Categoría: Parlamento de Galicia

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España que no Real-Decreto para o fomento dunha alimentación saudable e sostible en centros educativos fixe como recomendable un consumo mínimo tres racións de peixe por semana; elimine o punto no que se insta a evitar o consumo de produtos do mar polo seu alto contido de mercurio; corrixa o texto no xeito de que se segue a incluír o peixe “dentro da proteína animal”, sen diferencialo da carne, cando é nutricionalmente máis completo e saudable; e elimine as referencias ás tendencias dietéticas, como o vexetarianismo, para desenvolver as recomendacións, algo que pode sentar un precedente e facer que a norma perda o seu carácter neutral.

O deputado popular Raúl Santamaría salientou que “Galicia é unha terra ligada ao mar, cun sector pesqueiro que xera emprego para milleiros de familias e que proporciona produtos de altísima calidade, recoñecidos tanto a nivel nacional como internacional”. Porén, lamentou que “o Goberno central ignora esta realidade e avanza cun proxecto de Real-Decreto que podería poñer en risco a industria pesqueira galega e, o que é máis grave, a saúde dos máis novos”.

CONTRADÍ AS RECOMENDACIÓN DA AESAN E DA OMS

En concreto, Raúl Santamaría afirmou que “a proposta do Goberno de Pedro Sánchez contradí as recomendacións tanto da Axencia Española de Seguridade Alimentaria e Nutrición como da propia Organización Mundial da Saúde, limitando o consumo de peixe nos menús escolares a entre una e tres racións semanais”.

“Non podemos permitir que o goberno central siga ignorando ao sector pesqueiro e, ao mesmo tempo, tome medidas que prexudiquen a súa actividade”, indicou o deputado popular, quen apuntou que “a limitación do peixe nos menús escolares non só é contraproducente desde o punto de vista da saúde pública, senón que tamén prexudica á promoción e ao consumo de produtos do mar, que levan sufrindo unha caída sostida”.

Segundo os datos da Confederación Española de Pesca, o consumo de peixe en España caeu un 30 por cento nos últimos dez anos e en 2023 as familias españolas reduciron as súas compras de produtos pesqueiros un 2,2 por cento, alcanzando o nivel máis baixo en volume desde que existen rexistros.

Raúl Santamaría salientou que “en Galicia levamos máis dunha década traballando no fomento do consumo de produtos do mar, con campañas de promoción e programas educativos, divulgativos e promocionais para concienciar aos consumidores sobre a importancia de incluír o peixe na súa dieta”.

O Parlamento de Galicia aprobou hoxe a proposición non de lei do Grupo Popular, que non contou co voto favorable dos deputados do PSdeG, a través da que se solicita ao Goberno Central que estableza as medidas necesarias para que se poida activar un mecanismo de segundo rexistro na frota pesqueira de bandeira española que opera fora das augas do caladoiro nacional, co obxectivo de frear a perda de unidades, reter tripulantes e mellorar a súa competitividade a través dunha fiscalidade máis beneficiosa, afianzando as expectativas de futuro do sector pesqueiro español e a soberanía alimentaria que representa.

O portavoz popular do Mar, Miguel Fidalgo, lembrou que o Goberno de España publicaba en decembro de 2013 a orde pola que se creaba o rexistro especial de empresas de buques de pesca españois (Resae), unha norma que non tivo o seu desenvolvemento ata o 2015. Neste rexistro poden darse de alta aquelas embarcacións que enarboren pavillón español, estean anotadas no rexistro da frota pesqueira comunitaria, faenen en augas extracomunitarias e capturen exclusivamente túnidos ou especies afíns.

PAQUETE COMPLETO PENDENTE

Porén, Fidalgo lamentou que “neste rexistro só teñen cabida atuneiros e palangreiros de superficie, deixando fóra boa parte da frota de altura e gran altura e á de litoral”. Ademais, aprobouse a modificación do imposto sobre a renda, “pero o paquete completo, que pasaría por descontos no imposto de sociedades, nos pagos á Seguridade Social e no IRPF para a tripulación, quedou pendente a expensas de que a Unión Europea dese o visto e prace a eses incentivos, dado que podían entenderse como axudas estatais”.

