O PPdeG destaca que “Galicia é pioneira” en materia sanitaria a pesar do “alarmismo hipócrita” da oposición e a “parálise” do Goberno central

O Partido Popular de Galicia destaca que a nosa Comunidade “foi pioneira” á hora de tomar medidas para garantir unha asistencia sanitaria de calidade durante o verán a pesar da “parálise” do Goberno central e do “alarmismo hipócrita” dos partidos da oposición.

En declaracións aos medios nas inmediacións do centro de saúde de Fontiñas, en Santiago de Compostela, a secretaria xeral do partido, Paula Prado, puxo en valor “a sorte que temos de contar en Galicia cunha sanidade pública de calidade” e agradeceu aos profesionais sanitarios –especialmente aos máis de 48.000 que estiveron traballando durante os meses estivais– a súa contribución á “excelencia” do sistema.

Na súa opinión, son eles e elas “os que fan da nosa sanidade pública unha das mellores do mundo” e, precisamente con eles e elas, “a nosa sanidade seguirá funcionando pola mañá, pola tarde, pola noite, en verán e en inverno”.

“Fronte ás dificultades, Galicia foi pioneira e apostou por medidas arriscadas para reforzar o persoal, ao tempo que seguiu investindo en infraestruturas e tecnoloxía”, afirmou destacando o plan de 12,5 millóns de euros que o Goberno galego puxo en marcha para garantir a asistencia sanitaria de calidade e que a nosa sanidade contara en verán con 1.500 profesionais máis que o ano pasado.

Un reforzo que, tal e como explicou, “permitiu non só manter a actividade habitual no período estival, senón incrementala respecto doutros anos”. De feito, Galicia realizou 1.400 cirurxías programadas máis e o 061 atendeu 5.000 chamadas máis.

“Ante ao alarmismo do BNG e do PSOE, e aínda que lles pese, Galicia segue funcionando”, remarcou Prado criticando a unha oposición “líder da hipocrisía” que “só sabe alarmar e ao final acábase dando de fronte coa realidade”.

Unha oposición, ademais, á que reprochou que “sexan incapaces de apoiar calquera medida da Xunta, nin en Galicia nin en Madrid, pero despois son os primeiros que se poñen detrás dunha pancarta e saen á rúa a manifestarse”.

“Galicia ten que ser un modelo para o Goberno central, xa que van 6 ministros desde que chegou Sánchez e ningún foi quen de tomar as medidas necesarias dentro das súas competencias”, concluíu reclamando á ministra de Sanidade que “se poña a traballar na parte que lle toca”.

O PLAN DE COBERTURA DO VERÁN DEMOSTROU A SÚA EFECTIVIDADE

O centro de saúde de Fontiñas foi para os populares galegos “un bo exemplo de que todo funcionou con normalidade” este verán e de que o plan de cobertura do verán deseñado polo Goberno galego demostrou a súa efectividade. De feito, o centro contou este verán co apoio dun médico residente de cuarto curso que traballou como médico de familia.

Este apoio, xunto aos reforzos realizados polos profesionais do centro prolongando xornadas e facendo gardas, permitiu que nos meses de verán se mellorase a cobertura asistencial respecto a anos anteriores.

O PPdeG pedirá a Sánchez no Congreso e no Senado que elimine os impostos aos residuos que castigan a Galicia coa complicidade de BNG e PSdeG

Os representantes do PPdeG no Congreso dos Deputados e no Senado presentarán a próxima semana unha iniciativa nas Cortes Xerais para esixir a Pedro Sánchez a eliminación dos impostos que castigan a xestión de Sogama, a entidade pública que xestiona os residuos do 94% dos concellos galegos.

Os populares explican que, a raíz da aplicación de varios impostos estatais e outras decisións lesivas do Executivo de Sánchez, “Sogama se ve obrigada a actualizar o seu canon”, xa que os sobrecustos que xeran “fan inviable mantelo como ata o de agora”. De aí que soliciten ao Goberno central a súa retirada “para que Sogama non teña que repercutilos nos concellos e estes á súa vez na cidadanía”.

“Non entendemos como España é un dos poucos países, por non dicir o único da Unión Europea, que decide gravar con impostos algo que se está facendo ben como é a valorización dos nosos residuos”, apuntou ao respecto a responsable de Medio Ambiente e Cambio Climático do Goberno galego, Ánxeles Vázquez, nunha reunión que mantivo esta semana cos deputados e senadores do PPdeG.

