Categoría: PP de Galicia

O presidente do PPdeG, Alfonso Rueda, pide o voto nestas eleccións europeas apelando a unha Europa que se pareza máis ao xeito de funcionar que ten Galicia e non ao desleixo que demostra o Goberno central cara a nosa Comunidade, polo que chama aos galegos a facerse oír en Europa e a facerse respectar en España a través do seu voto.

Na súa intervención no mitin celebrado esta tarde no Pereiro de Aguiar, o líder dos populares galegos reivindicou Galicia como o exemplo a seguir a nivel europeo no que se refire a atención ás familias, ao mar e aos proxectos que crean emprego e xeran riqueza.

Insistiu en que estas eleccións son a ocasión para dicir en toda España o que os galegos pensan da situación política actual, para que a nosa Comunidade recupere a atención que merece e para que os problemas da cidadanía volvan poñerse enriba da mesa. Pero, sobre todo, a mellor oportunidade para que Europa bote a Galicia a man que non lle bota o Goberno central.

Apelando á maioría acadada nas autonómicas, Rueda recordou que os galegos xa deixaron claro que non queren división, nin extremismos, nin egocentrismos; senón que apostan pola responsabilidade, o sentidiño e o cumprimento da palabra dada. De aí o seu chamamento a volver trasladar esta mensaxe o 9 de xuño coa mesma forza que o 18 de febreiro para que chegue ata o último recuncho.

O presidente asegurou que calquera voto que non vaia para o Partido Popular beneficia a Pedro Sánchez e só servirá para afondar nos incumprimentos do Goberno central con Galicia. De forma análoga, explicou que calquera voto que vaia ao BNG vai directamente a Bildu e a Esquerra, cos que os independentistas galegos comparten candidatura por moito que traten de escondelo.

RUEDA ACUDIRÁ Á CONCENTRACIÓN DESTE DOMINGO EN MADRID

Alfonso Rueda, que este domingo participará na concentración organizada polo Partido Popular en Madrid, invitou aos asistentes ao mitin a facer unha comparación entre o que ocorre en Galicia e o que ocorre en España e votar en consecuencia.

Contrapuxo así a quen busca o entendemento con quen só pretende sobrevivir a base de dividir, a quen cumpre a palabra dada con quen xa non sabe que inventar para escusarse e a quen dá a cara por Galicia con quen se esconde para non dar explicacións.

O voto o próximo 9 de xuño ten que ser, en consecuencia, a resposta por unha Galicia que se reafirme con forza no seu estilo, por unha España que se pareza máis a Galicia e por unha Europa na que os galegos teñamos o protagonismo que nos corresponde.

De aí que o líder dos populares galegos concluíuse a súa intervención pedindo aos galegos que, a través dun voto masivo e unitario ao Partido Popular, respondan para que o fondos europeos saian dos caixóns dos ministerios, para que se atenda á nosa pesca e o noso rural, para que as familias poidan chegar a fin de mes e para que se invista nunha mocidade que quere unha vivenda, estudar, traballar poder formar unha familia no futuro.

MILLÁN MON: “OURENSE SEGUIRÁ TENDO EN MIN UN FIRME DEFENSOR DOS SEUS INTERESES EN BRUXELAS”

Pola súa banda, o candidato Francisco Millán Mon quixo agradecer ao Partido Popular de Ourense a celebración deste primeiro mitin de campaña e sinalou que a provincia pode estar tranquila, xa que seguirá tendo nel un firme defensor dos seus intereses en Bruxelas o próximos cinco anos.

Reiterou que estas eleccións son moi importantes para a Unión Europea, pero tamén para Galicia e para España subliñando aspectos cruciais para o seu benestar como  a agricultura e gandería, industria, infraestruturas, transporte, enerxía, pesca, financiamento ou comercio exterior.

Por último, Millán Mon pediu unha alta participación e trasladou a súa esperanza de que o Partido Popular volva ser a opción preferida polos galegos nas urnas como nas autonómicas deste ano e as xerais de xullo do ano pasado.

“É unha oportunidade para todos os galegos -e tamén para todos os españois- de responder as políticas populistas e profundamente prexudiciais de Sánchez, así como de facer oír as súas voces en Europa. Pido o voto para que haxa unha repartición xusta dos fondos europeos entre as comunidades autónomas e pido o voto tamén para poder seguir loitando por unhas políticas xustas para o noso rural”, concluíu o político pontevedrés.