“A creación dun rexistro especial para a frota de altura suporía un revulsivo para a frota galega e para a do resto de España que sofre as mesmas penurias, en especial a do sector do palangre de superficie”, indicou o portavoz popular. En concreto, apuntou que este novo rexistro permitiría reter tripulantes e atraer novos traballadores, gracias a melloras nas condicións fiscais e sociais; aumentar a competitividade da frota pesqueira galega nos mercados internacionais; e frear a perda de embarcacións, afianzando a soberanía alimentaria de España e garantindo a subministración de peixe para a poboación.

O Grupo Popular centrará as súas demandas no Pleno do Parlamento de Galicia da vindeira semana na transferencia e a gratuidade das peaxes da AP-9, unha sesión na que se procederá á aprobación da nova lei para o desenvolvemento e impulso da intelixencia artificial. Así mesmo, o Pleno inclúe a comparecencia dos conselleiros de Presidencia, Xustiza e Deportes, para dar conta das liñas xerais do seu departamento, e de Economía e Industria, para informar sobre a situación dos proxectos industriais estratéxicos de Galicia.

Ao remate da Xunta de Portavoces, o portavoz popular, Alberto Pazos, explicou que, coa nova Lei de para o desenvolvemento e impulso da intelixencia artificial, Galicia se converte na primeira rexión europea en regular por lei o deseño, adquisición e uso da intelixencia artificial, primeiro na administración e, máis tarde, en toda a sociedade galega.

O obxectivo desta norma, que chega ao seu debate de aprobación definitivo sen votos en contra por parte da oposición, é garantir un desenvolvemento e utilización da intelixencia artificial ética, segura, fiable e centrada nas persoas. “Galicia pode e debe asumir o papel de liderado que lle corresponde na conformación dunha rexión intelixente a través da ordenación e xestión dunha das tecnoloxías que está chamada a marcar o futuro da humanidade”, indicou Alberto Pazos.

PROXECTOS ESTRATÉXICOS

A sesión plenaria inclúe as comparecencias do conselleiro de Presidencia, Xustiza e Deportes comparecerá, por petición propia, para informar sobre as liñas xerais do seu departamento; e da conselleira de Economía e Industria, tamén por petición propia, para dar conta da situación dos proxectos industriais estratéxicos en Galicia, “nunhas datas nas que o protagonismo o está acaparando a aprobación da Declaración de Impacto Ambiental do proxecto de ALTRI en Palas de Rei, pero que na que quedará de manifesto que a estratexia industrial do Goberno galego expándese por outros ámbitos, como a automoción, o sector eólico, o naval, os parques empresariais ou a industria forestal”, explicou o portavoz popular.

O Grupo Popular vai centrar a súa atención neste Pleno “na indignante situación na que se atopa a transferencia e a gratuidade da autoestrada AP-9, logo das afirmacións realizadas no Congreso pola secretaria xeral de Transporte Terrestre do Ministerio de Fomento, asegurando que o rescate da concesión da AP-9 ‘non é viable polo altísimo volume de gastos que conlevaría, inasubmibles agora mesmo polo Estado’”.

CLARIDADE SOBRE A AP-9

“Xa está ben de que os socialistas, tanto desde o Goberno de España como dos seus secuaces en Galicia, estean a tomar o pelo a todos os galegos cos seus constantes atrancos á transferencia e promesas incumpridas sobre esta autovía, porque só hai que lembrar que levamos 38 aprazamentos por parte da Mesa do Congreso á tramitación da proposición de lei remitida por este Parlamento solicitando á transferencia da AP-9”, sinalou Alberto Pazos, quen lembrou “a promesa, lanzada a bombo e prato durante a campaña electoral galega polo candidato socialista, dunha AP-9 libre de peaxes, cuestión que se atreveu a reiterar hai pouco máis dunha semana no Congreso que o reelixiu como secretario xeral dos socialistas galegos, diante do mesmo Pedro Sánchez, que deu a calada por resposta”.