Referiuse así aos tributos que se introduciron coa Lei 7/2022, de 8 de abril, de residuos e solos contaminados para unha economía circular. Unha lei á que o Goberno galego se opuxo durante o período de alegacións e á que o Partido Popular votou en contra, pero que foi aprobada “coa complicidade dun BNG sempre manso en Madrid e dun PSOE galego cuxa única lealdade é a Pedro Sánchez en detrimento dos intereses de Galicia”.

MOCIÓN NOS CONCELLOS

Tal e como argumentan os populares galegos na iniciativa que levarán ás Cortes Xerais e tamén aos plenos municipais, entre as medidas aplicadas polo Estado no marco da referida lei están, por exemplo, os impostos ao vertido e á incineración que “representaron o pasado ano unha contía de 9,1 millóns de euros que Sogama soportou cos seus propios recursos, apoiando aos concellos para non gravar as arcas municipais”.

A isto habería que sumar a supresión da retribución ao investimento da planta termoeléctrica de Sogama –comprometida ata o momento no que finalizaría a súa vida útil (2026)–, a diminución da retribución á explotación da planta e coxeración e a recuperación do imposto eléctrico do 7%.

“Se ben o Estado e o propio PSOE escúdanse no argumento de que a aplicación dos novos impostos obedece á transposición dunha Directiva europea, o certo é que, na actualidade, a práctica totalidade dos países europeos non instauraron estes tributos”, subliñan desde o PPdeG ao tempo que lamentan que os socialistas de Galicia fixeran “oídos xordos” cando o Goberno galego presentou alegacións á implantación dos novos tributos durante o período de exposición da lei estatal de residuos en 2022.

Alfonso Rueda: “Galicia defenderá con uñas y dientes la igualdad entre todos los españoles”

El presidente del PPdeG, Alfonso Rueda, asegura que “defenderá con uñas y dientes la igualdad entre todos los españoles” porque “es también la igualdad de todos los gallegos con el resto de nuestros compatriotas” y porque “Galicia no quiere ser más que nadie, pero tampoco admitirá ser menos”.

En una comparecencia ante los medios de comunicación tras participar en la cumbre de presidentes autonómicos organizada por el Partido Popular en Madrid, el líder de los populares gallegos reivindicó la igualdad y la solidaridad entre territorios como “valores fundamentales” de un modelo de financiación que “se rompería si Cataluña saliera de la caja común”.

“Un sistema de financiación autonómica debería ser negociado entre todas las comunidades autónomas y no de forma bilateral”, remarcó acusando a Pedro Sánchez de que “sólo para poder seguir siendo presidente” pretende “crear un modelo de financiación a la medida del independentismo y a costa de dejarnos al resto las sobras”.

En este sentido insistió en que “Galicia no va a tolerar que en ningún caso ese festín que se le quiere dar a los independentistas suponga que el resto tengamos que estar esperando a ver cuáles son las sobras para repartírnoslas”.

Rueda considera que se trata de “una discriminación flagrante que, aparte de ir en contra de la Constitución, supone una falta de respeto ya no a los gobiernos legítimos de las comunidades autónomas, sino una falta de respeto a los ciudadanos de todos y cada uno de nuestros territorios”.

El presidente del PPdeG volvió a urgir además a Pedro Sánchez a convocar la Conferencia de Presidentes “cuanto antes” porque es “su deber” y porque, de no hacerlo, estaría “incumpliendo una obligación establecida en la norma”. Sin embargo, se mostró escéptico ante la posibilidad de que esto suceda debido a que “son muchas las razones por las que a Sánchez no le interesa hacerlo”.

“Convocar esa reunión sería la constatación de que España la formamos todas las comunidades autónomas y de que el futuro de todos lo decidimos entre todos y no sólo con una parte”, explicó añadiendo que la no convocatoria sería la equivalencia a admitir que “hay muchas cosas que Sánchez no es capaz de explicar” y que “tiene la seguridad de que le saldría mal si el resultado es el que estamos viendo”.

Rueda concluyó subrayando que “Galicia no va a consentir esta discriminación flagrante, evidente y peligrosísima para nuestro futuro” y poniendo en valor la “alternativa” que representan los gobiernos del Partido Popular.

“Somos la alternativa de la gestión, de la estabilidad, de la igualdad y del sentidiño porque gestionamos para todos y defendemos un modelo que prefiere derribar muros donde otros los construyen y que prioriza siempre los intereses generales sobre los particulares”, dijo como remate de su intervención.