LUIS MENOR: “DEMOSTREMOS QUE SABEMOS GOBERNAR E FUNCIONAR”

O líder provincial do PP de Ourense, Luis Menor, apelou ao “voto da estabilidade e da certeza que en febreiro nos deu un goberno sólido, forte e de maioría en Galicia”, pedindo de novo aquel apoio como “a resposta que necesita España para enviar unha mensaxe de confianza a Europa”.

Incidindo na loita polo benestar colectivo dentro de Europa, apelou á necesidade dun Partido Popular forte na Eurocámara para “demostrar, como tamén facemos en concellos, deputacións e comunidades autónomas, que sabemos gobernar y funcionar e aí está o exemplo da Galicia que funciona de Alfonso Rueda”.

Hai catro meses, dixo, “demostramos que nesta provincia hai un partido con fame de triunfos” e por iso pediu aos seus que “agora demostremos que aquela marea de confianza non foi casualidade senón froito do traballo e da implicación das mulleres e homes do Partido Popular”.

O Partido Popular de Galicia dá inicio á campaña das eleccións ao Parlamento Europeo erixíndose como “a mellor resposta a todo o que afecta a Galicia en Europa” a apelando ao moito que a Comunidade se xoga nestes comicios.

Na tradicional pegada de carteis celebrada esta noite en Pontevedra, a secretaria xeral do partido, Paula Prado, fixo un chamamento a acudir “masivamente” ás urnas o próximo 9 de xuño e pediu o voto para “impulsar un reparto xusto dos fondos europeos, defender a plenitude do Estado de Dereito fronte aqueles que queren corrompelo, loitar por unhas políticas xustas para o rural e dar voz á nosa pesca e á nosa agricultura facendo fronte ao ecoloxismo de pancarta”.

“Nestas dúas semanas estaremos preto da xente, na rúa, respondendo ás dúbidas dos galegos e galegas, aos seus problemas e aos seus retos de futuro”, explicou facendo unha contraposición entre o proxecto dos populares e un BNG que “elixiu compartir lista co independentismo” e un PSOE que “segue recollendo derrotas no Congreso froito das súas nefastas amizades”.

Acompañada polo presidente provincial do PP de Pontevedra, Luis López, e o líder local do partido, Rafa Domínguez, a número dous dos populares galegos augurou un gran resultado: “Gañamos as municipais, gañamos as xerais, gañamos as autonómicas e imos gañar as europeas”.

O PP VOLVERÁ SER A OPCIÓN PREFERIDA POLOS GALEGOS

Na pegada de carteis tamén participaron os candidatos Francisco Millán Mon e Adrián Vázquez. O primeiro deles, natural de Pontevedra, subliñou que Galicia xógase en Bruxelas aspectos cruciais para o seu benestar como garantir un futuro próspero para a cadea mar-industria, seguir apostando polo seu sector primario e axustar a PAC ás necesidades da agricultura e a gandería, atraer investimentos para sectores como o das comunicacións e a mobilidade ou a mellora das infraestruturas.

O político pontevedrés pediu unha alta participación o próximo 9 de xuño e espera que o Partido Popular volva ser a opción preferida polos galegos e españois nas urnas, como foi nas autonómicas deste ano e as xerais de xullo do ano pasado.

 “É unha oportunidade para todos os galegos e todos os españois de responder ás políticas populistas e profundamente prexudiciais de Sánchez, así como de facer oír as súas voces en Europa”, concluíu Millán Mon.

UNHA OPORTUNIDADE PARA DEFINIR O FUTURO DE EUROPA E GALICIA

Pola súa banda, Adrián Vázquez manifestou o seu entusiasmo e o seu firme compromiso co proxecto europeo, resaltando a oportunidade que representa esta campaña para o futuro tanto de Galicia como de Europa.

“É un privilexio sumarme a esta contenda electoral, que vexo como decisiva para asegurar o benestar e desenvolvemento da nosa rexión e do continente”, declarou con convicción e subliñando a necesidade de contar cunha representación sólida do Partido Popular no Parlamento Europeo para defender de maneira efectiva os intereses dos galegos e galegas.

Vázquez concluíu o seu discurso expresando a súa gratitude ao PPdeG polo seu apoio nesta campaña electoral e reafirmando as súas ganas de percorrer e reconectar cos cidadáns nas distintas localidades das catro provincias galegas nas próximas semanas.