Diante desta situación, Alberto Pazos afirmou que “queremos que os grupos políticos deste Parlamento volvan poñer de manifesto a súa postura sobre a AP-9, e para iso imos someter a votación a solicitude ao Goberno de Pedro Sánchez para que culmine o proceso de transferencia da titularidade e competencias sobre esta autoestrada; a demanda da gratuidade inmediata das peaxes, tanto na AP-9 como na AP-53; e a petición para que o Goberno de España informe sobre as actuacións que está a levar a cabo diante dos requirimentos formulados pola Comisión Europea respecto das prórrogas do contrato de concesión da AP-9, atendendo a demanda da Xunta para celebrar unha xuntanza co ministro de Transportes co obxecto de abordar todas estas cuestións de xeito persoal e directo”.

Dentro do apartado de preguntas ao Goberno galego, o Grupo Popular centrará a súa atención no ámbito da vivenda, pedindo que se informe sobre a falta de diálogo do Goberno de España coas comunidades autónomas á hora de poñer en marcha os avais á compra de vivenda, que se terán que xestionar, precisamente, polas propias comunidades autónomas; e cuestionando sobre as medidas que está a poñer en marcha a Xunta para axudar á mocidade no seu acceso á vivenda, como o recentemente aprobado Bono Alugueiro.

Por último, a terceira das preguntas do Grupo Popular ten como obxectivo coñecer o balance da implantación pola Xunta dos Plans Locais de Saúde, logo de que recentemente se asinaran 24 novos plans locais, chegando aos 92 centros de saúde en toda Galicia.

Os deputados do Grupo Popular Miguel Viso e Víctor Manuel Baladrón salientaron hoxe que 320 mozos menores de 40 anos, 133 novos agricultores e 370 explotacións galegas beneficiáronse o pasado ano das axudas da Xunta para a modernización do sector gandeiro e a incorporación de novos profesionais ao sector.

Miguel Viso e Víctor Baladrón visitaron a explotación gandeira familiar Gandainas no concello ourensán de Riós, que se beneficiou dunha axuda da Xunta para a construción dun novo almacén, infraestrutura fundamental para optimizar a xestión de recursos e garantir o almacenamento de forraxe, ademais de acceder a un plan de mellora destinado ao peche perimetral da explotación, mellorando así a seguridade e o benestar animal.

GANDERÍA SOSTIBLE E RENDIBLE

Miguel Ángel Viso resaltou que “a modernización das explotacións gandeiras é clave para manter un sector competitivo e preparado para afrontar os retos do futuro”. Deste xeito, lembrou que desde a Xunta “apostamos por un modelo de gandería sostible e rendible, facilitando aos profesionais as ferramentas necesarias para mellorar as súas instalacións e procesos produtivos”. Ademais, destacou que “estes investimentos favorecen a profesionalización e a incorporación de novos profesionais ao agro galego”.

Pola súa banda, Víctor Manuel Baladrón sinalou que “estas axudas non só melloran as condicións laborais no sector agrogandeiro, senón que tamén axudan a fixar poboación no rural, dinamizando economicamente as nosas vilas e aldeas e garantindo que o rural galego sexa un espazo de oportunidades”. “Contar con instalacións modernas e ben acondicionadas é esencial para que os profesionais do sector poidan desenvolver o seu traballo con maior eficiencia e comodidade”, apuntou.

Finalmente, ambos os deputados “felicitaron aos responsables da explotación visitada polo seu esforzo e compromiso cun modelo produtivo que combina tradición e modernidade, contribuíndo a facer do rural galego un lugar atractivo para vivir e traballar”.

As deputadas do Grupo Popular Carmen Pomar e Cecilia Vázquez anunciaron hoxe a presentación dunha iniciativa no Parlamento de Galicia solicitando ao Goberno central o arranxo urxente da estrada N-550 entre A Coruña e Santiago, “un exemplo evidente dunha vía extremadamente perigosa, tanto para os condutores como para os peóns, polo pésimo estado do firme, a sinalización e a iluminación”.

Carmen Pomar e Cecilia Vázquez percorreron diversos tramos desta estrada nacional acompañadas dos alcaldes de Ordes, José Luís Martínez, e de Oroso, Álex Doval, para comprobar “as condicións deplorables nas que se atopa, cun asfalto moi deteriorado que precisa dunha intervención integral urxente, tanto para a seguridade como para a comodidade dos usuarios”.

DESPREZO DO GOBERNO CENTRAL

Así mesmo, as deputadas populares comprobaron como “a sinalización e a iluminación desta estrada, tanto horizontal como vertical, é deficiente en moitos puntos, o que incrementa a sensación de inseguridade para os condutores e incluso para os peóns que cruzan esta estrada nas numerosas poboacións polas que pasa”.

