiais; o galego mantén unha forte presenza no ensino, na cultura e nos medios públicos; e cada vez máis xente nova accede a contidos en galego, tamén no ámbito dixital e nas redes sociais”.

Deste xeito, asegurou que “o verdadeiro reto non é cambiar leis ou decretos cada vez que o BNG presenta unha moción, senón consolidar ese uso real do galego en todos os espazos sociais, desde o respecto e a liberdade individual”.

José Luís Ferro afirmou que “imos seguir traballando no camiño que nos define: garantindo que o alumnado acabe os seus estudos sendo plenamente competente en galego e castelán; apostando polo plurilingüismo como ferramenta de futuro; impulsando programas que leven o galego á ciencia, á tecnoloxía, ao audiovisual e á creación dixital; e facendo do galego unha lingua útil, viva e querida polas novas xeracións”.

A portavoz de Política Social do Grupo Popular, Raquel Arias, afirmou hoxe no Pleno do Parlamento galego que a Xunta está negociando un novo incremento da súa aportación aos concellos para o servizo de axuda no fogar, pero insistiu en que “o Goberno de Pedro Sánchez pague os máis de 2.500 millóns de euros que debe a Galicia pola prestación dos servizos da dependencia, que poderían destinarse a máis horas de axuda a domicilio, construción ou dotación das residencias dos maiores e centros de día, ou a teleasistencia”.

Raquel Arias asegurou que “nacionalistas e socialistas galegos son culpables de que todos os dependentes e as persoas con discapacidade en Galicia non teñan os servizos e prestacións que por lei lles corresponde, xa que o Goberno central estalle a negar á Comunidade galega o 50 por cento que lle corresponde pola prestación da dependencia”. “Díganlles a eses maiores galegos que Pedro Sánchez lle vai pagar ao Goberno vasco a metade dos custos da lei da dependencia, mentres a Galicia só lle abona o 35 por cento, e baixando ano tras ano”, pediu aos deputados de BNG e PSdeG.

Así mesmo, a portavoz popular criticou o recente recurso de inconstitucionalidade presentado polo Goberno central contra o plan de choque da valoración da dependencia e a discapacidade posto en marcha pola Xunta este ano, “unha decisión que vai prexudicar a 9.000 persoas con discapacidade galegas co aplauso dos socialistas galegos e o apoio implícito do BNG”.

Na súa intervención, Arias destacou que Galicia é a segunda comunidade na que máis se reduciu a lista de agarda da dependencia no último semestre, exactamente un 38 por cento respecto ao mesmo período de 2024; e, “segundo o puxo de manifesto o propio Goberno central, Galicia é a segunda comunidade na que máis subiu o número de beneficiarios, chegando aos 88.000 dependentes atendidos e unha ratio de atención dos xa valorados do 98 por cento”.

Para rematar, a portavoz popular puxo en valor o protocolo para reforzar a seguridade e a saúde laboral das traballadoras do servizo de axuda no fogar, aprobado onte polo Goberno galego, “un documento elaborado polo Instituto de Seguridade e Saúde Laboral de Galicia a petición da mesa de traballo impulsada pola Fegamp”.

Este protocolo ten en conta o perfil feminizado da actividade e a realidade específica do traballo nos pequenos concellos do rural, actuando sobre tres eixes clave: identificar e xestionar os riscos nos domicilios, optimizar a organización no traballo e reforzar a formación das profesionais.

A portavoz de Sanidade do Grupo Popular, Encarna Amigo, asegurou hoxe que coa nova Lei de protección da saúde das persoas menores e prevención das condutas aditivas, que hoxe superou o debate de totalidade e continuará a súa tramitación parlamentaria, “Galicia da un paso adiante para situarse á vangarda das políticas de saúde pública, con medidas baseadas na evidencia científica e na experiencia acumulada dos profesionais e as entidades sociais”.

Encarna Amigo lembrou que “a metade dos adolescentes de 14 a 18 anos consumiron bebidas enerxéticas no último mes, e un número crecente mestúraas con alcohol; ao tempo que o consumo de vapeadores e cigarros electrónicos medra a un ritmo alarmante”. “Diante desta situación, non podemos mirar para outro lado e temos a obriga, legal e moral, de protexer ás xeracións máis novas fronte a riscos que poden comprometer o seu desenvolvemento físico, emocional e social”, indicou.

“Esta lei nace, precisamente, para previr antes de curar, para educar antes de sancionar e para acompañar antes de estigmatizar”, manifestou a portavoz popular, quen fixou tres principios básicos desta norma: a prevención e promoción da saúde; a protección dos dereitos da infancia e da adolescencia; e a corresponsabilidade social, “porque esta loita non é só das administracións, senón tamén das familias, dos centros educativos, dos concellos e da sociedade no seu conxunto”.

MEDIDAS CONCRETAS

Entre as medidas incorporadas nesta nova lei, Encarna Amigo destacou a prohibición e venda de vapeadores e bebidas enerxéticas a menores; a regulación da publicidade e promoción destes produtos; a prevención das adicións dixitais, incluíndo actuacións sobre o uso abusivo das redes sociais, dos videoxogos e das novas tecnoloxías; o reforzo da educación para a saúde nos centros escolares e no ámbito familiar; a detección temperá e atención integral ás condutas de risco desde o sistema sanitario público; ou a coordinación institucional entre as administracións públicas, o tecido asociativo e as entidades sociais cunha traxectoria recoñecida na prevención das adicións.

“Estamos a falar dunha lei moderna, integral e pioneira, coa que Galicia será unha das primeiras comunidades en contar cun marco normativo que aborda conxuntamente o consumo de substancias e as adicións sen substancia, incluíndo o uso das tecnoloxías dixitais”, sinalou a portavoz popular, quen anotou que “non estamos a falar de limitar dereitos, senón de garantir o dereito fundamental á saúde dos menores, que sempre debe prevalecer sobre intereses comerciais ou de consumo”.

O portavoz de Medio Ambiente, Gonzalo Trenor, asegurou hoxe no Pleno do Parlamento galego que a futura Lei do Clima de Galicia, que hoxe pasou o seu trámite de debate de totalidade, “suporá un avance moi importante para acadar que a Comunidade galega sexa unha rexión neutra en emisións, mellorando os rexistros que xa presenta na actualidade e que a sitúan como líder en redución de emisións netas de CO2 desde 1990”.

Gonzalo Trenor salientou que “Galicia está a reducir as emisións netas de CO2 a un ritmo cinco veces superior ao conxunto de España, superando xa o obxectivo do 55 por cento establecido pola Unión Europea para 2030”. “Con esta norma, Galicia será a primeira comunidade autónoma en establecer por lei o adianto en dez anos do obxectivo de neutralidade climática, fixado pola Unión Europea en 2050”, concretou.

En concreto, o portavoz popular manifestou que a nova lei “nace para contribuír a mitigar as causas do cambio climático, limitando as emisións de gases de efecto invernadoiro a través do impulso das enerxías renovables ou a eficiencia enerxética”.