LUIS LÓPEZ: “O PROGRESO DA NOSA PROVINCIA PASA POR EUROPA”

O presidente provincial do PP de Pontevedra Pontevedra, Luis López, deu comezo a súa intervención agradecendo ao PPdeG por elixir Pontevedra para comezar unha nova e tamén importante campaña electoral: “O progreso da nosa provincia e de toda Galicia pasa, si ou si, polo que se decide en Europa e iso é o que está en xogo o vindeiro 9 de xuño”.

Destacou a importancia da representación do Partido Popular en Europa, porque alí se deciden desde as axudas da PAC ata as novas liñas ferroviarias que unen Galicia con Portugal e coa Cornixa Atlántica, pasando tamén polos apoios que se xestionan para os concellos.

“Para axudar a seguir polo bo camiño no que vai a provincia contamos con dous grandes guías, os dous pontevedreses, que son os nosos candidatos. Contamos con Paco Millán, que ten a experiencia imprescindible para defender os nosos intereses en Bruxelas e con Adrián Vázquez, outro baluarte da política con maiúsculas que, con raíces no Deza, sabe ben o que precisa esta provincia”, rematou López.

“OS GALEGOS APOSTAMOS POLA SENDA DA RESPONSABILIDADE”

Rafa Domínguez reivindicou a importancia dos comicios electorais do 9 de xuño para “trasladar a Europa unha mensaxe clara de que os galegos e o resto de españois queremos camiñar pola senda da responsabilidade, fuxindo da bronca e a confrontación do Goberno central”.

Recordando a vitoria nas eleccións municipais e a contribución do partido local á primeira maioría absoluta do presidente Alfonso Rueda desde a súa cidade, asegurou que vencer nas europeas “coa mesma solvencia” sería “o broche de ouro perfecto a un ano político fantástico para a familia popular”.

O Partido Popular de Galicia eríxese como defensor do rural galego e como “o único partido cos pés no territorio” de cara ás eleccións europeas, nas que propoñen para o sector agrogandeiro “máis axudas, menos burocracia e menos sectarismo ecolóxico”.

O candidato Adrián Vázquez asegurou hoxe que “só cunha delegación forte do Partido Popular en Europa será posible negociar máis fondos para a PAC, eliminar cargas burocráticas e impoñer cláusulas de reciprocidade que sitúen aos nosos agricultores e gandeiros en igualdade de condiciones cos seus competidores”.

Pola contra, lamentou que a esquerda estea impulsando na Eurocámara políticas que van en contra do sector primario galego. E máis concretamente referiuse á candidata socialista, definíndoa como “ministra de intransixencia ecolóxica” e alertando de que “deixar nas súas mans a defensa do rural galego sería como poñer ao lobo ao coidado das ovellas”.

PAULA PRADO: “O QUE SE DECIDE EN EUROPA REPERCUTE EN GALICIA”

O candidato ás eleccións europeas visitou hoxe a feira tradicional de Curtis acompañado pola secretaria xeral do PPdeG, Paula Prado, e o alcalde Javier Caínzos. Xunto a eles tamén outros rexedores (Aranga, Irixoa, Vilarmaior, Boimorto, Vilasantar, Abegondo, Coirós, Oza-Cesuras, Friol, Outeiro de Rei, Ordes e Frades) e representantes do partido na comarca.

Unha demostración de forza que a número dous dos populares galegos quixo evidenciar para defender que o Partido Popular é o partido máis apegado á xente, aos seus problemas e ás súas necesidades: “Somos a resposta que os galegos merecen para os seus problemas tamén en Europa”.

Explicou así que os populares son os únicos que poden dar resposta no Parlamento Europeo ás políticas de despoboamento ou á negociación dunhas boas condicións para a PAC. Tamén, e de xeito especial, á defensa do equilibrio entre a actividade agrogandeira e a protección do lobo “fronte ao ecoloxismo dun BNG que prima a protección da especie a costa de danar o noso agro”.

Por todo isto, pediu aos galegos que sexan conscientes de que “as políticas que se deciden en Europa repercutan en Galicia” e volvan confiar no Partido Popular nunha campaña que esta medianoite os populares galegos iniciarán en Pontevedra.