O PPdeG pregúntase cando vai recibir Pedro Sánchez a Alfonso Rueda e considera que se trata dun “desprezo a todos os galegos e galegas”

No Partido Popular de Galicia pregúntanse cando vai recibir Pedro Sánchez ao presidente Alfonso Rueda logo de que xa pasaran seis meses e medio desde as eleccións autonómicas e que neste tempo só houbese negativas que supoñen “unha falta total e absoluta de respecto institucional” e “un desprezo non só ao presidente autonómico de Galicia, senón a todos os galegos e galegas”.

“Estamos ante a constatación de que, unha vez pasado o 18 de febreiro, a Sánchez deixoulle de interesar Galicia”, afirmou a este respecto a secretaria xeral Paula Prado esta mañá nunha rolda de prensa na que se amosou escéptica ante o feito de que o presidente do Goberno anunciara unha rolda con todos os presidentes autonómicos: “¿Será certo que se celebrará esa xuntanza ou será unha mentira máis do señor Sánchez? No caso de producirse, a reunión co presidente Rueda chegará tarde, mal e arrastro”.

En contraposición a Sánchez e aos seus socios, que “elixen castigar a Galicia”, reivindicou ao Partido Popular como “o partido líder en toda España fronte aqueles que queren acabar co modelo e a igualdade actuais e aqueles que ven normalidade onde a gran maioría vemos feitos insólitos”.

Ironizou así co feito de que o PSOE e o BNG “vexan normal conceder un cuponazo a Cataluña, amnistiar a aqueles que só buscan a independencia e o fin da unidade territorial ou consolidar réximes ditatoriais como o de Venezuela”. Nada disto, remarcou, é normal. Como tampouco o é que “as infraestruturas de Galicia sexan agraviadas só porque aquí goberna o PP”.

A OPORTUNIDADE DE BESTEIRO

Paula Prado afirmou categórica que “o ­cuponazo catalán é unha irresponsabilidade que o Goberno de Sánchez segue xustificando cando non ten xustificación posible” e que “por iso hai cada vez máis líderes socialistas autonómicos que se sublevan e se posicionan en contra do seu líder”.

Uns líderes socialistas entre os que, explicou, non se atopa o galego Xosé Ramón Gómez Besteiro, que “lle debe todo a Sánchez” e ao que aconsella que “empece a pensar máis en Galicia e se poña do lado dos galegos e galegas”.

“O sábado ten unha gran oportunidade de seguir o camiño dos seus compañeiros máis sensatos. Eu propóñolle ao señor Besteiro que diga ‘non’ a máis privilexios para Cataluña e nos dea unha alegría a todos os galegos e galegas”, ironizou facendo referencia ao Congreso Federal do PSdeG que se celebrará nuns días.

O DO PSOE E O BNG NON É NORMAL

En contraste con toda esta situación, a número dous dos populares galegos amosouse orgullosa de que os líderes autonómicos do seu partido – tamén o presidente Alfonso Rueda – se vaian reunir mañá “para falar entre todos todo o relacionado coa financiación autonómica”. Algo que considera exemplificativo da “unidade” do PP “máis alá das particularidades de cada comunidade autónoma”.

“Do mesmo xeito, alégrame que Galicia sexa coherente co que opina a gran maioría dos galegos e galegas e que por iso a Xunta vaia interpoñer un recurso de inconstitucionalidade contra a Lei de amnistía”, dixo antes de concluír que “hai que actuar con toda a contundencia cando existen normas que atentan contra os nosos intereses”.

O Grupo Popular lamenta que a deficiente xestión municipal do Concello de Ourense impida levar adiante proxectos como a construción dun novo centro multiusos

O portavoz de Deportes do Grupo Popular, Pablo Prieto, afirmou hoxe no Parlamento galego que “para que un proxecto de gran envergadura sexa unha realidade, como é a construción dun centro multiusos na cidade de Ourense, ten que facerse coa colaboración de diferentes administracións, unha cuestión imposible de levar adiante nesta cidade porque existen problemas importantes derivados da deficiente xestión municipal, como é a falta de Plan Xeral de Ordenación Municipal ou de orzamentos aprobados”.