“Os galegos xa sufrimos o desprezo e o castigo do Goberno de Pedro Sánchez co aprazamento sine die da transferencia da AP-9 a Galicia e as maiores peaxes de España nesta autoestrada, pero non podemos consentir que tamén teñamos que sufrir a penitencia dunha N-550 que se atopa nunhas condicións deplorables, poñendo en serio risco aos que circulamos habitualmente por esta estrada e tamén aos veciños que viven nos seus arredores”, sinalaron.

O presidente do Parlamento de Galicia, Miguel Santalices, participou nas xornadas ‘Máis España, máis Europa. A preservación dos valores democráticos no debate parlamentario’, un foro no que se abordaron os principais desafíos que afectan á democracia e ao parlamentarismo en España.

Durante a súa intervención, Santalices resaltou o compromiso dos presidentes autonómicos na defensa da dignidade da democracia e do parlamentarismo democrático, como base para fortalecer a confianza da cidadanía nas institucións. Apostou tamén por unha rexeneración política e institucional que garanta o respecto aos valores democráticos e fortaleza o debate parlamentario como instrumento esencial na vida política do país.
Estas xornadas serviron como espazo de reflexión e diálogo sobre o futuro da democracia en España e en Europa, poñendo de manifesto a necesidade de traballar en conxunto para preservar os principios fundamentais que sustentan as nosas institucións.

 

Un gran avance que se acadou esta semana logo de que o Senado aprobase as emendas dos populares á lei de desperdicio alimentario e nas que o partido incluíu esta reiterada reivindicación das comunidades lobeiras e do sector gandeiro.

Non obstante, lamentan desde o PPdeG, as emendas contaron co voto en contra tanto dos senadores galegos do PSOE como da representante do BNG, que “en Galicia din defender o medio rural, pero en Madrid fan todo o contrario”.

Agora, as emendas deberán ser ratificadas o próximo xoves no debate do proxecto de lei no Congreso dos Deputados e, no caso de que os partidos que as apoiaron no Senado manteñan a coherencia do seu voto na Cámara Baixa, isto suporá a saída inmediata e definitiva do lobo do Lespre.

O GOBERNO DE ESPAÑA NON ATENDEU O MANDATO DE EUROPA

Deste xeito, tal e como destaca o eurodeputado do PPdeG Adrián Vázquez, España situaríase na mesma liña que Europa no que se refire á defensa do equilibrio entre a conservación desta especie e a garantía de futuro do sector gandeiro.

Recorda neste sentido que Bruxelas “cambiou as regras de xogo” para avanzar no control cinexético do lobo “outorgando aos Estados membros liberdade para decidir como manexar as superpoboacións desta especie que tantos problemas está a causar aos nosos gandeiros”. Algo que nunca fixo o Goberno de España, que desde 2021 outorga ao lobo a categoría de especie especialmente protexida.

Trátase dun nivel de protección que, tal e como denuncia, está “frustrando o esforzo diario de quen sofre os seus ataques e ve minguados os seus gandos”, un extremo que se pode comprobar no caso de Galicia, que é unha das comunidades máis afectadas e onde o sector gandeiro leva anos pedindo solucións.

“Ninguén cuestiona que o lobo deba ser protexido, pero tampouco debería cuestionarse que é imprescindible garantir un control efectivo da súa poboación para frear os danos que está provocando”, explica incidindo en que, co novo marco europeo e cos avances lexislativos acadados polo Partido Popular, España ten agora a oportunidade de equilibrar a conservación do lobo e a supervivencia dun sector gandeiro “que xa non aguanta máis abandono”.

O Grupo Popular solicita ao Goberno central a elaboración dun informe que xustifique que o rescate da AP-9 non é viable, no que se recolla expresamente unha estimación do custo que suporía este rescate e o gasto que tería que afrontar o Goberno de España en bonificacións das peaxes ata o remate da concesión. “Sería todo un exercicio de transparencia que nos permitiría a todos xogar coas mesmas cartas e valorar con obxectividade a mellor opción a seguir respecto do futuro da AP-9”, sinalou o portavoz popular, Alberto Pazos.