O Partido Popular de Galicia presentou hoxe as liñas mestras da súa campaña para as eleccións europeas e fíxoo poñendo o foco na importancia das decisións que se toman no Parlamento Europeo para o dia a día dos galegos, a quen se dirixe directamente o seu lema: “Somos a túa resposta”.

“O noso obxectivo é responder ás dúbidas dos galegos e galegas, responder aos seus problemas e responder aos seus retos de futuro. Tamén responderemos a aqueles partidos, como o BNG, que elixiron compartir lista co independentismo e cos herdeiros de ETA; ou como o PSOE, cuxa prioridade é seguir socavando os principios básicos do Estado de Dereito”, explicou a secretaria xeral Paula Prado antes de reunirse co Comité de Campaña do partido.

Anunciou que o PPdeG dará inicio á súa campaña na noite de mañá coa tradicional pegada de carteis en Pontevedra e que, a partir de aí, tratará de estar “en cada recuncho” tanto con actos sectoriais como con mitins. Unha axenda na que o presidente Alfonso Rueda volverá estar presente nas catro provincias e nas sete cidades e na que os candidatos Francisco Millán Mon, Adrián Vázquez e Pablo Gómez Cedrón “terán cada un o seu propio percorrido polo territorio”.

A número dous dos populares galegos adiantou así mesmo a presenza na tradicional Romaría do Pino –que se celebrará o sábado 1 de xuño– do presidente nacional do Partido Popular, Alberto Núñez Feijóo; ao que agradeceu por adiantado a súa visita “fronte a outros presidentes que parece que non pisarán Galicia durante a campaña”.

DOUS ANOS DE ÉXITOS CON ALFONSO RUEDA Á FRONTE DO PARTIDO

Os temas que segundo os populares “ocupan e preocupan” aos galegos –como a economía, o rural, a pesca, a seguridade e o Estado de Dereito– serán o que tratarán de abordar ao longo dos próximos quince días nos que o seu principal obxectivo será “poñer o colofón a un ciclo electoral de éxitos cun novo triunfo”.

Así se refería Paula Prado ao feito de que hoxe mesmo cúmprense dous anos desde que Alfonso Rueda asumira o liderado do PPdeG e que, desde entón, o partido obtivo tres grandes éxitos electorais en forma de maiorías nas eleccións municipais, xerais e autonómicas. Un tempo no que “a maquinaria do partido funcionou a pleno rendemento, nos 313 concellos, con ducias de actos dentro e fóra das campañas”.

“Non nos conformamos e queremos máis: o 9 de xuño temos un novo reto, as eleccións europeas, que afrontamos coa mesma ilusión e, sobre todo, coa mesma confianza nos galegos”, concluíu.

UNHAS ELECCIÓNS CLAVE PARA ESPAÑA E PARA GALICIA

Na reunión do Comité de Campaña tamén participaron os tres candidatos galegos Francisco Millán Mon, Adrián Vázquez e Pablo Gómez Cedrón, que incidiron na importancia destes comicios non só para Europa, senón tamén para España e especialmente para Galicia.

“A Galicia que votou masivamente ao PPdeG e de Alfonso Rueda o pasado 18 de febreiro ten que ir votar o próximo 9 de xuño e renovar o seu compromiso co partido que máis se parece a Galicia”, subliñou neste sentido Millán Mon.

Unha mensaxe na que tamén incidiu Adrián Vázquez ao asegurar que “votar pola política centrada, moderada, e responsable que encarna o Partido Popular é a mellor resposta a Pedro Sánchez e aos seus constantes ataques a Galicia”.

O Partido Popular de Galicia márcase como obxectivo de cara ás vindeiras eleccións europeas impulsar a nivel comunitario medidas que afonden en cuestións como a loita contra a violencia de xénero, a redución da fenda salarial entre homes e mulleres ou a erradicación da trata de seres humanos con fins de explotación sexual.

Esta semana reuniuse a Comisión de Igualdade do partido para analizar a situación actual das mulleres en Galicia e avanzar en propostas de futuro coa vista posta nas eleccións europeas do próximo 9 de xuño. Unha xuntanza encabezada pola secretaria xeral do PPdeG e directora de campaña, Paula Prado, na que se puxo o foco na necesidade de adoptar medidas efectivas no que se refire á prevención e eliminación da violencia contra as mulleres, así como a protección ás vítimas.