No debate celebrado esta mañá sobre a posible construción dun novo polideportivo na cidade de Ourense, Pablo Prieto lembrou que “a Xunta está sempre aberta a estudar a posibilidade de acometer as actuacións que, no ámbito das instalacións e equipamentos deportivos, sexan necesarios e demandados polo tecido deportivo”.

ESFORZO INVERSOR

Neste sentido, lembrou que a Xunta ten realizado “un importante esforzo inversor na cidade e na provincia de Ourense nos últimos anos na dotación de infraestruturas deportivas, como a pista cuberta de atletismo de Expoourense, a reforma integral do pavillón dos Remedios, a remodelación das instalacións e do céspede do Couto ou o complexo deportivo e parque acuático de Monterrei, en Pereito de Aguiar”. En total, lévanse investidos nestas actuacións máis de 17 millóns de euros nos últimos sete anos.

Porén, o portavoz popular lamentou que “a realidade a día de hoxe é que no concello de Ourense existen importantes problemas pola mala xestión municipal para levar adiante o proxecto dun novo multiusos”, dada a ausencia de Plan Xeral de Ordenación Municipal e de orzamentos aprobados.

En concreto, Pablo Prieto lembrou que a remodelación integral do Pavillón dos Remedios, que estaba previsto fora cofinanciada entre a Xunta e o Concello de Ourense, finalmente foi a Administración galega a que tivo que facer fronte á totalidade do proxecto, “dado que o Concello non tiña nin ten orzamentos aprobados e a lei impedía levar adiante o convenio asinado para esta obra”.

Alfonso Rueda reivindica o “estilo Galicia” e rebélase contra o financiamento singular para Cataluña: “Non permitiremos que se beneficie a uns a costa de prexudicar aos demais”

Alfonso Rueda reivindicou hoxe no acto de inicio do curso político o “estilo Galicia” que fai da nosa Comunidade unha terra de traballo, convivencia e respecto tanto polo benestar individual como polo común nuns momentos nos que “hai que defender o que interesa a cada territorio sen prexudicar ao conxunto” e rebelarse contra medidas que “benefician a uns e non aos demais”.

“Os galegos somos pouco de discutir e moito de traballar. Somos pouco de divisións e moito de convivir. Somos moito de saber o que verdadeiramente importa, de pensar no que lle importa a Galicia tendo en conta tamén o que lle importa aos demais”, explicou ao tempo que apostaba pola solidariedade e a igualdade como principios dun sistema autonómico que “é un tesouro a conservar entre todos”.

O líder dos populares galegos subliñou que “Galicia non vai renunciar a nada do que lle corresponde nin admitirá ningún tipo de discriminación” e que, de feito, a nosa Comunidade será “a primeira” en dar a batalla para “garantir que non se tome ningunha decisión que prexudique ao conxunto”.

“Non van conseguir que nos pelexemos polos restos do banquete que se quere dar o independentismo porque, en todo o que dependa de nós, non haberá banquete. Non haberá outra cousa que xustiza e solidariedade. Porque se nos sentamos entre todos, ninguén ten que perder e todos podemos gañar”, concluíu rebelándose contra a proposta de financiamento singular do Goberno central a Cataluña.

A GALICIA QUE CUMPRE COA PALABRA DADA

Rueda asegurou que aqueles que “menten por sistema, cren que todo é cháchara política e formulan enfrontamentos onde debería haber cooperación” non contarán nunca co apoio do Goberno “responsable, con sentidiño e de palabra” que el preside e que os galegos apoiaron maioritariamente nas urnas o pasado 18 de febreiro.

“Non queremos outra cousa que seguir gobernando sen perder o tempo nin distraernos, seguir traballando para dar a Galicia o nivel de servizos que se merece, seguir defendendo á nosa xente e seguir apostando pola estabilidade”, sinalou amosando o seu orgullo de que, entre outras cousas, Galicia sexa “a comunidade que máis apoia ás familias” e tamén “a primeira onde a que os que se esforzan poden estudar gratis desde o principio ata o final do ciclo educativo”.

Avogou así mesmo por “seguir apostando por unha sanidade de primeira”, facendo fincapé en que a sanidade pública galega “estivo á altura” nun verán como este, que se presentaba complicado “pola falta de toma decisións do Goberno central” e no que os nosos sanitarios “coidáronnos especialmente ben a nós e a todos os que viñeron a visitarnos”.