A secretaria xeral de Transporte Terrestre do Ministerio de Fomento anunciou esta semana no Congreso que o rescate da concesión da AP-9 “non é viable polo altísimo volume de gastos que conlevaría, inasubmibles agora mesmo polo Estado”, “unha afirmación que tivo lugar dous días despois de que o reelixido secretario xeral dos socialistas galegos anunciara a bombo e prato en Santiago que ‘nós chegaremos á liberación das peaxes’”, lembrou Pazos. “Un anuncio que fixo diante do mismísimo Pedro Sánchez, quen non dixo nin mu na súa intervención a pesar de que era perfectamente consciente de que o que estaba vendendo o seu fiel soldado Besteiro era mentira e que para nada entraba nos plans do Goberno de España esa gratuidade”, engadiu.

“Descoñecemos os argumentos sobre os que se sustenta esta decisión do Goberno de España de non proceder ao rescate neste momento da concesión da AP-9, polo que desde o Grupo Popular imos solicitar a través dunha iniciativa neste Parlamento galego que o Goberno central elabore con urxencia un informe xustifique esta decisión”, indicou o portavoz popular.

BAILE CONSTANTE DE CIFRAS

Alberto Pazos sinalou que “xa estamos fartos do baile constante de cifras que se ofrecen por parte dos responsables do Ministerio para valorar o rescate, que un día cifran en 4.000 millóns e ao seguinte en 6.000 millóns, cando o que si coñecemos é que o Estado xa ten reservados 3.150 millóns de euros para o abono á empresa concesionaria polas bonificacións das peaxes ata o remate da concesión en 2048, unha cifra moi superior ao máximo de 2.331 millóns que suporía o rescate da AP-9, segundo o informe elaborado para a Xunta por unha consultora de prestixio especializada nestas cuestións”.

“Esiximos seriedade e que o Goberno central cumpra os compromisos anunciados aos galegos, liberando de peaxes a AP-9, como dixeron en plena campaña electoral, e procedendo á transferencia desta autoestrada a Galicia, como temos acordado neste Parlamento en numerosas ocasións”, demandou o portavoz popular. En concreto, dixo que “o primeiro paso sería levantar o bloqueo que a tramitación da proposición de lei aprobada por unanimidade neste Parlamento está a sufrir no Congreso pola decisión da Mesa e da súa Presidenta, que xa que leva 23 prorrogas nesta lexislatura ao prazo para a presentación de emendas a esta proposición”.

Alberto Pazos referiuse, tamén, á actividade desenvolvida esta semana no Parlamento de Galicia, protagonizada pola celebración da sesión plenaria. En concreto, subliñou que “o conselleiro de Facenda deixou ben claro as razóns polas que Galicia non pode aceptar a condonación da débeda que, para cumprir os desexos dos independentismo catalán, o Goberno de Pedro Sánchez pretende impoñer ás comunidades autónomas”.

GALICIA, A MÁIS PREXUDICADA

Así, explicou que “en primeiro lugar, rexeitamos que o Goberno central premie desta forma a comunidades autónomas que se destacaron por malgastar o diñeiro público e incumprir os compromisos de débeda e déficit impostos pola Unión Europea e o Goberno de España para os momentos de crise económica que sufrimos non hai moitos anos; pero tampouco podemos aceptar que os galegos sexan os máis prexudicados nesta condonación da débeda: 1.369 euros por galego fronte afronte a 1.892 euros de media española”.

“Un negocio ruinoso para Galicia, porque a cada galego, polo feito de ser galego, se lle reduce a débeda en 1.477 euros, pero, ao mesmo tempo, a ese mesmo galego, polo feito de ser español, a débeda se lle incrementa en case 1.700 euros, o que da como resultado que cada galego verá incrementada a súa débeda en case 220 euros”, manifestou.

Deste xeito, Alberto Pazos insistiu que “Galicia precisa realmente unha reforma do financiamento autonómico, que atenda realmente o custo da prestación dos servizos e recolla, expresamente, o agravante que supón o envellecemento da nosa poboación e a súa dispersión pola xeografía galega”.

A curto prazo, o portavoz popular reclamou que o Goberno de España “actualice as entregas a conta ás comunidades autónomas, porque este retraso xa supón a retención de case 1.600 millóns de euros a Galicia e 1,5 millóns de euros en xuros adicionais cada mes”.