Poñendo en valor a recente aprobación da Directiva europea sobre a loita contra a violencia contra as mulleres e a violencia doméstica –na que se insta aos países da Unión Europea a adoptar medidas específicas para protexer ás vítimas, apoiar e facilitar o acceso á asistencia xurídica e poñer en marcha liñas telefónicas de axuda e centros de apoio –, desde o PPdeG sitúan a Galicia como referente e pioneira na adopción de medidas neste eido.

Cómpre recordar que Galicia xa ten en marcha moitas das medidas propostas nesta Directiva e, de feito, a nosa Comunidade foi pioneira cunha Lei de Igualdade destinada a blindar os dereitos das mulleres no eido laboral, da ciencia, o deporte ou a cultura. Ademais, a día de hoxe, Galicia é a única Comunidade que ofrece unha axuda mensual ás vítimas de violencia de xénero para impulsar a súa autonomía.

De aí o compromiso do PPdeG por seguir reforzando as axudas e a rede de apoio ás vítimas e avanzar na prevención de posibles novos tipos de agresións ou discriminacións. Un compromiso que se materializa na proposta do presidente Alfonso Rueda de poñer en marcha Centros de Información á Muller (CIM) móbiles para ampliar este servizo ás vítimas de violencia de xénero e achegalo a todos os recunchos de Galicia.

OS INCUMPRIMENTOS DA ESQUERDA COAS MULLERES

Pola contra, as populares lamentan que o suposto feminismo e compromiso coas vítimas de violencia de xénero da esquerda nunca pasan das pancartas á realidade. Poñendo como exemplo disto o incumprimento por parte do Goberno de Pedro Sánchez –co apoio e a complicidade do BNG– do Pacto de Estado contra a violencia de xénero aprobado en 2018 no que se refire á aprobación dunha Lei de Trata a nivel estatal.

Ou tamén o feito de que, mentres os orfos das mulleres vítimas de violencia de xénero son recoñecidos en Galicia como vítimas e beneficiarios de axudas, o Goberno do Estado segue sen recoñecelos como tal e imposibilitándolle, polo tanto, o acceso a apoios económicos.

Pero sen dúbida o maior atentado contra os dereitos das mulleres en España, segundo denuncian desde o PPdeG, foi a Lei do só si é si que aprobou o PSOE co voto a favor do BNG. Unha lei coa que, por primeira vez na historia da lexislación en materia de protección á muller, se lexislou a favor dos agresores e en prexuízo das vítimas e que tivo como consecuencias a rebaixa de penas a máis de 1.200 delincuentes sexuais e a excarceración de máis de 120 agresores antes de tempo.

Desde o PPdeG instan ás mulleres galegas a que non esquezan cuestións como estas e que o próximo 9 de xuño teñan en conta quen lexisla ao seu favor con medidas efectivas e quen se limita a repetir slogans que nunca van máis aló.

O Partido Popular de Galicia reivindicou hoxe nun acto con motivo da conmemoración do Día das Letras Galegas o modelo de “normalidade e convivencia lingüística” da nosa Comunidade, defendendo o “sentidiño, a harmonía e a liberdade” fronte a aqueles que queren “impoñer o sectarismo e a imposición”.

A secretaria xeral do PPdeG, Paula Prado, amosou durante a súa intervención o orgullo de que o galego siga a ser a lingua máis falada en Galicia e subliñou que se trata dunha lingua que forma parte do ADN do seu partido: “O PPdeG construíuse en galego e, tamén en galego, seguirá medrando”.

De feito, asegurou que a política lingüística promovida desde o Goberno galego ao longo destes anos contribuíu a que “se lograse incrementar o número de falantes da nosa lingua e, ao mesmo tempo, converter a nosa terra nun exemplo de convivencia lingüística”.

“En Galicia non hai imposicións e por iso defendemos o galego con sentidiño e afastados do sectarismo: co sentidiño que achega o noso modelo de bilingüismo cordial que queren a maioría dos galegos e afastados do sectarismo e a polarización daqueles que queren converter a nosa lingua nunha arma política”, afirmou.

A número dous dos populares galegos subliñou que os datos avalan que “somos unha Comunidade Autónoma con dúas linguas que os cidadáns coñecen e escollen falar con harmonía e liberdade” e por iso, engadiu, o PPdeG será sempre o único partido que garanta a defenda este “modelo de éxito que forma parte do noso patrimonio cultural e que queremos que siga vixente”.