“Seguiremos sendo un Goberno que planifica desde a responsabilidade, que ten claro o que quere facer e como conseguilo e que seguirá cumprindo os seus compromisos como fixo nestes primeiros 100 días executando vivenda pública, implantando a matrícula universitaria gratuíta e reforzando a sanidade e a educación”, sintetizou antes de lamentar a ausencia dunha oposición “forte e responsable” en Galicia.

Afeou deste xeito ao BNG que “se deixe tomar o pelo por sistema ante as incontables promesas incumpridas de Pedro Sánchez” e que “prefira quedar ben cos seus socios independentistas antes que con Galicia”. Amosándose especialmente belixerante ante o feito de que aos nacionalistas galegos lles “parezan mellor que Galicia eses réximes ditatoriais que apoian sen importarlle o sufrimento dun pobo venezolano que, ao final, conseguirá facer triunfar a democracia”.

Do mesmo xeito que amosaba a súa alegría porque o PPdeG non sexa como o BNG, Rueda afirmou alegrarse de non ser tampouco como un PSdeG “irrecoñecible, esvaecido, capaz de facer unha cousa e a súa contraria e que se limita a obedecer ao seu amo no que faga falta e cando faga falta”.

“PARA O GOBERNO CENTRAL GALICIA É O ÚLTIMO”

O líder dos populares galegos lamentou que aínda non fose recibido na Moncloa polo presidente do Goberno de España cando este si recibiu xa ao presidente do País Vasco e aos dous últimos presidentes de Cataluña. Algo que Rueda considera demostrativo de que “para o Goberno central o primeiro é Sánchez, o segundo é Sánchez, o terceiro é Sánchez e o último é Galicia”.

“Esperar a ser recibido sería o de menos se polo menos o Goberno central funcionara con Galicia. Pero non o fai: nin hai iniciativas, nin investimentos, nin posturas responsables coas nosas demandas”, afirmou apostando porque “canto antes” Alberto Núñez Feijóo poida ser “o presidente que España merece e Galicia necesita para reverter esta situación”.

Facendo un relato das probas do desleixo do Executivo estatal coa nosa Comunidade, o presidente puxo como exemplo a situación duns servizos ferroviarios que “funcionan peor que nunca en Galicia” ante a “chulería dun ministro de Transportes tuitero que non se dá conta da paciencia e comprensión que demostramos día a día logo de anos esperando polos trens de Alta Velocidade e por unhas infraestruturas que merecemos como os que máis”.

Tamén se referiu á “supostamente galega” ministra de Traballo e á súa oposición a investimentos que precisamente crean postos de traballo e ademais contribúen a xerar riqueza para Galicia e que a xente poida vivir na nosa Comunidade. Unha postura que, tal e como defendeu o líder dos populares galegos, “non vai de empresas concretas, senón de actitudes e de crear riqueza ou impoñer a ideoloxía”.

“Entre ideoloxía e traballo, en Galicia imos escoller sempre o traballo. Entre dogmas ou crecemento económico, nós imos escoller crecemento económico. E entre desenvolvemento industrial ou protección medioambiental, non temos que escoller porque ambas son compatibles”, explicou para concluír que o PPdeG “garantirá todo iso sen ter que elixir”.

UNHA TERRA ABERTA E ACOLLEDORA

Alfonso Rueda tamén dedicou unha parte importante da súa intervención a defender a todas as persoas que ao longo deste verán visitaron Galicia “con sentidiño” e descubriron unha terra na que “todo o mundo é benvido”.

“Estamos orgullosos da xente que nos admira, que nos respecta e que se marabilla cando vén a Galicia e descobre o que temos aquí. Somos xente de brazos abertos que agradecemos que se nos valore e se nos axude a medrar grazas ao turismo”, subliñou contrapoñendo esta actitude con aqueles que “só se representan a si mesmos ao crer que o que nos debería facer orgullosos e que é de todos é só seu”.

A toda esa Galicia “minoritaria, enfurruñada e á que lle molesta todo ao que os demais nos alegra”, o presidente dirixiuse asegurando que “Galicia seguirá traballando como un pobo aberto e encantado de que cada vez sexan máis as persoas que queren visitarnos, descubrirnos e coñecernos”.

O PPdeG celebra mañá un acto de inicio do curso político “ilusionante” no que trasladará as “reivindicacións” do futuro de Galicia e de toda España

O PPdeG celebrará mañá en Cerdedo-Cotobade o inicio do curso nun acto “ilusionante” no que trasladará as “reivindicacións políticas” para o futuro de Galicia e de toda España, coa presenza do presidente nacional, Alberto Núñez Feijóo, e do presidente autonómico, Alfonso Rueda.