Pazos considerou “lamentable o apoio incondicional tanto dos socialistas galegos como do BNG a este propósito de impoñer unha condonación da débeda ás comunidades autónomas, que miran máis polos seus intereses partidistas que polos de todos os galegos”.

A TEMPO DE RECTIFICAR

Para rematar, Alberto Pazos amosou “a decepción do Grupo Popular pola covardía amosada polo BNG e, principalmente, pola súa voceira, a señora Pontón, á hora de condenar a noxenta campaña machista levada a cabo pola CIG contra a conselleira de Política Social, un comportamento vergoñento que os levou a negarse a votar unha iniciativa no Pleno e de amosar a máis mínima mostra de apoio á conselleira de Medio Ambiente, polo ataque que sufriu a pasada fin de semana por detractores de Altri, entre os que figuraban representantes e simpatizantes do BNG da comarca de Melide”.

“Aínda están a tempo todas as deputadas do BNG de rectificar, algo que a bo seguro agradecerán as que realmente traballan pola igualdade real de homes e mulleres, e loitan contra este tipo de estereotipos machistas utilizados contra as mulleres”, rematou.

A Comisión 1ª do Parlamento de Galicia aprobou esta mañá, sen votos en contra, o ditame do proxecto de Lei para o desenvolvemento e impulso da intelixencia artificial en Galicia, co que este texto lexislativo queda pendente da súa aprobación definitiva en sesión plenaria.

O viceportavoz popular, Julio García Comesaña, salientou que “estamos a falar dunha norma pioneira, coa que Galicia abriu o camiño para que outras comunidades autónomas estean tomando exemplo e tramitando leis semellantes”.

En concreto, García Comesaña fixou tres obxectivos desta nova lei: mellorar a eficacia da Administración autonómica, dispoñer dunha intelixencia artificial segura que salvagarda os dereitos da cidadanía e consolidar a Galicia como unha rexión de referencia en Europa.

LEI GARANTISTA

“Preténdese impulsar e asegurar os beneficios que a intelixencia artificial vai ter tanto para o tecido produtivo como para a cidadanía, mellorando os servizos que presta aos cidadáns a Administración galega ao mesmo tempo que se respectan os dereitos de todos os galegos”, indicou.

Así mesmo, Julio García Comesaña afirmou que “estamos diante dunha lei garantista, coa que se asegura a supervisión humana daqueles procedementos que así o precisen e coa que todos os sistemas de intelixencia artificial formarán parte dun rexistro para o seu coñecemento por parte da cidadanía”.

O portavoz de Industria do Grupo Popular, Rubén Lorenzo, criticou hoxe “a incongruencia de BNG e PSdeG ao demandar hoxe no Pleno suspender a convocatoria das axudas do Fondo de Transición Xusta cando na sesión plenaria de hai 15 días pedían que se axilizase a concesión destas mesmas axudas”.

Rubén Lorenzo lamentou que “Galicia sofre as consecuencias de decisións precipitadas do Goberno de Pedro Sánchez no marco dunha transición inxusta que agora emendan”. En concreto, lembrou que España recibirá a través do Fondo de Transición Xusta 868 millóns de euros que recalará nos territorios de seis comunidades autónomas españolas, entre elas Galicia, afectados polo peche de minas de carbón e centrais térmicas de carbón.

CRITERIOS MARCADOS POR MADRID E EUROPA

“O programa do Fondo de Transición Xusta de España 2021-2027, deseñado polo Goberno de España e aprobado pola Comisión Europea, chega tarde, porque este retraso impediu que as axudas xa se puidesen activar ao longo do ano 2022; e chega mal, porque beneficia unicamente a concellos da provincia de A Coruña e exclúe os tres concellos da provincia de Lugo afectados polo peche de minas e centrais térmicas do carbón”, explicou o portavoz popular.

Deste xeito, apuntou que “as axudas artelladas pola Xunta, a través dos convenios de transición xusta, non poden facer outra cousa que non fose seguir os criterios marcados polo Goberno central e Europa, o que non supón que estes concellos se vexan favorecidos por outras axudas, a través do Inega ou do Igape, para paliar os efectos do peche das centrais térmicas”.