“A nosa normalidade e convivencia lingüística son tamén un exemplo ante Europa, e estamos seguros de que os galegos o valorarán nas eleccións do 9 de xuño”, apuntou en clave europea.

LÓPEZ CAMPOS: “CONSTRUAMOS UNHA GALICIA ONDE CAIBAMOS TODOS”

Pola súa banda, o responsable de Cultura, Lingua e Mocidade do Goberno galego, José López Campos, quixo destacar na súa intervención que “se o PPdeG é o partido que máis se parece a Galicia é porque falamos o mesmo idioma que os galegos”.

Neste sentido explicou que a clave do éxito desta simbiose radica na “transversalidade” dunha lingua que permite que todas as persoas, con independencia do seu xénero, idade ou procedencia poida entenderse. E este, engadiu, é o camiño que se debe seguir.

“Debemos seguir construíndo unha Galicia onde caibamos todos, sen exclusións, e facelo desde a moderación e o respecto”, subliñou facendo un chamamento a seguir o exemplo de vitalidade e compromiso coa lingua que nos deixou Luísa Villalta.

MÚSICA DE VIOLÍN E POEMAS PARA HOMENAXEAR A LUÍSA VILLALTA

O acto estivo conducido polo coordinador de Cultura do PPdeG, Daniel Chapela, e contou coa participación dunha parella de violinistas encargados de interpretar en directo dúas das pezas favoritas da homenaxeada este ano no Día das Letras Galegas.

Logo da intervención do presidente local do PP da Coruña, Miguel Lorenzo, deuse lectura a catro poemas de Luísa Villalta por parte dos candidatos do PP ás eleccións europeas Francisco Millán Mon e Pablo Gómez Cedrón, e os deputados autonómicos do PPdeG Carmen Pomar e José Luis Ferro.

A xornada concluíu coa entrega dun ramo de flores por parte de Paula Prado e José López Campos á nai, a irmá e o sobriño da homenaxeada, que serviu para poñer o broche ao acto e trasladar o orgullo e o agradecemento do PPdeG pola contribución de Luísa Villalta ao engrandecemento da lingua galega.

A unha semana do inicio da campaña das eleccións europeas, o PPdeG xa ten “a maquinaria perfectamente engraxada” e aos seus equipos preparados para afrontar “con ilusión e confianza” uns comicios nos que agardan unha gran mobilización e un resultado co que “facer oír alta e clara a voz dos galegos en Europa”.

Así o explicou esta mañá a secretaria xeral do PPdeG e directora de campaña, Paula Prado, en declaracións aos medios antes de encabezar a reunión do Comité de Campaña que se celebrou na sede autonómica dos populares. Unha reunión na que se puxo de manifesto que “aínda que a veces parece que o que ocorre en Bruxelas queda lonxe, o certo é que Galicia xógase moito”.

“O Parlamento Europeo é o lugar onde, da man dos candidatos do PPdeG, os galegos podemos loitar por ter máis fondos europeos e mellores infraestruturas, negociar mellores condicións para o rural e garantir un futuro próspero para a nosa pesca”, explicou neste sentido.

Fronte a un proxecto popular que aposta por “máis Galicia en Europa”, a alternativa da esquerda supón, segundo afirmou Paula Prado, “menos Galicia” na medida en que o PSOE “demostrou estes anos atender pouco ou nada os nosos intereses” e o BNG “integrouse novamente con Bildu e ERC nunha lista cun condenado por terrorismo no segundo posto e defende o ecoloxismo máis radical”.

Por todo isto a número dous dos populares galegos apela a “mandar unha mensaxe en Europa na defensa de Galicia, da nosa economía, do noso rural, da nosa seguridade e das nosas institucións” e a demostrar nestas eleccións que “Galicia non quere independentismo nin tampouco escándalos de corrupción cada vez máis graves”.

Parafraseando ao presidente Alberto Núñez Feijóo, concluíu subliñando que “non cabe nin un minuto de descanso neste mes” e que o Partido Popular é “a única opción para defender a igualdade e a prosperidade dos galegos, dos españois e da nosa democracia en Europa”.