“Temos por diante un curso importante no ámbito da igualdade de todos os españois. Galicia non quere ser máis que ninguén, pero tampouco quere ser menos que outros territorios que están constantemente chantaxeando ao Goberno central. Sánchez está cedendo a esas chantaxes, e iso está prexudicando enormemente a comunidades como a nosa”, sinalou a secretaria xeral do PPdeG, Paula Prado, que visitou esta mañá os traballos de montaxe.

O acto terá lugar na carballeira de San Xusto, en Cerdedo-Cotobade, a partir das 12 do mediodía, e tal e como anunciou Prado, estarán presentes os líderes autonómicos de Castela e León e da Comunidade Valenciana, Alfonso Fernández Mañueco e Carlos Mazón, así como o presidente de honra do PPdeG Mariano Rajoy e unha parte moi importante do equipo de dirección do PP nacional, entre outros.

A número dous dos populares galegos agradeceu que Alberto Núñez Feijoo elixira unha vez máis Galicia para iniciar o curso político: “Desde aquí seguirémoslle dando todo o noso apoio a el e ás súas políticas, porque estamos seguros de que moi pronto será o presidente de España”.

Así mesmo, Paula Prado subliñou que a formación afronta o acto “con especial ilusión”, tendo en conta que se celebra no ano no que tivo a lugar a primeira maioría absoluta de Alfonso Rueda. “Foi un dos obxectivos que nos puxemos hai xusto un ano, en Soutomaior, e agora celebramos que o cumprimos, non só co triunfo electoral, senón cun Goberno da Xunta de Galicia que xa puxo en marcha moitas das medidas comprometidas durante a campaña”, salientou.

Outra das metas do pasado curso, lembrou, eran as eleccións europeas, e o PPdeG obtivo dous “magníficos” eurodeputados que defenderán os intereses de Galicia en Bruxelas, “onde se deciden cuestións moi relevantes”, e que ademais “estarán traballando a tempo completo, a diferenza doutros que parece que van a estar a tempo parcial, como a representante do BNG”.

Precisamente, os populares reivindicarán en Cerdedo-Cotobade “a política de sentidiño e estabilidade, afastada dos radicalismos que marcarán o inicio do curso político do BNG con exemplos como o apoio á ditadura de Maduro”.

“Galicia non quere esa forma de facer política e nós seguiremos apoiando a liberdade e a democracia que busca o pobo venezolano, moitos deles veciños e veciños da nosa terra que están moi preocupados polas súas familias e amigos que residen en Venezuela baixo unha ditadura e un réxime autoritario”, rematou Prado.

LUIS LÓPEZ: “A PROVINCIA, CENTRO DAS MIRADAS DE ESPAÑA”

Pola súa banda, o presidente provincial do PP de Pontevedra, Luis López, asegurou que Pontevedra “está lista para ser mañá o centro das miradas de toda España e tamén para que soe con moita forza a voz que di que somos o partido da unidade, da moderación e da defensa da igualdade dos españois”.

En clave provincial, López, sinalou o ciclo electoral “sobresaínte”, que deu inicio co “éxito colectivo” das 61 agrupacións locais e a recuperación da Deputación de Pontevedra, e que continuou coa importante contribución ás vitorias nas eleccións xerais, nas autonómicas e nas europeas.

Un “sobresaínte electoral” que contrasta, dixo, “co suspenso claro que teñen nacionalistas e socialistas: un cero en canto a defensa dos intereses da provincia”. “Refírome a temas de financiamento ou infraestruturas, á rede ferroviaria, a todos os atrasos que hai nos trens día tras día, á xestión da  AP-9 ou ao estado das estradas nacionais”, abundou.

“Mañá certificarase aquí que estamos preparados para proporcionar solucións aos grandes problemas que ten a cidadanía a día de hoxe en toda España”, finalizou o presidente provincial.

“IMPACTO E TRANSCENDENCIA” PARA CERDEDO-COTOBADE

Por último, o alcalde anfitrión, Jorge Cubela, mostrouse “moi orgulloso” de volver acoller o acto: “Na agrupación local estamos moi contentos de que se volva celebrar no noso concello, nesta magnífica carballeira que tanto simboliza para o PP despois dun exercicio onde acadamos a maioría absoluta no Parlamento de Galicia”.

Cubela fixo ademais fincapé na “unidade” do Partido Popular e en que os concellos do rural, como Cerdedo-Cotobade, acollan este tipo de actos. “Estamos moi satisfeitos do impacto e da transcendencia a nivel nacional que ten o noso pobo no inicio do curso político”, valorou.

Paula Prado: “Se o Goberno central consegue aprobar os Presupostos Xerais, nacerían mortos”

“Por unha banda, porque estarían sustentados polo independentismo catalán e vasco, e por outra, porque contarían co cheque en branco do BNG, que unha vez máis sería enganado con papel mollado”, sinala

Lembra que entre 2018 e 2023, o incremento medio de investimento territorial foi en Galicia a metade que en España, e en 2023, as empresas públicas deixaron de executar aquí 4,2 de cada 10 euros

O PPdeG celebra este sábado en Cerdedo-Cotobade o inicio do curso político, onde intervirán os presidentes Rueda e Núñez Feijóo

 

A secretaria xeral do PPdeG, Paula Prado, adiantou hoxe que se o Goberno central consegue aprobar os Presupostos Xerais do Estado de 2025, tal e como anunciou esta semana, estes “nacerían mortos”.

“Por unha banda, estarían sustentados polo independentismo catalán e vasco, sen concesións ao resto de comunidades autónomas, e por outro lado, no caso de Galicia, nacerían mortos porque contarían co cheque en branco do BNG, que unha vez máis sería enganado con papel mollado”, sinalou Prado.

A isto sumaríaselle, ademais, a escasa execución orzamentaria “ano tras ano” desde que Sánchez é presidente, tal e como demostrou con datos a número dous dos populares galegos: entre 2018 e 2023, o incremento medio de investimento territorial en España foi do 31%, mentres o de Galicia foi a metade: o 15%; e en 2023, as empresas públicas, que son o auténtico brazo inversor do Estado nos territorios, deixaron de executar 4,2 de cada 10 euros do orzado en Galicia.

“Desde 2018, Sánchez sempre penalizou o investimento territorial en Galicia. É a constatación de que non lles perdoa aos galegos que cada vez que hai eleccións leven os resultados do PSOE a ser os peores da súa historia, mentres lle outorgan unha maioría absoluta tras outra ao Partido Popular”, lamentou.

Paula Prado sinalou que “non se sabe ata onde están dispostos a chegar”, pero o Partido Popular de Galicia seguirá “vixiante”. “Está claro que máis Sánchez significa menos Galicia”, concluíu.

Por todo isto, a secretaria xeral recomendoulle ao Goberno de Sánchez que “deberían facer unha cousa: aprender de Galicia”, subliñando que o Executivo galego xa aprobou o teito de gasto máis alto da súa historia e que vai camiño de aprobar en tempo e forma os seus décimo sextos Orzamentos consecutivos.

 

INICIO DO CURSO POLÍTICO EN CERDEDO-COTOBADE

Precisamente, que Galicia non quere máis que ningunha outra comunidade, pero tampouco merece ser menos, será un dos temas centrais do inicio do curso político do PPdeG que terá lugar no mediodía deste sábado na Carballeira de San Xusto de Cerdedo-Cotobade. “Este verán, o Goberno central volveu demostrar que só ten ollos para aquelas comunidades e aqueles partidos que cumpren coas súas chantaxes. E a partir de aí, a desigualdade é absoluta, rompendo con esa cohesión que fai forte ao noso Estado”, engadiu Paula Prado.

En Cerdedo-Cotobade estarán os presidentes do PPdeG, Alfonso Rueda, e do PP, Alberto Núñez Feijóo, ademais de membros do Comité de Dirección do PP nacional, o presidente de honra Mariano Rajoy e líderes autonómicos.

O PPdeG afronta o novo ano político “con ilusión e, sobre todo, coa seguridade de que é a única opción que asegura a estabilidade e a prosperidade da Comunidade”.

De feito, inicia o curso como o partido galego maioritario no Parlamento de Galicia, con 40 deputados e deputadas; no Congreso, con 13 deputados; no Senado, con 14 senadores; e no Parlamento Europeo, con 2 eurodeputados. Ademais, é a formación con máis alcaldes, un total de 151, e máis concelleiros, 1.775 —tamén é o partido líder en mulleres alcaldesas e concelleiras—. “Contamos con todos eles para que os galegos e as galegas sigan tendo o máximo benestar e o mellor futuro”, dixo Prado.