O presidente e candidato do PPdeG, Alfonso Rueda, fixo hoxe un chamamento a facer forza desde o partido de cara á próximas eleccións europeas para reclamar os fondos Next Generation e as infraestruturas que Vigo, como primeira cidade de Galicia e motor económico da nosa Comunidade, merece e necesita.

Nun encontro con militantes e simpatizantes celebrado hoxe na cidade olívica e no que estivo acompañado pola secretaria xeral do PPdeG, Paula Prado, o presidente provincial do PP de Pontevedra, Luis López, e a líder local do partido, Ana Ortiz; o líder dos populares galegos incidiu no moito que Vigo se xoga nos comicios do próximo 9 de xuño.

Neste sentido, adiantou que entre as propostas do Partido Popular en clave europea está a de reformar o deseño e a xestión dos fondos Next Generation co fin de eliminar os criterios partidistas na súa adxudicación, acelerar a súa distribución e facilitar o acceso para pemes e autónomos.

A conexión de Galicia co norte de Portugal tamén é unha das prioridades dos populares e por iso se comprometen a seguir reclamando desde o Parlamento Europeo que o Goberno de España impulse canto antes a Saída Sur de Vigo. Unha infraestrutura vital para a cidade e que, a día de hoxe, aínda segue en estudo de alternativas e sen planificación orzamentaria para a súa execución.

O presidente do PPdeG, Alfonso Rueda, amosou hoxe o seu convencemento de que o Partido Popular volverá repetir os seus bos resultados na provincia de Lugo nas próximas eleccións europeas e puxo o foco na importancia de defender o rural e o mar galegos no eido das políticas comunitarias.

Fíxoo na Xunta Directiva Provincial do PP de Lugo celebrada esta tarde e acompañado pola presidenta do partido na provincia, Elena Candia, e a secretaria xeral do PPdeG, Paula Prado. Unha reunión na que tamén interviñeron os novos conselleiros do Goberno galego, María Martínez Allegue, José González, Antonio Gómez Caamaño, José López e María José Gómez, que se deron a coñecer entre o partido provincial e fixeron unha breve presentación das liñas mestras dos seus departamentos.

O líder dos populares galegos incidiu precisamente na importancia de que sectores estratéxicos para a provincia de Lugo como son o agrogandeiro, o forestal e o pesqueiro estean en mans de dous lucenses: Alfonso Villares e María José Gómez. Algo que considera un reflexo do moito que teñen que dicir Galicia e a provincia en Europa á hora de defender os intereses destes sectores.

Tamén quixo dar a benvida e trasladar os seus mellores desexos a Encarna Amigo e a Nicole Grueira, que onte tomaron posesión como novas deputadas do Grupo Popular no Parlamento de Galicia. Dúas novas parlamentarias que se unen ao grupo de 8 deputados que representan a esta provincia no Pazo do Hórreo, ao que lle pediu compromiso e traballo na defensa dos intereses dos lucenses.

O Partido Popular de Galicia reitera o seu compromiso de continuar defendendo que a Unión Europea estableza criterios para consolidar o equilibrio entre a conservación do lobo e a actividade agrogandeira “fronte ao ecoloxismo radical que queren impoñer o PSOE e o BNG”.

Así o manifestou hoxe en declaracións aos medios a secretaria xeral do partido, Paula Prado, durante a súa visita á cuarta edición da Feira en defensa do gandeiro da montaña celebrada en Cervantes. Unha visita na que aproveitou para anunciar algunhas das medidas que impulsará o Partido Popular para o rural galego en Europa.

“Converteremos o despoboamento rural nunha prioridade de ámbito europeo, incorporando beneficios automáticos na concesión de fondos europeos para as rexións despoboadas e aumentaremos o orzamento da PAC, asegurándonos de que inclúe e respecta as particularidades do medio rural galego”, explicou.

Unhas medidas coas que os populares galegos aspiran a facer “máis Galicia en Europa” da man do seu programa electoral de cara ás eleccións europeas e cos seus candidatos Francisco Millán Mon, Adrián Vázquez e Pablo Gómez Cedrón.

“Só coas políticas do PPdeG é posible vivir no rural e do rural”, concluíu Paula Prado ao tempo que insistía no moito que se xoga Galicia nas decisións que se toman desde Bruxelas e en que só da man dos candidatos do PPdeG será posible comezar a construír novas políticas fronte ao despoboamento, negociar as condicións da PAC e defender o equilibrio entre a actividade e a protección do lobo.