“Celebramos que o presidente Feijóo volva elixir Galicia para iniciar o curso por terceiro ano consecutivo. O encontro servirá de impulso para os próximos meses da Galicia que funciona liderada por Alfonso Rueda e da España que funciona liderada por Núñez Feijóo”, salientou a secretaria xeral.

Por último, desexou sorte aos 14 deportistas galegos que participan desde hoxe nos Xogos Paralímpicos e trasladou o seu pésame polo falecemento do presidente e editor de La Voz de Galicia, Santiago Rey Fernández-Latorre.

O PPdeG esixe ao Goberno central que tome medidas para garantir un correcto etiquetado dos produtos pesqueiros

Os populares argumentan que nos últimos anos se están dando exemplos de produtos que son comercializados coa etiqueta de ‘pescado’ cando en realidade teñen unha composición puramente vexetal

Manuel Ruiz: “Esta práctica induce a error sobre a verdadeira natureza do produto, xera confusión entre os consumidores e provoca a preocupación do sector pesqueiro polos prexuízos para os seus intereses comerciais e socioeconómicos”

 

O Partido Popular de Galicia levará ao Senado unha moción para esixir ao Goberno que tome medidas ante a problemática que se está dando co etiquetado como ‘pescado’ dalgúns produtos veganos e evitar así a confusión entre os consumidores e o prexuízo do sector pesqueiro.

Tal e como explica o portavoz de Pesca do Grupo Popular no Senado, Manuel Ruiz, nos últimos anos estanse dando numerosos exemplos de comercialización de produtos –como o denominado “atún vegano” ou outros alimentos comercializados como “pescado 100% vexetariano”– que, a pesar de levar a etiqueta de ‘pescado’, teñen unha composición puramente vexetal.

“Este etiquetado inadecuado das conservas de orixe vexetal induce a error sobre a verdadeira natureza e composición do produto e, como consecuencia, acaba xerando confusión e descoñecemento entre os consumidores e tamén preocupación no sector pesqueiro polos prexuízos para os seus intereses comerciais e socioeconómicos”, sostén.

De aí que na súa moción os populares insten ao Goberno de España a tomar as medidas necesarias para evitar a información confusa no etiquetado de produtos de orixe vexetal baixo a denominación de ‘pescado’, así como a promover unha modificación lexislativa a nivel europeo para reservar esta descrición de venda aos produtos pesqueiros.

O PPdeG amosa o seu rexeitamento ao plan do Goberno central para limitar o consumo de pescado nos centros educativos

Faise eco do malestar do sector pesqueiro ante a norma na que traballa o Ministerio de Consumo e que establecería unha pauta de unha a tres racións por semana e só unha ao mes de rebozado

“Non logramos entender por que o Goberno de Sánchez se empecina en non buscar solucións ao descenso do consumo de pescado e en tomar o camiño erróneo”, sosteñen os populares

 

O Partido Popular de Galicia amosa o seu rexeitamento á proposta do Ministerio de Consumo de limitar a presenza de pescado nos menús escolares e insta ao Goberno central a tomar medidas para incentivar o consumo de produtos do mar en xeral e entre a poboación infantil e xuvenil en particular.

A través dos seus senadores na Cámara Alta, que prometen “dar a batalla” contra este plan, os populares galegos fanse eco do malestar do sector pesqueiro ante a noticia de que o Executivo está traballando nunha norma que aconsella aos centros educativos establecer unha pauta de alimentación de unha a tres racións de pescado por semana e só unha ao mes de rebozado.

Unha proposta que, tal e como sosteñen os populares, choca cos estándares establecidos pola OMS e vai no sentido “completamente oposto” aos informes emitidos polo do Comité Científico da Axencia Española Alimentaria e Nutrición, que recomendan o consumo de tres ou máis racións semanais.

“Non logramos entender por que o Goberno de Sánchez se empecina en non buscar solucións ao descenso do consumo de pescado e en tomar o camiño erróneo, en contra de calquera razón e do beneficio que para a poboación significaría aumentar a inxestión destes produtos”, sosteñen desde o PPdeG.

Lamentan que o Executivo “non se tome en serio” esta problemática e “as súas consecuencias no presente e no futuro do sector pesqueiro e da nosa economía”, polo que lle demandan que “cambie de rumbo” e comece por cumprir o mandato do Senado reducindo o IVE que se aplica aos produtos do mar.